Marrë parasysh që Bashkimi Evropian, në njëfarë mënyre, zakonisht e përkrahë më shumë qeverinë sesa opozitën, për shkak se punon më shumë me të – jo vetëm në Kosovë, por në të gjitha vendet e tjera – mund të ndodhë që edhe qeveria e përdor BE-në që të na detyrojë neve brenda, që t’i zgjidhim çështjet, ka deklaruar Shenoll Muharremi, njohës i integrimeve evropiane.

“Pra, qeveria e pyet BE-në që t’i bëjë favor, i thotë ‘kërkona këtë’, për shkak se kemi probleme të brendshme, në mënyrë që t’ia lehtësojë aprovimin në Kuvend”, tha ai duke folur për Radion Evropa e Lirë.

Këto komente Muharremi i bëri në një prononcim lidhur me çështjen e demarkacionit të kufirit me Malin e Zi që sipas tij, nuk do të ishte ndonjë problem i madh për Bashkimin Evropian, po të mos politizohej në Kosovë, si një çështje për të cilën ka mospajtime të skajshme ndërmjet pushtetit dhe opozitës.

“Por, tash, me faktin që ne e kemi politizuar këtë çështje, mos të harrojmë që edhe BE-ja, përkundër faktit që ka kritere teknike, shpeshherë vepron edhe politikisht, dhe e gjen si mekanizëm shumë të rëndësishëm çështjen e liberalizimit të vizave, për t’i detyruar vendet që të ndërmarrin disa reforma ose disa vendime të ndryshme,” ka shtuar ai.

Sipas tij, çështja e demarkacionit, edhe pse njihet si kusht monitorues, do të jetë çështje shumë e rëndësishme dhe konsideron se nëse kjo nuk zgjidhet shpejt, të aktivizohet në fazën para se të hyjë në fuqi lëvizja e lirë për kosovarët.

Muharremi, nga ana tjetër, rikujton se një se kërkesë e ngjashme nga BE-ja, për demarkacion të kufirit, nuk i është bërë Serbisë për liberalizim vizash.

Përfaqësues të Organizatave të Shoqërisë Civile, mediave, dhe artistë nga Bosnja dhe Hercegovina, më 4 dhe 5 shkurt do ta vizitojnë Kosovën, qëllimi i së cilës vizitë është vazhdimi i iniciativave, të cilat do të avokojnë për lirinë e lëvizjes në mes të Kosovës dhe Bosnje e Hercegovinës.

Gjatë këtyre dy ditëve, do të organizohen panele diskutimi, të cilat do të shtjellojnë temën: Vizat-barrierë komunikimi midis Kosovës dhe Bosnje e Hercegovinës.

“Për më tepër se një vit, Fondacioni i Kosovës për Shoqëri të Hapur dhe Fondacioni për Shoqëri të Hapur në Bosnje dhe Hercegovinë kanë ndërmarrë disa iniciativa që për qëllim kanë liberalizimin e vizave midis Kosovës dhe Bosnjës e Hercegovinës”, thuhet në njoftimin për mediat.

Përveç takimeve zyrtare, pjesë e projektit janë edhe takimet e avokimit me palët kyçe të interesit, akterët vendimmarrës në Bosnje dhe Hercegovinë, Kosovë dhe Serbi.

Kryetari i Kuvendit, Kadri Veseli, ka kërkuar nga presidentja Atifete Jahjaga që t’i thërrasë palët në një tryezë të dialogut pasi, sipas tij, ky është obligim kushtetues i saj dhe palët duhet të përgjigjen.

Veseli ka thënë se kërcënimi me zgjedhje nuk është opsion. Por, përfaqësuesit e opozitës si zhbllokim të situatës e shohin shkuarjen në zgjedhje të parakohshme, raporton “Epoka e re”.

Anëtari i Kryesisë së AAK-së, Muharrem Nitaj, ka thënë se duhet të ndodhë një marrëveshje politike për të dalë nga kriza dhe për të shkruar në zgjedhje të parakohshme.

Edhe Frashër Krasniqi nga VV-ja ka thënë se kjo Qeveri duhet të japë dorëheqje dhe të mos bëjë përpjekje për zgjedhjen e presidentit.