Një i ri me inicialet A.B. është ndaluar nga policia, pasi i njëjti kishte deklaruar rrejshëm se kishte qenë viktimë e një grabitje.

Ai i kishte thënë Policisë në stacionin policor në Prizren se në afërsi të varrezave në lagjen “Arbana” duke e drejtuar automjetin me targa 04-805-FJ model “Volkswagen” (pronë e një ndërmarrje) e kanë ndaluar dy persona të panjohur për të, njëri prej të cilëve kinse i ka hyrë në automjet, e ka sulmuar fizikisht, duke e goditur me grushte dhe më pas nën kërcënimin e armës ka pretenduar se ia ka marrë rreth 4000 euro.

“Gjate bisedës me të hetuesit kanë arritur që të zbulojnë se viktima A. B. ka bërë deklarim të rrejshëm, respektivisht se rasti nuk ka ndodhur fare”, ka njoftuar policia.

E tani i dyshuar A B në prezencë të avokatit mbrojtës pranon se ka trilluar me rastin e paraqitur në polici.

Lidhur me rastin, është informuar prokurori i shtetit i cili ka sugjeruar që rasti të procedohet me procedurë të rregullt.

Pesë persona janë përfshirë në rrahje në “Shatërvan” të Prizrenit.

Tre prej tyre kanë pësuar lëndime trupore.

Policia njofton se ata janë rrahur mes vete për shkak një mosmarrëveshjeje.

“Si pasojë, lëndime trupore kanë pësuar tre prej tyre të cilët kanë pranuar trajtim mjekësor. Me vendim të prokurorit të gjithë të dyshuarit pas intervistimit janë dërguar në mbajtje”./PrizrenPress.com/

Përmbytjet e javës së kaluar janë përcjellë me dëme të konsiderueshme në bujqësi dhe në infrastrukturë, ndërsa problematike mbetet gjendja e digës dhe urës në liqenin në Mirushë. Kështu në mbledhjen e rregullt të së hënës, të Këshillit të Drejtorëve, të drejtuar nga kryetari i Komunës së Malishevës, Ragip Begaj. Përmbytjet ishin dhe tema kryesore e diskutimit në këtë mbledhje.

Në këtë mbledhje, për situatën e përgjithshme gjatë dhe pas përmbytjeve, ka raportuar zyrtari për emergjenca në Drejtorinë për Mbrojtje dhe Shpëtim, Halit Mazreku, sipas të cilit, sasia e ujit ka qenë shumë e madhe, si pasojë e reshjeve të mëdha të shiut, dhe ka dëme të konsiderueshme në bujqësi e në infrastrukturë. Është dëmtuar një rrugë në Guncat, në të cilën është dashur të intervenohet me urgjencë, pastaj rruga në Banjë, ndërsa në gjendje të rëndë mbeten diga dhe ura në liqenin në Mirushë. Sipas Mazrekut, janë evakuuar dhjetë familje, ku një prej tyre tashmë është zhvendosur në një fshat tjetër.

Për vlerësimin e dëmeve nga përmbytjet, kryetari i Komunës së Malishevës, Ragip Begaj, ka formuar edhe komisionin për vlerësimin e dëmeve të shkaktuar.

Në mbledhjen e sotme të Këshillit të Drejtorëve, drejtorët e drejtorive, kanë raportuar për punët dhe angazhimet e tyre gjatë javës së kaluar dhe angazhimet që i kanë planifikuar për javën në vijim. Sipas drejtorëve të drejtorive, është duke vazhduar realizimi i projekteve kapitale, sipas planifikimeve dhe pavarësisht kushteve atmosferike, projektet janë drejtë përfundimit.

Po ashtu në mbledhjen e sotme, u raportua edhe për përgatitjet për shënimin e 28 Nëntorit, Ditës së Flamurit Kombëtar Shqiptar.

