Policia e Kosovës ka njoftuar se persona të panjohur e kanë sulmuar një shtetas të huaj në Prizren.
“Viktima mashkull shtetas i huaj ka raportuar se dy të dyshuar të panjohur e kanë sulmuar fizikisht dhe më pas ia kanë vjedhur çantën në të cilën kishte një fotoaparat, pasaportën dhe 30 euro para të gatshme”, thuhet në raport.
Sipas policisë, viktima ka pësuar lëndime trupore dhe është dërguar në spitalin e Prizrenit për tretman mjekësor.
EC Ma Ndryshe në bashkëpunim me organizatat tjera të shoqërisë civile ka realizuar performancën publike të titulluar “Shadërvan Parking”, përmes të cilit aktivitet ka tërhequr vëmendjen për çështjen e parkingjeve private në zonën historike të Prizrenit.
Në saje të kësaj performance, sheshi i Shadërvanit për një orë është shndërruar në parking të automjeteve, si reagim kundër parkingjeve private në Qendrën Historike si dhe rrënimit të shtëpive të vjetra dhe adoptimit të këtyre parcelave në parkingje, derisa në anën tjetër institucionet shtetërore nuk kanë ndërmarrë veprime për zbatimin e ligjit.
Në kuadër të këtij aktiviteti në fillim të urës së Arastës dhe të Gurit janë vendosur shenjat e improvizuara “Shadërvan Parking”. Në sheshin Shadërvan janë prezantuar të dhëna në lidhje me parkingjet si dhe një numër automjetesh janë parkuar aty.
Prej 34 parkingjeve brenda dhe rreth qendrës historike të Prizrenit, diku 25 janë krijuar me rrënimin e shtëpive të vjetra. Nga sipërfaqja e përgjithshme e parkingjeve del se vetëm 4.3 për qind janë parkingje publike, derisa 60.6 për qind janë private e 31.4 për qind janë parkingje joformale në trotuare e rrugë, që cenojnë lirinë e lëvizjes së qytetarëve.
Po ashtu institucionet përgjegjëse nuk kanë prodhuar zgjidhje për problemin e parkingut, ku rrjedhimisht sektori privat e ka marrë përsipër zhvillimin e kësaj veprimtarie, me një shpërndarje kaotike.
Prandaj, rekomandimi në këtë rast që i adresohet institucioneve përgjegjëse është hartimi i një plani të mobilitetit, me fokus të veçantë në transportin publik të qytetit dhe shtigjeve të çiklizmit, sikurse edhe ndërmarrja e masave ligjore kundër parkingjeve private, duke përfshirë edhe shenjëzimet e tyre që shfaqen si pengesë nëpër trotuare dhe rrugë.
Performanca publike “Shadërvan Parking” është realizuar në kuadër të projektit “Qyteti gjithëpërfshirës…”, të financuar nga Olof Palme International Center (OPIC), e cila përkrahet nga Qeveria e Suedisë. Projekti “Qyteti gjithëpërfshirës…” synon të artikulojë nevojat e grupeve të komunitetit dhe t’i përkthejë ato në plane të zbatueshme urbane të komunës së Prizrenit. Grupet e komunitetit me të cilat punohet në këtë projekt janë të shpërndarë në lagje të ndryshme të qytetit.
Projekti “Qyteti gjithëpërfshirës – planifikimi me pjesëmarrje për zhvillim të qëndrueshëm urban në Prizren” përkrahet financiarisht nga Olof Palme International Center, që përkrahet nga Qeveria e Suedisë
Vendimi i Drejtorisë për Arsim në Komunën e Prizrenit që t’ia shpall kundërligjshëm të lirë vendin e punës mësimdhënëses Samire Çoçaj, në shkollën fillore “Shtjefën Gjeçovi” në Zym të Hasit, ka rebeluar prindërit.
Ata tash e tri ditë u kanë ndërprerë mësimin fëmijëve të tyre, duke mos e pranuar në asnjë mënyrë mësuesen e re, Sadete Shala.
Njëri nga prindërit, i cili nuk e ka lejuar fëmiun e tij të shkojë në shkollë tash e tri ditë, i ka thënë Gazetës Blic në asnjë mënyrë nuk do ta pranojnë mësuesen e re.
