Kryetari i Këshillit për Mbrojtjen e Luftëtarëve të UÇK-së, Xhevdet Qeriqi ka thënë se po presin që nesër Komisioni për Verifikim të statusit të dëshmorit, veteranit dhe invalidit të dalë me certifikatat për këto kategori dhe nëse një gjë e tillë nuk ndodhë, atëherë do të dalin me një qëndrim për hapat më të tutjeshme që do t`i ndërmarrin.

Sipas tij, nuk është dëshira ajo që i bën ish-luftëtarët të dalin në rrugë për të protestuar, por kjo gjë po u imponohet nga vet komisioni.

“Ne po presim që nesër të fillojnë me shpërndarjen e tyre, në rast se kjo nuk ndodh ditën e premte ne do të dalim me një qëndrim rreth hapave të mëtutjeshëm që do t`i ndërmarrim. Nuk jemi ne pse po dëshirojmë të dalim në rrugë për të protestuar por kjo po na imponohet nga ky komision, është e pakuptimtë dhe e pa arsyeshme kjo vonesë që ka ndodh nga ana e këtij komisioni”, ka thënë Qeriqi për Indeksonline.

Ai një pjesë të fajit ka thënë se e ka edhe qeveria, për shkak se ajo e ka emëruar këtë komision.

“Mendoj se një pjesë të fajit e ka edhe vet qeveria sepse ky komision është emëruar nga vet ajo dhe se është dashur që t`i kërkoj raport rreth punës që kanë bërë për arsye se ky komision paguhet nga taksapaguesit e qytetarëve. Të gjithë jemi dëshmitar se po bëhen gati tri vite prej se ka filluar punën dhe ende nuk kemi në rezultat final në këtë drejtim”, është shprehur Qeriqi.

Ai ka thënë se ekziston mbështetje e vazhdueshme nga veteranët për t`u bërë presion komisionit dhe qeverisë, sepse siç ka thënë Qeriqi, e kanë kuptuar se komisioni nuk është serioz në punën e tij.

“Ne jemi në kontakt të vazhdueshëm me veteran dhe kërkesat e tyre të vazhdueshme janë që t`u bëjmë presion sepse e kanë kuptuar se komisioni nuk është serioz në punën e tij dhe zgjidhjen e shohin vetëm përmes protestës në njëfarë forme edhe e kanë humbur besimin tek ta duke parë sa kohë ka kaluar dhe ende s`ka një përmbyllje të këtij procesi”, ka shtuar ai.

Sipas Qeriqit, ai dhe veteranët nuk do të zmbrapsen deri në realizimin e kërkesave të tyre./Indeksonline/

Një person është arrestuar në fshatin Bellacerk të Rahovecit.

Ai dyshohet se pas një mosmarrëveshje të mëhershme e ka sulmuar fizikisht një person tjetër derisa ishte duke lëvizur me biçikletë, të cilit i ka shkaktuar lëndime trupore.

Viktima ka pranuar tretman mjekësor. I dyshuari është arrestuar dhe

Me urdhër të prokurorit i dyshuari është dërguar në mbajtje. /PrizrenPress.com/

Mbi 108 mijë qytetarë të Kosovës nga mosha 15 deri në 24 vjeç nuk kanë asnjë angazhim. Ata gjatë tërë vitit 2014 as nuk kanë lexuar kurrë e as nuk kanë prekur punë me dorë.

Në këtë gjendje është më shumë se qereku i popullsisë së re që ka Kosova. E sipas Agjencisë së Statistikave të Kosovës, kjo është shifër shqetësuese për vendin. Shqetësim për popullësinëë e pa arsimuar mirë ka ngritur edhe Banka Botërore, duke treguar se vetëm me arsimi Kosova mund të bëjë një rritje të shpejtuar ekonomike, raporton Gazeta Fjala.

“Të rinjtë e këtij grupi, përfshijnë të rinjtë që nuk janë të punësuar, nuk ndjekin shkollën, as nuk trajnohen, d.m.th. janë krejtësisht të shkëputur nga tregu i punës dhe nuk marrin pjesë as në sistemin arsimor. Përqindjet e larta të këtij grupi në popullsinë e të rinjve rrisin shqetësimet në lidhje me punësimin e të rinjve në të ardhmen pasi tregon shkëputje nga tregu i punës”, ka treguar ASK’ja.

Ky institucion ka bërë të ditur se pjesa më e madhe e të rinjve që nuk kanë asnjë angazhim në jetën e tyre janë femrat.