Pas mbledhjes, Kryetari i Komunës së Malishevës, Ragip Begaj, bashkë me drejtorin për Mbrojtje dhe Shpëtim, Sejdi Paçarizi dhe drejtorin për Shërbime Publike, Milazim Morina, kanë vizituar digën në liqenin në Mirushë, për të parë nga afër gjendjen e digës, pas rënies së nivelit të ujit./PrizrenPress.com/

Kanë kaluar pothuajse një javë prej kur i është bërë ekspertiza trupit të të ndjerit Astrit Dehari, i cili vdiq në rrethana të dyshimta në burgun e Prizrenit.

Mirëpo, Prokuroria ende nuk ka informacione se kur do dalin rezultatet e shumëpritura të autopsisë, të aktivistit të Vetëvendosjes.

Prokurori i rastit, Sylë Hoxha në një prononcim për Indeksonline, ka thënë se janë duke punuar në drejtim të kësaj çështje.

“Ende nuk e di se kur dalin rezultatet jemi duke punuar në këtë drejtim, ne, ata edhe krejt. Për nder nuk e dimë”, ka thënë Hoxha.

Ndërsa, avokati Tomë Gashi duke iu drejtuar Hoxhës, ka theksuar se ai duhet të punojë më shumë në këtë drejtim.

“Pas këtij dështimi që e ka bërë prokurori dhe që i kanë rrjedh informatat ish dashtë më seriozisht me u marrë më këtë rast”, ka thënë Gashi.

Astrit Dehari vdiq më 5 nëntor përderisa po mbahej në paraburgim në burgun e Prizrenit, nën dyshimet se ka marrë pjesë në sulmin ndaj Kuvendit të Kosovës./Indeksonline

Avokati përfaqësues i familjes Dehari, Tomë Gashi, në rastin e vdekjes së birit të saj, Astrit Dehari, ka ngritur dyshime të padëgjuara deri tani për rrethanat e vdekjes së Deharit para nëntë dite në Qendrën e Paraburgimit në Prizren.

Gashi, tha se nuk do ta luaj rolin e disa mediave për të nxjerr shkaqet e vdekjes përpara ekspertizës së mjekësisë ligjore, por tha se rrethanat e vdekjes së tij janë shumë konfuze, duke thënë se Astriti nuk e pasur asnjë pikë gjak në fytyrën e tij, dhe se gardianët kanë mundur të aktrojnë kur janë kthyer të burgosurit nga shëtia. Sipas tij, Astrit Dehari është e mundur të ketë vdekur më herët se kur ka qenë koha e shëtisë.

Gashi ka konkulduar se Dehari nuk është vetëvrarë.

“E keni pa që Astritin e bartin të burgosurit dhe jo gardianët e as motrat medicinale. Unë e kam pa gjatë obduksionit se Astriti në fytyrën e tij nuk ka pasur asnjë pikë gjak në fytyrën e tij dhe nuk ka pasur asnjë njollë të gjakut. Po ashtu kemi pa një peshqir të madhësisë mesatare të mbuluar krejtësisht me gjak, po ashtu një sapun të përgjakur. Përvec kësaj, e gjithë dhoma ka qenë e mbushur me gjak. Kjo është e vetëspjegueshme se definitivisht Astriti nuk ka vdekë në atë periudhë kohore prej një ore, por me siguri shumë më herët dhe gardianët kanë aktruar në momentin kur janë kthy të burgosurit kinse atëherë e kanë pa”, tha Gashi.

Gashi tha se sot është dita e nëntë e vdekjes së Deharit dhe ende nuk ka rezultat preliminar e as përfunditmar mbi vdekjen e tij.

“Sot është dita e nëntë e vdekjes së Astritit. nuk kemi rezultat preliminar e as përfundimtar rreth vdekjes së tij”, tha ai.

Gashi tha se deklarata e komandantit të Policisë nuk ka qenë e rastësishme se ai ka vdekur nga barnat. Sipas tij, kjo deklaratë nuk është bërë pa një qëllim.

“Deklarata e Nexhmi Krasniqit nuk ka qenë e rastësishme se ka vdekë nga barnat. Nuk e ka thanë pa një qëllim”, tha avokati Gashi. /Periskopi/