“Mësimdhënëses Samire Çoçaj kundërligjshëm i është shpallë i lirë vendi i punës. Ne nuk do ta pranojmë mësuesen e re. Bojkoti do të vazhdoj derisa Drejtoria e Arsimit të tërhiqet nga ky vendim”, tha ky prind në kushte anonimiteti.
Gazeta Blic ka marrë vesh se prindërit e kanë nënshkruar edhe një peticion, të cilin ia kanë dërguar edhe Drejtorisë së Arsimit në Prizren, mirëpo që nuk e ka marrë parasysh.
Ndryshe, Çoçaj në shkollën fillore “Shtjefën Gjeçovi” në Zym të Hasit është punësuar në vitin 2012.
Është e diplomuar në Gjuhë dhe Letërsi Shqipe në Fakultetin e Edukimit në Prizren.
Çoçaj tregon se nga kjo kohë ka punuar në mënyrë të rregullt.
“Kam punuar dhe nënshkruar kontrata të rregullta të lëshuar nga Drejtoria e Arsimit”, shprehet aj
Lëvizja Vetëvendosje në Malishevë, ka kritikuar Projekt-rregulloren për taksa, ngarkesa dhe gjoba komunale për vitin 2017.
Sipas VV-së Miratimi i kësaj rregullore u bë në kundërshtimi me nenin 68 të Ligjit për Vetëqeverisjen Lokale, dhe në kundërshtim me nenin 12.1 të Statutit të Komunës së Malishevës.
Reagimi i plotë i VV-së në Malishevë
Në mbledhjen e Kuvendit Komunal në Malishevë e cila u mbajt me datë 30.11.2016, asamblistët me shumicë votash miratuan Projekt-rregulloren
për taksa, ngarkesa dhe gjoba komunale për vitin 2017.
Miratimi i kësaj rregullore u bë në kundërshtimi me nenin 68 të Ligjit për Vetëqeverisjen Lokale, dhe në kundërshtim me nenin 12.1 të Statutit të Komunës së Malishevës, i cili parasheh informimin, pjesëmarrjen dhe konsultimin e gjerë të qytetarëve përmes fushatave informuese, shpalljeve publike dhe debateve të ndryshme. Derisa edhe rregullorja e punës së Kuvendit Komunal i ka të detajuara procedurat për miratimin e
rregulloreve komunale.
Rregullorja për taksa, ngarkesa dhe gjoba komunale është njëri nga dokumentet më të rëndësishme që ndërlidhet me jetën e qytetarëve dhe me veprimtarinë e bizneseve, pasi përmes saj përcaktohen obligimet në formë taksash, që qytetarët dhe bizneset paguajnë në formë të shërbimeve dhe kontributeve, mjete këto të cilat hyjnë tek të hyrat vetanake, e të cilat më pas do duhej të ju kthehen qytetarëve dhe komunitetit të biznesit në formë të investimeve apo shërbimeve komunale.
Duke u bazuar në këto Lëvizja VETËVENDOSJE! përmes përfaqësuesve të saj në Kuvendin Komunal ka kundërshtuar miratimin e kësaj rregullore, duke
kërkuar nga kryetari dhe Kuvendi i Komunës që ky dokument ti nënshtrohet konsultimit të gjerë publik, dhe konsultimit brenda kuvendit, para se ai
të miratohet.
Është hipokrizi që në njërën anë qeverisja lokale përdorë retoriken e politikës sociale dhe pjesëmarrje qytetare, kurse në praktikë pamundëson pjesëmarrjen qytetare, dhe përmes vendimeve të tilla si ky i rregullores, krijon pabarazi sociale, duke vënë në pozita të njëjta si qytetarin e varfër me bizneset, si dhe duke krijuar pabarazi edhe brenda vet bizneseve, formë kjo që ju siguron përfitime bizneseve të mëdha në kurriz të bizneseve të vogla dhe nxit klientelizmin politik.
Miratimi i kësaj rregullore si për nga mënyra, ashtu edhe për nga përmbajtja, shpërfaqë papërgjegjësinë e komunës, ndaj qytetarëve të saj, tregon mungesë elementare të njohurisë së zhvillimit ekonomik të bazuar në mirëqenie si dhe pamundëson rritjen e të hyrave vetanake që janë parakusht për vetqëndrueshmërinë e Komunës së Malishevës.