“Në vitin 2014, 108,200 persona të rinj (të moshës 15 deri 24 vjeç) në Kosovë nuk ndiqnin shkollimin, nuk ishin të punësuar ose në trajnim dhe ata përbënin 30.2 për qind të popullsisë së re. Pjesa e femrave është 34.0 për qind krahasuar me 26.6 për qind të meshkujve”, thuhet në raportin e Agjencisë së Statistikave.

Përveç kësaj, një numër i madh i të rinjve të pa angazhuar në vendet me papunësi të lartë të të rinjve, siç është Kosova, mund të shkaktojë uljen e fitimeve për shkak të rritjes së konkurrencës, si dhe ka mundësi t’i kontribuojë problemeve sociale.

“Ajo që është shqetësuese është se me kalimin e kohës mundësia që popullata joaktive të rritet mbetet e lartë pasi çdo vit afërsisht 36,000 të rinj i shtohen popullsisë në moshë pune (d.m.th. 14 vjeçarët do të bëhen 15 vjeçarë), ndërkohë që vetëm rreth 10,000 do të hiqen nga popullsia në moshë pune (d.m.th. 64 vjeçarët bëhen 65 vjeçarë”.

Me mos shkollimin e rinisë kosovare dhe mungesës së angazhimit të tyre është marrë edhe Banka Botërore në Kosovës. Ky institucion ndërkombëtar të treguar se Kosova mund të përfitojë nga dividenca demografike nëse arsimin e shndërron në prioritet, shkruan Gazeta Fjala.

“Arsimi konsiderohet si një pjesë esenciale e përpjekjeve të Kosovës për një rritje të shpejtuar ekonomike, rritje të produktivitetit dhe pagave dhe zvogëlim të papunësisë. Njëkohësisht, pjesa më e madhe e popullsisë së Kosovës do t’i bashkëngjitet tregut të punës në disa vitet e ardhme. Për të ndihmuar në luftimin e këtyre sfidave, autoritetet do të mund të bëjnë shumë më shumë në rritjen e standardeve në arsim në të gjithë vendin përmes ndarje së resurseve shtesë si dhe duke përdorur në mënyrë më efikase resurset ekzistuese”, ka vlerësuar BB’ja.

Banka Botërore ka treguar se Kosova ka një popullsi të re, me 38 për qind të popullsisë nën moshën 19 vjeçare, shumë më shumë sesa vendet fqinje.

“Shqipëria (33 për qind), Bosnja (25 për qind), Serbia (23 për qind), Sllovenia (19 për qind) ose Mali i zi (27 për qind).”

Kjo popullsi e re, siç thotë Banka Botërore ofron një mundësi për krijimin e një fuqie punëtore të madhe, të arsimuar me pak presione fiskale dhe ekonomike të cilat i rëndojnë vendet me një popullsi në plakje, një problem me të cilin ballafaqohen shumë vende të Evropës lindore.

Megjithatë, sipas BB-së nëse Kosova nuk shfrytëzon përparësinë që i ofron popullsia e saj e re, atëherë konsiderohet se dividenda demografike mund të bëhet mallkim demografik.

E drejtori i Institutit për Hulumtime Zhvillimore, Lumir Abdixhiku, vlerëson se ssituata është edhe më alarmante se që paraqitet në raportin e statistikave.

“Problemi serioz mbetet në mosllogaritjen e plot 702,238 kosovarëve, përkatësisht pjesës dërmuese (plot 58.3%); të cilët fshihen prej kalkulimeve të papunësisë me një vijë lapsi”, ka shkruar Abdixhiku. Sipas tij, normë kaq të lartë joaktiviteti kanë vetëm 4 shtete tjera në botë (sipas të dhënave të Bankës Botërore), bëhet fjalë për Timorin Lindor (62.1%), Moldavinë (59.3%), Gazan (58.8%) dhe Samoa (58.5%).

“Vendet fqinje të Kosovës, kanë norma shumë më të ulëta joaktiviteti; Mali i Zi (50.1%), Serbia (47.5%); Shqipëria (44.9%) e Maqedonia (44.8%) – për të dhënë një mesatare prej 46.8%”.

Nëse Kosova, sipas tij, do të llogaritej se ka një fuqi punëtore joaktive sikurse regjioni – siç dhe ka gjasa të jetë – atëherë në Kosovë mund të jenë rreth 562,764 kosovarë joaktiv e 639,724 aktiv – për të dhënë në fund një papunësi prej plot 50.1% e jo 35.1%.

