Subjektet opozitare Lëvizja Vetëvendosje, Aleanca për Ardhmërinë e Kosovës dhe Nisma për Kosovën kanë vendosur që seancën e sotme ku presidentja Atifete Jahjaga do ta mbajë fjalimin e saj për fundvit, ta bojkotojnë seancën.
Burim të Klan Kosovës brenda Opozitës kanë thënë se sot as nuk do të protestohet dhe as nuk do të ketë ndonjë skenar tjetër që ka ndodhur brenda Kuvendit më herët, por vendimi i Opozitës së bashkuar është bojkotimi i fjalimit të Presidentes.
Tre subjektet opozitare Vetëvendosje, AAK dhe Nisma për Kosovë kanë njoftuar se sot do ta mbajnë manifestimin e radhës në Malishevë.
Në një njoftim për media thuhet se qytetarët e Malishevës nuk pajtohen me kthimin e Serbisë brenda Kosovës e as me faljen e mbi 8 mijë hektarëve tokë Malit të Zi.
“Për këtë do të manifestojmë nesër bashkë, të shumtë në numër dhe të vendosur në qëndrimin që marrëveshjet për këto çështje duhet të tërhiqen”.
“Malisheva ka treguar edhe më herët që del në mbrojtje të Republikës, kërkon çlirim dhe nuk mund të rrijë e qetë kur vendi kërcënohet si në këtë situatë nga këto marrëveshje shumë të dëmshmë”.
Në këtë njoftim thuhet se projekti i “Zajednicës” që e gjymton Kosovën dhe marrëveshja për demarkacionin me Malin e Zi që e copëton territorin e Republikës përbëjnë alarm për të gjithë ne.
Andaj partitë opozitare kanë bërë të ditur se mblidhen nesër në Manifestimin për Republikën, në sheshin e Dëshmorëve në Malishevë, në orën 13:00 për të shprehur vullnetin tonë: kundër marrëveshjeve.
“Nuk mund të sillemi sikur shteti nuk është në rrezik. Marrëveshjet famëkeqe mund të tërhiqen. Ato duhet do të tërhiqen”, përfundon ky njoftim për media.
Treshja opozitare kanë mbajtur manifestime të tilla edhe në Gjakovë, Gjilan dhe Pejë.
Kinemaja e Prizrenit, DokuKino i ka bërë të gjitha përgaditjet për premierën e filmit më të ri të “Star Wars: The Force Awakens 3D” që do të shfaqet çdo natë nga 17 dhjetori në terminin e orës 19:30 dhe 22:00.
“Ata që vendosin ta shohin këtë premierë në DokuKino do t’a kenë rastin të fotografohen me veshjet e karaktereve të filmit për të cilat janë kujdesur stafi i kinemasë”, thuhet në njoftim.
Ky film me regji të J. J. Abrams është një vazhdim i sagës së krijuar nga George Lucas dhe është i krijuar tridhjetë vjet pas Star Wars: Episode VI – Rikthimi i Jedi-t (1983). Në rolet kryesore luajnë: Harison Ford, Mark Hamill, Carrie Fisher, Daisy Ridley, John Boyega, Oscar Isaac, Adam Driver. /PrizrePress.com
Shtohet presioni mbi Qeverinë e korruptuar të Kosovës. Krerët e Qeverisë të japin llogari për mashtrimin e qytetarëve
Shteti i Kosovës po vazhdon të mbetet i vetmi vend i izoluar në rajon, pa liberalizim vizash, edhe në mandatin e Qeverisë PDK-LDK.
Përfaqësues të subjekteve politike në pozitë dhe opozitë, analistë politikë, konsiderojnë se tani është momenti kyç që ky lidership që mashtroi qytetarët për vite me radhë, të japë dorëheqje.
