Deputeti i PDK-së nga Prizreni Nezir Çoçaj nuk është i kënaqur me përfaqësimin e Prizrenit në Qeverinë e Kosovës. Ai thotë se si deputet, e ka ngritur këtë shqetësim.

“Kam shprehur pakënaqësinë time për përfshirje jo të drejtë dhe jo adekuate të kuadrove profesionale nga Prizreni në pozitat e Ministrave, zv. Ministrave, si dhe në pozitat e tjera relevante, agjencione shtetërore, kompani publike dhe në institucione tjera publike e profesionale në proporcion me fuqinë elektorale e votën që ky qytet / komunë”, shkruan Çoçaj në Facebook,transmeton PrizrenPress.

“Si deputet i Kuvendit të Kosovës nga ky qytet, që nga fillimi i mandatit tim jam angazhuar dhe munduar që të avokoj në të gjitha nivelet partiake dhe institucionale për përmisimin e përfaqësimit dhe pozitës së mjerë të kuadrove nga ky regjion në të gjitha institucionet e Republikës së Kosovës”.

Çoçaj premton se do të angazhohet deri në fund, që Prizreni si komuna e qyteti i dytë më i madh i Republikës të ketë pozitën e merituar dhe përfaqësimin meritor në të gjitha institucionet e Republikës së Kosovës.

“Gjithashtu qytetarë të respektuar të Prizrenit, jam duke komunikuar me autoritetet lokale që ato të kenë një qasje më pragmatike, dhe të kenë një dialog të afërt më qytetarin”.

“ Mirëqenia e qytetarit, përfaqësimi meritor, zhvillimi ekonomik i vendit, janë mision për mua, mision për të cilin do të vazhdoj të angazhohem deri në ditën kur unë do të jem aktiv në politikë”, shkruan ai./PrizrenPress.com/

Babë e bir janë paraqitur në gjykatën e Prizrenit për t’u përballur me akuzat për vrasjen e trefishtë në Prizren.

Eshref Shemallari dhe Ejup Shemallari akuzohen se më 8 mars 2015, për shkak të një mosmarrëveshjeje të mëhershme, privuan nga jeta Ferdi Shishkon, Haki Thaqin dhe Bergin Ersoyn, të tre nga Prizreni.

Incidenti kriminal, i cili ishte temë e diskutimeve të shumta për shkak të të kaluarës recidiviste të të vrarëve, tashmë ka nisur të gjykohet në Gjykatën e Prizrenit.

Në seancën e sotme avokatët Mahmut Halimi e Betim Shala kanë kërkuar që të hedhet poshtë aktakuza ndaj të pandehurve kërkesë kjo që është kundërshtuar nga prokurori Genc Nixha. Ky i fundit në nisje të seancës u ka paraqitur avokatëve dokumentacionin dhe provat e mbledhura nga prokuroria përfshirë ekzaminimin e në veture “Golf 2”.

Mënyra se si është kryer ky ekzaminim u kritikua nga avokati Mahmut Halimi, i cili dha vërejtje në raport me arsyetimin se nuk është bërë ekzaminimi i mekanizmit të dyerve.

Por, prokurori Nixha tha se ekzaminimi i mekanizmit të veturës nuk ka mundur të bëhet pasi që automjeti i ishte kthyer pronarit të veturës.

Ndërsa, mbrojtësi i të akuzuarit Ejup Shemallari, avokati Betim Shala, propozoi si provë emisionin “Drejtësia në Kosovë të datës 16 mars 2015, ku ishte trajtuar ngjarja.

Vendimi për vazhdimin e procesit gjyqësor në këtë rast pritet të merret nga gjykatësi i çështjes, i cili sqaroi palët se vendimi do u kumtohet me shkrim. /Kallxo.com/