NISMA në Prizren ka formuar nëndegën e radhës në lagjen ‘Ortokoll’. Kryetar i kësaj nëndege është zgjedhur Rrahman Kastrati, nënkryetar janë zgjedhur Ismet Paqarizi dhe Milaim Kryeziu, ndërsa sekretar është zgjedhur Rasim Gashi.

Kryetari i Degës së NISMA-s në Prizren, Sinan Aliaj tha se NISMA po vjen si një alternativë e fuqishme politike në Prizren dhe më gjërë.

“Zyrtarizimi i sotëm i nëndegës më me peshë në Prizren, siç është lagjja ‘Ortokoll’, len për të kuptuar se NISMA, po vjen si një alternativë e fuqishme politike në Prizren dhe më gjërë”, tha Aliaj, derisa uroi zyrtarizimin dhe të sapozgjedhurit e kësaj nëndege.

NISMA në Prizren ka bërë të ditur se shtrirja e saj do të vazhdojë edhe ditëve në vijim. /PrizrenPress.com/

Nëse mendoni se minatorët jetojnë shkurt, atëherë mund të konsiderohet konstatim i pasaktë.

Në raportin e Agjencisë së Statistikave “Të moshuarit në Kosovë 100 e më shumë vjeç”, janë gjithsej 73 persona mbi 100 vjeç në tërë Kosovën.

Mirëpo karakteristik e këtij raporti është se 20 nga 73 të moshuarit kanë punuar minator. Ndërsa pjesa tjetër kanë qenë bujk.

Po ashtu shumica e këtyre personave mbi 100 vjeç që janë intervistuar, kanë deklaruar se nuk kanë konsumuar alkool asnjëherë, ndërsa vetëm 4 nga ta kanë deklaruar se kanë konsumuar nganjëherë.

Por nëpër kohë ka ndryshuar edhe jetëgjatësia. Të dhënat që janë në Agjencinë e Statistikave që nga koha që njihet në histori “Neandertali”, njerëzit kanë jetuar mesatarisht 20 vjet. Ndërsa tash mesatarja në e jetës është 67 vjet.

Në shtetet që prijnë me jetëgjatësi është Japonia që e ka mesataren 82 vjet; më pas është Hong Kongu me po aq, 82 vjet; Islanda me 81 vjet; Australia me 81 vjet; Spanja 80 vjet; Izraeli me 80 vjet; Makao me 80 vjet dhe Franca e përmbyll top dhjetëshen e jetëgjatësisë me 80 vjet.

Ndërsa Shqipëria është në vendin e 46 me mesataren e të jetuarit me 76 vjet, ndërsa Kosova nuk figuron në këtë listë.

Vendi ku ka më së shumti 100 vjeçar është qyteti i Prizrenit me gjithsej 17; më pas është kryeqyteti, Prishtina me 13; Ferizaj me 10; Gjakova me 9; Peja me 9; Mitrovica me 8 dhe në fund është qyteti i Gjilanit ku jetojnë 7 persona mbi 100 vjeç, raporton Indeksonline.

Edhe lartësia mbi detare nuk po del të jetë si indikator i jetëgjatësisë. 63 për qind e personave mbi 100 vjec jetojnë në një lartësi mbi detare 300 deri 600. Në lartësinë mbidetare prej 601-900 jetojnë 23.3 për qind në atë 901-1200 jetojnë 9,6 për qind dhe 1201 e më tepër jetojnë 4.1 për qind e të moshuarve.

E që femrat jetojnë më gjatë ajo tashmë nuk diskutohet. Statistikat demografiko-shëndetësore tregojnë se femrat jetojnë më gjatë se meshkujt për 4-5 vite.

Nga të dhënat del se numrin më të madh të të moshuarve në Kosovë e përbejnë femrat me 57 apo 78.1 për qind, dhe meshkujt 16 persona apo 21.9 për qind./Indeksonline/

Në përvjetorin e 17-të të vrasjes së 48 shqiptarëve të Kosovës në Suharekë, dhjetëra aktivistë marshuan nga qendra e Beogradit deri në periferi të Batajnicës, ku më 2001 u gjetën trupat e tyre.

