Qyteti i vjetër i Prizrenit dita-ditës po e humb pamjen bizantine. Ky qytet i vjetër po shkatërrohet e në këtë po ndikon më së shumti faktori njeri.
Ishte vetë shefi i BE-së në Kosovë, Samuel Zbogar, i cili ditë më parë qortoi ashpër komunën e Prizrenit duke thënë se nuk po parandalohet shkatërrimi i objekteve të karakterit historik.
http://dai.ly/x4cffey
Sot, në ambientet e ministrisë së Kulturës, Rinisë dhe Sportit, është mbajtur një takim pune ndërmjet ministrit Kujtim Shala, ministrit të Mjedisit dhe Planifikimit Hapësinor, Ferid Agani, kryetarit të Këshillit të Kosovës për Trashëgimi Kulturore, Shafi Gashi dhe kryesuesit të Task Forcës për Qendrën Historike të Prizrenit, Qemajl Hasani.
Ky takim është thirrur me qëllim të identifikimit të sfidave dhe prioriteteve rreth trashëgimisë kulturore të Kosovës, veçmas lidhur me Qendrën Historike të Prizrenit, si dhe koordinimin e veprimeve për të ruajtur dhe menaxhuar këtë qendër.
Ministri Shala u shpreh se ky takim pune për trashëgiminë kulturore, më saktë rreth dëmtimeve që po bëhen, qoftë për shkak të pakujdesisë, qoftë për shkak të zbrazëtirave ligjore, është në funksion të mobilizimit të gjitha faktorëve të rëndësishëm për të krijuar masa dhe mekanizma shtesë rreth ruajtjes dhe mbrojtjes së trashëgimisë kulturore të Kosovës, veçmas në Qendrën Historike të Prizrenit.
Më tej ministri Shala u shpreh se trashëgimia kulturore është interes i vendit dhe kërkohet bashkëpunim i gjithanshëm, masa dhe mekanizma shtesë jo vetëm për Qendrën Historike të Prizrenit, por edhe për objektet tjera më rëndësi për trashëgiminë kulturore të Kosovës nga dëmtimet dhe shkatërrimet.
Ndërsa ministri Ferid Agani shprehu gatishmërinë e tij për të bashkëpunuar ngushtë me MKRS-në dhe organizmat tjera në funksion të krijimit të këtyre masave shtesë. Ai më tej shpjegoi punën që po bën kjo ministri nëpërmjet Task Forcës së saj për të identifikuar problemet me të cilat ballafaqohet kjo qendër.
Po ashtu, në këtë takim palët shtruan nevojën e intensifikimit të bashkëpunimit ndërmjet institucioneve qendrore, atyre lokaleve dhe organeve të rendit e drejtësisë, si dhe shoqërisë civileve, në funksion të mbrojtës së trashëgimisë kulturore të Kosovës nga dëmtimet dhe shkatërrimet. /PrizrenPress.com/
Azbi Gashi, profesori i arrestuar sot pasi ka shtënë në ajër me armë pas një përleshjeje me një nxënës të shkollës “Selajdin Mullaabazi-Mici” në Rahovec, është edhe këshilltar në Kuvendin Komunal.
Asamblisti i Lëvizjes Vetëvendosje, Azbi Gashi, është arrestuar sot nga Policia pasi ka shtënë me armë zjarri në ajër pas një përleshjeje që ka pasur më nxënësin e Shkollës Profesionale “Selajdin Mullaabazi-Mici” në Rahovec, ku edhe jep mësim si profesor.
Frashër Krasniqi nga LVV-ja ka thënë se nuk janë në dijeni për arrestimin e Gashit.
Mirëpo, sipas tij, arsyeja e arrestimit nuk ka të bëjë me aktivitetin e tij si asamblist i Lëvizjes Vetëvendosje.
“Ne nuk kemi asnjë informacion për arrestimin e tij. Mirëpo nga informata që po na e jepni ju, Lëvizja Vetëvendosje këtë e sheh si çështje personale të Azbi Gashit”, ka deklaruar Frashër Krasniqi.
