Mësuesja amerikane, Megan, e cila është anëtare e Korpusit të Paqes dhe jep mësim në fshatin Maqitevë të Suharekës, është sulmuar nga qentë para afro një jave dhe tani ndodhet nën kujdesin e mjekëve në spitalin e Shkupit.

Ndonëse tani është lënduar rëndë, nuk është hera e vetme që është sulmuar. Rast i ngjashëm i ka ndodhur brenda këtij muaji, nga qentë shtëpiakë të fshatit Maqitevë, të cilët po paraqesin rrezik për të gjithë banorët, duke u lëshuar netëve dhe duke qenë të lirë edhe në mëngjes, kur banorët udhëtojnë për në punë apo në shkollë, raporton portali lokal TherandaPost.

Sipas të dhënave që kemi marrë nga banorët, në muajt e fundit kanë ndodhur katër raste të sulmit nga qentë. Përveç mësueses Megan, janë sulmuar edhe dy fëmijë.

“Megan është sportiste dhe del çdo mëngjes për të vrapuar, pasi që merr pjesë edhe në gara të vrapimit”, kanë thënë bashkëbanuesit e mësueses amerikane.

Ajo do të qëndrojë në spitalin e Shkupit edhe këtë vikend, për t’ju kthyer sërish dhënies së mësimit në shkollën e Maqitevës

Kryetari i Kuvendit, Kadri Veseli, ka përuruar sot shtatoren e Ukshin Hotit në oborin e Universitetit “Ukshin Hoti” në Prizren.

Kryeparlamentari Veseli ka thënë se ndihet i nderuar, që sot, në këtë vend të edukimit të brezave të ri, po përuron shtatoren e njërit prej personaliteteve më të shquar të luftës për liri dhe pavarësi.

“Ukshin Hoti ishte dhe mbeti deri në fund veprimtar i pakompromis i lëvizjes sonë kombëtare për lirinë e Kosovës.
Ai ishte ideologu, që me guximin e tij politik dhe mendimin e thellë intelektual frymëzonte këtë lëvizje. Ai ishte në kuptimin e plotë të fjalës filozofi i çështjes sonë kombëtare”, ka thënë kryeparlamentari Veseli.

Kreu i Kuvendit ka thënë se në fillim të viteve ‘80 të shekullit të kaluar, kur terrori i regjimit jugosllav po përgjakte rininë e Kosovës, kur shumë kush e zgjodhi heshtjen dhe mbylljen e syve, Ukshin Hoti ngriti zërin e protestës dhe kundërshtimit.

“Ngriti zërin e protestës, sepse besonte fuqishëm se dija dhe intelektuali kanë kuptim vetëm duke qenë në shërbim të lirisë, dinjitetit njerëzor e kombëtar. Dhe Ukshin Hoti i qëndroj deri në fund këtij besimi. U përpoqën ta joshin me poste, por nuk e bën dot ideolog të sistemit. E burgosën, por nuk ia thyen dot përcaktimin intelektual e kombëtar”, ka thënë kryeparlamentari Veseli.

Ai ka thënë se Ukshin Hoti ndoqi rrugën e Hasan Prishtinës.

“Ashtu si Hasan Prishtina, ai në vend të posteve zgjodhi rrugën e disidencës”, ka thënë Veseli. Amensty International, në vitin 1983 e kishte shpallur Ukshin Hotin të burgosur të ndërgjegjes. Në këtë mënyrë, Veseli tha se emri i tij iu bashkua listës së gjatë të disidentëve që po luftonin për liritë njerëzore gjithandej botës komuniste.

“Në vitet ‘90 kur lëvizja jonë kombëtare po përgatiste formimin e Ushtrisë Çlirimtare të Kosovës, regjimi përsëri e burgosi Ukshin Hotin. E izoluan, sepse e dinin shumë mirë se filozofi i çështjes shqiptare do të bëhej zëri i Ushtrisë Çlirimtare të Kosovës. Por, përsëri dështuan. Dështuan, sepse tashmë Ukshin Hoti ishte kthyer në ikonë të lëvizjes sonë kombëtare”, ka thënë kreu i Kuvendit, Kadri Veseli.

Kryeparlamentari Veseli ka thënë se Kosova sot është e lirë, shtet i pavarur dhe sovran, por plagët e luftës ende nuk na janë shëruar.

“Janë më mijëra qytetarë të pagjetur Kosovës, për fatin e të cilëve ende shteti serb nuk jep përgjigje se ku janë. Në mesin e tyre është edhe profesori Ukshin Hoti. Ne nuk do të ndalemi asnjëherë derisa të dihet fati i tyre dhe të vendoset drejtësia për ta dhe për Ukshin Hotin”, ka thënë ai.

Kreu i Kuvendit ka thënë se duhet të punojmë shumë, pa u lodhur asnjëherë, për ta forcuar shtetin, për ta zhvilluar ekonominë dhe për t’i fuqizuar universitetet tona, në mënyrë që t’iu krijojmë perspektivë të sigurt të rinjve tanë në Kosovë. /Telegrafi/

Partia e Drejtësisë në Prizren ka uruar të gjithë shqiptarët për 28 Nëntorin – Festën e Flamurit!

