Anila Brahaj nga Gjonaj i Hasit të Prizrenit, nesër niset për shërim në Turqi. Familjarët kanë njoftuar se paratë fillestare për trajtimin e Anilës, tashmë janë siguruar.

“Familja e Anila Brahajt ju falënderon nga zemra për kontributin tuaj për shërimin e Anilës”, shkruan familja Brahaj në llogarinë e saj në Facebook.

“Falënderojmë në veçanti furrtarët nga Hasi, këngëtarët dhe mediat, të cilët kanë dhënë një kontribut të çmuar”.

“Ju njoftojmë se falë ndihmës tuaj Anila nesër, më 19.03.2016, udhëton për shërim në Stamboll –Turqi”.

“Shuma fillestare e kërkuar është siguruar falë jush dhe Ministrisë së Shëndetësisë së Republikës së Kosovës”.

“Nga sot e tutje, familja Brahaj kërkon nga të gjithë qytetarët që të ndërpresin mbledhjen e mëtutjeshme të parave”.

“ Pra, askush nuk është i autorizuar të mbledhë më tutje para në emër të familjes së Anila Brahajt, as në rrjete sociale dhe askund tjetër në Kosovë dhe diasporë”.

“Shuma totale e mjeteve të dhuruara për shërimin e Anilës deri sot është 148.419.56 Euro”.

“Faleminderit të gjithëve për kontributin e dhënë”./PrizrenPress.com/

Një i moshuar ka tentuar të bëjë vetëvrasje, duke provuar të konsumoj pastrues kimik në shenjë proteste ndaj një vendimi të gjykatës.

Sipas dëshmitarëve prezent, policët nga Suhareka, B.K dhe R.B kanë shpëtuar plakun, duke ia pamundësuar veprimin e tij drejt vetëvrasjes, transmeton TherandaPost.

Ngjarja ka ndodhur përballë Komunës së Suharekës sot rreth orës 12:00

Sot është mbajtur tryeza me temën “Transparenca dhe llogaridhënia para publikut”, si aktivitet përmbyllës vjetor, që është organizuar nga Forumi ‘Transparenca’.

Anëtari i Forumit ‘Transparenca’, Hajrulla Çeku, tha se ky aktivitet përmbyllës përmbledh temat e diskutuara në kuadër të ciklit të debateve “Ballafaqim”, me një përqendrim në realizimin e premtimeve të dhënave gjatë kësaj periudhe, llogaridhënien para publikut për mos realizimin e tyre.

Më pas lidhur me temën e tryezës, ka qenë e zëshme në kritika ndaj pushtetit lokal rreth transparencës dhe llogaridhënies kuvendarja e LVV-së, Drita Millaku, duke thënë se këto çështje janë dëshmi e keqqeverisjes me Prizrenin.

Edhe kreu i degës së LDK-së në Prizren, Haxhi Avdyli, ka kritikuar pushtetin lokal për mungesë të transparencës dhe llogaridhënies, dhe ka kërkuar masa konkrete në zgjidhjen e shumë problemeve të cilat sipas tij dëmtojnë interesat e qytetarëve.
Ndërkaq, shefi i zyrës për informim në komunën e Prizrenit, Ymer Berisha tha se, pushteti lokal është transparent në punën e vet, “por ka edhe vend për përmirësime”.

Gjatë kësaj tryeze është shfaqur një material i përgatitur në të cilin janë përmbledhur problemet dhe sfidat e identifikuara nga pjesëmarrës të debateve televizive, si dhe premtimet dhe zotimet e zyrtarëve të institucioneve të ndryshme në zgjidhjen e shumë problemeve, të cilat sipas asaj që u tha në aktivitet ende nuk kanë marrë ndonjë zgjidhje të kërkuar. /TV Prizreni/

Landovica vazhdon të përballet me ndotje të vazhdueshme nga deponia mbi këtë fshat, kanë bërë të ditur të enjten banorët e këtij lokaliteti, nëpërmjet një reagimi.

Sipas tyre, me gjithë zërin protestues të banorëve, nuk janë marrë masa për ndalimin e ndotjes së mjedisit.

“Edhe pse banorët e fshatit Landovicë kanë ngre zërin për të protestuar ndaj ndotjes së përhershme nga deponia e vendosur mbi fshatin Landovicë, kjo dukuri tepër shqetësuese jo vetëm që nuk është ndërprerë nga organet kompetente, por ka vazhduar dhe vazhdon me një intensitet edhe më shqetësues”, thuhet në reagimin e banorëve.

