Krusha e Madhe përkujton sot të vrarët dhe të masakruarit nga forcat serbe, ku nuk janë kursyer as gratë,fëmijët dhe pleqtë.

17 vite më parë, konkretisht më 25,26,27 mars të vitit 1999, në fshatin Krushë të Rahovecit janë masakruar 243 persona.

Masakra e Krushës së Madhe është një nga masakrat më të turpshme e kryer mbi popullsinë civile dhe njëra ndër masakrat dhe vrasjet masive që u bënë prej paramilitarëve, policisë dhe ushtrisë okupuese serbe anekënd Kosovës.

Për kriminelët serb masakra ishte diçka e zakontë, diçka që sipas tyre duhej të ndodhej vetëm me qëllimin të eliminimit të popullsisë shqiptare në Kosovë. Për ta populli i Kosovës duhej të zhdukej.

Anëtari i Kryesisë së Lidhjes Demokratike të Kosovës, Sali Asllanaj, i ka bërë thirrje opozitës të kthehet në Kuvend.

Në këtë intervistë për “Epokën e re” ai ka vlerësuar se është një pamje jo e këndshme në Kuvendin e Kosovës meqë po mungon debati i mirëfilltë në mes të pozitës dhe opozitës.

“I bëj apel opozitës të kthehet në Kuvend, sepse aty ka hapësirë të mjaftueshme t’i prezantojë të gjitha idetë. Natyrisht nuk është e përjashtuar edhe forma që përmes protestave të prezantohen qëllimet politike, por Kuvendi është vendi ku debatohet dhe ngërthehen argumentet e palëve të ndryshme”, ka deklaruar Asllanaj.

Ai ka thënë se pamjet e gazit lotsjellës në Kuvend dhe sulmet ndaj institucioneve shtetërore me koktej molotovi nuk janë imazhe pozitive për vendin tonë.

Sipas Asllanajt, kriza politike do të tejkalohet me sukses vetëm duke u respektuar rregullat demokratike dhe ligjet.

“Opozita e ka një synim, për të shkuar në zgjedhje të parakohshme. Kjo po shndërrohet në një precedan që çdoherë pala e pakënaqur, në këtë rast humbësit e zgjedhjeve, pretendojnë zgjedhje të parakohshme. Prandaj, ky model nuk është shumë i pëlqyer, sepse krijon destabilitet të përhershëm të institucioneve të Republikës së Kosovës”, është shprehur ai, duke shtuar se kohët e fundit ka shenja të përçarjes së opozitës së bashkuar.

“Kjo është çështje e brendshme e partive opozitare, megjithatë në horizont duket një moskoordinim i proceseve të përbashkëta, sepse kohët e fundit ka pasur vendime të njëanshme të AAK-së dhe të Nismës, të cilat në njëfarë forme janë distancuar prej akteve të dhunës. Në këtë aspekt, duket një mospërputhje e koncepteve politike sepse qëllimet i kanë të njëjta, por mjetet për t’i realizuar dallojnë”, ka theksuar Asllanaj.

Ai i është kundërpërgjigjur edhe sekretarit të Vetëvendosje!-s, Dardan Molliqajt, sa i përket një koalicioni të mundshëm LDK-VV.

Asllanaj nuk e ka përjashtuar mundësinë që në të ardhmen LDK-ja të bëjë koalicion me Lëvizjen Vetëvendosje. /Epoka e Re/

“…Disa njerëz me ndikim në jetën publike-institucionale mund të kenë qenë pjesë e shërbimeve të huaja informative, prandaj ata janë të interesuar ta shtynë publikimin e emrave të bashkëpunëtorëve të shërbimeve të huaja, e sidomos të shërbimeve serbe, që kanë punuar kundër Kosovës. Vonesat e publikimit të emrave të tyre janë edhe të dëmshme, edhe të rrezikshme, sepse njerëzit e tillë mund t’i sjellin dëme vendit edhe tash, prandaj publikimi i emrave të tyre është shumë i nevojshëm”, tha deputeti Ismajl Kurteshi për “Kosova Sot”.