“Në këto ditë feste, secili shqiptarë duhet t’i kujtojë vlerat e përhershme kombëtare, të cilat ndër shekuj kanë mbajtur gjallë shpirtin liridashës të kombit tonë deri sot, sakrificat e pareshtura të shumë gjeneratave që kulmuan me mëvetësinë e Shqipërisë dhe të Kosovës”, thuhet në urimin e kryetarit të PD-së në Prizren, Qemal Mehmeti.

“Edhe ky 28 Nëntor le të nxisë dhe thellojë më shumë se dje, më shumë se sot ndjenjat me të cilat ndër ne shumë më fuqishëm do të manifestohet dashuria, paqja, harmonia , solidariteti dhe mirëkuptimi ndërqytetar dhe mbarëkombëtar”/PrizrenPress.com/

NISMA për Kosovën, dega në Prizren, ka uruar të gjithë shqiptarët me rastin e festave të nëntorit.

“Sa herë vjen Nëntori, aty ku frymon shqip, Shqipëri, Kosovë, Iliridë, Preshevë, Medvegjë, Bujanovc, Mal të Zi, e deri në Çamëri, kujtohet dhe festohet e kaluara heroike shqiptare. Kujtohen të gjithë ata që dhanë më të shtrenjtën e tyre, jetën, që ne sotë të jemi të lirë. Gjërat e mëdha, koinçidojnë ndërmjet veti, prandaj me të drejtë, Nëntori është muaj i shqiptarëve. Kështu, duke kujtuar 28 Nëntorin e 1912-tës, Vlorën historike, pavarësinë e Shqipërisë, 28 Nëntorin e 1955-tës, ku lindi i madhi Adem Jashari, për tu bërë legjendar i përjetshëm dhe themeltarë i Pavarësisë së Kosovës dhe 28 Nëntorin e 1997-tës, ku për herë të parë doli publike UÇK-ja, për të bërë kthesën historike në dobi të shiptarëve”.

“Andaj me këtë rast, NISMA për Kosovën – dega Prizren, iu uron të gjithë shqiptarve kudo që janë, Nëntorin e fitoreve historike”.

“Rroftë për jetë Shqipëria dhe Zoti i bekoftë shqiptarët!” thuhet në urimin NISMA-s. /PrizrenPress.com/

Për nder të 28 Nëntorit, Festës së Pavarësisë së Shqipërisë, qyteti i Prizrenit është dekoruar me flamuj kombëtar shqiptarë e të Kosovës.

Por, ajo që bie në sy në këtë qytet janë edhe flamujt e Turqisë krahas atij shqiptar e të Kosovës.

Lidhur me praninë e flamujve turq, zëdhënësi i Komunës së Prizrenit, Ymer Berisha, tha për KALLXO.com se Komisioni Organizativ ka vendosur që disa flamuj edhe të shteteve të tjera të vendosen krahas atij kombëtar dhe të Kosovës.

“Vende-vende paska edhe flamuj amerikanë, gjermanë, etj.”, ka thënë Berisha në një përgjigje për KALLXO.com.

Shqiptarët në gjithë botën festojnë nesër Ditën e Flamurit -28 Nëntorin.

104 vjet më parë, Shqipëria shpalli pavarësinë e saj.

Deri më 28 nëntor 1912, trojet shqiptare ishin nën pushtimin osman.

Dega e PDK-së në Prizren, dhe kryetari i saj, Minir Krasniqi, ka uruar të gjithë qytetarët e Komunës së Prizrenit, dhe të gjithë bashkëkombasit shqipëtarë anë e kënd globit me rastin e Festës së Flamurit.

“Data e 28 Nëntorit, është kurorëzim i sakrificës dhe betejave të vazhdueshme të shumë gjeneratave ndër shekuj me synim-krijimin e shtetit shqipëtar”.

“Sot në këtë ditë të madhe për kombin dhe për pasardhësit tanë, duhet të konstatojmë objektivitetet, se shqiptarët si komb vazhdojnë të jenë nën një betejë të vazhdueshme, për të rikonfirmuar veten si anëtarë respektabil në familjen e kombeve euro-atlantike”, thuhet në urim. /PrizrenPress.com/

Kryetari i Komunës së Prizrenit, Ramadan Muja, ka uruar të gjithë qytetarët e Prizrenit, me rastin e 104-vjetorit të pavarësisë së Shqipërisë.

“Të nderuar qytetarë pranoni urimet më të mira për festën e flamurit në emër të komunës së Prizrenit duke ju dëshiruar mbarësi, shëndet dhe shumë gëzime për ju dhe familjet tuaja. Urojmë që kjo festë e madhe kombëtare të ndahet më të tjerët duke reflektuar për rrugëtimin tonë kombëtar gjatë gjithë historisë sonë deri më sot, të jemi të gatshëm që të punojmë shumë në realizimin e synimeve tona politike e kombëtare, në rrugën e integrimeve euro-atlantike, si synim gjithë qytetar”, ka uruar Muja. /PrizrenPress.com/