Edhe pse Gjimnazi “Hamdi Berisha” në Malishevë ka të punësuar katër psikologë, nga të cilët dy punojnë me gjysmë norme, atje është punësuar pa konkurs për t’i kryer detyrat e psikologut edhe miku i Fatmir Limajt, Hafir Xhyliqi

Ndonëse në Gjimnazin “Hamdi Berisha” në Malishevë janë të punësuar katër psikologë, nga të cilët dy punojnë me gjysmë norme, Drejtoria Komunale e Arsimit në këtë komunë ka punësuar edhe psikologun e pestë pa shpallur fare konkurs.

Burime të gazetës “Zëri” kanë thënë se në këtë shkollë është punësuar Hafir Xhyliqi, miku i Fatmir Limajt, kryetarit të subjektit politik “Nisma për Kosovën”, i cili subjekt udhëheq me Komunën e Malishevës.

Edhe pse në shkollë punojnë psikologët, Eshref Zogaj dhe Avni Ibrahimi, me vetëm gjysmë norme, kurse Arbnora Halili dhe Bislim Hoti kanë normë të plotë pune, DKA-ja e Malishevës ka gjetur mënyrën për t’i bërë një punë edhe Xhyliqit.

Prindërit nuk e duan Xhyliqin për psikolog të fëmijëve të tyre

Për shkak të ndikimit që ky ka në Malishevë prindërit hezitojnë të flasin me emër, por ka të tillë që kanë dyshime në profesionalizmin e tij dhe nuk e duan për psikolog shkolle.

“Flitet se atij nuk i është vazhduar kontrata në Aeroportin e Prishtinës për shkak të disa dyshimeve që rëndojnë mbi të. Dhe, nuk do të doja që një person i tillë të jetë psikologu i vajzës sime në shkollë”, ka thënë një prind, emri i të cilit është i njohur për redaksinë.

“Ne vetvetiu ndajmë një emocion të veçantë si familje, si unë ashtu edhe nëna ime dhe vëllai Armendi. Është kjo festë që i gëzohemi të gjithë prizrenasit dhe shqiptarët kudo që janë”, thotë Dafina Drini

Ballkani i ka dy shtete shqiptare, por që të dyja rrënjët i kanë në Prizren. Ymer Prizreni bashkë me burrat e tjerë të kombit më 1878 mbajtën Kuvendin e Prizrenit, që synonte autonominë shqiptare nga Perandoria Osmane. Në këtë tetëvjetor të pavarësisë ne takuam një nga trashëgimtaret e kësaj familjeje që bëri historinë. Është kjo Dafina Drini-Hoxha, e cila rrëfen për trungun familjar, për mbajtjen gjallë të frymës patriotike, për ndjenjat e saj dhe të familjes së saj me rastin e përvjetorit të tetë të shtetësisë së Kosovës.

Dafina Drini-Hoxha, stërmbesë e Ymer Prizrenit, shpjegon faktin se Ymer Prizreni kishte vetëm dy vajza, njëra prej tyre ka vdekur në Turqi dhe nuk ka lënë pasardhës e tjetra në Prizren, por nuk ka lindur fëmijë. Ne ishim në një vizitë në familjen Drini në prag të festës. Dafina Drini-Hoxha është e bija e Ahmet Drinit, i cili tani e një vit më parë është ndarë nga jeta. Ajo rrëfen e ka mbajtur shënime e për ato që i ka treguar babai i saj, Ahmeti.

“Ai na shpjegonte se ishte një burrë trupgjatë, me mollëza të qitura dhe mbi të gjithë ishte myderriz, që për kohën e tij ishte personalitet i shkolluar”, na tregon Dafina.

Kjo familje kishte shumë mësues të fesë që njiheshin atëherë si myderrizë, dhe krahas fesë ata mbollën edhe farën e atdhedashurisë. Por, kjo familje la gjurmë edhe në fusha të tjera. Kështu vëllai i Ymer Prizrenit ndërtoi penën e parë mbi Lumbardhë që mos të vërshohet qyteti.

Ky ishte Aliu dhe për këtë prizrenasit në shenjë nderimi këtë familje e quanin Aliu dhe po kështu me vite pastaj familja e barti këtë mbiemër. Kështu kjo familje ka bartur disa mbiemra gjatë dekadave. Ajo njihet edhe si familja Drini, për faktin se kishin çifligun e tyre në Nashec bri Drinit të Bardhë, mbiemër të cilin e mori në vitin 1945.

