Nisma në Prizren ka formuar nëndegën e radhës në fshatin Krajk të Hasit. Kryetar i kësaj nëndege është zgjedhur Leutrim Likaj, nënkryetar Fatos Pervizaj, ndërsa sekretar Tahir Shala.
Kryetari i Degës së NISMA-s në Prizren, Sinan Aliaj, uroi zyrtarizimin dhe të sapozgjedhurit e kësaj nëndege.
Ai kërkoi nga përfaqësuesit e kësaj nëndege që të jenë zëri i rajonit të Hasit.
Aliaj premtoi se Nisma për Kosovë, do të zgjerohet edhe në fshatrat e tjera të Hasit. /PrizrenPress.com/
Merr fund odisejada e drejtorit të policisë rajonale në Prizren.
Nexhmi Krasniqi sot zyrtarisht u kthye në pozitën e drejtorit të Policisë Rajonale të Prizrenit.
Lajmin për KALLXO.com e konfirmoi zëdhënësi i policisë në rajonin e Prizrenit, Hazir Berisha.
“Po, sapo isha në takim me z. Nexhmi Krasniqin dhe ai sot zyrtarisht është kthyer në pozitën e drejtorit të Policisë Rajonal të Prizrenit”, tha Berisha.
Inspektorati Policor i Kosovës (IPK) në shtatorin e vitit të kaluar i kishte rekomanduar Policisë së Kosovës suspendimin e drejtorit të Drejtorisë Rajonale të Policisë së Prizrenit, Nexhmi Krasniqit, së bashku me Besim Rexhepin, udhëheqës në sektorin e hetimeve të vrasjeve, nën dyshimin se nga informacionet që posedonte IPK kishte ankesa nga qytetarët ndaj tyre.
Rexhepi ishte kthyer në punë rreth dy muaj më parë, ndërsa më 4 mars kthimin në punë e nënshkroi edhe Nexhmi Krasniqi i cili na disa qytetarë ishte pritur edhe me fishekzjarrë e daulle.
Ai, fillimisht mendoi se ishte kthyer në pozitën e drejtorit, mirëpo në ndërkohë kuptoi se i ishte ndërruar pozita e punës.
Krasniqi, më 7 mars filloi punën si shef i operativës në policinë e Gjakovës. /Kallxo.com/
Edhe pse është e kënaqur me përkrahjen nga Ministria e Kulturës drejtoresha e “Dokufestit” thotë se 30 mijë eurot nuk mjaftojnë.
Ministria e Kulturës Rinisë dhe Sportit ka disa ditë që ka publikuar listën e institucioneve përfituese të subvencioneve të saj.
Sipas një komunikate të Ministrisë, ajo ka ndarë 816 mijë e 300 euro subvencione për Departamentin e Kulturës.
Përfitues i këtyre subvencioneve është edhe Festivali i Filmit Dokumentar dhe atij të Shkurtër “Dokufest” që ka marrë 30 mijë euro.
Drejtoresha e “Dokufestit” Nita Deda tha për KALLXO.com se ky subvencion nga ministria është shumë i mirë në krahasim me mospërkrahjen nga Komuna e Prizrenit.
“Është pozitive që ka rritje sepse Ministria e Kulturës për dallim nga Komuna e Prizrenit e cila ka ngecur, çdo vit po ka një rritje të mbështetjes, por mendojmë se kjo nuk është e mjaftueshme për nga madhësia e festivalit, por edhe nga përfitimet që i sjell festivali vendit tonë, si për nga prurjet kulturore, por edhe në rritjen ekonomike gjithashtu,” tha Deda.
Zëdhënësi i Ministrisë së Kulturës, NdueUkaj tha se ministria do të vazhdojë që të përkrahë të gjitha aktivitetet të cilat janë në të mirë të vendit.
“Ne do të vazhdojmë të mbështetim aktivitetet të cilat janë të rëndësishme për Kosovën dhe sigurisht që gjatë viteve tëardhshme do të ketë edhe rritje të tjera të subvencioneve,” tha ai.
Kurse sa i përket “Dokufestit” ai tha se ky subvencion është i mirë dhe do të jetë në funksion të organizimit të festivalit.
Ministria e Kulturës, Rinisë dhe Sportit ka ndarë 250 mijë euro subvencion edhe për Qendrën Kinematografike të Kosovës.
