Kryetari i Kuvendit të Kosovës, Kadri Veseli, ka thënë se partitë opozitare janë duke bërë sjellje tërësisht antidemokratike dhe të papranueshme.

Veseli në këtë intervistë për “Epokën e re” ka thënë se insistimi i veprimit të opozitës në këtë mënyrë është një rrugë pa krye, që nuk i shërben askujt, as opozitës, aq më pak qytetarëve të vendit. Ai e ka vlerësuar iniciativën e presidentes Atifete Jahjaga që ka ndërmarrë në kontekst të situatës së krijuar, duke mos e vlerësuar këtë si krizë institucionale, por si tentativë për ta futur vendin në krizë të panevojshme për qëllime të luftës për pushtet.

Veseli ka theksuar se gjatë tërë kësaj situate si kryetar i Kuvendit është përpjekur ta ruajë nivelin e komunikimit në Kuvendin e Kosovës, që t’i jepet mundësia secilës palë ta thotë qëndrimin dhe argumentet e saj, të veprojë mbi bazën e racionalitetit dhe të shmanget demonstrimi i forcës.

Kryeparlamentari Veseli ka thënë se Kuvendit duhet t’i kthehet normaliteti i punës, për të cilin edhe është votuar nga qytetarët e vendit.

“Ende konsideroj se duhet të vazhdohet rruga e komunikimit të përbashkët. Tash kemi një iniciativë të presidentes Jahjaga, e cila është në funksion të kësaj rruge, si dhe qëndrimet e qarta të vendeve perëndimore nëpërmjet pranisë së tyre diplomatike në Prishtinë, se Kuvendi i Kosovës nuk bën të bjerë nën diktatin e dhunës”, ka deklaruar Veseli, duke u bërë thirrje zërave të arsyeshëm opozitarë, që bashkërisht ta kapërcejnë këtë situatë.

“Me këtë rast u bëj thirrje zërave të arsyeshëm opozitarë, që besoj se janë shumica, të ndihmojnë që të gjithë së bashku ta kapërcejmë këtë situatë”, është shprehur Veseli.

Ai ka shtuar se askush nuk ka të drejtë ta bllokojë punën e Kuvendit, aq më pak me metoda të vrazhda dhe antidemokratike.

“Kuvendi i Kosovës do të vazhdojë të punojë sepse nuk bën ta lejojmë bllokimin e sistemit demokratik në vend. Obligimet tona kushtetuese janë shumë të qarta në këtë drejtim. Është për keqardhje që dëgjojmë zëra opozitarë, që funksionimin demokratik të Kuvendit të Kosovës e quajnë provokim. Provokime janë sjelljet e dhunshme në sallën e seancave, hedhja e gazit lotsjellës, lëndimi dhe rrezikimi i shëndetit të përfaqësuesve të popullit”, ka thënë Veseli.

Sipas tij, provokimi më i madh po i bëhet popullit të Kosovës me injorimin dhe mospërfilljen totale që opozita po ua bënë thirrjeve të miqve tanë perëndimorë dhe partneritetit të shtetit tonë me ta.

“Deri këtu kemi arritur falë këtij partneriteti dhe lëndimi i këtij partneriteti është shërbimi më i keq që mund t’i bëhet këtij vendi”, është shprehur Veseli.

Ai ka thënë se Kosova ka lëvizur përpara sa herë që ka funksionuar trekëndëshi i partneritetit Uashington – Prishtinë – Bruksel. Ky trekëndësh, sipas tij, i ka sjellë lirinë, pavarësinë, shtetndërtimin, fuqizimin e subjektivitetit ndërkombëtar, marrëveshjet e fundit për normalizimin e raporteve të Kosovës me Serbinë.

“Dalja nga ky trekëndësh partneriteti është provokimi më i madh që mund t’i bëhet popullit të Kosovës, por unë jam i bindur thellësisht se qytetarët tanë janë shumë të pjekur politikisht për të mos ndjekur këtë aventurë politike të opozitës”, ka thënë ai.

Veseli ka deklaruar se veprimet e tij të deritanishme kanë pasur për qëllim që tensionet e fabrikuara nga politika të mbahen brenda institucioneve e të mos barten në rrugë dhe tek qytetarët.

“Mesazhi është tejet i qartë: çmimin duhet ta paguajë politika, jo qytetarët”, ka thënë kryeparlamentari Veseli.

Ai e ka përjashtuar mundësinë e mbajtjes së zgjedhjeve të reja.

“Vendi aktualisht ka një shumicë parlamentare funksionale dhe një qeveri legjitime që e ka mbështetjen e kësaj shumice demokratike. Për aq kohë sa funksionon formati ekzistues qeverisës, duhet ta presim kalendarin e rregullt të procesit elektoral që përcaktohet nga ligji, e jo nga gazi lotsjellës”, ka pohuar Veseli. /Epoka e Re

Dhjetëra dëshmitarë të mbrojtur, që pritet të dëshmojnë në proceset gjyqësore kundër ish-udhëheqësve të UÇK’së, që do të nisin vitin e ardhshëm në Gjykatën Speciale, tashmë janë vendosur në vendet anëtare të Bashkimit Europian.

Gjykata Speciale, e cila pritet të nis punën vitin e ardhshëm në Holandë, që të trajtojë akuzat për krime lufte të cilat burojnë nga Raporti i Martit, pritet të funksionalizohet pas një marrëveshjeje ndërmjet Kosovës Holandës dhe BE’së.