“Ishin ato kohë të ngjarjeve të furishme të Lidhjes Shqiptare të Prizrenit”, rrëfen Dafina për kujtimet e familjes së saj.

Ajo rrëfen se Haxhi Ymer Prizreni ishte martizuar në Ulqin, kurse gruaja e tij, Fatimeja, me vajzat Ajshja dhe Shefkinazja ishin internuar në Izmir të Turqisë dhe pas gjashtë vitesh ishin kthyer sërish.

“Ajshja pas vdekjes së nënës dhe të shoqit ka jetuar e vetmuar në shtëpinë atërore, në mbikëqyrjen e gjyshit tim”, pohoi ajo./Kosova Sot/

Gjykata e Nishit dënoi dje ish-eprorët e UÇK-së, në mungesë, për veprën e ashtuquajtur, vrasjen e ushtarëve serb në luftën e Koshares, në kufirin Kosovë-Shqipëri.

Në mesin e të dënuarve ishte edhe Anton Quni, tash deputet i LDK-së, që ishte pjesëmarrës në luftën e Koshares.

Quni tha për Indeksonline se dënimet e shpallura nuk kanë të bëjnë fare me drejtësinë por me përdorimin politik të drejtësisë dhe të dënimeve në raport me Kosovën.

Madje, sipas tij, një nga përdorimet ka të bëjë pikërisht me implikimin e institucioneve ndërkombëtare, siç janë INTERPOL dhe EUROPOL, në kuptimin e kufizimit të lëvizjes në shtete të ndryshme.

Quni shpreson se Qeveria e Kosovës do të gjejë mënyra për të qartësuar pozicionin e tyre në raport me këto dënime.

“Konsideroj se Qeveria e Kosovës do të gjejë mënyra për të qartësuar pozicionin tonë në raport me këto dënime. Nëse kemi parasysh kohën kur janë shpallë këto dënime, nuk mund të mos kenë ndërlidhje me synimet e Kosovës për t’u anëtarësuar pikërisht në INTERPOL dhe në EUROPOL, duke dëshmuar kështu vazhdimësinë e angazhimeve për të penguar anëtarësimin e Kosovës në organizata dhe institucione ndërkombëtare, në kundërshtim me Marrëveshjen e 19 prillit 2013” , tha Quni për Indeksonline.

Më tutje deputeti i LDK-së tha se ngjarja për të cilën janë ngritur akuzat dhe janë shpallë dënimet nga gjykatat serbe, ka ndodhur në shtator 1998, pra në kushtet e luftës së UÇK-së ndaj forcave serbe, dhe ka qenë e drejtuar kundër këtyre forcave, e jo ndaj popullatës serbe.

Pasi që në këtë aksion nuk ka pësuar asnjë qytetar serb dhe askush që nuk ka qenë i përfshirë në luftime, Quni tha se aksioni ka qenë në përputhje me çdo konventë dhe normë ndërkombëtare për luftën prandaj kjo nuk përbën bazë për gjykim dhe dënim.

“Me këto dënime, Serbia ka treguar se trajton krime edhe aksionet e mirëfillta ushtarake ndërmjet forcave ushtarake armike, kurse nuk i quan krime operacionet e organizuara policore dhe ushtarake ndaj popullatës civile shqiptare. Serbia shpallë dënime ndaj shqiptarëve për operacione ndaj forcave të organizuara serbe, kurse ngre zërin kundër dënimeve të serbëve për krime ndaj popullatës civile shqiptare, si në rastin e dënimit të Oliver Ivanoviqit” , tha Quni. /Indeksonline/

Imami Irfan Salihu është akuzuar për një vepër të amnistuar nga Kuvendi i Kosovës. “Nxitja e urrejtjes, përçarjes ose mos durimit kombëtar, racor, fetar apo etnik”, është në mesin e veprave të amnistuara. Ligji parasheh amnisti për veprat e kryera deri më 20 qershor 2013. Salihu akuzohet se veprën e ka kryer në mars të vitit 2013. Prokurori thotë se do ta tërheq aktakuzën. Arsyetohet se nuk e ka ditur këtë.

Shteti e ka akuzuar imamin Irfan Salihu, për një vepër që ligjërisht është e amnistuar tri vjet më parë.

Ligji për Amnisti i miratuar në korrik të vitit 2013, mes 90 veprave penale, amniston edhe “ Nxitjen e urrejtjes, përçarjes ose mos durimit kombëtar, racor, fetar apo etnik e sanksionuar me nenin 147 të Kodit Penal.

Për këtë vepër akuzohet Salihu.