Sipas Ndue Ukajt kjo rritje e buxhetit për Qendrën Kinematografike të Kosovës në 1 milion euro ka ndodhur si rezultat i punës së këtij institucioni.
“Normalisht që ne do të vazhdojmë përkrahjen për kinematografinë dhe siç kemi njoftuar edhe në komunikatën zyrtarë që përkrahja vjen pas suksesit të jashtëzakonshëm që ka pasur Kinematografia e Kosovës më shumë filma, e veçmas me filmin “Shok,” tha ai.
Filmi “Shok”në kategorinë e filmave të shkurtër ishte sivjet kandidat për “Oscar”, por nuk mundi ta marrë këtë çmim.
Drejtori i Qendrës Kinematografike të Kosovës Arben Zharku tha për KALLXO.com se kjo rritje do t’i ndihmojë QKK-së për realizim të më shumë projekteve filmike.
“Është një lajm shumë i mirë për ata që merren me film sepse të gjithë ata që do të aplikojnë në Qendrën Kinematografikë do të kenë gjasa më të mëdha për t’u financuar, sepse kemi me pasë një buxhet më të madh dhe mundësi me mbështetë më shumë projekte filmike,” tha ai.
Zharku gjithashtu tregoi se Qendra Kinematografike së shpejti do të hapë edhe konkursin e filmave që do të mbështeten nga ky institucion.
“Ky është lajmi më i mirë për ata që bëjnë film. Ne së shpejti kemi me e hapur konkursin dhe do të presim aplikimet dhe ky subvencion do të ndikojë pozitivisht që më shumë projekte të mbështetën sivjet,” tha ai.
Përveç “Dokufestit” e Qendrës Kinematografike, Ministria e Kulturës dha 459 mijë euro për Divizionin e Arteve Skenike, Muzikore dhe Pamore ku bëjnë pjesë projekte të ndryshme nga muzika, filmi, teatri dhe nga ekspozitat, kurse 70 mijë e 250 euro janë ndarë për botimin e librave dhe për revista letrare.
Ministria e Kulturës, Rinisë e Sportit më 15 mars dha edhe 799 mijë euro për disa nga federatat sportive të Kosovës. /Kallxo.com/
Në shkurt 1942, Stefan Zweig dhe gruaja e tij e re bënë vetëvrasje në Brazil. Shteti brazilian, në nder të shkrimtarit, mbajti një ceremoni mortore shtetërore, me pjesëmarrjen e presidentit të vendit, Getulio Vargas. Lajmi për vetëvrasjen e Zweig u përhap shpejt në të gjithë botën dhe mediat më të rëndësishme shkruan për të.
Në atë kohë, Zweig ishte një nga autorët më të njohur dhe veprat e tij ishin përkthyer në dhjetëra gjuhë të huaja.
Sipas një prej miqve të tij më të mirë, novelistit Irmgard Keun, Zweig ishte një njeri që, pavarësisht vuajtjeve, ishte i paaftë të urrente dhe mbase kjo e çoi drejt vetëvrasjes.
Vetëvrasja e Stefan Zweig shkaktoi reagime të ndryshme. Tomas Man, pa diskutim lideri i shkrimtarëve gjermanfolës në ekzil, nuk e fshehu indinjatën ndaj atij që cilësoi si një akt frikacakësh. Në një telegram, Man nuk i kurseu vlerësimet për talentin e mikut të tij, por në të njëjtën kohë nuk pajtohej dot me veprimin e tij.
Qëndrimi i Man bëhet edhe më i qartë në një letër dërguar një miku e kolegu shkrimtar: “Zweig nuk duhej t’ua jepte nazistëve kënaqësinë për ta paraqitur veprimin e tij si triumf të tyre. Nëse Stefan do të mund të ushqente më tepër urrejtje për ta, nuk do ta kishte ndërmarrë aktin e vetëvrasjes”.
Pse e kishte kaq të pamundur Zweig të ndërtonte një jetë të re në ekzil?
