Rreth orës 17:15 minuta, policia në Prizren ka pranuar dje një informacion, i cili bënte me dije se në restorant “Niki” në fshatin Gjonaj ka të shtëna me armë zjarri.

Dy patrulla policore dhe një grup hetuesish kanë dalë në vendin e ngjarjes për të kryer hetime. Siç merret vesh nga raportet policore, policia në vendin e ngjarjes ka gjetur katër gëzhoja të kalibrit të panjohur.

Gjatë kryerjes së detyrës, policët janë penguar nga tre të dyshuar, të cilët kishin kërkuar që policia të largohet nga ambientet e restorantit dhe gjithashtu edhe veturat e policisë të largohen nga oborri.

Pas përfundimit të këqyrjes së vendit të ngjarjes, tre të dyshuarit janë sjellë në stacion për t’u pyetur për rastin.

Më pas është informuar prokurori i shtetit, i cili ka urdhëruar që këta tre dhe një tjetër, i cili me parë ishte larguar nga vendi i ngjarjes dhe ishte arrestuar nga policia e Gjakovës, të ndalën nën masën e arrestit policor për 48 orë. Ndërkaq hetuesit po punojnë për gjetjen e armës. /PrizrenPress.com/

Policia Rajonale e Prizrenit, ka raportuar se një zyrtar policor është sulmuar afër Drejtorisë së Pylltarisë në Prizren.

Patrulla policore kufitare ka kërkuar ndihmë nga kolegët e tyre në Prizren, pasi që njëri ndër ta ka marrë lëndime trupore nga dy të dyshuar me mbiemrin Pirkuqi, pasi këta të fundit ishin ndaluar si të dyshuar për bartjen e druve në mënyrë ilegale.

Në kohën kur ka ndodhur ngjarja, policët po u jepnin asistencë pylltarëve të cilët i kishin ndaluar dy personat, nën dyshimin e prerjes së druve nga pyjet.

Dy të dyshuarit janë ndaluar dhe po mbahen në objektet e policisë në Prizren. /PrizrenPress.com/

Brenda muajit gusht pritet të përfundojë procesi i shqyrtimit të rreth 20 mijë ankesave të veteranëve të Ushtrisë Çlirimtare të Kosovës.

Kjo është bërë e ditur nga zyrtarët e Komisionit për verifikimin e veteranëve.

Në anën tjetër veteranët kanë paralajmëruar protesta të reja në muajin shtator, nëse nuk përfundon tërë procesi gjatë gushtit, pasi që kërkojnë që sa më parë të fillojë dhënia e beneficioneve për veteranët.

Udhëheqësi i Zyrës për Veteranët e Luftës së UÇK-së në Zyrën e Kryeministrit, Faik Fazliu, ka thënë për “Zërin” se beson që procesi i shqyrtimit të ankesave do të bëhet shumë shpejt dhe se veteranët do të marrin certifikatat brenda muajit gusht.

“Procesi është në përfundim e sipër, besoj që në fund të këtij muaji të gjithë do t’i marrin vendimet dhe certifikatat”, ka deklaruar shkurt Fazliu.

Ndërsa përfaqësuesi i organizatave të dala nga lufta e UÇK-së, Xhavit Jashari, ka thënë se në bazë të informata që i kanë, procesi i shqyrtimit të ankesave është afër përfundimit dhe se shpreson që ky proces të përfundojë shpejt.

Shënimet statistikore tregojnë se numri i përdoruesve të drogës në Kosovë është në rritje dhe më të prekurit nga kjo dukuri negative janë adoleshentët dhe të rinjtë, kryesisht në mjediset urbane, veçmas në qytetet e mëdha.

Sipas shënimeve statistikore problemi i përdorimit të drogës në Kosovë më së shumti prek grupmoshën 22-35 vjeçare, që shprehur në përqindje janë 46% të përdoruesve të drogës që i takojnë kësaj moshe.

Njohës të këtij problemi tregojnë se viteve të fundit ka nj? rritje t? përdorimit të substancave narkotike mariuhanë, heroin?, kokain? apo të drogave t? tjera sintetike, por n? rritje ?sht? dhe numri i p?rdoruesve t? drogës me injektim.

Gjithashtu thuhet se më së shumti drogat përdoren në ambiente të mbyllura, kryesisht në të ashtuquajturat lokale të natës, por drogat përdoren edhe në secilin ambient që përdoruesit e tyre e shohin si të përshtatshëm, sepse vartësit e drogës nuk zgjedhin kohë të caktuar e as ambient të caktuar për të konsumuar drogën, si e quajnë ata në zhargonin e tyre ‘bari’, ‘pluhur i bardh’, ‘pluhur i parajsës’, etj.

