Ka mbaruar autopsia e gjashtë viktimave nga rrëzimi i avionit më 6 shtator në afërsi të Shkupit. Bazuar në raportin e Institutit për Mjekësi Ligjore në Shkup, asnjëri nga viktimat nuk ka pasur djegie në trup dhe se vdekja ka qenë momentale.

Nga Prokuroria Publike njoftojnë se ka filluar faza e identifikimit të trupave. Rreth shkaqeve të rrëzimit hetuesia thotë se është herët të flitet, por informon se nga vendi i ngjarjes janë tërhequr mbetjet dhe po vazhdojnë hetimet.

“Prokuroria Themelore e Shkupit i ka pranuar të gjitha lëndët e nevojshme dhe dëshmitë të cilat do të shërbejnë si prova për të vërtetuar arsyet e fatkeqësisë ajrore. Lënda është në procedurë dhe nevojitet kohë për të konstatuar shkaqet e rrëzimit të avionit”, thanë nga Prokuroria.

Gjatë ditës në Shkup arritën edhe familjarët e viktimave nga Italia. Të njëjtit i janë nënshtruar analizave të ADN-së, me qëllim identifikimin e të afërmve të tyre. Nga Ambasada e Kosovës në Shkup thonë se kanë bërë kërkesë që trupi i Visar Begaj të dërgohet në Kosovë.

“Ambasada ka ndërmjetësuar në mes familjarëve Begaj dhe Ambasadës italiane në Shkup dhe ka dërguar notë verbale pranë institucioneve të Maqedonisë për të shprehur dëshirën e familjarëve që trupi i pajetë i Visar Begaj të varroset në Kosovë”, deklaruan nga Ambasada e Kosovës në Shkup.

Ndërkohë Alsat-M kontaktoi edhe me Ambasadën e Italisë në Shkup e cila konfirmoi se trupi i Visar Begaj do të kthehet në Kosovë.

“Jemi në kontakt të vazhdueshëm me institucionet e Maqedonisë. Pas përfundimit të procedurave ligjore dhe rregullimit të dokumentacionit, trupat e pesë viktimave do të dërgohen në Itali ndërsa trupi i viktimës Visar Begaj në Kosovë”.

Referuar medieve italiane, fatkeqësia ka ndodhur si pasojë e motit të ligë dhe mjegullës së madhe dhe se institucionet italiane paralajmërojnë hetim të ri të rastit. Avioni u rrëzua disa minuta pas humbjes nga radarët e kontrollit të fluturimeve civile të aeroportit të Shkupit./alsat-m

Fshati Gorozhub është fshat në kufirin Kosovë-Shqipëri, buzë Pashtrikut. Ky fshat identifikohet me malin Pashtrik. Sipas historianëve, rrëzës së këtij mali kanë jetuar dikur fiset ilire, Pirustët dhe Dardanët.

“Në mesin e shumë trashëgimive është edhe emri i malit Pashtrik, pastaj mali Perges ku gjendet shpella e Dajçit, ku në vitin 1985/87 janë bërë gjurmime arkeologjike nga ana e arkeologëve të Shqipërisë dhe janë gjetur shumë materiale arkeologjike, që flasin se kjo shpellë dikur moti ka qenë vendbanim i njohur”, pohon studiuesi Nexhat Çoçaj.

Dikur ky fshat ishte mjaft i banuar, po nga përfundimi i Luftës së Dytë Botërore, me shtimin e dhunës së regjimit serb, nis edhe shpërngulja e popullsisë. Besohet se janë mbi 150 familje të këtij fshati që jetojnë kryesisht në Prizren.

“Aktualisht, fshati ka 30 familje, të cilat jetojnë me kushte të rënda, por vështirë se dikush pranon të rikthehet atje”, thotë Çoçaj.

Lidhjet me Shqipërinë

Banorët e mbetur të fshatit ankohen për kushtet e këqija. Kryetari i fshatit Shani Tanaj, tregon se mungon uji i pijshëm.

“Problemet janë aq të mëdha, saqë tashmë s’kemi ujë, s’kemi as kanalizimet e kryera. Por, është edhe një problem tjetër, është rruga nga Mazrreku. Atje nuk ka asnjë mbikëqyrje dhe ato gropa të krijuara nuk po mbulohen”, ka thënë Tanaj.

Ai shprehet se kanë lidhje martesore me pjesën e fshatrave përtej kufirit. Por, sipas tij, në të kaluarën ishte e vështirë jeta në kufi, sepse edhe survejimi nga shteti ishte i madh.

“Për plot 50 vjet kemi kuptuar fatin e njëri- tjetrit vetëm përmes këngëve që kemi kënduar në arat tona. Ngase kufiri nuk ishte i hekurt, por ishte i gjakosur me gjakun e shumë shqiptarëve. Bile, edhe raste e vdekjeve ia kumtonim njëri -tjetrit përmes këngës”, pohon kryetari Tanaj.

Sipas tij, ende padrejtësisht janë të ndara lagjet Mariq edhe Pogaj.

