Janë bërë dy vjet që nga mbajtja e mbledhjes së parë ndërmjet dy qeverive shqiptare, asaj të Kosovës dhe Shqipërisë.

Më 11 janar 2014, mbledhja u vendos të mbahej në qytetin e Prizrenit, dhe nga atje të dy krerët e qeverisë Edi Rama dhe Hashim Thaçi, e cilësuan këtë mbledhje si “takim që shënon kapitull të ri dhe dërgon mesazhin evropian për të gjithë, mesazhin e rajonit me kufi të hapur dhe pa barriera të së kaluarës.”

Ky takim po ashtu u cilësua nga dy kryeministrat si historik i cili ndodhte për herë të parë në historinë e dy shteteve.

Në këtë datë u nënshkrua “deklarata për bashkëpunim dhe partneritet strategjik ndërmjet Republikës së Kosovës dhe Republikës së Shqipërisë”.

Kjo marrëveshje përfshinte fushën e transportit dhe infrastrukturën dhe bashkëpunimin tregtar.

E po ashtu u pajtuan që të themelohet edhe një fond i përbashkët për Luginën e Preshevës.

Shqipëria dhe Kosova, po përgatiteshin që të mbajnë edhe mbledhjen e dytë në nivel të lartë. Me 23 mars të vitit 2015, u takuan sërish por tash Kosova përfaqësohej nga një kryeministër tjetër, Isa Mustafa.

Kryefjala e mbledhjes së dytë të dy qeverive ishte thellimi i partneritetit strategjik i Shqipërisë me Kosovën, i cili në një vit kishte njohur progres të rëndësishëm edhe në fushën e politikës së jashtme.

Në këtë mbledhje u nënshkruan këto marrëveshje, memorandume dhe protokolle:

1. Për Bashkëpunim të “Ndërsjellë në Fushën e Sigurisë”.

2. Memorandum mbi “Forcimin e Bashkëpunimit në Fushën e Kontrollit të Brendshëm”.

3. Protokoll mbi “Shfrytëzimin e Përbashkët të Pajisjeve për Kontrollin e Kufirit”.

4. Protokoll “Për Ndjekjen e Menjëhershme Ndërkufitare”.

5. Memorandum i Mirëkuptimit “Për forcimin e bashkëpunimit ndërmjet Ministrive të Financave të Republikës së Shqipërisë dhe Ministrisë së Financave të Republikës së Kosovës”.

6. Marrëveshje e Bashkëpunimit për “Organizimin e Përbashkët të Mësimit të Gjuhës Shqipe dhe të Kulturës Shqiptare në Diasporë dhe në Mërgatë”.

7. Marrëveshje e “Bashkëpunimit në Fushën e Arsimit të Lartë dhe Kërkimit Shkencor”.

8. Marrëveshje për “Bashkërendim Institucional për Përparimin dhe Zhvillimin Profesional të Mësimdhënësve në Arsimin Parauniversitar”.

9. Protokoll “Për Zbatimin e Marrëveshjes Kuadër Ndërmjet Këshillit të Ministrave të Republikës së Shqipërisë dhe Qeverisë së Republikës së Kosovës për Bashkëpunimin në Nxitjen dhe Lehtësimin e Tregtisë”.

10. Memorandum “Mbi bashkëpunimin në fushën e bujqësisë dhe zhvillimit rural”.

11. Memorandum Bashkëpunimi ndërmjet Ministrisë së Kulturës të Republikës së Shqipërisë dhe Ministrisë së Kulturës, Rinisë dhe Sportit të Republikës së Kosovës, Ministrisë së Diasporës të Republikës së Kosovës.

Kriza politike po thellohet, askush nuk mendon për legjislacion të ri zgjedhor

Derisa kriza politike në vend po vazhdon të thellohet, imponohen si mundësi zgjedhjet e jashtëzakonshme. Por, subjektet politike të përfaqësuara në Kuvendin e Kosovës e kanë lënë krejtësisht pas dore, mbase edhe qëllimisht, finalizimin e reformës zgjedhorë, të cilën e patën iniciuar dhe proceduar me plot improvizime në dy mandatet e kaluara qeverisëse.

Sidoqoftë, njohësit e fushës së proceseve zgjedhore në vend, alarmojnë se shkuarja eventuale në zgjedhje të reja me legjislacionin e vjetër, pa e përmbyllur një proces të mirëfilltë zgjedhor, nuk ka shanse të prodhojë zgjedhje të besueshme e kredibile, me këtë edhe institucione të mirëfillta demokratike që duhet të jenë pasqyrim real i vullnetit të votuesve, sepse prapë do të kishim zgjedhje me vjedhje dhe blerje votash.

Kryetarja e Komisionit të ligjeve në Kuvendin e Kosovës, deputetja Albulena Haxhiu, konstaton se vetë mënyra se si u iniciua dhe si mbeti në gjysmë të rrugës një nismë e subjekteve më të mëdha politike parlamentare në Kuvendin e Kosovës për reformën zgjedhore e Kushtetuese, tregon më së miri se kjo ishte vetëm farsë sa për tejkalim të një krize, në të cilën ishin futur ato në mandatin e kaluar, por jo edhe vullnet i mirëfilltë për të pasur një reformë gjithëpërfshirëse zgjedhore në interes të vendit. Ajo shton se me heshtjen e këtij procesi në këtë mandat të ri qeverisës, vetëm sa po konfirmohet se qasja nuk ishte serioze dhe zgjedhjet e reja gjithsesi do të mund të mbahen me legjislacionin e vjetër, dhe me plot rreziqe për mundësi manipulimi.

“E ashtuquajtura ‘Reforma zgjedhore’, e nisur në vitin 2011, ka qenë një farsë dhe një mashtrim klasik nga ana Thaçit ndaj Isa Mustafës. Besoj ju kujtohet prilli 2011, Marrëveshja Thaçi-MustafaPacolli-Dell. Aty u morën vesh që Pacolli të hiqte dorë nga posti i presidentit, meqë LDK-ja e dërgoi në Kushtetuese procedurën e zgjedhjes dhe të bëhej zv.kryeministër e t’i shtohej Ministria e Zhvillimit Ekonomik, që të miratohej kandidatura e Ambasadës Amerikane, pra Atifete Jahjaga dhe Isa Musfata, në emër të LDK-së kërkoi reformën zgjedhore dhe ndërrimin e Kushtetutës për zgjedhjen e presidentit. Për këtë farsë u ngritën komisione ad hoc parlamentare, u ftua shoqëria civile, ekspertë e përfaqësues të shoqërisë civile. Por, siç e dini, Hashim Thaçi ra në heshtje, pasi kaloi afati ligjor se kur mund të shqyrtoheshin këto çështje. Edhe atëherë, edhe tani reforma zgjedhore dhe zgjedhja e presidentit nga populli qenë dhe mbeten kalkulime mediokre kryesisht të LDK-së dhe PDK-së”, thotë për ‘Kosova Sot’ kryetarja e Komisionit të ligjeve, Albulena Haxhiu, nga lëvizja ‘Vetëvendosje’.

Haxhiu ka thënë se për dallim nga ‘Vetëvendosje’, që ka punuar e hartuar propozime e amendamente për një qasje serioze të reformimit të sistemit, kanë qenë dy subjektet PDK-LDK, që nuk dorëzuan asnjëherë me shkrim propozimet e tyre. /Kosova Sot