Drejtori i Arsimit në Prizren, Zehadin Shemsedini është duke u hetuar për keqpërdorim të detyrës zyrtare për kohën sa ka qenë Ushtrues i Detyrës në Universitetin e Prizrent. Ai dyshohet se kundërligjshëm ka angazhuar djalin e tij, si asistent në këtë universitet.

Angazhimi i djalit të tij, ka ndodhur në vitin 2014.

Inspektorati i Arsimit në Prizren(SIA), rastin e ka lajmëruar në organet e drejtësisë.

Lënda e SIA-s, deri më tash nuk është trajtuar nga organet e drejtësisë.

Burimet e “PrizrenPress”-it bëjnë të ditur se kanë filluar hetimet ndaj drejtorit të sapozgjedhur të Arsimit në Prizren, Zehadin Shemsedini.

Kryeprokurori i Prokurorisë Themelore në Prizren, Sylë Hoxhaa, ndërkaq nuk ka pranuar të flasë rreth kësaj cështjeje. Ai as nuk e ka mohuar, por as pohuar se janë duke u zhvilluar hetimet ndaj Shemsedinit.

“Kur ka diçka të re ju informojmë sic kemi bërë deri më tash për rastet e tjera”, tha shkurt Hoxha për “PrizrenPress”.

Në mars të vitit 2014-të në UPZ është pranuar djali i ish-Ushtruesit të Detyrës së Rektorit, Zehadin Shemsedini, pa i përmbushur kriteret profesionale.

Djali i Zahedinit, Afrim Shemsedini ishte angazhuar në lëndën e statistikës.

Ai, në atë kohë ka pranuar për media se është angazhuar në UPZ.

“Nuk besoj që ka pasur ndonjë ndikim baba në përzgjedhjen time. Ma merr mendja që nuk ka pas . Ata që kanë hap konkurs e dinë se a ka pasur ose jo”, pati deklaruar Afrimi.

Ndërkaq, Zehadin Shemsedini kishte pranuar se djali i tij është angazhuar si asistent në këtë universitet, por ka mohuar se ka ndikuar në përzgjedhjen e tij.

“Angazhimet i ka bërë Fakulteti Ekonomik, jo unë. Angazhimin e bën fakulteti, dekanati i fakultetit. Ndërsa unë i nënshkruaj kontratat për të gjithë dhe jo vetëm për atë. Angazhimin e bëjnë ata, ndërsa unë i nënshkruaj”, pati thënë ai.

Zehadin Shemsedini, muajin e kaluar, është emëruar drejtori i Drejtorisë së Arsimit në Prizren. Emërimi i tij është bërë në kuadër të reformimit të Qeverisë së Ramadan Mujës./PrizrenPress.com/

Një person ka humbur jetën në Opterushë të Rahovecit pasi ka rënë në një humnerë me ekskavatorin me të cilin ishte duke punuar.

Një ngjarje tragjike ka ndodhur dje në fshatin Opterushë të Rahovecit, ku një person ka humbur jetën pasi ka rënë në një humnerë me ekskavatorin me të cilin ishte duke punuar.

Sipas Policisë, ngjarja ka ndodhur rreth orës 15:40.

Në raportin e saj të përditshëm Policia njofton se viktima teksa ishte duke punuar nga pakujdesia ka humbur kontrollin mbi makinën punuese – bager dhe ka përfunduar në një humnerë jashtë rruge.

“I njëjti si pasojë ka pësuar lëndime vdekjeprurëse. Në vendngjarje kanë dalë njësitë përkatëse policore dhe ekipi mjekësor i cili ka konfirmuar vdekjen e viktimës. Me vendim të prokurorit trupi i pajetë është dërguar në Institutin e Mjekësisë Ligjore për Obduksion”, thuhet në raportin e Policisë.

Njësitë policore janë duke hetuar rastin, të cilin po e trajtojnë si vdekje aksidentale.

FOTOGRAFIA: ILUSTRIM

Në rrugën “Wesley Clark” në Prizren, mbrëmë rreth orës 21 e 10 minuta një grup qytetarësh prej 8-10 veta kanë dëmtuar pengesat e betonit nëpër trotuare të vendosura nga Kuvendi Komunal, thuhet në raportin e Policisë, shkruan PrizrenPress.

Me tej, në raport thuhet se të njëjtit janë shoqëruar në polici dhe pas intervistimit me vendim të prokurorit janë liruar në procedurë të rregullt. /PrizrenPress.com/

Policia e Kosovës ka njoftuar se në Prizren është arrestuar një mashkull i nacionalitetit rom, pasi që i njëjti ka kanosur verbalisht një zyrtar Komunal për Komunitete, shkruan PrizrenPress.

Në njoftim të Policisë thuhet se me vendim të prokurorit i dyshuari pas intervistimit është dërguar në mbajtje. /PrizrenPress.com/

Kryetari i Organizatës së Veteranëve në Prizren, Selim Krasniqi, duke folur për “Kosova Sot” ankohet në veprimet e pasluftës të disa bashkëluftëtarëve.

“Ata u bënë matrapazë dhe e shitën luftën, e shitën gjakun e shokëve tanë”, ka thënë Krasniqi.

Ai ka ankesa në nivelin qendror se nuk ka bërë asgjë për të pagjeturit.

“Në Jeshkovë, nëntë janë varrosur, kurse 11 janë të pagjetur dhe deri në tani,18 vjet pas lufte asgjë nuk dihet për fatin e tyre. Por, populli u ka dhënë përgjigje të qartë e të saktë atyre politikave. Nuk ishte dorëzuar në vitet e 1980-ta dhe as në vitet e luftës. Nuk dorëzohet as tash. Nuk do të dorëzohen kurrë. Populli i Kosovës di të vlerësojë saktësisht të mirën e të keqen. Di të orientojë fuqitë e veta për të mbrojtur e për të zhvilluar Kosovën. Për të siguruar që askush nuk mund të luajë me fatin e popullit, me fatin e Kosovës”, shprehet ai.