Sipas burimeve të Gazetës Express, dëshmitarët e mbrojtur janë ish –pjesëtarë të të UÇK’së, që kanë njohuri për krimet e luftës që kanë ndodhur . Po ashtu bëhet e ditur se tashmë komandantët janë në dijeni për dëshmitarët të cilët pritet të dëshmojnë me identitet të mbrojtur për krimet e luftës.

Krerëve të UÇK’së të cilët aktualisht mbajnë poste të larta politike në skenën kosovare mund t’u ngrihen akuza menjëherë pas fillimit të punës të Gjykatës Speciale. Sipas zyrtarëve të lartë të BE’së aktakuzat e para pritet të ngrihen në fillim të vitit të ardhshëm. /Gazeta Express

Kreu i Nismës për Kosovën, Fatmir Limaj, thotë se referendumi është e vetmja zgjidhje për të dalë nga situata e krijuar.

Ai thotë se edhe pse nuk ka hapësirë ligjore për referendum, ajo mund të krijohet shpejt.

“Në këtë situatë adekuat është referendumi. Kemi pasur situata kur kemi bërë ndryshime kushtetuese brenda ditësh. Ne mund të kemi një ligj për referendumin brenda dy ditësh. Qytetarët duhet të flasin”, ka thënë Limaj në emisionin “Click” të RTV 21.

Limaj ka thënë se pozita dhe opozita fillimisht nuk pajtohen edhe në pikën se a ka apo nuk ka krizë në Kosovë. Për pozitën, thotë Limaj, në Kosovë nuk ka krizë. Por kjo sipas tij nuk është e vërtetë.

“Në Kosovë ka krizë dhe ky konstatim është shumë i rëndësishëm sepse nëse paradite thonë nuk ka krizë e pasdite thonë hajde bëjmë dialog, atëherë si nuk ka krizë. Kemi një situatë jonormale, kush i ka fajet dhe pse ka ardhë dhe si ka ardhë, debatojmë. Gjendja është keq dhe ka krizë”, ka thënë Limaj.

Qëndrime të njëjta Limaj ka shprehur edhe në emisionin “Rrokum Roll” me Fidan Jupollin në TV Rrokum.

Grupet Parlamentare të Opozitës kanë reaguar me një komunikatë të përbashkët në lidhje me ftesën për seancë të radhës Kuvendit, që siç është thënë do të mbahet këtë të premte nga ora 16:00.

Mirëpo thirrja e kësaj seance nga ana e partive opozitare po shihet si provokim dhe papërgjegjshmëri politike.

Deklarata e përbashkët e partive opozitare:

Në kohën kur Qeveria e Kosovës me marrëveshjet e veta që e rrënojnë dhe falimentojnë republikën e ka sjellur vendin në një situatë të jashtëzakonshme, insistimi i vazhdueshëm në mbajtjen e seancave të rregullta plenare nga Koalicioni është tentim kontrabandimi i normalizimit të ‘Zajednicës’ dhe faljes së tokave të Kosovës Malit të Zi.

Thirrja e seancës dhe insistimi që ajo të mbahet do ta përshkallëzojë tutje situatën.

Seanca e ardhme është caktuar të mbahet në mbrëmje, nga ora 16 të premten. Ky vendim i Kryesisë së Kuvendit më së miri e paraqet punën e koalicionit qeverisës, dhe e Kryetarit të Kuvendit: ata punojnë natën, sa më larg syve të publikut, në kundërshtim të plotë me praktikat e deritashme parlamentare.

Ashtu siç i kanë arritur marrëveshjet fshehtas, tash po duan t’i përvjedhin ato me këto seancat të natës.

Nuk do të ketë vazhdim të seancës për sa kohë që nuk ka tërheqje nga marrëveshjet. Protestën nuk do ta ndalim pavarësisht se në çfarë ore mbahet seanca dhe sa kërcënuese është policia e pushtetit. Qeveria e ka sjellur këtë situatë jashtëzakonshmërie në Kosovë.

Ne si deputetë të Opozitës as nuk do të zbrapsemi e as nuk do të pushojmë deri sa të tërhiqen marrëveshjet që e cungojnë Republikën dhe territorin e saj.

Kryetari i Kuvendit të Kosovës, Kadri Veseli ka bërë të ditur se seanca e radhës e Kuvendit të Kosovës do të mbahet të premten pasdite.

Veseli në konferencën për media pas mbledhjes së Kryesisë tha se janë të vendosur të mbrojnë institucionet e vendit dhe nuk do të ketë as gaz lotsjellës e asgjë tjetër që do t’i zmbrapsë.

Ai nuk deshi të tregojë se si do të veprojë nëse edhe të premten opozita tenton të bllokojë mbajtjen e seancës.

Në këtë drejtim, kryetari Veseli u ka bërë thirrje edhe partive opozitare që të jenë konstruktive në mbarëvajtjen e seancës së radhës.

“Opozita le ti thërrasin arsyes dhe ndërgjegjes. Opozita dhe opozita janë grupe politike që veprojnë dhe duhet vepruar brenda institucioneve të Kosovës”, ka thënë ndër tjerash Veseli.

Seanca do të filloj në ora 16:00.