Ministri në ardhje instaloi rrjet klientelist dhe korruptiv

Drejtimi i Ministrisë së Jashtme nga ana e PDK-së gjatë mandatit të kaluar, saktësisht nga i zgjedhuri prej këtij subjekti politik, Enver Hoxhaj, sipas raportimeve të ndryshme në medie, gjatë atij mandati ishte cilësuar si njëri nga rastet më eklatante të instalimit të rrjetit nepotik dhe lokalist në një dikaster qeveritar. Tani me rikthimin e tij në të njëjtën pozitë, po cilësohet nga opozita dhe analistët politikë si një vazhdimësi e shndërrimit të MPJ-së nga Hoxhaj në një bastion akoma më të fuqishëm të suharekasve, me një rrjet të fortë nepotist, duke krijuar mundësi rehatimi dhe sistemimi të njerëzve më jokompetentë, thuajse analfabetë, nëpër përfaqësitë diplomatike të Kosovës dhe ambasada gjithandej nëpër botë. Ky rrezik vlerë- sohet të jetë dëmi më i madh që pritet t’i bëhet, për pjesën e mbetur të këtij mandati, politikës së jashtme të Kosovës.

Deputeti i lëvizjes ‘Vetëvendosje’, Ismail Kurteshi, tha për “Kosova Sot” se jo vetëm në këtë ministri, por pothuajse në të gjitha dikasteret ministrore, praktika e instalimit të rrjeteve nepotiste dhe joprofesionale në punësim është bërë “Ligj” i llojit të vet të kapjes së shtetit nga kjo klasë politike e korruptuar, prandaj është e nevojshme që shteti sa më parë të lirohet nga keqqeverisja e tyre.

“Një ndër të këqijat e mëdha, që i karakterizon institucionet e vendit në të gjitha nivelet, është nepotizmi. Kusht shumë i rëndësishëm për punësim, pavarësisht kualiteteve, janë lidhjet qoftë partiake qoftë familjare, ose korrupsioni. Këto dukuri të shëmtuara e pamundësojnë parimin – njeriu i duhur – në vendin e duhur, kështu i kemi degraduar institucionet, shkollat, spitalet e pse jo edhe ambasadat, pasi që me detyra të përfaqësuesit të vendit janë angazhuar njerëz, që nuk janë të zotët t’i përfaqësojnë as familjet e tyre”, u shpreh ai.

Dështoi në arsim, pa sukses në MPJ

Edhe anëtari i kryesisë së AAK-së, Muhamet Kelmendi, vlerëson se rikthimi i Hoxhajt në këtë ministri është kulmi i të gjitha dështimeve të deritanishme dhe jo vetëm ruajtjes dhe instalimit të klientelës së ngushtë lokaliste të ministrit Hoxhaj, bastionit suharekas të punësuar në MPJ. Kelmendi tha se edhe sa ishte në krye të MASHT-it, ky ministër qe i dështuar.

“Në tërësi mund të themi se kemi dështim të këtij njeriu në të gjitha drejtimet. Sa ishte ministër i Arsimit e shkatërroi në ato përmasa, saqë nuk bëri as më të voglën ecje në modernizimin dhe në rritjen e kualitetit të mësimdhënies dhe të mësimnxënies. Si ministër i Punëve të Jashtme pati dështuar gjithashtu. Në mandatin e tij, pastaj edhe të Thaçit, e kështu pritet të vazhdojë edhe tash, nuk e kemi asnjë rezultat konkret në raport me botën e jashtme”, tha Muhamet Kelmendi për “Kosova Sot”.

Ai ka pohuar se tri zhvillimet pozitive, dhënia e MSA-së, pranimi në UEFA dhe tash propozimi për liberalizimin e vizave janë një politikë me dy tehe e interesit politik evropian, por assesi zhvillim pozitiv i punës së MPJ-së.

“Përveç UEFA-s, ku mund të flitet për sukses të lartë, sepse Kosova u bë anëtare e barabartë e këtij subjekti të futbollit, derisa në dy çështjet e tjera kemi dështim të plotë që ndërlidhen me MPJ-në dhe drejtuesit e saj të deritanishëm. MSA-ja e ka refuzuar Kosovën si shtet, kurse edhe propozimi për liberalizimin e vizave e ka refuzuar po ashtu specifikimin dhe adresimin e këtij propozimi për Kosovën si shtet i pavarur, i barabartë me shtetet e tjera. Pra, të dy këto çështje nuk e njohin shtetin e pavarur dhe sovran. Ky është dështim absolut i politikës së jashtme në vazhdimësi. Dhe, në këtë rrugë, duke i ditur dështimet e tërësishme të Enver Hoxhajt, nuk është as politike dhe as diplomatike, zgjidhje dhe vendosja e tij përsëri në një dikaster, ku ka dështuar dhe nuk ka arritur asnjë sukses”, theksoi Kelmendi.

Dikasteri i luksit dhe jo i punës

Veç vazhdimit të traditës së dështimit të mandatit të kaluar dhe fuqizimit të klientelës rajonale në punësim në këtë ministri, asnjë qëllim tjetër të kthimit në këtë ministri të ish-ministrit Hoxhaj nuk sheh edhe njohësi i marrëdhënieve ndërkombëtare, Albinot Maloku.