Të dhënat për papunësinë

– Në Kosovë janë 1,202,489 njerëz në moshë pune;
– Prej të cilëve plot 702,238 (58.3%) janë joaktiv – pra s’kërkojnë punë;
– Pjesa e mbetur, prej 500,251 kosovarëve janë forcë aktive;
– Nga ta, të punësuar janë 323,508 kosovarë (formal e joformal);
– Ndërsa, vetëm 176,743 janë të papunë;
– Rrjedhimisht, papunësia në Kosovë është rreth 35.1%.

Njohësit e çështjeve juridike kanë qëndrime të ndryshme, sa i përket mundësisë që Gjykatën Speciale ta themelojë Këshilli i Sigurimit të OKB-së.

Nëse Kosova nuk e themelon vetë Gjykatën Speciale, atëherë është Këshilli i Sigurimit të OKB-së ai që e bën një gjë të tillë. Ky është kërcënimi që vjen më së shpeshti nga faktori ndërkombëtar dhe përdoret edhe nga Qeveria e Kosovës, për themelimin e Gjykatës Speciale. Mirëpo, njohësit e çështjeve juridike kanë qëndrime të ndryshme, sa i përket mundësisë që Gjykatën Speciale ta themelojë Këshilli i Sigurimit të OKB-së.

Profesori i të drejtës kushtetuese, Mazllum Baraliu nuk e sheh të mundshëm themelimin e Gjykatës Speciale nga Këshilli i Sigurimit të Organizatës së Kombeve të Bashkuara. Ai thotë se nëse vepron në mënyrë racionale, KS i OKB-së nuk ka mundësi ta themelojë një gjykatë të tillë dhe nuk ka interes t’i futet kësaj aventure. E për këtë, Baraliu përmend tri arsye.

“Arsye e parë është se Kosova nuk është anëtare e OKB-së. E dyta, rezoluta 1244 është e tejkaluar. Në këtë rast, cdo veprim që do ta merrte KS i OKB-së, nuk ka as objekt as subjet. E treta, nëse do të bënte një gjë të tillë, do të krijonte autogol. Do të krijonte një situatë bumerangu ndaj vetes, sepse edhe ato shtete që janë kundër Kosovës si shtet, do ta njihte shtetësinë e Kosovës dhe do të kishte efekte të caktuara positive në trendin e njohjes së Kosovës nga shtetet tjera”, tha Baraliu për Radio Kosovën.

Por ndryshe mendon, profesori i të drejtës ndërkombëtare Afrim Hoti. Ai thotë se Këshilli i Sigurimit të OKB-së mund ta themelojë Gjykatën Speciale, nëse Kosova këmbëngul që mos ta themelojë atë dhe e humb mbështetjen e SHBA-së dhe Britanisë së Madhe të cilat mund ta përdorin veton në Këshillin e Sigurimit.

“Mospërdorimi i të drejtës së vetos në KS të OKB do të hapte rrugën dhe do të jepte dritën jeshile që këshilli i sigurimit të themelonte këtë gjykatë. Me fjalë të tjera, unë mendoj se një gjykatë e tillë mund të themelohet mbi konstelacionin e akteve juridike ndërkombëtare në fuqi që janë në Kosovë dhe themelimin e gjykatës speciale nga OKB-ja e shoh si krejt realist”, tha Hoti për Radio Kosovën.

Gjithsesi, Hoti thotë se mosthemelimi i Gjykatës Speciale nga Kosova, përveç mundësisë që të themelohet nga KS i OKB-së, mund të bartë edhe pasoja të tjera, siç është zbehja e miqësisë me partnerët ndërkombëtarë dhe ngecja e integrimit të Kosovës në BE.

Ndërsa profesori Baraliu e quan jokorrekte që të ushtrohet një presion kaq i madh ndaj një shteti të ri dhe të pakonsoliduar ende, si dhe të frikësohet një popull i tërë me krijimin e Gjykatës Speciale nga Këshilli i Sigurimit të OKB-së.

Ndërkohë, edhe ish shefi i zyrës ligjore të UNMIK-ut, Alexander Borg Olivier e ka vënë në dyshim mundësinë e themelimit të Gjykatës Speciale nga ana e Këshillit të Sigurimit të Kombeve të Bashkuara, duke thënë se dy anëtarët e përhershëm në Këshillin e Sigurimit, Rusia dhe Kina, nuk do të pranojnë të krijojnë një precedent i cili në të ardhmen mund të përdoret kundër tyre. Ai ka thënë se asnjë pasojë nuk do ta ketë Kosova nëse nuk e themelon këtë gjykatë./Radio Kosova/