Stefan Zweig nuk kaloi ndonjëherë momente terrori në jetën e vet, as nuk kishte qenë i detyruar të largohej nxitimthi nga vendi i tij, përkundrazi kishte pasur luksin të zgjidhte edhe destinacionin. Ai e la Austrinë dhe shtëpinë e tij të bukur në Salzburg në vitin 1933, duke shkuar në Britaninë e Madhe dhe duke lënë pas gruan e tij Friderike dhe dy vajzat e saj. Ndryshe nga kolegët e tij gjermanë, përshirë edhe Tomas Man, të cilët e lanë Gjermaninë kur pushteti i Hitlerit ishte fuqizuar, pa shpresë për t’u kthyer më deri në ndërrimin e regjimit, Zweig ishte i lirë të udhëtonte mes Londrës, Vjenës dhe Salzburgut edhe për 5 vite të tjera. Madje, pasaporta austriake e lejoi edhe të udhëtonte në Shtetet e Bashkuara dhe në Amerikën e Jugut.
Fuqizimi i pushtetit të Hitlerit ndikoi, në fakt, në krijimtarinë e Zweig, pasi ai humbi botuesin e tij. Gjithsesi, në fillim të vendosjes së regjimit nazist, veprat e Zweig vazhdonin ende të qarkullonin në Gjermani.
Vitet e para të ekzilit nuk ishin të vështira. Stefan dhe gruaja e tij kishin marrëdhënie mjaft të mira, madje ai i kërkoi së shoqes t’i gjente një sekretare kur u shpërngul në Londër. Ajo zgjodhi një refugjate gjermane, Lotte Altman, një grua e re dhe serioze, me të cilën Zweig pati një histori dashurie dhe u martua disa vite më vonë.
Në vitin 1935, Zweig mbërriti në Nju Jork; ishte në kulmin e krijimtarisë së vet. Zweig e dinte që nuk ishte romancier i kalibrit të Tomas Man, e megjithatë shitjet e librave të tij kishin thyer rekorde ndërsa në Gjermani u dogjën bashkë me librat e Frojdit dhe Ajnshtajnit. Zweig asnjëherë nuk u bë politikisht aktiv, asnjëherë nuk u shpreh hapur kundër regjimit të Hitlerit. E megjithatë, ishte pikërisht pushteti i këtij të fundit që e demoralizoi.
Më 7 dhjetor 1941, kur Zweig dhe gruaja e tij Lotte ishin në Brazil, japonezët sulmuan flotën amerikane në Pearl Harbor. Një ditë më pas, Shtetet e Bashkuara shpallën luftë. Zweigu edhe një herë u përfshi nga paniku. Ai i trembej një pushtimi të mundshëm gjerman në Amerikën e Jugut.
Në këtë kohë ai punoi me librin e fundit, “Novela e Shahut”, ku për herë të parë përfshiu në përmbajtje elementë të regjimit nazist. Zweig e përfundoi novelën më 22 shkurt. Të nesërmen, ai dhe e shoqja u gjetën të vdekur. /Botime Shqip/
Paralajmërohet kthesa e madhe. Opozita hap dyert për jopartiakët
Subjektet politike opozitare janë zotuar se do ta shfrytëzojnë në maksimum shansin e fundit për të hapur dyert për njerëzit e aftë, pa parti dhe shumë profesionistë, duke garantuar një qeverisje të re, të pastër për të ngjallur shpresën qytetare dhe perspektivën e zhvillimit të vendit.
Tanimë ekziston një disponim te të tre liderët e opozitës që t’i lënë anash interesat e ngushta grupore, klanore, partiake e biznesore, vetëm e vetëm që ta shpëtojnë Republikën nga rrënimi i mëtejshëm i klasës kriminale në pushtet.
“Vetëvendosje po përpiqet vazhdimisht që opozita e bashkuar të konsolidohet edhe më shumë, si dhe të zgjerohet edhe më tutje ky front. Jemi në diskutime të vazhdueshme edhe me shoqërinë civile, edhe me personalitete të ndryshme, që të krijojmë një alternativë të përbashkët qytetare dhe shoqërore për ta luftuar suksesshëm këtë regjim autoritar në Kosovë”, tha për Kosova Sot Adonis Tahiri nga Lëvizja Vetëvendosje.
Hapje të madhe të dyerve për figura të reja, ekspertë të pavarur, njerëz të botës akademike dhe intelektualë pa parti politike ka edhe në AAK.