KALLXO.com ka provuar të kontaktojë edhe me asamblisten tjetër të LVV-së në Kuvendin Komunal të Rahovecit, Minire Hoti, por ajo nuk është përgjigjur në telefon.
Kryesuesi i Kuvendit Komunal të Rahovecit, Nahit Elshani, ka thënë për KALLXO.com se nuk është në dijeni për arrestimin e asamblistit Azbi Gashi.
“Unë nuk e kam këtë informatë. Ai sot ka qenë në mbledhje në Asamble deri pak para orës 12:00 dhe unë s`jam në dijeni se çka ka ndodhur më pas”, ka thënë kryesuesi Nahit Elshani.
Ai ka thënë se do të kërkojë në mbledhjen e ardhshme sqarime rreth asaj që ka ndodhur, pasi që i arrestuari është asamblist i kuvendit komunal.
Elshani ka thënë se asamblisti i arrestuar Azbi Gashi nuk ka shfaqur shenja se është i dhunshëm dhe as nuk është në dijeni nëse ka bartur armë edhe në mbledhjen e sotme të Asamblesë së Rahovecit.
Komandanti i Stacionit të Policisë në Rahovec, Osman Ismajli, ka konfirmuar për KALLXO.com se profesori së bashku me nxënësin janë arrestuar pas këtij incidenti.
“Ka ndodhë një përleshje dhe është shtënë me armë zjarri,” ka thënë Ismajli.
Kryeprokurori i Gjakovës, Ali Selimaj, ka sqaruar se zënka me të shtëna në mes profesorit dhe nxënësit të shkollës ka ardhur pas një konflikti që nxënësi me mësuesin e kanë pasur para dhjetë ditësh në ekskursionin e shkollës në Prishtinë.
“Mësuesi pas këtij konflikti ka deklaruar se është ndier i frikuar dhe ka bartur armën me veti”, ka thënë kryeprokurori Selimaj. /Kallxo.com/
Rexhep Osmani, ish Ministri i Arsimit dhe profesori i Fakultetit të Edukimit, është suspenduar nga rektori Marjan Dema pas raportimit se ai kishte ngacmuar seksualisht një studente të tij.
Lajmin për suspendimin e profesorit Osmani e ka konfirmuar për Gazetën Fjala Afrim Hoti prorektor për bashkëpunim ndërkombëtarë në UP.
“Rektori ka marrë vendim për suspendimin e z. Osmani deri në zbardhjen e plotë të rastit”, tha ai.
Profesorin Osmani ka provuar ta kontaktoj Gazeta Fjala, mirëpo ai ka thënë se nuk mund të flas pasi që ka pasur një kontroll mjeksore sot gjatë ditës.
Gazeta Fjala ka raportuar ditën e premte, sesi studentja që është ngacmuar e kishte lajmëruar policinë dhe bashkëshortin e saj.
Osmani, pati mohuar të ketë ngacmuar seksualisht studenten, ashtu siç ishte raportuar, por ai ka pranuar se e ka përqafuar studenten ne fjalë dhe kjo sipas tij është keqkuptuar nga ana e saj.
Ai thotë se përqafimin ndaj studentes e ka bërë meqë ka pasur lidhje familjare me të.
“Ka qenë një keqkuptim dhe s’ka pasur asgjë tjetër. Ajo që e ka keqkuptuar ka lajmëruar policinë në prill edhe kam shkuar në polici, e kam dhanë deklaratën. Ç’do gjë do të jetë okay sepse prindërit kur kem biseduar me ta i kam sqaruar se kjo më ka thënë që i ka do të njohshëm, kushërira të mia, dhe unë jam sjellë normalisht me të. /Gazeta Fjala/
Profesori Azbi Gashi nga Rahoveci dyshohet se pas një zënke më një nxënës të Shkollës Profesionale “Selajdin Mullaabazi-Mici” në Rahovec ka shtënë me armë zjarri.
Incidenti dyshohet të ketë ndodhur në afërsi të oborrit të shkollës.
Komandanti i Stacionit të Policisë në Rahovec Osman Ismajli ka konfirmuar për KALLXO.com se profesori së bashku me nxënësin janë arrestuar pas këtij incidenti.