Sipas shkresës së komunitetit, deri tashti ndotja e lumit të fshatit zakonisht ka ndodhur gjatë natës, ndërkohë që tashti kjo ndodh edhe në pikë të ditës dhe kjo pa u ndërprerë fare.

Drejtori i shkollës “Dëshmorët e Zhurit” në Zhur Bedri Hoxhaj është kundërpërgjigjur në reagimin e LDK-së në këtë fshat. Ai ka hedhur poshtë të gjitha akuzat që LDK-ja i ka bërë në drejtim të tij.

Hoxhaj ka sugjeruar LDK-në në Zhur që të merrt me vetveten dhe të qëndrojë larg institucioneve shkollore.

Reagimi i plotë dhe pa ndërhyrje

Reagojmë njëherit njoftojmë opinjonin dhe vet subjektin LDK. Dega në Zhur lidhur me komunikatën me të cilën hedh akuza në adresë të Drejtorisë së SHFMU. “Dëshmorët e Zhurit” në Zhur, se këto akuza janë të pa qëndrushme, të pa bazëdhe tendencioze që adresohen Drejtorisë së kësaj shkolle. Njoftojmë opinjonin dhe këtë subjekt politik, në lidhje me kërkesën e prindërve të nxënësve të lagjes “Gurishte”, se ne si shkollë gjegjësisht Këshilli Drejtues i Shkollës ka shqyrtua disaher kërkesën e këtyre prindërve dhe ka marr dy vendime. Vendimi i parë mban datën 02.09.2015 drejtuar DKA. në Prizren me kërkesë të siguroj transportin për nx. e lagjes Gurishte të fshatit Zhur. KDSH. ka marr vendim që të participoj nga buxheti i shkollës për ti hequr një pjesë të shpenzimeve të udhëtimit. Gjithashtu KDSH. në mbledhjen e radhës të mbajtur me datë06.01.2016 sërisht ka shqyrtuar kërkesën e këtyre prindërve dhe ka rikonfirmuar vendimin e saj që të participoj nga buxheti i shkollës për heqjen e një pjese të shpenzimeve të udhëtimit në shumë prej 1000 €. Me datën 08.01.2016 ju kemi drejtuar DKA. dhe kemi kërkuar që edhe DKA. të participo dhe kështu bashkarisht të gjejm zgjidhje të kësaj kërkese.

Pra, ju njoftojmë se ne si shkollë, si KDSH. dhe Drejtoria e shkollës jemi solidarizu dhe kemi nda mjete nga buxheti i shkollës për tu dalë ndihmë në zgjidhjen udhëtimit të këtyre nx. edhe pse ligjërisht nuk kemi patur obligim …dhe jemi ndoshta e vetmja shkollë jo vetëm në Komunën e Prizrenit por edhe në nivel të Republikës së Kosovës që kemi ndar mjete nga buxheti i brendshëm i shkollës për heqje të shpenzimeve të nx. udhëtar. Edhe këtë, bazuar në LIGJIN nr. 04/L-032, LIGJIT PËR ARSIMIN PARAUNIVERSITAR TË REPUBLIKËS SË KOSOVËS, jo vetëm si shkollë por as edhe Komuna e Prizrenit nuk është e obliguar ti heq shpenzimet e udhëtimit për nx.( vetëm në raste të veçanta, sipas Ligjit) sepse këta nx. gjenden brenda perimetrit më pak se 4 km . larg nga shkolla në njerën anë, dhe në anën tjetër këta nx. shkollën ma të afërt kanë shkollën e Shkozës në largësi perj 50- 200 e më së largu 300 metra… (Për këtë çashtje kemi edhe vlerësimin e Inspektorjatit të Arsimit)

Sa i përket KONKLUZIONIT të Bordit të Drejtorëve me numër 01/06-7757 të datës 19.01.2016 dhe të zbatimit të këtijë konkluzioni, Drejtoria e shkollës nuk ka të drejtën ligjore të hap tenderin për bartjen e nx. Këtë të drejtë e ka DKA. gjegjësisht Zyra e Prokurimit.(Hapjen, mbyll dhe përcaktimin e fituesit të tenderit) …
Po ta kishim këtë të drejtë ligjore atëher ne mbajmë përgjegjësinë… si KDSH. dhe Drejtori e shkollës.
Ajo që edhe pajtohemi është tejzgjatja e kësajë lënde…
I bëjmë thirrje LDK. Dega në Zhur të merret me punët e veta … dhe të qëndroj larg institucionit shkollor!