“Nëse shkon në listë të përbashkët në zgjedhje dhe lë një kuotë të caktuar për 15- 20% të emrave pa parti, përfshirë këtu edhe rrjedhjet prej LDK-së, atëherë opozita i fiton sigurt zgjedhjet me mbi 51% dhe do të ketë një ndryshim përmbajtjesor në kuptimin e demokracisë”, tha analisti politik dhe profesori universitar, Nexhmedin Spahiu. /Kosova Sot/
Gjykata Speciale pritet që më së voni deri në vjeshtë të këtij viti t’i ngrejë aktakuzat e para për krime të supozuara nga ish-udhëheqësit e UÇK-së. Tani Kosova i ka kryer të gjitha obligimet, por topi është në anën e BE-së për caktimin e një paneli për rekrutimin e gjyqtarëve të Gjykatës Speciale. Vlerësohet se kriza politike në vend nuk mund ta prolongojë funksionalizimin e Speciales
Kosova tashmë ka kryer të gjitha obligimet për themelimin e Gjykatës Speciale. Pas ratifikimit të marrëveshjes me Holandën për vendin ku do të vendoset Specialja, tashmë ka mbetur në dorën e Bashkimit Evropian shpejtësia e funksionalizimit të Gjykatës.
Kjo pasi BE-ja duhet ta formojë një panel, i cili do t’i rekrutojë të gjithë gjyqtarët.
Ekspertët juridikë në vend thonë se Specialja llogaritet e themeluar pas nënshkrimit të marrëveshjes mes Holandës dhe Kosovës.
Profesori i Fakultetit Juridik në Universitetin e Prishtinës “Hasan Prishtina”, Vigan Qorrolli, thotë për “Zërin” se brenda këtij viti, saktësisht më së voni në vjeshtë, do të ngrihen aktakuzat e para. Ndërsa, situata aktuale politike, sipas Qorrollit, nuk mund ta ndalë funksionalizimin e Speciales.
“Problemet e brendshme politike nuk mund ta pengojnë një detyrim ndërkombëtar, siç është Specialja. Kjo për shkak se të gjitha veprimet e Gjykatës do të bëhen jashtë territorit të Kosovës”, ka thënë Qorrolli. /Zëri/
(I plotësuar)– Një person ka mbetur i vdekur ndërsa tre të tjerë janë të lënduar në aksidentin e ndodhur më parë në Kijevë pranë pompës së derivateve Al Petrol, raporton Indeksonline.
Këtë lajm për Indeksonline e ka konfirmuar shefi i trafikut rajonal të Gjakovës Albin Sahatqija.
“Një person ka ndërruar jetë si pasojnë e aksidentit të ndodhur në fshatin Kijevë, ndërsa tre të tjerë janë të lënduar”, ka thënë Sahatqija.
………..
Aksident i tmerrshëm në Kijevë, dy persona të lënduar rëndë
Lajmin e aksidentit i cili ndodhi rreth një orë më parë në Kijevë për Indeksonline e ka konfirmuar zëdhënësi i policisë për rajonin e Malishevës, Halil Morina, ai tha se në aksident janë përfshirë 3 vetura dhe një autobus, gjatë aksidentit kanë mbetur disa persona të lënduar, por Morina nuk dha numër specifik duke thënë se deri sa të përfundojnë të gjitha procedurat ligjore.
“Policia ka dalë në vendin e ngjarjes, jemi duke u marrë me aksidentin i cili ndodhi disa minuta më parë. Në këtë aksident janë të involvuara tri vetura dhe autobusi. Jemi duke u marrë me rastin nuk mundemi të japim informata të tjera deri sa të përfundojnë procedurat ligjore”, tha Morina për Indeksonline.
Morina, tha se deri sa policia ka arritur në vendi e ngjarjes, të lënduarit ishin dërguar nga ambulanca për trajtim në Prishtinë.
…….
Në magjistralen Prishtinë- Pejë, konkretisht në fshatin Kijevë të Malishevës, si pasojë e një aksidenti të rëndë trafiku kanë mbetur të lënduar 2 persona , transmeton Indeksonline.
Në një fotografi të dërguan nga një lexues i portalit Indeksonline shihet një golf 2 i cili është aksidentuar më një BMV. Veturat shihet se janë tejet të dëmtuara. /Indeksonline/
Në fshatin Celinë është përkujtuar dëshmori Naim Rexhepi dhe dhjetëra bashkëfshatarë të tij, të cilët u vranë nga forcat serbe me 25 mars 2016 .