Nga të dhënat zyrtare që i ka siguruar KosovaLive, gjendja ekzistuese është alarmante, pasi numrit të përdoruesve të drogës po i shtohen çdo ditë e më shumë moshat minore, nga 12 vjet e tutje, ndërsa në vend mungojnë institucione adekuate për t’i trajtuar të prekurit nga kjo dukuri.

Gentiana Kuqi-Tishukaj, psikologe në Qendrën specialistike psikiatrike “Labyrinth” në Prishtinë, e cila merret me problemin e përdoruesve të drogës, ka thënë për KosovaLive se përdorimi i drogës në përgjithësi është në rritje. Sipas saj, rritje ka shënuar përdorimi i disa llojeve të drogave dhe në veçanti marihuana dhe kokaina.

Ajo tregon se edhe mosha mesatare e fillimit të përdorimit të drogave ka rënë shumë ndër vite dhe tani sillet në 16 vjeç e më ulët. Sipas saj, kjo qendër ka të regjistruar 1.130 përdorues, kuptohet se në këtë shifër janë të përfshirë vetëm përdoruesit problematik të drogës, të cilët kërkojnë trajtim në këtë qendër.

Zëdhënësi i policisë, Daut Hoxha, duke iu referuar statistikave të Drejtorisë për hetimin e trafikimit me narkotikë (DHTN) të Policisë së Kosovës ka thënë se në krahasim me vitin paraprak ka një ulje të rasteve të përdoruesve dhe të konfiskimeve të narkotikëve. Sipas tij, raste më të shpeshta janë në rajonin e Prishtinës, i cili prinë për të tilla raste në krahasim me rajonet e tjera.

Hoxha thotë se problemi i përdorimit të drogës në Kosovë më së shumti prek gruposhën moshën 22-35 vjeçare me 46%. Kjo grupmoshë pasohet nga grupmosha 19-21 vjeç me 27%, pastaj nga ajo 14-18 me 15% dhe mbi 35 vjeç me 12%.

“Për të parandaluar dhe zvogëluar qarkullimin e drogës në Kosovë, Drejtoria e trafikimit me narkotikë angazhohet në veprimtarinë e parandalimit, hetimit, zbulimit dhe arrestimit të personave qe kryejnë të gjitha format e veprave kriminale që kanë të bëjnë me substancat narkotike (drogat) të parapara me legjislacionin e Republikës së Kosovës.

Kjo drejtori angazhohet në realizimin e objektivave të parapara me strategjinë kombëtare kundër drogës dhe implementimin e planit të veprimit. Përkushtim i shtuar i është kushtuar parandalimit dhe zvogëlimit të ofertës dhe furnizimit. Në mënyrë që të arrihet efikasiteti në parandalim janë ndërmarrë hapat si në vijim: janë intensifikuar takimet me burime në terren, vizitat në lokacionet e ndryshme të frekuentuara nga trafikantët (kryesisht mbrëmjeve), janë mbajtur takime me institucione kombëtare dhe ndërkombëtare, në shkollat e mesme të Kosovës janë mbajtur ligjërata me qëllim të vetëdijesimit për pasojat nga përdorimi i drogave, janë shtuar kapacitetet logjistike (pajisje për identifikimin e drogave) e kështu me radhë”, ka thënë Hoxha.

Sociologu Genc Xërxa ka thënë për KosovaLive se në periudhën e paraluftës ishin disa individ si përdorues të drogës, ndërsa tani viteve të fundit ky numër është shtuar dhe në vazhdimësi ka tendencë rritjeje. Sipas tij edhe pse nuk ka një statistikë të saktë në nivel nacional në lidhje me këtë fenomen numri i përdoruesve të drogës në vendin tonë ka tendencë rritje.

Në bazë të perceptimeve nga institucionet relevante që merren me këtë problematikë Kosova tani është bërë vend transitor i qarkullimit të drogës dhe një pjesë e konsiderueshme mbetet për konsum në vendin tonë, madje numri mesatar i moshës së përdoruesve të narkotikëve në vazhdimësi po bie dhe kjo po i bie që konsumuesit më të mëdhenj sot janë rinia jonë.

“Rinia është trageti më i ekspozuar dhe më lehtë i bërë konsumues droge, për shkak të natyrës së tyre të re, mendjelehte dhe dëshirës për të eksperimentuar me gjërat dhe kureshtjes në vitet e caktuara të adoleshencës së tyre, për këto arsye rreziku permanent i kanoset kësaj kategorie të shoqërisë”, ka thënë Xërxa.

Në prononcimin e tij Xërxa prek edhe problemin se droga dhe përdorimi i saj në Kosovë ende vazhdojnë të konsiderohen si temë tabu edhe pse numri i përdoruesve të drogës është vazhdimisht në rritje. Kjo bën që njerëzit të cilët kanë nevojë për të kërkuar ndihmë për t’u liruar nga vartësia e drogës ndjejnë turp për të shkuar në vizitë në Klinikën Psikiatrike të Qendrës Klinike Universitare të Prishtinës, pasi vizitën në këtë klinikë e ndërlidhin me çmendurinë.