Ky veprim i ngutshëm dhe i pa takt i kuvendit të komunës do të thotë humbje e mijëra eurove në buxhetin e komunës të cilat do të mund të destinoheshin për çështjet shumë jetike për qytetarët e komunës së ranguar ndër më të varfrat në vend.
Policia e Kosovës arreston 16 persona të dyshuar për konsumim të veprave penale: ,,organizim të skemave piramidale dhe bixhozit të jashtëligjshëm” dhe veprën penale ,,krim të organizuar”.
Policia e Kosovës, konkretisht Departamenti i Hetimeve më, 1 dhjetor 2016 ka ndërmarrë dy operacione policore të shtrira në tërë vendin.
Në operacion e parë pos Drejtorisë për Hetimin e Krimit të Organizuar (DHKO) kanë qenë të përfshirë dhe njësi tjera të specializuara policore, zyrtarë nga Doganat e Kosovës dhe ATK-ja.
Sektori i Hetimeve të Krimit të Organizuar në kuadër të DHKO-së, pas hetimeve të zhvilluara për ushtrim të veprimtarisë së paligjshme të lojërave të fatit, me 1 dhjetor 2016, bazuar në planin operativ ,,BLIC”, me urdhëresë të gjykatës kompetente ka kontrolluar lokacione të ndryshme në rajonet: Prishtinë, Pejë, Gjakovë, Gjilan, Ferizaj, Prizren dhe Mitrovicë.
Me këtë rast në cilësi të personave të dyshuar janë arrestuar 6 persona si dhe janë kontrolluar 77 lokacione të ndryshme.
Personat e dyshuar tanimë të ndaluar janë:
· R. L. lindur me 1962 m/sh/k
· D. H. lindur me 1986 m/sh/k
· B. I. lindur me 1985 m/sh/k
· R. I. lindur me 1960 m/sh/k
· S. H. lindur me 1959 m/sh/k
· F. I. lindur me 1992 m/sh/k
Gjatë këtij operacioni janë sekuestruar si prova materiale:
· 3 ruleta,
· 2 tavolina pokeri,
· 69 aparate të lojërave të fatit,
· 2 lojëra Keno,
· 2 armë,
· 546 fishekë,
· 17 PC,
· 3 DVR,
· 9 telefona celularë,
· 41 260 euro, si dhe dokumentacion relevant për rastin.
Kurse në operacionin tjetër të udhëhequr nga Drejtoria për Hetimin e Krimeve Ekonomike dhe Korrupsionit (DHKEK), Sektori për hetimin e krimeve ekonomike, pas një pune te gjatë hetimore po ashtu me datë 01.12.2016, të asistuar nga njësitet policore nga Gjilani, kanë zbatuar Urdhëresën e Gjykatës Themelore në Gjilan, për kontrollimin e një lokali të lojërave të fatit në rrugën Gjilan-Kamenicë afër fshatit Shillovë, me dyshimin e bazuar se në këtë lokacion është duke u kryer vepra penale ,,Organizim e Skemave Piramidale dhe Bixhozit të jashtëligjshëm”, sipas nenit 300 te KPRK-se.
Gjate kontrollit të lokalit, përfaqësuesit të tij, nuk kanë prezantuar dëshmi se pika në fjalë ishte e licencuar. Në lokal është hasur një pjese e ndarë ku zhvillohej veprimtaria e jashtëligjshme. Në ndërkohe janë ftuar edhe zyrtarë të Doganës së Kosovës dhe ATK-se për verifikim të gjendjes.
Personat e dyshuar tanimë të ndaluar janë:
· B.B lindur me 1983 m/sh/k
· A.SH lindur me 1986 m/sh/k
· R.S lindur me 1986 m/sh/k
· A.G lindur me 1983 m/sh/k
· G.M lindur me 1991 m/sh/k
· Xh. M lindur me 1980 m/sh/k
· I.G lindur me 1969 m/sh/k
· V.I lindur me 1984 m/sh/k
· A.A lindur me 1986 m/sh/k
· L.H lindur me 1978 m/sh/k
Gjatë këtij operacioni janë sekuestruar si prova materiale:
Fletore me shënime për hyrje – daljet reale të parasë në këtë pike.
10030 Euro,
200 Franga të Zvicrës,
100 Dollarë Amerikan dhe
Të ashtuquajturat Chips dhe Zaret.