Deputeti i LDK-së, Adem Salihaj, tha për “Kosova Sot” se liberalizimi i vizave ka qenë një premtim i vazhdueshëm elektoral dhe propagandistik i ish-kryeministrit dhe zëvendëskryeministrit të tashëm, nga viti në vit e nga mandati në mandat po del se ka qenë premtim farsë.
“Popullit të stërmashtruar të Kosovës i është servuar e vërteta e shtrembëruar se liberalizimi i vizave varet nga disponimi i BE-së, dhe se ata nuk po kanë vullnet për ta bërë këtë. Kjo është plotësisht e pavërtetë dhe është bërë me qëllim të amnistimit të pushtetit. Liberalizimi i vizave varet kryekëput nga përparimi që bën Kosova në luftimin e krimit dhe korrupsionit, aspak nga disponimi i BE-së. Zyrtarët e Kosovës po mundohen ta fshehin këtë fakt. Arsyeja është se ata janë vetë aktorë të një korrupsioni galopant, i cili sot nuk gjendet në asnjë vend të Evropës”, tha Salihaj. /Kosova Sot
I ftuar në emisionin “Zona B” të Klan Kosovës, ishte Shefi i Grupit Parlamentar i Lëvizjes Vetëvendosje, Glauk Konjufca.
Sipas tij, burgosjet e deputetëve të opozitës, janë shembull i një shteti autoritar. Ai ka treguar se veprimet e opozitës nuk kanë qenë menjëherë përdorimi i gazit lotsjellës, mirëpo se ato janë ashpërsuar pasi që Qeveria nuk i ka tërhequr nënshkrimin nga marrëveshjet.
“Nëse këto dy marrëveshje nuk largohen, ne do të radikalizohemi edhe më tutje. Pushteti nuk e kupton se çfarë dëmi ka bërë dhe me një kokëfortësi po qëndron prapa këtyre marrëveshjeve. Nëse Isa Mustafa tregohet kryeministër, marrëveshjet nuk kalojnë, por nëse kapet për Zajednicën ne preferojmë që ai të fundoset bashkë me Zajednicën”, ka thënë ai.
Konjufca u shpreh se 9 janari do të jetë data, siç thotë ai, e rënies së kësaj Qeverie.
“Manifestimet do të përfundojnë më 9 janar që do të jetë protestë. Me 9 janar do të fillojë rënia e kësaj Qeverie”, tha ai.
“Ka shumë arsye që kjo Qeveri të bie. Dështimet kanë filluar prej janarit me Jabllanoviqin e deri te UNESCO dhe vizat. E këto duhet t’i faturohen krejt kësaj Qeverie”.
Në një lidhje telefonike për emisionin Rrokum Roll në TV Rrokum, deputeti i Lëvizjes Vetëvendosje, Rexhep Selimi, mohon deklaratën e Policisë se në manifestimin e Pejës ishin 2000 pjesëmarrës.
“S’kisha me u marrë shume me numrin, por me mesazhin që qytetaret po ia tregojnë Qeverise”, tha Selimi.
Për 13 deputetë të opozitës që janë të arrestuar, Selimi tha se kjo paraqet hendikep për opozitën për vazhduar me kundërshtimin e marrëveshjeve të Asociacionit dhe Demarkacionit. Por, shton se nëse mbetet vetëm një, ata nuk do të ndalen.
“Nesër kemi me qenë në Kuvend. Ne s’kemi probleme me Kuvendin e seancat, por me agjendën e Qeverise në Kuvend dhe jashtë saj. Nuk kemi qëllim me pengu as Parlamentin e as Kuvendin. Nëse ministri i Jashtëm thërret protesta kundër BE, ne kemi me thirr protesta kundër Serbisë. Kështu Thaçi po i mbron interesat e Serbisë. Nëse mund të rrojmë pa viza, mund të rrojmë edhe pa këtë Qeveri”.
https://youtu.be/NDOSoj6RJ_c
Prokuroria Themelore në Prishtinë-Departamenti i Krimeve të Rënda, ka ngritur aktakuzë, kundër katër personave, deputetë të Kuvendit të Republikës së Kosovës për veprat penale përdorimi i armës apo mjetit të rrezikshëm nga neni 375 par.1 të KPRK-së dhe pengim i personit zyrtar gjatë kryerjes së detyrës zyrtare nga neni 409 par.1 të KPRK-së.