Pas më shumë se dy vjetësh rifilloi gjykimi i 7 të akuzuarve për rrëmbimin e djalit të biznesmenit “Beska”.

Për shkak se në këtë çështje penale është ndërruar kryetari i trupit gjykues, shqyrtimi gjyqësor rifilloi nga e para.

Pas leximit të aktakuzës së prokurorisë të gjithë të akuzuarit u deklaruan të pafajshëm.

Fjalën hyrëse në këtë proces gjyqësor e dha prokurorja Ervehe Gashi, ndërsa avokati Bashkim Nevzati që mbron Selam Shoshajn, kërkoi shtyrjen e kësaj seance, për shkak se siç tha ai trupi gjykues kishte planifikuar që të mbajë vetëm seancë teknike për sot.

Kërkesës për shtyrje të përmendur nga avokati Bashkim Nevzati iu bashkuan edhe shumica e mbrojtësve të të akuzuarve.

“Ky rast njëherë është ndërprerë për shkaqe objektive ngase është dashtë të sigurohen disa prova, po në ndërkohë ka ardhë deri te ndërprerja ma e gjatë për shkak të objektivitetit cili është i lidhur me trupin gjykues. Prandaj pas dy vjetësh ndoshta edhe më shumë, rifilloi sot, por ne, përkatësisht mbrojtja për sot nuk ka qenë e përgatitur për ndonjë vazhdim të matutjeshëm, për arsye se çështja është shumë serioze dhe kërkon një përgatitje serioze paraprake,” tha avokati Nevzati.

Trupi gjykues e aprovoi kërkesën e avokatit.

Seancat e radhës u caktuan për datat 21 dhe 22 prill 2016.

Sipas aktakuzës së prokurorisë, më 14 shtator të vitit 2011 në bashkëkryerje shtatë të akuzuarit kanë rrëmbyer të birin e biznesmenit Mërgim Shkreli, Gentianin, i cili ditën kritike ishte duke e përcjellë të dashurën e tij për në banesë.

Pas ndarjes nga e dashura, sipas aktakuzës, Gentiani rrëmbehet nga Bashkim Krasniqi dhe Selami Shoshaj me një makinë “pick-up”. Ata e kishin futur viktimën mbrapa në rimorkio duke ia mbyllur sytë, me qëllim që të mos ua shohë fytyrat dhe e kishin dërguar në vendin e quajtur Marash.

Aty Gentian Shkrelin e kishin mbajtur të mbyllur deri më 17 shtator 2011, në një shtëpi në Rrugën e Kalasë.

Prokuroria bën të ditur se të akuzuarit për lirim i kërkuan babait të Gentianit 100 000 euro. Mërgim Shkreli pastaj paratë e kërkuara ia kishte dhënë një personi të maskuar që pasi i kishte marrë paratë ishte larguar me shpejtësi drejt kalasë.

Në të njëjtën kohë Gentian Shkreli ishte liruar.

Aktakuza e prokurorisë i ngarkon Selam Shoshajn në atë kohë 24-vjeçar dhe dajën e tij Bashkim Krasniqin 48 vjeç të njohur me pseudonimin “Mjekra” që nga lufta e UÇK-së, se në bashkëkryerje kanë kryer veprën penale rrëmbim i personit.

Ndërsa mbi të akuzuarit Besim Paçarizi, 29 vjeç, Beqir Dangallaj, 47 vjeç dhe Fatmire Rexhëbeqaj, 32 vjeç që të tre të punësuar në Policinë Rajonale në Prizren aktualisht të suspenduar për shkak të procesit gjyqësor, rëndojnë akuzat për kryerje të veprës penale ndihmë në bashkëkryerje të rrëmbimit të personit.

Ndërsa të pandehurve Shukri Krasniqi dhe Leonard Veshalli, aktakuza për veprën penale të rrëmbimit u është ngritur më vonë, në bazë të dëshmisë së Enes Xhemës, i cili ka qenë po ashtu i pandehur për këtë rast dhe i dënuar me gjashtë muaj burgim për armëmbajtje pa leje.

Ky gjykim ishte gati në përfundimin e procedurës së provave, mirëpo në vitin 2013 kryetarit të trupit gjykues Xhevdet Elshanit, iu keqësua gjendja shëndetësore dhe nga ajo kohë nuk është mbajtur asnjë seancë gjyqësore./kallxo.com/