“Ka ndodhë një përleshje dhe është shtënë me armë zjarri,” ka thënë Ismajli.
Kryeprokurori i Gjakovës Ali Selimaj ka sqaruar se zënka me të shtëna në mes profesorit dhe nxënësit të shkollës ka ardhur pas një konflikti që nxënësi me mësuesin e kanë pasur para dhjetë ditësh në ekskursionin e shkollës në Prishtinë.
“Mësuesi pas këtij konflikti ka deklaruar se është ndier i frikuar dhe ka bartur armën me veti,” ka thënë kryeprokurori Selimaj.
Ai ka shtuar se nga informacionet e para që i ka prokuroria, nxënësi Betim D. sot ka shkuar për t’i dhënë disa provime në shkollë dhe në momentin kur janë takuar me profesorin kanë shkëmbyer disa fjalë e më pas kanë filluar një përleshje në oborrin e shkollës.
“Kur konflikti ka eskaluar të dy kanë dalë jashtë oborrit, ndërsa mësuesi e ka nxjerrë revolen dhe ka shtënë me të,” ka thënë Selimaj.
Ai ka deklaruar se pas shkrepjes së armës nxënësi ka tentuar të sulmojë me një thikë mësuesin, por pas ndërhyrjes së qytetarëve konflikti nuk ka vazhduar tutje.
Dy protagonistët e kësaj ngjarjeje 20 vjeçari Betim D dhe profesori tashmë janë arrestuar nga policia dhe po mbahen në masën e arrestit prej 48 orësh. /Kallxo.com/
Me rastin e 170-vjetorit të lindjes së një nga figurave më të rëndësishme të rilindjes kombëtare shqiptare, Naim Frashërit, Biblioteka Kombëtare e Shqipërisë do të publikojë më datë 25 maj editimin digjital të veprave të tij, të cilat mund të shfletohen dhe shkarkohen në faqen zyrtare të BKSH-së (www.bksh.al).
Pas përvojës së suksesshme me tragjedinë shekspiriane, “Othello – Arapi i Venedikut”, Arkivi Digjital i BKSH-së pasurohet me veprën e plotë të rilindësit Naim Frashëri, e cila mund të lexohet dhe shkarkohet nga të gjithë pajisjet kompjuterike, smartphone dhe tablet, duke pasur kështu mundësinë për ta pasur me vete krijimtarinë naimiane.
Gjashtëmbëdhjetë tituj të rinj çelin shërbimin më të ri online që BKSH ofron për të gjithë përdoruesit e saj. Ata janë “Dëshira e vërtetë e shqipëtarëvet” (1904), “Bagëti e Bujqësija” (1886), “Lulet e verësë” (1890), “Istori e Shqipërisë” (1899). “Fletore e Bektashinjvet” (1908), “Dituritë për mësonjëtoret të para” (1888), “Qerbelaja” (1898), “Shqipëria” (1902), “Istori e përgjitheshme për mësonjëtoret të para” (1886), “Vjersa për mësoiëtoret e para” (1886), “Istori’ e Skënderbeut” (1898) “Mësime” (1894) si dhe “Gjithësija: (1895). Krahas tyre do të publikohen edhe përkthimi nga Naim Frashëri i këngës së parë të “Iliadhë” (1896).
Arkivi Digjital i Bibliotekës Kombëtare së fundmi është pasuruar me shërbimin më të ri, “LIBRA”, në të cilin do të publikohen në format elektronik libra të vyer të fondit arkivor të BKSH, duke i ardhur në ndihmë të gjithë studiuesve dhe përdoruesve të saj.
Si një pjesë e rëndësishme e fondit e-Albanica, që përfaqëson Bibliotekën Digjitale Albanologjike të BKSH-së, krahas tyre janë përfshirë edhe tituj të rëndësishëm për historikun e periodikut shqiptar, si “Albania” (1896-1913), “Dituria” (1909-1929), “Hylli i Dritës” (1921-1944), “LEKA” (1929-1944), “Kalendari Kombiar” dhe “Përlindj’e Shqipëniës”.
