Në fshatin Dejn të Rahovecit, mbrëmë ka nisur festivali tradicional treditor folklorik, edicioni i 15-të me radhë, ku marrin pjesë ansamblet folklorike nga e gjithë treva shqiptare.
Drejtori i Drejtorisë për Kulturë, Rini dhe Sport, Gardalin Shtavica, potencoi se festivali “Anadrinia Jehon 2016”, tash e 15 vite e ruan traditën e trashëgimisë së muzikës folklorike të mbarë trojeve shqiptare, lashtësia e cila vazhdohet të pasqyrohet ende.
“Përmes kësaj trashëgimie pasqyrohet, jeta, puna dhe begatia kulturore dhe etnografike e një populli”, tha Shtavica.
Vajdin Berisha, kryetar i degës së OVL në Rahovec, thotë se ky festival madhështor mbahet në kuadër të “Javës së Dëshmorëve”, dhe nuk është e rastësishme që përshëndetjet i fillova nga familjarët e dëshmorëve, sepse ata janë më meritorët për iniciativën e mbajtjes të këtij festivali madhështor, i cili do të mbijetoj edhe shumë vite e dekada.
Kryetari i Rahovecit, Idriz Vehapi, tha se me festivalin “Anadrinia Jehon” tashmë indetifikohet komuna e tyre.
“Jam i nderuar që sonte gjendem në mesin tuaj për të hapur një ngjarje kaq të rëndësishme, ngjarje me të cilën tashmë identifikohet komuna jonë, festivali “Anadrinia Jehon 2016”. Ky festival tashmë i përmbush 15 vjet jete, i cili na sjell një trashëgimi të lashtë të kombit shqiptar, gjithë ato të bëmat, doket, zakonet dhe traditën kulturore përmes folklorit burimor dhe autokton dhe na sjell frymën e të parëve tanë. Përmes festivalit, i cili mbahet në kuadër të Javës së Dëshmorëve, ne i kujtojmë edhe dëshmorët të cilit kanë rënë për liri, dhe përkujtimet janë traditë e jona”, tha Vehapi.
Festivalin e kanë hapur Sh.K.A. “Anadrinia” nga Dejni, nikoqir dhe Sh.K.A. “Rahoveci”. Ndërkaq, natën e parë në konkurrencën garuese janë paraqitur me programet e tyre Sh.K.A. “Shqiponja” nga Saraji i Shkupit, Sh.K.A. “Ardhmëria” nga Gjakova dhe Sh.K.A. “Isa Boletini” nga Rogova e Hasit .
Të gjitha paraqitje i vlerëson juria në përbërje: Dilaver Kryeziu koreograf, Sami Piraj kompozitor, dhe Zymer Neziri folklorist. /PrizrenPress.com/