Ai, bashkë me bashkëfshatarët e tij dhe familjarë të ngushtë është ekzekutuar në bodrumin e shtëpisë, pasi që nuk kishte lëshuar pragun e shtëpisë.
Në fshatin e lindjes dhe të rënies, Naim Rexhepi, përfaqësues të ndryshëm vendosën kurora lulesh të freskëta mbi varrin e tij dhe të tjerëve në mesin e tyre edhe drejtues të Lirisë.
Naimi, tashmë dëshmorë ka qenë veprimtar i dalluar, duke kryer funksione të ndryshme partiake dhe shoqërore të kohës, nga vitet e 90-ta e deri në rënie.
Ai, ka qenë nënkryetarkryetar i KF “Liria” dhe kontributi i tij ka qenë shumë i madh, si në mbështetjen financiare, ashtu edhe organizimin e klubit dhe futbollit të asaj kohe në Kosovë.
“Më kujtohet se Naimi ka qenë pos zyrtar i klubit edhe shok shumë i mirë. Me siguri që mungesa e tij, është e madhe.’, thotë Erxhan Dana, lojtar në ato vite dhe aktualisht, njëri nga drejtuesit e klubit.
Ndërkaq, kryetari Mirsad Çollaku, po ashtu ka kujtime shumë të mira.
“Naimi ka qenë i veçantë. Ishte shumë energjik por edhe i dashur.Ai, iu bashkua rezistencës aktive duke kontribuar në sport e më pas ndihmoi edhe direkt në çlrimin e vendit. Si klub jemi krenar për te dhe Përparimin. Ata, dhanë jetën për këtë liri . Ne, si shoqëri kemi obligim t’i kujtojmë dhe nderojmë për sakrificën që bënë. I përhershëm kujtimi për Naimin dhe gjithë të rënët’, ka thënë Çollaku.
Struzha, fshati i vetëm shqiptar në mesin e 19 fshatrave të Luginës së Lumbardhit (ish- Zhupa) të banuara me popullatë boshnjake e serbe për mungesë të kushteve normale të jetës rrezikonte të zhdukej. Fshati ka pasur 450 familje, por të cilat janë shpërngulur nga ky fshat, shumica janë vendosur në Prizren, por edhe në vende të tjera. Fshati është larg Prizrenit rreth 17 kilometra. Përfaqësuesi i fshatit, Ramadan Muji, me keqardhje kujton kohët kur fshati kishte qindra shtëpi dhe mijëra banorë, ndërsa tani këtu jetojnë vetëm 25 familje me më pak se 200 anëtarë. Maliq Pireci, që tani banon në Prizren nga ky fshat i ardhur, në vitin 1999, thotë se asokohe fshati kishte 97 familje me rreth 800 anëtarë.
“Popullata e atjeshme jeton kryesisht prej ndihmave të farefisit që punojnë jashtë vendit si në Itali, Austri, Slloveni etj”, shpjegon Ramadan Tafallari. Ai pohon se ky fshat rrezikon të mbetet pa asnjë banor. Mirëpo, sipas tij, me ndërtimin e rrugës së asfaltuar prej 9 km, shpresohet se do të ketë iniciativa për kthim në vendlindje. Tafallari shpreh gëzimin tij se tashmë shumë struzhjanë kanë filluar të mendojnë që atje të rikthehen ose së paku të zhvillojnë bizneset e tyre, ngase atje ka kushte shumë të mira për të zhvilluar blegtori, e pse jo edhe turizëm. Koordinatori i Drejtorisë së Turizmit në Prizren, Shkodran Kryeziu thotë për gazetën se është paraparë që të zhvillohet turizmi rural e familjet që kanë mbetur atje janë të gatshme t’i presin turistët vendorë dhe të huaj me ushqime tradicionale, kulturë vendore, akomodim etj. Ai mendon se në këtë pikëpamje fshati Struzhë do të jetë pika më atraktive e një zhvillimi të turizmit malor e rural, shkruan gazeta Kosova Sot.