“Politika e jashtme e vendit tonë e drejtuar nga ministri i rikthyer, Enver Hoxhaj, që në start vihet në dyshim për suksese, e për të cilat suksese ka nevojë shteti i Kosovës. Dikasteri i Punëve të Jashtme i Qeverisë së vendit është parë më shumë si luks sesa si angazhim maksimal në rrugëtimin e shtetndërtimit të mirëfilltë dhe pasjen e një strategjie zhvillimore të shteti të Kosovës. Mandati i parë i ministrit të rikthyer është përcjellë me dështime nga më të ndryshmet, e deri në skandale të diplomatëve të Kosovës dhe kjo për shkak të virusit më të keq për sistemin shtetëror, e që është nepotizmi familjar e politik. Angazhimi i mirëfilltë e profesional në Ministrinë e Punëve të Jashtme të Republikës së Kosovës nuk duket gjëkundi. Rikthimi i Enver Hoxhajt pa e menduar periudhën e tij me skandale, është pjesa kryesore e këtij virusi që po e ndrydh shtetin e shoqërinë kosovare”, tha Maloku për “Kosova Sot”.

Në edicionin e radhës, të premten, rubrika “POLICIA” e cila transmetohet në kuadër të emisionit “Drejtësia në Kosovë” sjell pamjet ekskluzive të operacionit të fundi të policisë në konfiskimin e pronave të familjes Kqira në Prizren, të dyshuar për fajde.

Operacioni i cili është zhvilluar javën e kaluar ka pasur cak sekuestrimin e pronave me vlerë milionëshe të cilat dyshohet se janë fituar nga veprimtaria kriminale e fajdeve.

Sipas njoftimit zyrtar të policisë, gjatë këtij aksioni janë sekuestruar: një hotel, një restorant dhe veranda e tij, një objekt dhe një parcelë toke (6664 m2).

Policia në lidhje me këtë rast ka sekuestruar më herët edhe “para të gatshme 303,235.00 euro, 1,100 franga zvicerane, 700 gramë ar, 7 vetura private.

Në sekuenca të shkurtra ‘Drejtësia në Kosovë’ tashmë ka publikuar disa nga pamjet e këtij operacioni.

Prokurori ka kërkuar dënimin e drejtorit të Arsimit, Nexhat Çoçaj dhe drejtorit të gjimnazit “Gjon Buzuku”, Shaip Buduri, të cilët akuzohen për punësim të kundërligjshëm të profesorit Besnik Krasniqi. Mbrojtja, ndërkaq, kërkoi lirimin e të akuzuarve.

Mehdi Sefa, Prokurori në rastin e gjykimit të drejtorit të Arsimit në Prizren, Nexhat Çoçajt dhe të drejtorit të Gjimnazit “Gjon Buzuku”, Shaip Buduri, kërkoi sot në fjalën përfundimtare që të akuzuarit të shpallen fajtorë dhe të dënohen sipas ligjit.

Prokurori Sefa, i cili ka zëvendësuar kolegun e tij të suspenduar Bajram Hamitaga, tha se qëndron plotësisht pranë aktakuzës. Ai theksoi se në cilësinë e personave zyrtarë, duke shfrytëzuar autoritetin zyrtar, në mënyrë të kundërligjshme të akuzuarit kanë mundësuar dobi për tjetrin, në rastin konkret për profesorin Besnik Krasniqi, duke i mundësuar punësim jo të ligjshëm.

Prandaj, tha ai, kërkoj nga trupi gjykues që të akuzuarit t’i shpallë fajtorë dhe t’i dënojë sipas ligjit.

Ndërsa, mbrojtja e kundërshtoi në tërësi aktakuzën me arsyetimin se ajo është e pabazuar në prova dhe fakte.

“Nëse me vëmendje e analizojmë dispozitivin e aktakuzës dhe provat të cilat janë administruar nga trupi gjykues e sidomos me dëgjimin e dëshmitarëve dhe vet të akuzuarve këtu dhe Ligjin për Arsimin dhe provat materiale që janë proceduar, me plot gojën mund të them se aktakuza juridikisht dhe faktikisht nuk mund të qëndrojë”, tha Esat Gutaj, avokati i të pandehurit Shaip Buduri.

Për më tepër, avokati Gutaj tha se klienti i tij nuk është punëdhënës dhe nuk ka mundur as ta punësojë e as ta largojë nga puna profesorin Besnik Krasniqi, prandaj edhe nuk e ka kryer veprën penale.

Aktakuzën e kundërshtoi edhe mbrojtësi i të akuzuarit Nexhat Çoçaj.

Avokati Rexhep Hasani tha se për rastin konkret në bazë të udhëzimit administrativ nuk është dashur të hapet konkurs dhe se klienti i tij në bazë të këtij udhëzimi ka qenë i detyruar të nënshkruajë kontratë me profesorin Krasniqi, i cili deri në atë kohë ka qenë drejtor në një shkollë tjetër.

Prandaj, kërkoi nga trupi gjykues të marrë aktgjykim lirues.

Të akuzuarit e mbështetën në tërësi fjalën përfundimtare të mbrojtësve të tyre.

Sipas aktakuzës, drejtori i Drejtorisë së Arsimit, Nexhat Çoçaj, i ka nënshkruar në mënyrë të kundërligjshme kontratën e punës Besnik Krasniqit. Ai punësimin e Krasniqit e ka bërë pa shpallur konkurs për vendin e punës – profesor i gjuhës dhe letërsisë shqipe.

Ky i fundit kishte punuar edhe pa kontratë pune në gjimnazin “Gjon Buzuku”, drejtor i të cilit është dhëndri i tij, Shaip Buduri.

Shpallja e aktgjykimit do të bëhet më 16 maj.

Në Gjykatën Themelore të Prizrenit Çoçaj është duke u gjykuar edhe për dy raste të tjera të keqpërdorimit të detyrës apo autoritetit zyrtar, për të cilat KALLXO.com ka raportuar në vazhdimësi. /Kallxo.com/