Të gjithë personat e dyshuar, gjithsej 16 persona, me vendim të prokuroreve janë dërguar në mbajtje për vazhdim të procedurës të mëtejme. /PrizrenPress.com/
Pesë të dyshuarit për sulmin me gur dhe koktej molotovi në ndërtesën e Konsullatës së Përgjithshme të Republikës së Turqisë në Prizren mund të përballen me akuzat edhe për rrezikimin e objektit zyrtar të personave nën mbrojtje ndërkombëtare.
Kjo ngase Prokuroria Themelore e Prizrenit ka marrë vendim që të zgjerojë hetimet duke përfshirë edhe dispozitat e veprës penale të rrezikimit të personave nën mbrojtje ndërkombëtare, përkatësisht paragrafin 3 të saj, shkruan sot “Koha Ditore”.
“Prokuroria ka vendosur që të zgjerojë hetimet lidhur me dyshimin se në këtë rast mund të jetë kryer një vepër më e rëndë penale nga neni 173, paragrafi 3 i Kodit Penal të Kosovës. Pra, vepra penale shkaktimi i rrezikut të përgjithshëm mbetet dhe hetimet zgjerohen edhe për veprën penale nga neni 173, paragrafi 3”, ka thënë kryeprokurori i Prokurorisë Themelore të Prizrenit, Sylë Hoxha, teksa ka sqaruar se me rastin po merret Departamenti i Krimeve të Rënda.
Neni 173 i Kodit Penal të Kosovës përkufizon veprën penale “Rrezikimi i personave nën mbrojtje ndërkombëtare”. Ndërsa, paragrafi 3 i këtij neni thekson se “kushdo që kryen një sulm të dhunshëm mbi objektet zyrtare, vendbanimin privat ose në mjetet e transportit të një personi nën mbrojtje ndërkombëtare, kur akti i tillë ka gjasë të rrezikojë personin ose lirinë e tij, dënohet me burgim prej një deri në dhjetë vjet”.
Përfaqësues politikë të nivelit lokal e qendror kanë adresuar shqetësime, lidhur me rastet e vjedhjeve dhe dëmtimit të pasurisë në fshatin Restelicë të Dragashit, shkruan sot Koha Ditore.
Ata kanë kërkuar marrjen e masave konkrete nga autoritetet përgjegjëse si për rritjen e sigurisë së qytetarëve dhe pronës së tyre ashtu edhe për gjetjen e kryesve të këtyre veprave dhe vënien e tyre para organeve të drejtësisë për të marrë dënimin e merituar.
Brengën, lidhur me dukurinë e vjedhjeve në Restelicë të Dragashit e ka adresuar edhe deputetja e NDS-it, Emilija Rexhepi, e cila gjatë seancës së fundit plenare të Kuvendit të Kosovës ka kërkuar që MPB-ja të vendosë ndonjë post, ose nënstacion policor në Restelicë, me qëllim të parandalimit të vjedhjeve dhe rritjes së sigurisë.
Mënyra se si është qeverisur dhe po qeveriset vendi deri më tani nga kjo klasë politike, si në nivelin qendror edhe në atë lokal, po e krijojnë një përshtypje te analistët politikë se qytetarët mund të jenë krejtësisht indiferentë nga pjesë- marrja në zgjedhjet e reja, qofshin ato lokalet apo parlamentaret. Sipas tyre, qytetarët kosovarë janë pa pikë shprese se diçka mund të ndërrojë në Kosovë edhe pas zgjedhjeve të reja, pasi si pozita, si opozita janë në duart e mafio-oligarkëve dhe financohen prej tyre.
Shqetësimi i tillë vjen për faktin se si në nivelin qendror, që e mbajnë partitë e mëdha, si në nivelin komunal, për shembull në kryeqytet që udhëhiqet nga opozita,”VETEVENDOSJE”, nuk dallon mënyra e qeverisjes apo keqqeverisjes, bile edhe tenderët, lejet e ndërtimit dhe shumëçka tjetër shkojnë për te njëjtët mafio-oligarkë të inkriminuar. Analisti politik, Fadil Lepaja konsideron se në Kosovë mbretëron një klimë e tillë, pikërisht për faktin se akoma nuk është pjekur vetëdija qytetare për ndryshime rrënjë- sore.
