Prej tri ditësh ka nisur në Prishtinë Java e Bibliotekave. Këtë vit ky aktivitet ka hyrë në edicionin e tij XIV. Përfaqësues së botës së librit janë mbledhur në bibliotekën kombëtare “Pjetër Bogdani” të Kosovës ku po mbahen dhe aktivitetet e kësaj ngjarjeje kulturore. Pjesë e këtij aktiviteti është dhe Biblioteka Kombëtare e Shqipërisë e përfaqësuar nga drejtoresha e Institucionit Prof. Persida Asllani dhe specialistë të sektorëve të ndryshëm. Sipas saj, “kjo pjesëmarrje vjen si shprehje e bashkëpunimit gjithnjë e më të ngushtë të dy bibliotekave kombëtare, bashkëpunim i theksuar edhe në Protokollin e bashkëpunimit mes dy qeverive, përkatësisht në aktivitetet e përbashkëta e reciproke mes dy Ministrive të Kulturës”. Biblioteka Kombëtare e Shqipërisë do të prezantojë disa evente gjatë kësaj jave, siç është ekspozita “Qytetet e Kadaresë”, aktivitet në kuadër të vitit kulturor kremtues në 80-vjetorin e shkrimtarit, me dëshirën për të ndarë rrugëtimin në veprën kadareane përmes leximit dhe shkrimit të qytetit, të propozuar edhe më parë për publikun në Tiranë. Gjithashtu, në bashkëpunim mes dy bibliotekave kombëtare – të Shqipërisë dhe të Kosovës, është ndërmarrë edicioni II i Konferencës së përbashkët shkencore: “Kadare – leximi dhe interpretimi”, në të cilën kanë referuar studiues të të dyja vendeve.

“Specifikë e këtij edicioni për BKSH-në ishte pjesëmarrja me kumtime e studime shkencore mbi veprën e Kadaresë të vetë specialistëve të bibliotekës, duke dëshmuar vullnetin e Bibliotekës Kombëtare të Shqipërisë për t’u shndërruar edhe në promotore të kërkimit shkencor në vend e rajon. Kumtimet e këtij edicioni synonin të merrnin në shqyrtim mundësitë e reja të leximit dhe interpretimit të veprës kadareane. Nga romanet te poezia, nga dialogu te digresioni, nga shkrimi te teksti, nga fiksioni tek eseja, nga botimet kritike te leximet subjektive, tipar i kësaj konference mbeti në thelb sfida e përhershme e leximit dhe interpretimit të letërsisë. Gjatë ditës së parë të Javës së Bibliotekave në Kosovë, BKSH nisi prezantimet edhe me promovimet e botimeve të saj profesionale dhe bibliografike: “Bibliografinë e librit shqip 1945-1958” (vëllimi III), përmbyllje e etapës së fundit të Bibliografisë Retrospektive të Librit Shqip, si dhe “Aftësimi në Informacion përmes Teknologjive të Reja dhe Komunikimit” – Aktet e Konferencës së Shkencës së Bibliotekave dhe Informacionit Shqipëri-Kosovë 2014. Pas kurorëzimit me sukses të dy vëllimeve të para të bibliografive retrospektive të librit shqip të periudhës: 1555-1912 dhe 1913-1944, BKSH njoftoi përfundimin edhe të vëllimit III të Bibliografisë Retrospektive të librit shqip, që i përket periudhës 1945-1958. Kjo bibliografi do t’i bashkëngjitet dy bibliografive të para që gjenden tashmë në faqen e Bibliotekës Kombëtare bksh.al, në versionin online.

Kështu plotësohet i gjithë informacioni bibliografik mbi botimet libër, që prej librit të parë të dokumentuar “Meshari” i Gjon Buzukut e deri në librat e fundit të botuar që përfshihen në bibliografinë kombëtare korrente. Pas një përmbledhjeje të kritereve të përshkrimit dhe të hartimit të dy vëllimeve të para të bibliografive retrospektive, u prezantua dhe Vëllimi III, që përmbyll etapën e këtyre bibliografive. Ky vëllim përfshin të gjithë librat, që janë botuar në Republikën e Shqipërisë prej vitit 1945 deri në 1958 dhe ndodhen në fondet e Bibliotekës Kombëtare. Kështu, përdoruesi i Bibliotekës Kombëtare, i ndodhur sot kudo në botë, qoftë student, studiues i fushave të rëndësishme të dijes, ka një informacion të plotë mbi librin që ndodhet në fondet e Bibliotekës, por mbi të gjitha një informacion të organizuar dhe të pajisur me elemente të rëndësishme kërkimi. Hartimi i Vëllimit III të bibliografisë retrospektive të librit përbën një kontribut, në historinë e bibliografive kombëtare të librit, duke e kompletuar tërësisht pasqyrimin e librave shqip, prej 1555-s e deri 1958. Kjo punë dhe ky prezantim u zhvillua nga bibliografja e BKSH-së zn. Brunilda Tahiri.

“Aftësimi në informacion” ka qenë një tjetër pjesë e rëndësishme e zhvillimit të bibliotekave. Kjo strategji u parapri me organizimin në vitin 2014 e Konferencës së shkencës së bibliotekave dhe informacionit Shqipëri-Kosovë Edicioni IX me temë: “Aftësimi në informacion përmes teknologjive të reja dhe komunikimit”, ku Shqipëria u përfshi në kremtimet  e përvjetorit të 40 të përkufizimit të termit “Aftësim në Informacion”, si një nga principet bazë të bibliotekonomisë bashkëkohore në nivel tashmë global. Aktet e botuara të kësaj konference u prezantuan në Kosovë nga specialistja e BKSH-së, Renida Ferro, e cila sqaroi gjithashtu se në këtë botim përfshihet e përkthyer në shqip paketa e plotë e dokumenteve (deklarata, manifeste etj.) të IFLA-s dhe UNESCO-s mbi Aftësimin në Informacion. Gjithashtu, u vijua me prezantimin e projektit të BKSH-së mbi strategjinë e “Aftësimit në Informacion”, qëllimi, objektivat, mjetet me të cilat realizohet ajo si dhe modulet teorike e praktike.

Interes pati funksionimi dhe zbatimi i strategjisë për grupmosha të ndryshme dhe  zbatimi i saj për kategori të ndryshëm përdoruesish. Të pranishmit u njohën edhe me aktivitetet, veprimtaritë, seminaret, vizitat e grupmoshave të ndryshme dhe leksionet e hapura mbi “Aftësimin në Informacion” që zhvillohen prej më se një viti në mjediset e BKSH-së. Për drejtorin e Bibliotekës Kombëtare të Kosovës, Fazli Gajraku “edicioni i sivjetmë me të gjitha aktivitetet dhe veprimtaritë, synon të kryejë funksionin e një ndërgjegjësimi publik për të promovuar kulturën bibliotekare, për të nxitur përdorimin e bibliotekës, por edhe përkrahjen e tyre”. Ai vlerësoi se Java është dhe duhet të jetë javë e një respekti kombëtar për bibliotekat dhe bibliotekarët, të përkushtimit ndaj tyre, të cilët e mirëmbajnë kujtesën për kulturën dhe dijen njerëzore. Ndërsa drejtoresha e Bibliotekës Kombëtare të Shqipërisë, Persida Asllani, theksoi rëndësinë e bashkëpunimit e shkëmbimit institucional mes dy bibliotekave, si dhe siguroi mbështetje sistematike për thellimin e tij.