Seanca e gjykimit ku Nexhat Çoçaj akuzohet për keqpërdorim detyre është shtyrë për mungesë të avokatit të tij dhe një të akuzuari.

Bashkim Nevzati, avokati i drejtorit të arsimit në Prizren Nexhat Çoçajt kishte njoftuar me shkrim Gjykatën themelore në Prizren se sot gjendet në një seancë tjetër civile në Prishtinë.

Sot mungoi edhe i akuzuari Bedri Çejku, pasi fletëkthesa e postës për gjykatën konstatonte se aty jetonte një palë e panjohur. Çeku kishte marrë pjesë në dy seancat e para të këtij gjykimi.

Sot ishte paraparë të dëshmonte Arbër Rexhaj, aktivist i “Vetëvendosjes” në Prizren, i cili edhe kishte ngritur kallëzimin penal ndaj drejtorit Çoçaj. Ky kallëzim penal është pjesë e aktakuzës ndaj drejtorit të arsimit.

Rexhaj, shtyrjen e seancës e konsideroi të qëllimshme.

“Këto zvarritje po bëhen qëllimisht për ta shtyrë sa më shumë vendimin edhe unë personalisht edhe LVV-ja kemi thënë se ne nuk besojmë në këto organe të drejtësisë dhe këto organe të drejtësisë kanë treguar disa herë që dinë të marrin vendime të gabuara dhe selektive, tha Rexhaj”.

Kallëzimi penal i “Vetëvendosjes” ndaj Nexhat Çoçajt ishte ngritur, pasi ky subjekt siguroi gjendjen e llogarive bankare të drejtorit të arsimit në Prizren dhe mësimdhënësit Bekim Thaçi. Nga kjo gjendje e llogarive “Vetëvendosje” pretendon se Komuna e Prizrenit i kishte transferuar në llogarinë e Çoçajt 12 mijë e 803 euro për Manifestimin “Java e Remzi Ademajt”.

Kjo është pika e parë e aktakuzës kundër Çoçajt.

“Nexhat Çoçaj, gjatë periudhës kohore maj- qershor të vitit 2008 në Prizren, si person zyrtar i ka tejkaluar kompetencat e tij me qëllim të fitimit të kundërligjshëm pasuror për vete, në atë mënyrë që si kryetar i këshillit organizativ “Manifestimi i javës Remzi Ademaj” në xhirollogarinë e tij bankare, alokohet shuma 12 mijë e 803 euro nga Komuna e Prizrenit,” thuhet në këtë pikë të aktakuzës.

Për dorëzimin e gjendjes së llogarive bankare të Çoçajt e Thaçit në selinë e “Vetëvendosjes” në Prizren u dënua më 18 gusht me 5 mijë euro gjobë ish-punonjësi i Bankës “ProCredit” Abdullah Thaçi.

“I akuzuari Çoçaj, përmes kësaj shume të mjeteve, pa një procedurë të tenderimit ka paguar fatura furnitorëve përmes transferit, ka bërë blerje me kartelë nëpër qendra tregtare, ka tërhequr mjete në shuma të ndryshme nga bankomati, ka bërë po ashtu tërheqje të parave nga llogaria rrjedhëse, të cilat i ka alokuar Kuvendi Komunal i Prizrenit dhe atë më datë 14.11.2008, shumën prej 2 mijë euro dhe më datë 04.12.2008 shumën prej 1 mijë e 137 euro, pa u ditur destinacioni i shpenzimit të parasë publike,” vijojnë të shpjegohen veprimet e Çoçajt në aktakuzë.

Përmes këtyre veprimeve prokuroria akuzon Çoçajn se ka kryer keqpërdorim të detyrës ose autoritetit zyrtar.

Në pikën e dytë të aktakuzës, Çoçaj, akuzohet se gjatë periudhës maj- qershor 2009 në Prizren, ka keqpërdorur sërish manifestimin e javës që mbahet në emër të dëshmorit “Remzi Ademaj”.

Kësaj radhe aktakuza thotë se Çoçaj nuk merr mjetet në xhirollogarinë e tij, por mjetet prej 11 mijë euro, alokohen në xhirollogarinë e ndërmarrjes botuese “Bogdani”, pronar i së cilës është vetë ai.

Në pikën katër të akuzës, Çoçaj, sërish në vitin tjetër, gjatë muajve maj- qershor 2011, akuzohet për keqpërdorim të detyrës zyrtare, së bashku me arsimtarin Bekim Thaçi. /Kallxo.com

Një femër e mitur është shkelur nga një veturë në fshatin Lutogllavë të Prizrenit.