Rreth 30 aktivistë të udhëhequr nga Iniciativa e të Rinjve për të Drejtat e Njeriut (YIHR), me seli në Beograd, dhe lëvizja “Iniciativa ime”, u mblodhën në qendër të Beogradit të shtunën dhe marshuan deri te vendi ku ishte varreza masive, në Batajnicë, për të shënuar përvjetorin e masakrës së kryer nga forcat serbe gjatë luftës së Kosovës.

Qëllimi ishte që të tregojmë se varreza masive në qendrën stërvitore të Policisë, në Batajnica, në të cilën gjendeshin trupat e rreth 700 shqiptarëve të Kosovës, duke përfshirë edhe viktimat e Suharekës, “është një ecje këmbë larg nga sheshi “Republika” i Beogradit”, tha për BIRN Jovana Prusina nga YIHR.

”Kjo është diçka që njerëzit nuk e dinë dhe diçka për të cilën nuk është biseduar (në Serbi)”, tha Prusina.

Dyzet e tetë banorë të qytetit të Suharekës u vranë më 26 mars të vitit 1999 nga forcat serbe.

Dyzet e gjashtë prej tyre ishin anëtarë të familjes Berisha, 14 prej tyre nën moshën 15 vjeç, duke përfshirë dy foshnja, si dhe një grua shtatzënë dhe një grua të moshuar.

Dy gra dhe një fëmijë i mbijetuan masakrës.

Disa prej burrave u qëlluan për vdekje, ndërsa të mbijetuarit i detyruan të futeshin në një piceri, i mbyllën aty dhe hodhën granata dore kundër tyre.

Ata që treguan shenja jete u qëlluan në kokë dhe u transportuan dhe u varrosën fillimisht në një varr masiv në Kosovë.

Trupat u rivarrosën më vonë në qendrën stërvitore të Policisë në Batajnica, pasi u transportuan nga Kosova në një përpjekje nga forcat serbe për të fshehur vrasjet.

Prusina tha se një tjetër arsye e marshit përkujtimor është edhe të tërhiqet vërejtja për “rehabilitimin e kriminelëve të luftës që po ndodhë tani në Serbi”.

“Kriminelët e luftës po shpallen heronj. Kemi rastin e ish-zyrtarit të Ushtrisë Jugosllave, Vladimir Lazareviq, i cili është një kriminel i dënuar i luftës dhe i cili u prit si hero pasi vuajti dënimin (për krimet e luftës në Kosovë)”, tha ajo.

Shefi i policisë në Suharekë Radojko Repanoviq dhe oficeri i policisë Slagjan Çukariq u dënuan me 20 vjet burg për përfshirjen e tyre. Oficeri i policisë Miroslav Petkoviq dhe zyrtari i Sigurimit të Shtetit, Milorad Nisaviq, janë dënuar me 13, respektivisht 15 vjet burgim.

Gjykata e Hagës i ka dënuar edhe gjashtë zyrtarë të lartë të Beogradit mbi vrasjet në Suharekë.

Gjithsej 744 trupa të viktimave, shqiptarë të Kosovës, janë zhvarrosur nga varrezat masive në Batajnicë.

Varreza e tjera masive që përmbajnë trupat e shqiptarëve të Kosovës të vrarë gjatë luftës janë gjetur në tri lokacione të tjera në Serbi – në liqenin Peruqac, në një qendër të Policisë në Petrovo Selo dhe në guroren e Rudnicës, pranë qytetit të Rashkës.

Megjithatë, deri më tani askush nuk është ndjekur penalisht në Serbi për operacionin për zhvendosjen e trupave.

Vetëm ish-ndihmësministri i Brendshëm serb, Vlastimir Gjorgjeviq është dënuar nga Tribunali i Hagës për transportimin e trupave nga Kosova në Serbi, në mesin e krimeve të tjera të kryera gjatë luftës së fundit të viteve 1990. /BIRN/