“Prokuroria Themelore në Prishtinë-Departamenti i Krimeve të Rënda ka ngritur sot aktakuzë kundër katër personave”.
“Të pandehurit Albin Kurti, Albulena Haxhiu, Donika Kadaj Bujupi dhe Faton Topalli, akuzohen që secili veç e veç kanë kryer veprat penale: përdorimi i armës apo mjetit të rrezikshëm nga neni 375 par.1 të KPRK-së dhe pengim ipersonit zyrtar gjatë kryerjes së detyrës zyrtare nga neni 409 par.1 të KPRK-së”.
“Aktakuza është ngritur nga Prokuroria Themelore-Departamenti i Krimeve të Rënda në Prishtinë, për veprat me të cilat i pandehuri ngarkohet”, thuhet në njoftim.
Në vazhdim mund ta lexoni një poezi jo shumë të njohur për lexuesit, por tejet të fuqishme të Ukshin Hotit.
Ukshin m’kanë quejt prej të vogli, prej të gjallmi,
nana idiomën e pyllit mbi supe ma ngjiti.
Ende nuk ka ndodhë, por kur në varr të visit t’m’kallni,
malësorit rranjën e emrit do ia hiqni.
N’trevat tona kur foshnje kam mbërritë,
si çdo foshnje e kësaj bote një destin për me falë,
m’sundoi shpresa se n’origjinë tamli ish dritë,
m’poshti e vërteta se frika pleqve të mi ende s’u ka dalë.
As n’andrrat e mia, mbushë me zanin e saj të plaktë,
s’ia paska hekë nanës frikën emri që m’ka ngjitë.
Edhe nëse i pjekur vij mes jush, tradhtinë për me matë,
do bahem bishë po t’ndij se m’thërrisni Ukshin.
Nëpër troje ku punën kam hedhë,
emra trimash mbush pagëzimi,
por nuk u mbërrit jeta dhe emri nuk ngjiz dejet.
Emrin e trimit e mban dhe amfibi.
Kemi pas kenë për emra ngatërrestarë të mëdhaj,
dhe unë foshnjë e naiv u paskam zanë besë,
kam besu shku e ardhë, kam besu bir e nanë.
Kur m’thërrisnin Ukshin e merrja për betejë.
Me mu bashkë lindën prej gënjeshtre poetët,
u nxinë që drita t’kthehej në të folmen tuej.
Lindën po me mu prej mashtrimit dëshmorët
që shqipja të mos flitej nga gjuhë e huej.
Se shumësia juej në trishtim të shkurtër
ka pjellë përbri meje krimin e vogël, tradhëtinë e madhe.
E dinit që mes emrash do të zhduknit të flaktët, të urtët,
ata që shquenin tmerrin ndër kang e ndër valle.
Nëse vendimi s’e cakton një SOT për m’u ngritë balte,
në bajgë ku jeni zhytë nuk mund të derdhet qielli.
N’bajgë ku jeni zhytë, ku emri ju kallte,
Ukshin do të jetë për ju një fjalë vreri.
Ukshin Hoti
Librat po bëhen gjithnjë e më të trashë, por shtimi i faqeve nuk i ka trembur lexuesit. Ata po vazhdojnë të konsumojnë libra në formate elektronike dhe duket se fenomeni i librave të gjatë tashmë është botëror.
Librat po rriten gjithnjë e më shumë në përmasa. Sipas një sondazhi, është zbuluar se mesatarja e numrit të faqeve është rritur me 25 për qind gjatë 15 vjetëve të fundit. Një studim i më shumë se 2 500 librave, që u klasifikuan si bestsellerë dhe libra të përzgjedhur, si dhe librat më të diskutuar në Google, zbulon se trashësia mesatare është rritur nga 320 faqe në vitin 1999, në 400 faqe në vitin 2014.