“Fillimisht, jo të gjithë qytetarët e Kosovës duan ndryshime rrënjësore. Pjesa më e madhe janë për ndryshime të pjesshme. Prandaj edhe e votojnë këtë elitë politike. Pjesa më e madhe është indiferente dhe nuk del në zgjedhje, sepse nuk e sheh veten si faktor të ndryshimeve dhe mendon se ato mund të vijnë vetëm nga jashtë”, ka thënë ai.
Pse po na udhëheqin të njëjtët?
Edhe politologu Arsim Haziri mendon se për t’i dhënë vendit një lloj shprese, qytetari gjithsecili duhet t’i parashtrojë një pyetje vetes. Pse gjithnjë jemi nën udhëheqjen e njëjtë dhe drejtohemi nga ata që shpërfillën gjithçka çka ishte e mundshme? “Faktikisht, sot pjesa dërrmuese e popullit ndihen të ìmponuar në çështjen e votës, ndihen në pamundësi për të dhënë vlerësim të drejtë e subjektiv, çka njëherësh kjo situatë po garanton edhe më tej vazhdimësinë e pushtetit pothuajse të njëjtë. Derisa për vite me radhë kemi këso situate të tillë, atëherë përgjegjësia bie direkt në mendimin e qytetarëve, sepse ata përbëjnë bazën themelore nga e cila vjen e ndërtohet pushteti. Fatkeqësisht, mendimi qytetar gjithnjë po mbetet me gjykim gati të njëjtë . Pra, pa asnjë ndryshim ndaj subjekteve dhe duke qenë nën këso linje ia ka dhënë mundësinë pushtetit që të zhvillojë politika që në masë të konsiderueshme kanë shkuar në kundërshtim me nevojën publike të interesit të përgjithshëm qytetar”, u shpreh më tutje ai.
“Aktualiteti politik si ai lokal, edhe ky qendror, vështirë e kanë të ofrojnë strategji besimi në kuptimin e një qeverisjeje më të mirë në interesin social dhe publik, pasi e kaluara na tregon dukshëm se tërë agjendat e tyre kinse pozitive gjithnjë e më shumë kanë qenë për elitën e tyre politike, si dhe për zgjerimin e bizneseve. Kahja e shtetit dhe mirëqenia e përgjithshme ndryshojnë pozitivisht vetëm kur ikën mendimi aktual qytetar dhe duke pretenduar të mos jemi pjesë e statistikave negative, por që mund t’i shërbejmë zhvillimit dhe prosperitetit”, tha Arsim Haziri./kosova sot/
Zbatimi i marrëveshjes që i hap rrugë funksionalizimit të plotë të gjykatës speciale përmes së cilës do të gjykohen krimet e pretenduara të luftës ku dyshohen të jenë kryer nga ish luftëtarët e UÇK-së, do të fillojë nga 1 janar i 2017-ës.
Kjo pasi, Mbretëria e Holandës e ka ratifikuar Marrëveshjen për Shtetin Nikoqir për Dhomat e Specializuara të Kosovës, Gjykatën Speciale.
Kështu bëhet e ditur në web-faqen zyrtare të Gjykatës Speciale, shkruan GazetaFjala. Kjo është marrëveshja e cila siguron bazën ligjore për dhomat e specializuara të Kosovës për të kryer procedurat në Holandë dhe e njëjta do të hyjë në fuqi më 1 janar 2017.
Deri në hyrjen në fuqi, Dhomat e Specializuara do të vazhdojnë funksionimin nën dispozitat e Marrëveshjes së Përkohshme të Shtetit Nikoqir,e cila lejon zbatimin e mandatit të Regjistrit dhe punës përgatitore në lidhje me procedurat gjyqësore./GazetaFjala
Dikur Caparci ishte një fshat me bujqësi e blegtori të zhvilluar, kurse sot fare pak banorë merren me këtë punë, për shkak se mbi gjysma e fshatit është shpërngulur jashtë. Banorët thonë se 25 familje tashmë i kanë mbyllur dyert me dry, e shumë të tjera kanë mbetur me numër të vogël të anëtarëve të familjes,shkruan gazeta Kosova Sot.