Uji dhe ajri i pastër
Kryeziu pohon se infrastruktura tanimë është rregulluar në Struzhë, si rrugicat e fshatit, pastaj ekziston ambulanca, objekti i shkollës, kanalizimi, që shumica prej këtyre ishin vepër e vetëkontributit të këtyre banorëve para e pas lufte. Ramadan Tafallarin e mban shpresa se jeta do të rikthehet në Struzhë. Drejtori i Drejtorisë së Shërbimeve Publike në Prizren, Hasan Hasani pohon se do të kenë në prioritet të gjitha nevojat e atij fshati për të kthyer ata banorë që kanë dëshirë të jetojnë atje. “Është shumë me interes që banorët atje të kthehen dhe të bëjnë jetën e tyre të bukur. Fshati ka bukuri të rrallë”, pohon ai. Por, edhe vetë disa nga banorët e këtij fshati tani pas asfaltimit të rrugës kanë shprehur gatishmërinë për t’u kthyer atje dhe për të filluar jetën, ngase thonë se atje kanë shumë kujtime të mira për jetën e dikurshme. Uji dhe ajri janë të pastër në këtë fshat dhe ekzistojnë edhe kushtet për zhvillimin e blegtorisë. Por, është fatkeqësi se deri më tani nuk ka pasur asnjë nxitje e asnjë lloj benificioni për të zhvilluar blegtorinë. Banorë të fshatit shpresojnë se do të gjejnë përkrahje për të zhvilluar blegtorinë e kësaj ane.
Shtëpitë pushimore
Dikur fshati ishte i njohur për valle, për lojëra të mundjes, e më shumti ishte i njohur për mikpritje, për bukë, kripë e zemër… Shtëpia e malorëve e njohur nga prizrenasit tani shfrytëzohet nga Shoqata e Bjeshkatarëve të Prizrenit, por Tafallari shpjegon se tashmë është një projekt që atje të fillojë ndërtimi i shtëpive pushimore dhe turizmi të bëhet një nga drejtimet ku mund të punësojë qindra të rinj. Struzha pritet t’i kthejë bijtë e bijat dhe Struzha do të jetë njëri nga vendet më të bukura turistike në Luginën Lumbardhit.
Kurse drejtori i Arsimit Nexhat Çoçaj shpjegon se aktualisht në SHFMU ”Anefi Muji” mësimin e vazhdojnë vetëm 9 nxënës dhe ka 5 mësimdhënës, drejtorin e shkollës, i cili edhe jep mësim, dhe një punëtor teknik. “Por, na mban shpresa se ngritja dhe rregullimi i infrastrukturës atje të shtojë numrin banorëve, sepse duke shtuar numrin banorëve shtohet edhe numri i nxënësve”, shprehet ai. Tregon se fshati është pika më e largët dhe nuk kanë arritur të mundësojnë bartjen e atyre nxënësve në ndonjë shkollë në Prizren, pasi Struzha është e rrethuar me fshatrat që kanë komunitet boshnjakë. Këto ditë, kur disa bashkatdhetarë kanë ardhur në Prizren, kanë marrë iniciativë që të rikthehen në këtë fshat. Disa mendojnë të bëjnë shtëpi- konakë për turistë, dikush të merret me blegtori, e disa syresh edhe me bletari.
(Kosova Sot)
59.009 shqiptarë janë internuar në kampe përqendrimi gjatë regjimit komunist, ndërkohë që 7.022 prej tyre kanë humbur jetën.
Të dhënat vijnë përmes raportit vjetor të Institutit të Studimeve të Krimeve dhe Pasojave të Komunizmit, i depozituar për shqyrtim në Kuvend.
Sipas të dhënave zyrtare të Institutit, numri i personave të vrarë gjatë diktaturës arrin në 6.027, ndërkohë që 308 persona kanë humbur aftësitë mendore për shkak të torturave fizike e psikologjike, raporton Shqiptarja.com.
Sipas raportit, në bashkëpunim me Institutin e Integrimit të ish të Përndjekurve Politikë, me shoqatat e të Përndjekurve Politikë që operojnë në çdo qytet e trevë të Shqipërisë ka nisur një projekt i regjistrimit të saktë të mijëra qytetarëve të pushkatuar pa gjyq në vitet 1944-1955, emrat e të cilëve nuk gjenden në asnjë arkiv.
“Zbardhja e fatit tragjik të këtyre qytetarëve është një detyrë e domosdoshme e Institutit tonë dhe një hulumtim i saktë mbi numrin e qytetarëve të pushkatuar për të dhënat e sakta të shifrës së tyre, çka nuk përputhet aspak me të dhënat e deritashme zyrtare”,thuhet në raport.