Sipas James Finlayson që kreu studimin, ka një rritje relative vit pas viti, gjë që ka shtuar rreth 80 faqe në përmasën mesatare të librave të marrë në studim që nga viti 1999.
Për Finlayson, një pjesë e madhe e këtij ndryshimi, mund të shpjegohet nga kalimi drejt digjitales.
“Kur zgjedh një libër të madh në një librari, mund të frikësohesh, kurse në Amazon përmasa e një libri është thjesht një shënim në fund, për të cilin nuk kushton tepër rëndësi”.
“Personalisht blej libra të mëdhenj vetëm kur shkoj me pushime, sepse nuk dua t’i lë në fund të çantës. Por kur ke një libër të trashë në Kindle, kjo nuk përbën problem”.
Agjentja letrare, Clare Alexander, bie dakord se librat e gjatë janë më të përshtatshëm në formatet elektronike, por thekson se shumica e leximit elektronik fokusohet te zhanret si romanca, krimi dhe erotika.
Për Alexander, rritja graduale në përmasa, është provë e një ndryshimi kulturor.
“Pavarësisht bisedës së vdekjes së librit, për shkak të konkurrencës me mediat e tjera”, thotë ajo, “njerëzit që duan të lexojnë duket se preferojnë një rrëfim të gjatë dhe të shpalosur mirë, krejt e kundërta e informacionit të thatë që ne shkarkojmë nga Google”.
“Amerikanët kanë çarë rrugën – mendoni për Donna Tartt, Jonathan Franzen, Hanya Yanagihara dhe së fundmi, Marlon James, por ata nuk janë të vetmit. Hilary Mantel nga Britania dhe Eleanor Catton nga Zelanda e Re, kanë shkruar të dyja romane të gjata dhe po të shohësh listën, kupton se sa prej tyre kanë fituar çmime. Është kaq e qartë se edhe juritë preferojnë librat e gjatë gjithashtu”.
Çmimi “The Man Booker” për shembull, në Britani është bërë eventi kryesor i librit që nga vitet 1970 dhe prova e zgjerimit mund të gjendet në regjistrin e fitimtarëve.
Romanet fituese të çmimit në pesë vitet e para kishin rreth 300 faqe, por edhe duke llogaritur romanin triumfues të vitit 2011 nga Julian Barnes prej 160 faqesh, pesë fitimtarët e këtyre viteve të fundit kanë një mesatare prej 520 faqesh. Fituesi i këtij viti, Marlon James, kishte një libër prej 700 faqesh.
Për Max Porter, redaktorin në Granta, që publikoi librin fitues të vitit 2013 prej 800 faqesh nga Eleanor Catton, është e vështirë të kuptohet thelbi i një ndryshimi të të gjithë tregut, por është inkurajuese të shohësh këta libra të rinj dhe ambiciozë teksa shfaqen.
“Në të gjithë kulturën, njerëzit po përpiqen të zgjidhin çështjen nëse përmbajtja do të bëhet mobile, çfarë pajisjesh njerëzit do të përdorin për ta konsumuar atë”, thotë Porter, “ndaj jam shumë i inkurajuar nga libri i madh dhe i trashë që thotë ‘më lexo’”.
Shtimi i programeve televizive, ku shikuesit angazhohen në kalimin e dhjetëra orëve për të ndjekur një rrëfim të vetëm, duket se ka inkurajuar publikuesit të mbështesin shkrimtarët që shkruajnë gjatë, vazhdon Porter.
“Është vërtetuar se njerëzit kanë oreksin, durimin dhe energjinë që të qëndrojnë pas një ngjarjeje dhe të njëjtave personazhe, teksa rrëfimi zgjerohet”.
