Nxënësit që përfundojnë klasën e nëntë të shkollës se fillore dhe ata të cilët përfundojnë klasën e 12-të, të shkollës së mesme, sipas ligjit, e kanë obligim t’i nënshtrohen testit të arritshmërisë, respektivisht testit shtetëror të maturës.

Përgatitjet për mbajtjen e këtyre testeve tashmë kanë përfunduar. Zyrtarë të Ministrisë së Arsimit, Shkencës dhe Teknologjisë, kanë treguar se testi i arritshmërisë, i cili do të mbahet më 21 maj, do t’i nënshtrohen rreth 30 mijë nxënës në gjithë Kosovën, kurse rezultatet pritet të publikohen më 30 maj.

Ndërsa, testit shtetëror të maturës, më 4 dhe 18 qershor, do t’i nënshtrohen 36 mijë nxënës, të cilët e kanë përfunduar klasën e 12-të.

Përfundimi më sukses i këtij testi mundëson më pas aplikimin për studime në universitet.

Kryetari i Komisionit shtetëror të maturës, Azem Guri, për Radion Evropa e Lirë, ka thënë se risi gjatë këtij viti, është se nxënësit do t’i kenë 100 pyetje nga lëndët e përgjithshme dhe profesionale dhe jo 120 sa kanë qenë vitin e kaluar.

Ai ka treguar se broshurat apo fletëpalosjet janë dërguar në të gjitha shkollat e mesme në Kosovë.

“Matura shtetërore ka prag të kalueshmërisë, që nënkupton se nxënësit përkatësisht kandidatët, të cilët arrijnë 40 për qind të pikëve nga testi i maturës, e kalojnë maturën dhe në këtë rast, Këshilli shtetëror i maturës i pajis me certifikatë. Që do të thotë, maturantët me diplomë dhe certifikatë kanë të drejtë të aplikojnë në Universitet, përkatësisht në njësi akademike”, ka thënë Guri.

Sidoqoftë, ekspertë për çështje të arsimit jo gjithmonë kanë qenë të kënaqur me nivelin e kalueshmërisë të testit të maturës.

Dukagjin Pupovci, udhëheqës në Qendrën për Arsim të Kosovës, për Radion Evropa e Lirë, ka thënë se gjatë këtij viti, në testin e maturës, pret administrim më të mirë, por jo rezultate në cilësi.

Ai, madje, është shprehur se duhet të bëhen publike rajonet dhe shkollat ku nxënësit tregojnë më pak rezultate, në mënyrë që të rritet angazhimi në ato vende.

“Cilësi më të mirë nuk pres, por administrim po. Nëse do të ketë administrim më të mirë të testit, atëherë mendoj se do të kemi një pasqyrë reale të cilësisë së arsimit. Pra, rezultati do të mund të jetë më i dobët se sa ka qenë viteve të kaluara. Dhe është me rëndësi qëkjo mos të shihet në nivel të Kosovës, por të shihet në nivel të komunave dhe në nivel të shkollave”, ka theksuar Pupovci.

Këshilli shtetëror i maturës, është fokusuar në administrimin e maturës, ka thënë Azem Guri, duke shtuar se gjatë këtij viti pret rezultate më të mira, pasi, siç është shprehur ai, një nga objektivat e Ministrisë është rritja e cilësisë së arsimit në nivelin parauniversitar.

“Edhe në programin qeverisës të MASHT-it të prezantuar në Qeverinë e Kosovës, një nga objektivat kryesor është cilësia në arsim dhe mu për këtë, kjo ministri ka përgatitur Strategjinë e Sigurimit të Cilësisë, dokument që vitin e kaluar është miratuar në Qeveri. Tani do të thotë është një bazë e mirë ligjore për avancimin e cilësisë”, ka deklaruar Guri.

Ndryshe, përveç testit të maturës dhe atij të arritshmërisë, për cilësi të arsimit Kosova vitin e kaluar i është nënshtruar një vlerësimi ndërkombëtar, i njohur me emrin “PISA”, rezultatet e të cilit do të bëhen publike në fund të këtij viti.

Vlerësimi i radhës i këtij vlerësimi ndërkombëtar do të jetë në vitin 2018.

Artisti i mirënjohur, Vlashent Sata do të performojë live “jetën e tij” në një koncert recital, të realizuar nga Qendra Kulturore Tirana (Teatri Metropol).

“Hana e plotë” është një koncert, ku do të promovohet dhe albumi me të njëjtin titull, këngët e të cilit flasin për fëmijërinë, shokët e parë, lojërat, familjen, dashurinë dhe sfidat e së ardhmes. Janë himn për kohën e bukur që ikën dhe gjithashtu për vlerat e një vendi, duke reflektuar jetën me ngjyrat e saj.

“Ndihem i privilegjuar që Qendra Kulturore Tirana (Teatri Metropol) më bëri ftesën për të dhënë këtë koncert që do të shoqërohet edhe me albumin “Hana”, për dy net me radhë në sallën “Shekspir”. Më pëlqen, që do të jap koncert aty, pasi teatri dhe salla prej druri të krijojnë një atmosferë ku ndihesh si në shtëpi. Kontakti i publikut me artistin dhe i artistit me publikun është kaq i afërt, madje unë adhuroj sallat e vogla dhe të rrumbullakëta”, tha Sata.

Ky koncert që do të organizohet në datat 25 – 26 maj në sallën “Shekspir”, vjen në vazhdën e strategjisë dhe projekteve që QKT ka për të promovuar vlerat më të mira kombëtare dhe ndërkombëtare, pas koncertit “JalbaniaZZ Society” të Gent Rushit dhe koncertit “Ritual Moods” nga poliinstrumentisti Robert Bisha.

“Kam rendur shumë, para se të regjistroja albumin dhe në mendjen time, të gjitha komponentët përbërës, vargjet, instrumentet, muzika ishin të plotësuara. Tani erdhi dita që më fund ky album u regjistrua. Është, albumi im i parë, i cili flet për të gjithë etapat e jetës sime, duke nisur që nga fëmijëria e deri aktualisht. Në të gjitha këngët ndihet njëlloj ndjeshmërie për të treguar historitë e mia, e më pas t’i ndajë ato me njerëzit. Është bukuria e epokës sime”, thotë Vlashent Sata.

Zëri dhe timbrika e veçantë e kantautorit stili i tij, poezia e teksteve e tingulli shumë i zgjedhur i muzikës, që në të njëjtën kohë ruajnë thjeshtësinë, çelësin për të arritur deri te dëgjuesi natyrshëm, bëjnë që ky projekt të jetë bashkësia e shumë elementeve të një niveli të lartë artistik e me vlera të rralla.

Ky album na bën të besojmë për një frymë të re në muzikën shqiptare me risitë dhe ndjeshmëritë që sjell për dëgjuesin.