Kosova qe një vit është zhytur në krizë të thellë politike, pasi që ka nënshkruar Marrëveshjen për Demarkacionin e kufirit me Malin e Zi. Opozita dhe disa deputetë të koalicionit qeverisës e fajësojnë Qeverinë për këtë krizë, duke thënë se ekzekutivi i vendit nuk i respektoi vendimet e Kuvendit

Më 26 gusht bëhet një vit prej se Kosova është futur në një krizë të thellë politike për shkak të nënshkrimit të Marrëveshjes për Demarkacionin e kufirit me Malin e Zi. Subjektet opozitare patën deklaruar se me këtë Marrëveshje Kosova i humb rreth 8200 hektarë tokë, prandaj filluan protestat në rrugë dhe në Kuvend.

Tani opozitarët dhe disa deputetë të koalicionit qeverisës thonë se kriza është shkaktuar nga arroganca e Qeverisë, madje, sipas tyre, ekzekutivi i vendit ka mbajtur të fshehta disa dokumente për procesin e demarkacionit dhe nuk i ka marrë parasysh vendimet e Kuvendit, shkruan ‘Zeri’..

Plotësimi i kriterit esencial dhe parësor në luftën kundër korrupsionit dhe krimit të organizuar të niveleve të larta të pushtetit, nga analistët dhe njohësit e fushës së drejtësisë po shihet si i pamundur dhe i paarritshëm që të përmbushet nga drejtësia kosovare për momentin dhe në të ardhmen,shkruan Gazeta Kosova Sot.

Ky kriter, veç rolit pozitiv që do të kishte në proceset e ndryshme të vendit, pos të tjerash është vënë edhe si kushti i parë nga BE-ja për liberalizimin e vizave për qytetarët kosovarë. Deputeti nga radhët e koalicionit në pushtet nga LDK-ja, Adem Salihaj, në një prononcim për gazetën “Kosova Sot”, ka thënë se kriteri numër një për liberalizimin e vizave është luftimi i krimit dhe korrupsionit, dhe jo ndonjë kriter tjetër, siç po trumbetohet me të madhe.

” Por, pavarësisht këtij fakti, ky kriter pothuajse nuk përmendet fare nga strukturat politike në Kosovë, sepse kjo nuk u përgjigjet vetë këtyre strukturave, derisa në anën tjetërlufta e këtyre strukturave nuk po bëhet kundër krimit dhe korrupsionit, por për zhvendosjen e vëmendjes së qytetarëve të Kosovës nga ky problem te problemet e tjera. Andaj, kjo do të prodhojë efekte të kundërta nga ato që po kërkon Bashkimi Evropian dhe të gjitha institucionet ndërkombëtare”, është shprehur deputeti Adem Salihaj.

Drejtësia është marrë peng

Analisti Shefqet Dibrani nuk beson se Prokuroria dhe Gjyqësia e Kosovës do të veprojë në bazë të ligjit, derisa, siç tha, të jetë në pushtet kjo kastë politike, e cila ka kapur shtetin dhe së këndejmi edhe Prokurorinë e Shtetit.

” Tashmë publikimi i përgjimeve telefonike ua hoqi maskën të gjitha institucioneve vitale të shtetit, duke mos përjashtuar as Prokurorinë, e cila nuk do t’i plotësojë kriteret për luftën serioze kundër korrupsionit dhe krimit të organizuar në nivele të larta, derisa vënia e theksit se qenka çështja e demarkacionit me Malin e Zi, kishte për qëllim vetëm sa për t’iu shmangur kriterit themelor që e ka kushtëzuar Qeverinë e Kosovës, BEja, por në këtë aspekt janë edhe një varg çështjesh të tjera në strukturat shtetërore dhe ato partiake për t’u plotësuar para se BE-ja ta shqyrtojë çështjen e liberalizimit të vizave për qytetarët e Kosovës”.

Më tej, Dibrani ka ngritur dilemën se përderisa nuk ka reforma as në pushtetin shtetëror, por as në atë partiak, çfarë mund të pritet nga kjo kastë politike, e cila bart mëkatin e gjendjes së tanishme, e cila nuk hap asnjë perspektivë, siç tha, as për zhvillim, as për shkollim dhe as për të lëvizur si qytetar evropian në Evropë.

” Ky barrikadim i kastës politike në konceptet e tyre të vjetruara, po ashtu ky shantazhim i gjithmbarshëm, ky nepotizëm dhe ky nivel kaq i ulët arsimor kanë prodhuar qytetarin me dinjitetin më të ulët që njeh historia e kombit tonë, gjë që është për t’u shqetësuar dhe për t’u lemerisur, teksa në anën tjetër nuk kemi çfarë të presim as nga Prokuroria, e cila i pret urdhrat nga politika”, theksoi ai.

Hajri Ramadani, Drejtor i Arsimit në Dragash, edhe pse është i dënuar nga Gjykata e Apelit me një vit burgim dhe dy vite të tjera për të mos e ushtruar detyrën e tij zyrtare, ai është i lirë dhe vazhdon punën si zakonisht, shkruan Gazeta InfoPress.

Sipas një burimi të sigurt të Gazetës InfoPress, më 16 maj Gjykata e Apelit e ka konfirmuar vendimin e Gjykatës së shkallës së parë, mirëpo kryetari i Dragashit, Salim Jenuzi nuk e shkarkon nga detyra.

Arsyeja e dënimit ka qenë keqpërdorimi i detyrës zyrtare, sepse një shofer i autobusit, emri i të cilët është Shukri Nebiu, pa konkurs është bër drejtor i Shkollës së mesme në Dragash.

Ministria e Arsimit e ka bërë padinë kundër tij, për shkelje të rëndë, ndërsa shoferi i autobusit ende vazhdon të jetë drejtor Shkollës së mesme Ruzhdi Berisha në Dragash.

Shukri Nebiu, është i afërm me Avni Nebiun, i cili e ushtron postin e drejtorit të Administratës në Dragash.

Interesant është fakti që, si në Dragash edhe në Prizren kryetari i kësaj komune edhe pse i dënuar me burgim vazhdon detyrën e tij, i lirë dhe pa e penguar askush. Mirëpo, nuk është vetëm ai, pasi edhe Drejtori i Arsimit i kësaj komune është i dënuar dhe vazhdon të jetë i lirë.

Njëjtë po ndodh edhe në Dragash, dhe kudo që PDK-ja është duke i udhëhequr komunat, pasi njerëzit të cilët janë në poste të larta, janë të dënuar me burgim dhe nuk e vuajnë atë. Për çudi, ata shpërblehen duke punuar në institucione, madje ka raste kur edhe pse janë në burg, si rasti i kryetarit të Skenderajt, Sami Lushtaku, vazhdojnë të marrin para nga shteti.

/Gazeta InfoPress