Në këtë fond janë përfshirë edhe vepra të rralla të Bibliotekës Kombëtare, dorëshkrime, harta dhe periodikë, të shekujve XV-XIX në gjuhën shqipe dhe në gjuhë të tjera.
Prej 10 vitesh Biblioteka Kombëtare, përmes faqes së saj zyrtare (www.bksh.al), ofron një sërë shërbimesh të rëndësishme online si katalogët online, bibliotekën digjitale, e-Bibliografi, etj., duke pasur vit pas viti rritje shumë të shpejtë të frekuentuesve dhe vizitorëve të saj.
Mbetjet njerëzore të gjetura në detin Mesdhe pas rrëzimit të avionit egjiptian flasin qartë për shkaqet e tragjedisë së të enjtes së shkuar.
Një zyrtar pranë hetimeve, i cili ka dashur të mbetet anonim, është shprehur se pas ekzaminimit të mbetjeve njerëzore në morgun e Kajros, ekspertët mendojnë se shkaku i rrëzimit të avionit ka qenë një shpërthim.
Ky burim i ka thënë agjencisë së lajmeve “Associated Press”se 80 pjesë trupi të rikuperuara deri tani tregojnë se ka pasur një shpërthim në bord.
“Nuk ka asnjë pjesë të tërë trupi, si një krah apo një kokë. Shpjegimi logjik të çon te një shpërthim në bord”, ka shtuar ai.
Shkaqet e aksidentit ajror, në të cilin humbën jetën 66 persona ende nuk janë bërë zyrtarisht publike.
Avioni i rrëzuar ishte një “Airbus A230” i kompanisë “Egyptair”, që fluturonte nga Parisi në Kajro.
Autoritetet meksikane kanë nisur zhvarrosjen dhe ekzaminimin e 116 trupave të groposur në një varr masiv në shtetin qendror të Morelos.
BBC shkruan se varri, i ndodhur në një zonë rurale, u zbulua nëntorin e kaluar në qytetin Tetelcingo.
Prokurori i shtetit, Javier Perez Duron deklaroi se varri masiv është i thellë të paktën 10 metra.
“Trupat mund të jenë hedhur ilegalisht nga autoritetet e morgut, por hetimet për identifikimin e përgjegjësve janë në zhvillim”, shprehen prokurorët që po merren me këtë çështje.
Sipas BBC-së, hetuesit në Tetelcingo kanë nisur punimet nën një tendë të madhe të ngritur pranë vendit të ngjarjes.
Gjithashtu, aty janë mbledhur edhe shumë familjarë të personave të zhdukur, si dhe përfaqësues të Komitetit Kombëtar për të Drejtat e Njeriut, për të ndjekur procesin.
Morelos është ndër shtetet më të prekura nga dhuna e lidhur me drogën në Meksikë. Rreth 20 mijë persona janë zhdukur në mbarë vendin për shkak të kësaj dhune, vlerëson OKB, ndërkohë që organizata të tjera deklarojnë se shifra është shumë më e lartë.
Duket se këngëtarja Xhesika Ndoj nuk i është drejtuar Italisë vetëm për të pushuar, por edhe për të punuar.
Këngëtarja ka publikuar disa video në Instagram ku është duke interpretuar këngën e saj më të fundit “Shoqe Bitch”.
Duket se shqiptarët në Itali e kanë mirëpritur këtë perfomancë provokuese të Ndojit.
Partia Demokratike e Kosovës i ka dorëzuar Qeverisë së Kosovës emrat e ministrave të rinj, që do të emërohen shumë shpejt. Gazeta Express ka siguruar emrat e tyre.
Siç merr vesh Express, në ministrinë e Integrimeve Evropianë do të jetë Gani Koci. Derisa ministër i jashtëm do të jetë Enver Hoxhaj.
Gazeta Express ka mësuar po ashtu se në postin e zëvendëskryeministrit do të jetë Hajredin Kuçi, që deri më tash ka qenë ministri i Drejtësisë.
E në vend të Kuçit, në Ministri të Drejtësisë do të emërohet Anila Statovci./Gazeta Express/