Shpeshherë edhe familjarët e kanë fajin se e fshehin problemin e fëmijëve të tyre dhe nuk kërkojnë trajtim mjekësor për ta, gjë që është shumë e nevojshme për ta tejkaluar gjendjen e tyre të vartësisë nga droga.

Qytetari nga Prishtina, T. S. ka pranuar të rrëfejë për KosovaLive se çfarë ai ka përjetuar qysh prej kohës kur ai e provoi drogën.

Ai ka treguar se para tri vitesh, kur ai ishte 21 vjeçar, kishte filluar të merrte substanca narkotike dhe fillimisht një gjë e tillë nuk u kishte rënë në sy prindërve të tij. Por, siç thotë ai, dita- ditës ndjente nevojën për të shtuar sasinë e konsumimit dhe për një gjë të tillë nuk i mjaftonin të hollat që i jepnin prindërit dhe kishte filluar që ato t’ua vidhte. Prindërit pasi vunë re se po mungonin paratë dhe po pakësoheshin disa nga gjësendet e shtëpisë, të cilat djali i tyre i shiste, e kuptuan se djali ishte përdorues i drogës ndaj të cilës kishte krijuar varësi.

Ai ka thënë se fillimisht nuk ka dashur të kërkojë ndihmë për shërim pasi që mund ta imagjinonte se çfarë do të mendojnë të tjerët për të. Mirëpo, me insistimin e prindërve dhe të disa miqve ishte bindur se më e rëndësishme është vetë jeta e tij sesa paragjykimet e njerëzve.

“Për tri vite me radhë kam qenë konsumues i rregullt i substancave narkotike dhe dita ditës fillova të shtoja dozën. Kur e kuptuan prindërit e mi mundoheshin të më jepnin mbështetje dhe më këshillonin të mos merrja më drogë, por unë nuk mund ta largoja këtë ves, e ndjeja të nevojshme të merrja vazhdimisht, sepse kjo më kishte kaluar në vartësi.

Nuk kisha guxim të kërkoja trajtim në ndonjë institucion, sepse frikësohesha nga ajo se çfarë do mendojnë të tjerët për mua dha një gjë të tillë nuk e dëshironin as prindërit e mi.

Kanë qenë dy shok të mi që vazhdimisht janë munduar të më bindin se unë duhet t’i drejtohem ndonjë qendre dhe të lirohem nga varësia e drogës pasi ata e kanë parë se gjendja ime po keqësohej dita-ditës. Edhe familja ime insistonte se më e rëndësishme është shërimi im sesa paragjykimet e njerëzve.

Kështu unë u drejtova në njërën nga qendrat ku trajtohen personat që konsumojnë drogë, në fillim e kisha shumë të vështirë, por tani u jam falënderues për tërë jetën shokëve të mi më të mirë dhe familjes që më binden për një gjë të tillë. Tashmë jeta ime ka ndryshuar për të mirë dhe me këtë unë i kam ndihmuar vetës dhe familjes sime, sepse kam filluar t’i kthehem realitetit dhe jetës normale”, ka rrëfyer ai për KosovaLive.

Në Kosovë nuk ka shumë mundësi për trajtimin e përdoruesve të substancave narkotike pasi mungojnë qendrat për rehabilitimin e tyre. Në Kosovë ekziston vetëm një qendër e tillë, e cila është e regjistruar si organizatë joqeveritare, Qendra specialistike psikiatrike “Labyrinth” që ofron shërbime për personat me vartësi nga droga, këshilla psikiatrike, shërbime terapeutike dhe trajtime zëvendësuese, si dhe psikoterapi për individë, familje dhe grupe./KosovaLive/

Kërkesa e komunave me shumicë serbe drejtuar Qeverisë së Kosovës dhe asaj të Serbisë për të arritur marrëveshje për asociacionin në takimin e radhës në Bruksel nuk do të ketë ndonjë ndikim në rrjedhën e këtyre negociatave.

Ministrja për Dialog, Edita Tahiri, ka thënë për “Epokën e re” se çështja e formimit të asociacionit të komunave me shumicë serbe nuk lidhet me afate kohore.

“Tani jemi duke diskutuar për parimet themelore mbi të cilat duhet të themelohet asociacioni. Për këtë ka pasur një përparim, por bisedimet do të vazhdojnë në takimet e radhës që janë më 24 gusht në nivelin teknik dhe më 25 gusht në nivelin e kryeministrave të ndërmjetësuar nga Mogerini. Se si do të shkojnë proceset kjo nuk mund të kufizohet me data e me afate. Prandaj, kërkesat e komunave serbe që kanë dalë nuk mund të kenë ndonjë ndikim sepse negociatat kanë një rrjedh të vetëm dhe ne si Qeveri e Republikës së Kosovës do të jemi të angazhuar për të arritur marrëveshje”, ka thënë Tahiri.

