Projektligji për Patentë shoferi ka nxjerrë në sipërfaqe edhe një herë mospajtimet mes partnerëve të koalicionit qeverisës në seancën e djeshme të Kuvendit të Kosovës.

Deputetët kishin shumë vërejtje, sidomos për nenin 4, që kishte të bënte me dy lloj dokumentesh, një për vozitje brenda Kosovës, e një jashtë saj.

Deputeti i LDK-së, anëtar i Komisionit për Legjislacion, Armend Zemaj, tha se duhet riformulim i nenit 4 të këtij Projektligji, sepse lejon hapësirë për manipulim.

“Ajo që mungon dhe është bazike është formulimi i Amendamentit 4, që ka të bëjë me llojet e patentave të shoferëve. Ashtu siç është e përcaktuar në projektligjin në fjalë, lë hapësirë të kuptohet se shteti mund të lëshojë dy lloj patenta shoferi. Një për lëvizje brenda vendit dhe një për lëvizje jashtë vendit. Nuk ka nevojë që të jenë dy dokumente udhëtimi. Kjo është një kosto shtesë. E maltreton qytetarin dhe krijon mundësi për manipulime”, ka thënë Zemaj.

Por, për deputetin e PDK-së, Raif Çela, këto vërejtje janë të pabaza. Ai ka thënë se pavarësisht vërejtjeve të Komisionit për Legjislacion, projektligji duhet të shkojë ashtu siç është.

“Komisioni është unanim dhe mendon se duhet të mbetet kështu siç e ka propozuar Komisioni për Zhvillim Ekonomik, Infrastrukturë, Tregti dhe Industri. Dhe nuk është me bazë vërejtja e Komisionit për Legjislacion, për arsye se duhet të jetë kështu. Dokument identiteti i cili i mundëson mbajtësit të tij ta drejtojë automjetin jashtë shtetit që lëshon këtë dokument. Është një patentë shoferi e përkthyer në shumë gjuhë dhe që ka një fotografi të drejtuesit të automjetit dhe të dhëna relevante për të drejtën për drejtim”, është shprehur deputeti Çela. /Zëri/

Kryeprokurori i Prokurorisë Themelore në Prizren Sylë Hoxha, ka konfirmuar hetimet që janë duke u zhvilluar për hapjen dhe mbylljen ‘maratonike’ të konkursit për drejtorë dhe zëvendësdrejtorë të shkollave në këtë qytet.

Ai tha se personalisht ka kërkuar hetimin e këtij konkursi.

“Unë kam kërkuar hetimin e këtij konkursi”, tregon Hoxha për “PrizrenPress”. Ai tha se hetimet janë duke u zhvilluar nga policia.

“PrzrenPress” ka raportuar se Policia në kordinim me Prokurorinë në Prizren, kanë filluar hetimet për të zbardhur shkeljet e mundshme ligjore, që mund të jenë bërë gjatë hapjes dhe mbylljes së shpeshtë të konkursit për drejtorë dhe zëvendësdrejtorë të shkollave.

Burime bëjnë të ditur se për këtë rast tashmë janë intervistuar edhe disa kandidatë të konkursit dhe zyrtarë të Komunës së Prizren.

“Ka disa ankesa të kandidatëve për shkelje ligjore të konkursit për drejtorë dhe zëvendësdrejtorë të shkollave,prandaj edhe kemi filluar hetimet për të shikuar se a ka pasur apo jo shkelej ligjore”, tregon burimi brenda Policisë në Prizren.

Zyra e Personelit në Prizren, brenda një kohe të shkurtër ka hapur dhe mbyllur disa herë konkursin për drejtorë dhe zëvendësdrejtorë të shkollave. Kandidatët që kanë konkurruar në këto konkurse konsiderojnë se mbyllja e tyre ishte bërë në kundërshtim me ligjin. Ata janë ankuar në organet e drejtësisë se nuk i din as arsyet pse është hapur e mbyllur kaq shpesh konkursi për këto poste të shkollave.

