Kryetari i Malishevës e kishte njoftuar Gjykatën se do të mungonte për shkak se do të priste një delegacion nga Kroacia. Begaj akuzohet se ka shpërdoruar pozitën zyrtare dhe autorizimet e tij.

Seanca gjyqësore ndaj kryetarit të Malishevës, Ragip Begaj, i akuzuar për vepër penale të shpërdorimit të detyrës zyrtare, është shtyrë për mungesë të tij.

Kryetari i trupit gjykues, Artan Sejrani, kishte pranuar një parashtresë nga Emrush Kastrati, avokati i të pandehurit, për shtyerjen e kësaj seance pasi që Begaj do të priste sot një delegacion nga shteti kroat.

Për këtë Gjykata kishte njoftuar edhe prokurorin special, Haki Gecaj, që të mos paraqitej në gjykimin e sotshëm pasi ai do të shtyhej për mungesë të kushteve për mbajtje të gjykimit.

Sipas aktakuzës së Prokurorisë Speciale të Kosovës i pandehuri Ragip Begaj gjatë muajve qershor-gusht të vitit 2014, në cilësinë e personit zyrtar, ka shpërdoruar pozitën zyrtare dhe autorizimet e tij me qëllim që një të dëmtuari t’i shkaktojë dëm, duke ia shkelur të drejtat nga marrëdhënia e punës.

Prokuroria e Shtetit pretendon se edhe pse i dëmtuari kishte kontratë të lidhur me Drejtorinë e Arsimit deri më 01.10.2015 si drejtor i shkollës fillore të mesme të ulët ‘Ganimete Tërbeshi’ në fshatin Astrazub, i pandehuri me dashje dhe me dijeni ka hapur konkurs pa ia ndërprerë më parë marrëdhënien e punës të njëjtit, duke e lënë pa vend pune dhe të ardhura për jetën.

Rreth këtij rasti gjyqësor KALLXO.com ka raportuar edhe më parë.

Tash e një vit, në fshatin Korishë të Komunës së Prizrenit, shembjet e dheut janë duke rrezikuar qytetarët e këtij fshati. Për këtë çështje, banorët e këtij fshati nuk lanë derë pa trokitur si në institucionet komunale ashtu edhe në ato qendrore, si dhe kanë organizuar peticionin të cilin do ta dorëzojnë në organet kompetente të Komunës së Prizrenit.

Asambleisti i VETËVENDOSJE!-s në Prizren, Arbër Rexhaj, tha se në pjesën e sipërme te fshatit Korishë javëve të fundit dheu ka përbirë disa objekte, ndërsa ka prekur edhe shtëpitë. “Prona dhe sidomos jeta e qytetarëve është në rrezik. Nëse nuk intervenohet brenda një jave, Korisha rrezikon ta pësojë njëjtë si Restelica, madje edhe më keq. Drejtoria e Emergjencës duhet të reagojë menjëherë dukë bërë evakuimin e dy lagjeve të këtij fshati, ashtu që t’i parandalojmë dëmet në njerëz nga një katastrofe të mundshme”, tha ndër të tjera Rexhaj, duke shtuar se Drejtoria e Emergjencave po mundohet me një ekskavator ta sanojë gjendjen, por një gjë e tillë është e pamundur.

Drita Millaku, asambleiste e Lëvizjes në Prizren, i bëri apel Komunës dhe drejtorive përkatëse që të intervenojnë sa më shpejt në këtë fshat. “Shpëtimi i jetës dhe pronës së qytetarëve është obligim për të gjithë ne, prandaj kërkojmë ndihmën e të gjithëve ashtu që të rritet presioni publik ndaj institucioneve gjegjëse. Nëse nuk intervenohet menjëherë, përgjegjëse për gjendjen atje do të jenë institucionet”, theksoi Millaku.

Lëvizja VETËVENDOSJE! kërkon nga Komuna e Prizrenit që urgjentisht t’i qaset këtij problemi me seriozitetin më të madh, sepse çdo vonesë mund të jetë fatale për shumë banorë të Korishës./PrizrenPress.com/

Policia në Prizren ka njoftuar se ka arrestuar një të dyshuar mashkull, pasi atij i është gjetur dhe konfiskuar një pistoletë.

Në njoftim thuhet, se personi i dyshuar është shoqëruar në stacion për procedura të mëtejme hetimore, por gjatë intervistës i dyshuari ka kanosur policin, i cili ia ka sekuestruar pistoletën në prani të disa policëve të pranishëm.

“Lidhur me zhvillimet rreth rastit është informuar prokurori i shtetit i cili ka urdhëruar që i dyshuari të ndalët nën masën e arrestit policor”, thuhet më tej në njoftim. /PrizrenPress.com/