Gjykata e Nishit dënoi dje ish-eprorët e UÇK-së, në mungesë, për veprën e ashtuquajtur, vrasjen e ushtarëve serb në luftën e Koshares, në kufirin Kosovë-Shqipëri.
Në mesin e të dënuarve ishte edhe Anton Quni, tash deputet i LDK-së, që ishte pjesëmarrës në luftën e Koshares.
Quni tha për Indeksonline se dënimet e shpallura nuk kanë të bëjnë fare me drejtësinë por me përdorimin politik të drejtësisë dhe të dënimeve në raport me Kosovën.
Madje, sipas tij, një nga përdorimet ka të bëjë pikërisht me implikimin e institucioneve ndërkombëtare, siç janë INTERPOL dhe EUROPOL, në kuptimin e kufizimit të lëvizjes në shtete të ndryshme.
Quni shpreson se Qeveria e Kosovës do të gjejë mënyra për të qartësuar pozicionin e tyre në raport me këto dënime.
“Konsideroj se Qeveria e Kosovës do të gjejë mënyra për të qartësuar pozicionin tonë në raport me këto dënime. Nëse kemi parasysh kohën kur janë shpallë këto dënime, nuk mund të mos kenë ndërlidhje me synimet e Kosovës për t’u anëtarësuar pikërisht në INTERPOL dhe në EUROPOL, duke dëshmuar kështu vazhdimësinë e angazhimeve për të penguar anëtarësimin e Kosovës në organizata dhe institucione ndërkombëtare, në kundërshtim me Marrëveshjen e 19 prillit 2013” , tha Quni për Indeksonline.
Më tutje deputeti i LDK-së tha se ngjarja për të cilën janë ngritur akuzat dhe janë shpallë dënimet nga gjykatat serbe, ka ndodhur në shtator 1998, pra në kushtet e luftës së UÇK-së ndaj forcave serbe, dhe ka qenë e drejtuar kundër këtyre forcave, e jo ndaj popullatës serbe.
Pasi që në këtë aksion nuk ka pësuar asnjë qytetar serb dhe askush që nuk ka qenë i përfshirë në luftime, Quni tha se aksioni ka qenë në përputhje me çdo konventë dhe normë ndërkombëtare për luftën prandaj kjo nuk përbën bazë për gjykim dhe dënim.
“Me këto dënime, Serbia ka treguar se trajton krime edhe aksionet e mirëfillta ushtarake ndërmjet forcave ushtarake armike, kurse nuk i quan krime operacionet e organizuara policore dhe ushtarake ndaj popullatës civile shqiptare. Serbia shpallë dënime ndaj shqiptarëve për operacione ndaj forcave të organizuara serbe, kurse ngre zërin kundër dënimeve të serbëve për krime ndaj popullatës civile shqiptare, si në rastin e dënimit të Oliver Ivanoviqit” , tha Quni. /Indeksonline/