Zyra e Personelit në Prizren, muajin e kaluar ka zgjedhur disa zëvendësdrejtorë të shkollave, ndërkaq që drejtorët ende nuk janë zgjedhur.
Zëvendësdrejtorët e shkollave nuk kanë filluar punën, për shkak ankesave të kandidatëve të tjerë të konkursit./PrizrenPress.com/

Katër lagje të Prizrenit kanë mbetur pa uji,për shkak prishjeve të gypave. Zëdhënësja e “Hidroregjionit Jugor” “, Verije Krasniqi- Ibrahimi tha se për shkak punimeve që do të zhvillohen për eliminimin e këtij defekti, do të ketë ndërprerje të furnizimit me uji në lagjen: “Janina”, “Bazhdarhane”, “Dardania”, “Kurillë” dhe “2 Korriku”.

“Ekipet janë duke punuar dhe në momentin e sanimit të defektit, do të rikthehet furnizimi me uji”.

Në 17-vjetorin e rënies, përkujtohen 4 dëshmorë dhe 27 martirë të cilët u vranë gjatë luftës së vitit 1999, në fshatin Opterushë të Komunës së Rahovecit.

Në tubimin përkujtimorë morën pjesë banorë të fshatit Opterushë, familjar të Dëshmorëve dhe Martirëve, z.Idriz Vehapi, kryetar i Komunës së Rahovecit me bashkëpunëtor, Vajdin Berisha, kryetar i OVL e UÇK-së dega në Rahovec dhe deputet të Kuvendit të Republikës së Kosovës.

Edmond Kabashi, kryetar i këshillit të fshatit Opterushë tha se kanë kaluar 17 vite dhe do të kalojnë edhe shumë vite tjera, shekuj tjerë, e kujtimi për dëshmorët tanë , bijtë e bijat më të mirë të atdheut do të mbetet i gjallë dhe i freskët në kujtesën tonë. Ka vetëm një rrugë, nëpër të cilën ecën liria, liria arrihet me gjake, arrihet me mund dhe ndërtohet me Dëshmorë dhe Martir.

Dëshmorët dhe Martirët janë krenaria dhe nderi i kombit, janë zemra dhe liria e Kosovës, si çdo vend edhe fshati Opterushë e pagoi lirinë shumë shtrenjtë, e pagoi me gjakun e me të dashurve tanë që ranë për lirinë tonë, për Kosovën tonë dhe për Shqipen tonë.

Kryetari i Komunës Idriz Vehapi, në fjalën e tij tha se nuk është lehtë të flasësh në raste të tilla, këtë e dimë të gjithë, duhet të jemi përgjegjës para familjarëve të cilët kanë humbur me të dashurit e tyre, mirëpo ky ishte fati jonë. Viti 1998-99, ishte kulmi, ku ushtria dhe policia kriminale serbe treguan para botës se janë të etshëm për dy gjera për gjake dhe për plaçkitje këtë e dinë e tërë bota.

Nga një fjalë rasti mbajtën edhe Vajdin Berisha, kryetar i OVL e UÇK-së dhe z.Ali Berisha, deputet i Kuvendit të Republikës së Kosovës.

Problemi i rriqrave është problem i përvitshëm në zonën e Malishevës, ndërkaq edhe këtë vit zyrtar të kësaj komune thonë se do t’i marrin masat e nevojshme për të parandaluar infektimin e qytetarëve nga rriqrat.

Në një prononcim për Telegrafin, kryetari i komunës së Malishevës, Ragip Begaj, tha se tashmë janë n[[ terren për të parandaluar infektimin e popullatës ndaj rriqrave.

“Jemi në aktivitet gjatë gjithë kohës në teren. Po bëjmë rregullimin e shtazëve nëpër stalla në të gjitha fshatrat tona. Vjet e parvjet kemi kaluar mirë, besoj që edhe sivjet. Do bëjmë spërkatjet e nevojshme. Do t’i shfrytëzojmë mundësitë tona deri në maksimum”, tha Begaj për Telegrafin.

Ndërkaq, ai shtoi se vitin e kaluar nga parandalimi i shpejtë, nuk kanë pasur asnjë rast të infektimit dhe të vdekjeve nga rriqrat.

Kryetari i komunës së Malishevës, Ragip Begaj po ashtu tha se “Ministria e Shëndetësisë dhe Ministria e Bujqësisë, Pylltarisë dhe Zhvillimit Rural, kanë qenë aktive dhe i kanë dal në ndihmë komunës sonë. Besoj që edhe sivjet do të na dalin në ndihmë për të kaluar mirë si vitet paraprake”.