Librat e trashë mund të bëhen më të lehtë për t’u mbajtur me vete, ngaqë lexuesi elektronik nuk e ka problem, por Porter nuk është i bindur nëse është leximi dixhital ai që ka nxitur trendin. Redaktori citon studimet që tregojnë se vetëm 60 për qind e librave që blihen elektronikisht, lexohen dhe normat e përfundimi shkojnë deri në 20 për qind për disa tituj.
“Një libër i trashë është një mishërim fizik i qëllimit tuaj për të kaluar kohën e nevojshme për ta lexuar atë”.
Shtimi i faqeve të romaneve bashkëkohore, mund të jetë shkak i pohimit plot vetëbesim të identitetit tonë.
Listat bestsellerë janë dominuar gjatë viteve të fundit nga seritë që variojnë nga Harry Potter te trilogjia e El James “50 hijet”. Megjithatë, nuk po ndodh vetëm shtimi i fjalëve, botuesit po lënë hapësira në fillim dhe në fund të faqes dhe po rrisin madhësinë e shkrimit për t’i shtuar peshën romanit.
“Ka disa audienca që duan ta ndiejnë peshën e librave që po blejnë”. Sfida e vërtetë e tregut të botimit të librave, nuk janë ekstremet e mëdha ose të vogla, por botimi i së mesmes, emrat jo shumë popullorë, shkrimtarët në mes të karrierës dhe librat e përmasave të mesme. /G-SH. Burimi: The Guardian/
Nga Bilall Sherifi –
Pas marrjes së lajmit se as këtë vit nuk do të ketë rekomandim për liberalizimin e vizave, kryeministri Isa Mustafa dhe sidomos zëvendësi i tij Hashim Thaçi, nga mbledhja e qeverisë, në drejtim të vendimmarrësve në Bashkimin Evropian i dërguan disa fjalë bukur të mëdha.
Isa tha, se “ne mundemi të jetojmë edhe pa liberalizim, vërtet më keq, ama mundemi të jetojmë edhe kështu”. Po pra, sigurisht që mundemi, kryeministër a jemi luan apo nuk jemi!?
Ndërsa zëvendësi i tij Hashimi, shkoi pak përtej tij dhe e “kërcënoi” Evropën me protesta gjithë popullore para zyrës së Bashkimit Evropian në Prishtinë, që i bie, para zyrës së Samuel Zhbogar e cila gjendet përballë parlamentit dhe qeverisë së Kosovës. Dhe, për të mos e frikësuar Zhbogarin, në fund, fare në fund të fjalës së tij, nuk harroi të thotë, “natyrisht protestë paqësore”.
Dhe, kaq mjaftoi që aktorë të ndryshëm të skenës publike, të frikësuar që këta dy, Isa dhe Hashimi, për shkak të çështjes së vizave, tani do të na prishin krejt me aleatët evropianë, duke i marrë më seriozisht se që ata e marrin veten, vrapuan dhe i gjykuan si të pamatura dhe emocionale reagimet e këtyre dyve.
Por unë, duke u bazuar në të kaluarën, po mendoj se krejt kjo është një teatër. Sepse, tanimë e tëra na vjen si një Deja vu. Brukseli merr vendime, qeveritarët tanë bëjnë reagime, sigurisht të ashpra.
Por, ata në Bruksel e dinë se kaq duhet t’u lejohet qeveritarëve të Kosovës. Diçka, për konsum të brendshëm duhet thënë edhe këta. Bile, besoj fort, që i tërë ky teatër, është i akorduar mes palëve në “konflikt”
Në stilin, ne nuk ua liberalizojmë vizat, ju bëni reagime të ashpra. Dhe, në fund të dy palët ndahen të kënaqura.
E qytetarëve të Kosovës nuk u mbetet gjë tjetër, pos, përballë “rrezikut” që qeveria të na prishë krejt me Evropën të harrojnë liberalizimin e vizave edhe për këtë këtë vit.
P.S: Deja vu (diçka që është parë më herët)