Derisa në të gjitha vendet e rajonit, madje edhe më gjerë, në vendet që kanë dalë nga ishsistemi komunist, në fazën e tyre tranzicionale, e kanë hartuar dhe zbatuar Ligjin e zbardhjes së dosjeve, si proces i shkëputjes nga ish-regjimet e kaluara kriminale, dhe formë ndëshkuese dhe e diferencimit nga njerëzit e së kaluarës kriminale në shërbim të regjimit, Republika e Kosovës edhe pas 8 vjet pavarësi nuk e ka arritur ta bëjë një veprim të tillë.

Ekspertë të kësaj fushe dhe përfaqësues të subjekteve politike konsiderojnë se një vonesë kaq e gjatë e institucioneve të shtetit të Kosovës, për të iniciuar hartimin e një ligji të tillë është shumë e dëmshme për vendin, ngase mungesa e vullnetit për t’u shkëputur edhe me ligj nga ndikimi i njerëzve të ish-regjimit të kaluar, veç- mas i spiunëve të të tria shërbimeve të inteligjencës shtetërore të ish-RSFJ-së dhe më vonë RFJ-së, përkatësisht Serbisë, po lejon akoma mundësinë e involvimit të njerëzve të tillë nëpër pozita të larta shtetërore. Eksperti i fushës së sundimit të ligjit, Riza Smaka, thotë se edhe Kosova duhet ta ndjekë praktikën e vendeve të tjera në rajon dhe më gjerë, që e kanë kaluar një fazë të tillë tranzicionale, dhe duhet që përfundimisht ta bëjë pa vonesë një ligj të tillë.

“Kjo çështje është shumë e nevojshme për t’u zgjidhur me ligj dhe për t’u zbatuar ligji, për t’u hapur dosjet dhe për t’u identifikuar personat e lidhur me ish-regjimin dhe që kanë ofruar shërbime për të kryer krime. Së paku, nëse ata nuk mund të ndëshkohen për shkaqe objektive, ata duhet të identifikohen dhe të diferencohen që të mos u lejohet infiltrimi në strukturat e tashme qeveritare”, ka thënë Smaka.

Mosbërja e ligjit, krim më vete

Eksperti Smaka ka pohuar se është i sigurt që, nëse do të kishte nismë për hartimin e një ligji të tillë, zbatimin e tij do ta mbështeste çdo qytetar i Kosovës, pasi shumica prej nesh kemi pësuar në një mënyrë ose në një tjetër nga njerëzit e atij regjimi../kosova sot/

Në Celinë të Rahovecit, sot është mbajtur një tubim përkujtimor me rastin e 17 vjetorit të masakrës së 75 civilëve të pafajshëm nga ky lokalitet.

Plaku Maxhun Ramadani rrëfen për ngjarje tronditëse të mëngjesit të 25 marsit të para 17 viteve, ku u masakruan në mënyrën më ç’njerëzore foshnja të porsalindura e njerëz që kishin mbi 90 vjetë.

Me rastin e shënimit të 17 vjetorit të masakrës së popullatës së pafajshme të këtij lokaliteti, është mbajtur një manifestim përkujtimor pjesë e të cilit ishin familjarë të dëshmorëve dhe martirëve, veteranë e invalid të luftës, banorë të Celinës dhe fshatrave përreth, si dhe zyrtarë komunal të Rahovecit.

Para të pranishmëve, në emër të fshatit ka folur, Muhamed Ramadani, i cili tha se tmerret e 25 marsit të vitit 1999 nuk mund të përshkruhen me fjalë me atë se çfarë ka ndodhur në Celinë, pasi armiku i mllefosur me humbjet e tij në beteja me luftëtarët e Lirisë, një ditë pas fillimit të bombardimeve nga Nato, u hakmorrë ndaj popullatës duarthatë duke mos kursyer fëmijë e pleqë.

Ndërkaq, kryetari i Rahovecit, Idriz Vehapi, tha se dhembjen dhe krenarinë për më të dashurit tonë duhet ta rikthejmë në forcë që ta zhvillojmë vendin.

Përveç fjalimeve është shfaqur një program i pasur artistik, i përgatitur nga nxënësit e shkollës së Celinës, të cilët kanë vendosur edhe nga një lule në varret e dëshmorëve dhe martirëve të këtij lokaliteti. /TV Prizreni/