Lideri i AAK-së, Ramush Haradinaj, e ka vlerësuar si reagim të pritur sulmin me vezë kundër Isa Mustafës, i cili po raportonte në Kuvend për marrëveshjet.
Ai ka thënë se opozitës ende i kanë mbetur vezë. “Gjuajtja me vezë ishte veprim i qëlluar dhe i nevojshëm. Na kanë mbet edhe do vezë”, ka thënë Haradinaj.

Lëvizja Vetëvendosje përmes një postimi në facebook ka thënë se pushteti po përgatite që të ndërmarrin masa për ti larguar opozitën nga Kuvendi.
“Pushteti po përgatitet që pas 20 minutash të intervenojë për t’i larguar dhunshëm dhe me polici deputetët e opozitës nga Kuvendi. Ftojmë të gjithë mbështetësit tanë dhe të Republikës, të gjithë qytetarët e këtij vendi që të mblidhen para Kuvendit të Kosovës. Në mbrojtje të Republikës! “Zajednica” nuk kalon!”, (sic) shkruan në njoftimin e VV-së.

Kryetari i Kuvendit të Kosovës, Kadri Veseli sërish ka kërkuar 15 minuta pauzë, pasi opozita nuk lejoi vazhdimin e seancës së Kuvendit.
Pas rifillimit të seancës partitë opozitare sërish kanë dalë para foltores së Kuvendit, duke pamundësuar kështu vazhdimin e seancës.
Pas kësaj, Veseli kërkoi 15 minuta pauzë për ta diskutuar me opozitën gjendjen e krijuar. /Telegrafi/

Rifillon seanca, opozita sërish para foltores

E plotësuar: Ka rifilluar seanca e paradites që ka si pikë rend dite raportimin e kryeministrit për marrëveshjet e arritura në Bruksel, ndërkaq para foltores së Kuvendit shihet sërish opozita e cila nuk po lejon vazhdimin e seancës,

Lëvizja Vetëvendosje! në një njoftim për media ka theksuar se sot në Kuvend, deputetët opozitarë janë sulmuar me gota qelqi nga deputetët e pozitës.

“Derisa deputetët e opozitës gjuajtën Isa Mustafën me vezë, deputetët e pozitës përdorën mjete të forta për të kundërshtuar një aksion demokratik.

Kjo tregon të vërtetën e tyre, pavarësisht çirrjes se gjoja opozita po e pengon demokracinë dhe po përdor dhunë”, thuhet në kumtesën e VV-së.

Qeveria e Republikës së Kosovës dënoi aktet, siç i quajti të dhunshme të zhvilluara sot nga deputetët e opozitës në seancën e Kuvendit të Kosovës, ku kryeministri i Republikës së Kosovës, Isa Mustafa, po informonte deputetët dhe qytetarët e Republikës së Kosovës lidhur më marrëveshjet e arritura në Bruksel.

Në reagim thuhet se Qeveria e Republikës së Kosovës vlerëson se të gjithë kanë për detyrim të përmbahen nga aktet e dhunës dhe të shmangin veprimet që tejkalojnë format demokratike të opozitarizmit të cilat dëmtojnë interesat e Republikës së Kosovës.

“Qeveria e Republikës së Kosovës fton Kuvendin e Kosovës që të krijojë kushte normale të punës, në mënyrë që sot të vazhdoj pa pengesa seanca e Kuvendit të Kosovës dhe që qytetarët e Republikës së Kosovës të informohen në detaje për përmbajtjen e marrëveshjeve të arritura. Qeveria e Republikës së Kosovës siguron qytetarët e Republikës së Kosovës se marrëveshjet e arritura në Bruksel, janë në përputhje të plotë me ligjet dhe Kushtetutën e Republikës së Kosovës dhe vlerëson se ato do t’i hapin rrugë integrimeve euroatlantike të vendit, dhe se janë mbështetur fuqishëm nga partnerët strategjik të Kosovës, SHBA-të dhe BE-ja”, thuhet në reagim.

Lëvizja Vetëvendosje ka lëshuar një deklaratë pasi ka hedhur vezë në drejtim të Kryeministrit.

“Sot deputetët e opozitës ia ndalën gënjeshtrën Isa Mustafës, përmes së cilës ai synonte që edhe njëherë t’i gënjejë qytetarët dhe deputetët për marrëveshjet e Brukselit. Isa Mustafa sërish po i trajton deputetët dhe qytetarët si të padijshëm”, thuhet në deklaratën e VV-së.

“Veprimet e tij janë tallje dhe shpërfillje e Kuvendit, ashtu siç marrëveshjet e Brukselit janë rrënim i Republikës” thuhet në deklaratën e VV-së.

Shefja e Grupit parlamentar të AAK-së, Donika Kadaj-Bujupi, ka gjuajtur me vezë kryeministrin Isa Mustafa gjatë fjalës së tij derisa ishte duke thënë se marrëveshjet me Serbinë dhe ajo e demarkacionit me Malin e Zi janë në harmoni me Kushtetutën e Kosovës.

Në foto shihet Kadaj-Bujupi teksa gjuan me forcë vezën drejt Mustafës, raporton Indeksonline. Asaj i ka ndihmuar edhe Albulena Haxhiu, nga Vetëvendosje, duke gjuajtur njëkohësisht vezë drejt Mustafës.