Ajo është shprehur e bindur se ky asociacion nuk do të ketë kompetenca ekzekutive dhe nuk do të jetë një nivel i tretë i pushtetit në Kosovë.

“Ne kemi thënë që nga fillimi, qëndrimi i Qeverisë së Kosovës është i qartë se asociacioni do të jetë në pajtim të plotë me Kushtetutën e Republikës së Kosovës dhe ligjet e Kosovës, ashtu siç e thotë edhe marrëveshja e Brukselit për normalizim të marrëdhënieve. Pra, jemi të prerë, ky asociacion nuk do të ketë kompetenca ekzekutive”, është shprehur Tahiri.

Ministrja Tahiri ka bërë me dije se marrëveshje për këtë çështje do të ketë vetëm nëse respektohen qëndrimet e shtetit të Kosovës, duke shtuar se delegacionit të Prishtinës nuk i interesojnë qëndrimet e Beogradit.

“Në të gjitha marrëveshjet që i kemi arritur në Bruksel i kemi prezantuar para opinionit publik dhe në parlament. Pra, ne si Qeveri e Republikës së Kosovës, duke respektuar edhe Rezolutën e Kuvendit të Kosovës për Dialogun e Brukselit, kemi mandat të arrijmë marrëveshje vetëm në përputhje të plotë me Kushtetutën e Republikës së Kosovës dhe ligjet e saj. Këtë qëndrim do ta mbrojmë, pavarësisht se çfarë qëndrimesh ka Serbia. Pra, marrëveshje do të ketë vetëm nëse do të jetë në pajtim me Kushtetutën dhe ligjet e Kosovës”, ka thënë Tahiri.

Dhjetë komunat me shumicë serbe në Kosovë të mërkurën u kanë bërë thirrje Qeverisë së Serbisë dhe të Kosovës, si dhe ekipit menaxhues për themelimin e bashkësisë së komunave serbe, që gjatë takimit të ardhshëm në Bruksel të arrijnë marrëveshje për themelimin e këtij asociacioni. Formimi i tij, sipas tyre, do t’i hapë rrugë normalizimit të mirëfilltë të marrëdhënieve midis dy vendeve.

Një sprovë e fuqishme e sistemit të drejtësisë në Kosovë do të jetë kalimi i të gjitha lëndëve të EULEX-it, përfshirë edhe krimet e luftës. Ky është një test nga Bashkësia Ndërkombëtare, për të parë se sa janë të gatshme autoritetet vendore të ballafaqohen edhe me lëndët e kësaj natyre që zanafillën e kanë te njerëzit e pushtetshëm të politikës dhe parapolitikës.

Mirëpo, njohësit e kësaj fushe thonë se EULEX-i këtë kalim e ka bërë për shkak të dështimeve të veta, kurse disa të tjerë mendojnë se nuk është dashur të bëhet ky kalim, duke pasur parasysh interferimet që bëhen në drejtësinë kosovare, shkruan Kosova Sot.

Avokati i njohur, Tomë Gashi, mendon se ky kalim i lëndëve nga EULEX-i te vendoret nuk është asnjë lloj testi, por nevojë e kohës.

“Dërgimi i lëndëve nga misioni i EULEX-it te prokurorët dhe gjykatat vendore nuk është as test dhe as provë për autoritetet gjyqësore vendore, por është një nevojë e kohës, që më në fund, pas 16 vjetësh të përfundimit të luftës në Kosovë, shqiptarët dhe të gjithë të tjerët që jetojnë në Kosovë të marrin në duart e veta punët shtetërore. Mendimi im është se dorëzimi i lëndëve nga ndërkombëtarët te vendoret është dashur të ndodhë shumë më herët, e jo që për 16 vjet raste të profilit të lartë, apo siç ju i quani raste të njerëzve të pushtetshëm, të pritet të gjykohen vetëm nga ndërkombëtarët”, thotë ai.

“Prokurorët dhe gjyqtarët vendorë nuk e kanë asnjë arsye që të mos merren edhe me raste të krimeve të luftës dhe me raste të profilit të lartë, për shkak se prokurorët e Prokurorisë Speciale dhe prokurorët për krime të rënda i kanë aplikuar vullnetarisht për ato vende të punës. Po ashtu, gjyqtarët e departamenteve për krime të rënda kanë aplikuar për ato vende të punës dhe paraprakisht janë pajtuar që të akuzojnë dhe gjykojnë me prova edhe rastet e veprave më të rënda penale”, thotë avokati Tomë Gashi për “Kosova Sot”.