“Këto lagje u ndan nga fshati Gorozhub dhe vazhdojnë të jenë të ndara. Por, tani miqësia e lidhur ka bërë që gradualisht ky fshat të ribashkohet. Në brezin kufitar në dekadën e fundit janë bërë 107 martesa, kryesisht në fshatra Gorozhub, Planejë, derisa tutje kufirit shqiptaro- shqiptar janë fshatrat Domaj, Pusi i Thatë, Kishaj që nuk janë më larg se 2 km larg njeri prej tjetrit”, na thotë Tanaj.

Beteja e Gorozhubit, e njohur në gjithë Kosovën

Edhe studiuesi hasjan, Nexhat Çoçaj shpjegon se në këtë dekadën e fundit janë ngjallur miqësitë e vjetra në Domaj, në Cahan, në Xhikaj që martohen me hasjanët e Kosovës.

“Kështu tani atje duket se gradualisht ai kufi artificial po shkrihet”, shprehet Çoçaj.

Sipas tij, për shkak të kushteve gjeografike, 21 nxënës të fshatit Dobrunë të Shqipërisë vazhdojnë mësimin në shkollën fillore të Godenit të Kosovës.

Kurse, Halil Shehu, drejtor i shkollës “Vëllezërit Frashëri” në Gorozhub e Planejë, shpjegon se në paralelen e Gorozhubit nga klasa e parë deri në të katërtën janë 34 nxënës. Banorët tregojnë se banorët e fshatrave të Shqipërisë janë të lidhur me Prizrenin dhe këto fshatra.

“Ata vetëm brenda 20 minutash vijnë deri këtu ku nis asfalti dhe tregtinë e bëjnë me Prizrenin”, shprehet një i moshuar.

Avdullah Tejeci, ish-banor i këtij fshati që tani banon në Prizren, pohon se atje kanë ende pasurinë, por atje vështirë jetohet. Ai kërkon që të krijohen kushte më të mira dhe për këtë, sipas tij, duhet dora e pushtetit lokal.

“Qeveria e ka ndërtuar dhe asfaltuar rrugën deri atje, por ajo rrugë kërkon mirëmbajtje”, ka thënë Tejeci.

Avdi Ibrahimi, ish-zëvendëskomandant në Brigadën 128 të UÇK-së, tregon se në maj të vitit 1999 kishin urdhër për sulm në hapësirën kufitare të Gorozhubit. Beteja e Gorozhubit ishte beteja më e njohur e luftës së fundit dhe përmendet edhe nga autorë të huaj. /Kosova Sot/

Një kabllo e cila ndihmonte që të funksionin pompat e ujit në fshatin Maxharrë të Malishevës, u bë shkaktar që të arrestohen 2 banorë të këtij lokaliteti.

Arsyeja është se Selajdin e Bekim Kastrati, morën këtë kabllo për shtëpinë e tyre të re, të cilën janë duke e ndërtuar, njofton Klan Kosova.

Gjithashtu ata kërcënuan me armë policit që shkuan tek shtëpia e tyre që tu thojnë ta kthejnë përçuesin i cili u mor pa leje.

Selajdin Kastratit iu shqiptua masa e paraburgimit për një muaj kurse vëllait të tij Bekimit, masa e arrestit shtëpiak për një muaj.

Por akuzat e tilla i kanë mohuar familja Kastrati. Nëna e të arrestuarve ka thënë se kablloja u mor me leje.

Ulëset e deputetëve të AAK-së dhe Nismës nga 13 shtatori më nuk do të jenë të zbrazëta.

Pas rreth 7 muajve bojkot, përveç seancave solemne, deputetët e këtyre partive kanë vendosur t’i kthehen jetës institucionale.

Ata kanë theksuar se tash e tutje deputetët e dy partive opozitare do t’u kthehen punimeve, jo vetëm në seancat plenare, por edhe mbledhjeve të komisioneve parlamentare.

Pas procedimit të demarkacionit në Kuvend, të dy partitë opozitare thonë se nuk kanë më arsye për të vazhduar bojkotin.

“Nisma për Kosovën në vazhdimësi ka deklaruar se në momentin që marrëveshja për demarkacionin të vijë për shqyrtim ne do të kthehemi në Kuvend dhe ashtu kemi vepruar. Nga ajo ditë ne do të vazhdojmë të jemi pjesë e punës së kuvendit”, ka thënë Valdete Bajrami, shefe e Grupit Parlamentar të Nismës.

E Pal Lekaj, shef i Grupit Parlamentar të AAK-së, ka treguar se kundërshtimi i tyre do të bëhet nëpërmjet votave, e jo gazit lotsjellës apo formave tjera që u përdorën më parë nga këto parti.

Te dy subjektet opozitare, që tashmë kanë lidhur koalicion mes vete, që nga inaugurimi i Hashim Thaçit si president i vendit, kishin vendosur bojkotimin e institucioneve të vendit, si shenjë pakënaqësie me koalicionin qeverisës, e sidomos nënshkrimin e dy marrëveshjeve, atë të Demarkacionit dhe Asociacionit.

Fillimisht pjesë e bojkotit të opozitës ishte edhe Lëvizja Vetëvendosje, por ajo u kthye në Kuvend më 6 qershor, pasi kishin vlerësuar se duke qëndruar jashtë Kuvendit nuk po arrinin t’i kundërshtonin dy marrëveshjet, sipas tyre, të dëmshme për Kosovën.