Të martën, Prokuroria Themelore në Prizren, ka njoftuar se ka ngritur aktakuzë kundër imamit të Prizrenit për shkak se në mars të vitit 2013, “ka nxitur dhe ka përhapur publikisht urrejtje, përçarje ose mos durim midis grupeve kombëtare, fetare etnike apo grupeve tjera që jetojnë në Republikën e Kosovës”.

Salihu akuzohet se me ligjëratën e tij “si ta shtojmë bereqetin”, ka theksuar se “në periudha të ndryshme gjatë pushtimit të perandorisë osmane në trojet tona kanë qenë 1 % shqiptar…, e shajnë atë myslimanë që ju ka dhënë me hektar tokë dhe i ka sjellë për të jetuar në Kosovë… i ka bërë sundimtarë të Ballkanit”.

Këtë ligjëratë në xhami, Imami Salihu e ka mbajtur në muajin mars 2013, saktësisht tre muaj brenda afatit të amnistisë.

Ligji për Amnistinë rregullon kushtet dhe procedurën me të cilën jepet amnisti për personat të cilën janë dënuar për një vepër penale, personat të cilët janë nën ndjekje penale për vepra penale, apo personat të cilët mund të jenë objekt i ndjekjes penale për veprat penale të kryera para 20 qershorit 2013 brenda territorit që tani përbën Republikën e Kosovës.

“Të gjithë kryesve të veprave penale të listuara në nenin 3 të këtij ligji të cilat janë kryer para datës 20 qershor 2013 u jepet lirim i plotë nga ndjekja penale apo nga ekzekutimi i dënimit, në përputhje me kushtet e parapara me nenin 3 të këtij ligji”, thuhet në Ligj.

Kësisoj, mundi për të kryer hetime, koha dhe shpenzimet shkojnë huq për shkak të ngritjes së një aktakuze të paligjshme.

Autori i aktakuzës, prokurori Beqë Shala ka thënë se nuk e ka ditur se vepra është e amnistuar. Në një bisedë me telefon, ai ka thënë se do ta shikojë rastin dhe do të heq dorë nga aktakuza. Nuk e ka përjashtuar mundësinë që të humb kohë edhe më shumë – duke e dërguar aktakuzën në Gjykatë dhe gjykata të marrë vendim për hedhjen poshtë të saj.

“Tash ka mundësi ligjore që në momentin kur të caktohet seanca të eliminohet edhe kjo. Të shohim tash se si thuhet decitivisht në ligj. Nuk kam kurrgjë personale”, ka thënë prokurori Shala për Insajderin.

“Kemi një kallëzim penal, veprime inkriminuese ka pas, nëse del ajo që është i përfshirë në amnisti, amnistohet edhe kaq. Normal që prokurori nuk ka çka me ba aty”, ka thënë ai.

Ligji i Amnistisë ishte miratuar në Kuvend pak kohë mas marrëveshjes së Brukselit mes Kosovës dhe Serbisë. Ndër kushtet e marrëveshjes ishte edhe ky ligj.

Në fillim, Ligji amnistonte vetëm serbët. Por, pas një interpretimi të Gjykatës Kushtetuese, ligji ishte bërë gjithëpërfshirës dhe ju jepte amnisti të gjitha komuniteteve në Kosovë, përfshirë shumicën shqiptare.

Kryeprokurori i Prokurorisë së Prizrenit, Sylë Hoxha, ka thënë se nuk mund t’i kontrollojë të gjitha aktakuzat. Për këtë arsye i ka ikur kjo aktakuzë me këtë lëshim.

Imami Irfan Salihu kishte mohuar se ka kryer vepër penale kur është marrë në pyetje nga organet e shtetit. Ishte arsyetuar se deklaratën për përqindje të shqiptarëve e ka mbështetur në një “tezë shkencore” të orientalistit Hasan Kaleshi, të lexuar në Kongresin Ndërkombëtar në Stamboll për Turkologjinë në vitin 1973.

Në deklaratën e dhënë në Prokurori më 11 nëntor të vitit të kaluar, Salihu ka mbrojtur ligjëratën e tij se Perandoria Osmane ka sjell të mira në Kosovë.

Ka thënë se gjatë ligjëratës “si ta shtojmë bereqetin” ka potencuar se ardhja e Osmanlinjve në Ballkan, shqiptarët i ka bërë agallarë.

“Ashtu e shoh unë. Këtë na e ka bërë pas gjendjes qindravjeçare të okupimeve të mëhershme duke u nisur nga perandoria romake, para erës së re, më pas të bullgarëve, serbëve, bizantinëve, venedikasve. /Insajderi/