Thuhet se fshati Caparc, i komunës së Prizrenit, ishte ndër fshatrat e pasura dhe të kamura për shkak të tokës bukanike dhe një fushe me bereqet, ku prodhohej kryesisht grurë e misër. Me ndryshimin e kohës tashmë në këtë fshat me bujqësi merren vetëm pak familje. Xhavit Thaçi, banor i Caparcit, është shprehur për “Kosova Sot” se ky fshat ka pasur një bujqësi të rëndësishme për kohën. “Tani janë më shumë se 80 për qind e familjeve nga 180 sa ka fshati që punojnë jashtë Kosove. Me bujqësi merren fare pak “, është shprehur ai. I brengosur për fshatin e tij shprehet se në Caparc ka familje që tërësisht ia kanë vënë drynin shtëpive dhe jetojnë jashtë Kosove. “Janë mbi 25 familje që tashmë shtëpitë e tyre i mbajnë në dry. Kjo vërtet është e dhimbshme”.
Rrugët e pashtruara dhe të pakubëzuara
Thaçi shprehet se fshati ka mungesë të ujit të pijshëm. Rrjetin e ujësjellësit e ka të shtrirë që moti, por në atë rrjet ujë të pijshëm nuk ka tani e një kohë të gjatë.
Tefik Thaçi, sekretar i shkollës në këtë fshat, shpreh me brengë të madhe faktin se dikur, edhe pse fshati kishte më pak familje, megjithatë kishte 320 nxënës. Sipas tij, tani ka vetëm 130 nxënës në këtë shkollë me tendencë të rënies. Në fshat jetojnë dy konfeksione, pra shumica myslimane dhe po kështu edhe 30 familje katolike. Fshati tashmë ka edhe xhami dhe në përfundim e sipër e ka edhe kishën. Xhavit Thaçi shprehet se këtë fshat e karakterizojnë marrëdhëniet e mira ndërfetare e ndëretnike. Derisa dihet botërisht se familja Oroshi në këtë fshat ka raporte fenomenale dhe bashkëjetojnë më vëllezërit e tyre myslimanë. Thaçi shprehet se gjysma e këtij fshati ende nuk i kanë rrugët e shtruara as të kubëzuara. Mahmut Thaçi shprehet se kjo është e padrejtë, ngase banorët janë parapagues të rregullt të gjithë kontributeve ndaj Kuvendit Komunal të Prizrenit.
Traditat ruhen me fanatizëm
Mahmut Thaçi thotë se fshati po përpiqet të ruajë traditën që e ka pasur, siç janë mikpritja e bujaria. Ruhen me fanatizëm tradita si kanagjegjet e dasmat. Tefik Thaçi shprehet se banorët përpiqen të jetojnë me vështirësi, ashtu si edhe kudo tjetër në Kosovë. Kurse për historikun e këtij fshati ka shumë gojëdhëna, që lidhen pikërisht me faktin se dikur këtu ishin fushat e mira dhe një vend blegtoral. Në këtë fshat vazhdon të frymojë besa shqiptare, ashtu si është trashëguar brez pa brezi. Mr. Nue Oroshi- kryetar i Shoqatës“ Trojet e Arbrit”, që merret me aktivitete të ngjeshura shkencore dhe kombëtare, thotë se shoqata ka arritur që t’i grumbullojë në gjirin e saj 150 intelektualë nga të gjitha viset etnike shqiptare dhe diaspora e madhe atdhetare. Deri tash kanë mbajtur katërmbëdhjetë sesione shkencore, shtatë akademi dhe ka botuar trembëdhjetë vepra enciklopedike me një vëllim të përgjithshëm prej rreth nëntë mijë faqe. Sipas tij, është e vetmja shoqatë që mban sesione shkencore në të gjitha trojet etnike shqiptare, si fazë afatshkurtër të punës ka planifikuar që sesionit t’i planifikojë një sesion shkencor me temat bosht: nga aktualiteti. Fran Thaçi është një humanist i dalluar që në rrethana të shumta ka ndihmuar lëvizjet e ndryshme në Kosovë, duke ofruar para për të gjitha organizimet humanitare e atdhetare, fetare.
I brengosur për fshatin e tij, Xhavit Thaçi shprehet se në Caparc ka familje që tërësisht ia kanë vënë drynin shtëpive dhe jetojnë jashtë Kosove. “Janë mbi 25 familje që tashmë shtëpitë e tyre i mbajnë në dry. Kjo vërtet është e dhimbshme” .
(Kosova Sot)