Policia njofton se një mashkull duke lëvizur me veturën VW me targa lokale nga pakujdesia dhe mospërshtatja e shpejtësisë së lëvizjes me kushtet e rrugës ka goditur një këmbësore- femër e mitur.

Viktima ka pësuar lëndime trupore dhe e njëjta është dërguar në spitalin e Prizrenit për tretman mjekësor. /PrizrenPress.com

Policia e Kosovës ka arrestuar tre persona, dy meshkuj dhe një femër shqiptare në Suharekë, pasi që për të njëjtit dyshohen se kanë kryer veprën kriminale ‘marrje me prostitucion’.

Policia bën të ditur se gjatë intervistimit të dyshuarit kanë pranuar se kanë kryer veprën kriminale.

Të njëjtit janë dërguar në gjykatën për kundërvajtje për procedurë të mëtejme. /PrizrenPress.com

Në fshatin Sallagrazhdë të Prizrenit ka ndodhur një aksident trafiku në mes të dy automjeteve me ngasës meshkuj.

Si pasojë e aksidentit lëndime trupore ka pësuar njëri nga ngasësit i cili pas marrjes së tretmanit mjekësor në spitalin e Prizrenit është liruar. /PrizrenPress.com

Sistemi i drejtësisë në Kosovë vijon të mbetet i përkeqësuar, duke bërë të pamundur kështu qasjen e qytetarëve në drejtësi. Prokuroria, gjykatat dhe policia ndikohen politikisht dhe i keqpërdorin detyrat, për të cilat janë të thirrur t’i kryejnë.

Problemet e akumuluara nën mandatin e UNMIK-ut, i cili i ngriti këto tre institucione, kanë mbetur të pandryshuara dhe të pazgjidhura edhe pas shpalljes së pavarësisë së Kosovës, por edhe pas vendosjes së misionit të EULEX–it, pasi ky i fundit tashmë ka treguar se ka dështuar.

Gjykatat janë shndërruar në institucione të pabesueshme me mijëra lëndë të grumbulluara ndër vite dhe të përcjella nga reputacion për favorizime dhe korrupsion. Ndërsa prokuroria një hap e hedh përpara dhe dy tre hapa të tjerë shkon prapa, pasi çështje të ndjeshme ku janë të përfshirë zyrtarë të lartë i fillon me bujë, por që në fund pajtohet me shuarjen e tyre. Që do të thotë se edhe për institucionin e prokurorisë jobesueshmëria mbetet e përhapur, ndërkohë që nuk mungojnë zëra për sabotim të punë së tyre nga oficerët hetues, për të cilët thuhet se kanë lidhje me politikën.

Sipas analistit Leon Duhanaj, Prokuroria e Shtetit, në qoftë se dëshiron dhe ka vullnetin për të bërë kthesa, të cilat nuk janë aspak të lehta, duhet që së pari të tregojë gatishmëri dhe guxim për hapa konkretë.

“Prokuroria e Shtetit duhet t’i ngre aktakuzat publikisht dhe nëse pushtetit vendor i mungon guximi apo gatishmëria për drejtësi atëherë kjo të kërkohet nga faktori ndërkombëtar”, ka thënë ai. /Kosova Sot

Deputeti i Lëvizjes Vetëvendosje, Rexhep Selimi ka një selam për kryeministrin e Kosovës, Isa Mustafa.

Selimi në një prononcim për RTV Dukagjinin ka thënë se shefi i qeverisë i ka vetëm dy rrugë, dorëheqjen ose tërheqjen e nënshkrimit nga marrëveshjet e fundit të arritura në Bruksel, përfshirë atë për “Zajednicën” dhe demarkacionin e kufirit me Malin e Zi.

Se a do të ketë protesta në vend, sipas Selimti është në dorën e vet kryeministrit Isa Mustafa.

Ai ka thënë se i vetmi njeri që mund të shmang protestat është kryeministri i Kosovës, Isa Mustafa duket se e ka zgjedhur se do të ketë protesta në këtë vend.

Ai ka paralajmëruar ballafaqim të fuqishëm të opozitës me pozitën të martën ne Kuvendin e Kosovës.

Rexhep Selimi, ish-komandat i UÇK ka thënë se Lëvizja Vetëvendosje nuk dëshiron që të vijë në pushtet me dhunë, siç pretendohet nga shumica por që VV dëshiron që përmes votës të marrë timonin e ekzekutivit. /Telegrafi