Nga Zafir Berisha

Në realitetin e sotëm në Kosovë është shumë normale të mendosh se kush çka dhe sapo bën për Kosovën. Kjo vjen si rezultat i gjendjes në Kosovë, e cila është në kërkim të identitetit individual dhe politik, ku si rezultat i këtij kërkimi e jetojmë jetën të cilën e jetojmë.

“Jeta është një përplasje vullnetesh e interesash të kundërta”, – thotë Harry Box dhe nëse ia shtojmë edhe mendimin e Bu DDA: “Bota mbahet mbi të panjohurat”, atëherë barazimi i këtij realiteti në Kosovë i nevojitet origjinalititi i epokës nëpër të cilën po kalojmë,dhe se vështirë mund ta definosh kush, çka është duke bërë në Kosovë, sic është vështirë ta definosh kush, çka po kërkon nga Kosova.

Mungesa e guximit qytetar dhe intelektual për tu përballur me keq-qeverisjen në vend, dhe me krimin e organizuar e vë në pikëpyetje zhvillimin e shtetit dhe e fundos shpresën për një jetë më të mirë.

Kosova, sot ka nevojë për qytetarë të vetëdijshëm të cilët nuk i nënshtrohen presioneve dhe shantazheve të krimit të organizuar në pushtet dhe për këtë duhet guxim qytetarë sepse fati I vendit dhe e ardhmja e fëmijëve tanë nuk guxon të mbetet në duart e matrapazëve dhe profiterëve të cilët e kanë kapur shtetin.

Sa më shumë që vonohemi në luftën kundër të keqes së madhe e cila e ka përfshirë Kosovën, aq më gjatë kjo e keqe do të zgjatë dhe seriozisht do të rrezikohet perspektiva e qytetarëve të vendit.

Mungesa e stilit origjinal të klasës politike në Kosovë dhe qasja e gabuar në kërkim të këtij stili rrezikon pluralizmin dhe demokracinë duke u servuar dhe imponuar qytetarëve një politikë “Pozash”, që nuk janë asgjë tjetër veç një kopje e politikanëve dhe politikave tashmë të dështuara.

Nga Jakup Krasniqi

Fillimi dhe rrugëtimi i Nismës për Kosovën nuk ishte i lehtë. Themeluesit e mbështetësit e saj me parime, besoj që kanë qenë e janë edhe sot të bindur se arsyeja kryesore e kësaj nisme ka qenë e ka mbetur, sjellja e një fryme të re për ndryshim në politikë dhe në qeverisjen e vendit. Dhe kësaj rruge i kemi qëndruar në mënyrën më besnike të mundshme, kuptohet për të gjithë ata që më besnikëri e besim iu kanë qasë këtij projekti të ri politik.

NISMA, ndryshimin e donë dhe e kërkon që të vije nga vullneti i lirë i qytetarëve të Kosovës.

Në rrugëtimin e saj politik dyvjeçar, NISMA në politikën e Kosovës ka lënë gjurmën e saj menjëherë pas zgjedhjeve të qershorit 2014, kur e mori rolin për krijimin e LAN-it e më vonë VLAN-it dhe sollën shpresën e ndryshimit dhe të festimit të anëtarësisë së partive të LAN-it, në rrugët e Prishtinës e të qyteteve të tjera të Kosovës. Ishin kapësit e institucioneve të shtetit që nuk donin t’i lëshonin me asnjë kusht dhe lakmia për kapjen e shtetit, e “kundërshtarit” më të madh politik të PDK-së, LDK-së, e cila pranoj të bëhet pjesë e kapjes së institucioneve të shtetit. Ky ndryshim, për mua i pritshëm i mbeturinave të LKJ-së, që në asnjë kohë nuk e kishin për gjë t’ia shtrijnë qafën më të fortit, në rend të parë e tradhtuan elektoratin e tyre dhe koalicionin pas zgjedhor.

NISMA për Kosovën, në rrethanat e reja e mori një detyrë tjetër, bashkimin e opozitës së mbetur dhe arritëm që për herë të parë në jetën parlamentare të Kosovës të kishim një opozitë të bashkuar. Kjo opozitë e bashkuar i ka edhe rezultatet e saja tepër të prekshme. Fillimisht opozita ishte bashkuar për tu bërë një opozitë e fuqishme e qeverisjes kriminale. Edhe në ketë rast NISMA ka luajtur një rol të rëndësishëm. Kështu ishte deri në sesionin vjeshtor, kur opozita e bashkuar filloj kundërshtimin e fuqishëm të Marrëveshjes në Parim të 25 gushtit 2015 dhe Marrëveshjen e Demarkacionit më Malin e Zi. Me këto marrëveshje cenohej rëndë interesi i kombit dhe i shtetit. Në këto çështje, NISMA edhe sot e kësaj dite, vazhdon të jetë opozitë e fuqishme.

Nuk ka asnjë dyshim, gjatë gjithë bisedimeve për të vazhduar e thelluar marrëveshjen e bashkëpunimit më partitë opozitare, ne kemi qenë për krijimin e një fronti opozitar, ku ruhet identiteti politik, por jo ku humbet identiteti politik. Më në fund, me kërkesën e shumë anëtarëve e të simpatizantëve, Kryesia e Nismës dhe Këshilli Kombëtar i saj, me shumicën e votave, përkatësisht me një, e dy vota kundër, organet e cekura të partisë kanë marr vendimin për të shkuar më AAK-në në koalicion në zgjedhjet e ardhshme parlamentare.

Natyrisht, në ketë rrugëtim të ri, u shkëputën dy anëtar të Kryesisë së partisë, duke konsideruar se po bëhej një “tradhti”, e ndonjëri se “kishte humbur 100 mundësi”. Neve nuk na mbetet tjetër vetëm, t’u themi atyre që “kanë humbur 100 mundësi”, që t’i kërkojnë ato. Ne mendojmë ndryshe. Ne mendojmë se shkuarja pas bindjeve tona, pas idealeve tona, pas qëllimeve fisnike për shtet, atdhe e komb, nuk është humbje, përkundrazi është fitore. Ata që u larguan kanë të drejt të mendojnë se ecja pas 100 të humburave për interesa personale, është fitorja e tyre. Rruga e mbarë u qoftë! Ju dëshirojmë fat!

Ne e respektojmë vullnetin e cilitdo që e përqafon programin e NISMËS dhe aderon në te, sikur e respektojmë çdo vullnet të cilitdo që dëshiron të ndjekë një rrugë të re! Zgjedhja është individuale! NISMA për Kosovën nuk do ta ndal askush rrugëtimin e saj socialdemokrat!

NISMA Socialdemokrate për Kosovën, vazhdon të jetë e hapur dhe solidare me çdo progresist e qytetarë që jeton e punon në Republikën e Kosovës!

Progresistë dhe ithtarë të ndryshimit, Mirë se vini në NISMËN Socialdemokrate të Kosovës!