Policia e Kosovës nëpërmjet një njoftimi për media ka mohuar akuzat e Lëvizjes Vetëvendosje se Policia intervenoi dhunshëm ndaj protestuesve që po vinin nga Shqipëria.

Policia thotë se bazuar në procedurat ligjore kufitare, 42 personave ju është refuzuar hyrja.

“Në pikën kufitare që lidhë Republikën e Kosovës me atë të Shqipërisë, bazuar në procedurat ligjore kufitare, një numri prej dyzet e dy (42) personave ju është refuzuar hyrja”, thuhet në saqrimin e PK-së, transmeton PrizrenPress.

Sqarimi i plotë i Policisë:

Me qëllim të informimit të drejtë të opinionit publik lidhur me shkrimet dhe deklarimet e publikuara sot (09.01.2016) në media dhe portale, se kinse Policia e Kosovës po i ndalon dhe pengon protestuesit që në mënyrë të organizuar me autobus të vijnë nga rajonet e ndryshme në Prishtinë, ky deklarim nuk është i vërtet dhe nuk qëndron.

Po ashtu edhe deklarimi në media se kinse Policia e Kosovës ka rrahur dhe maltretuar protestues të ndryshëm duke përfshirë ata nga Shqipëria, nuk qëndron dhe nuk është aspak i vërtetë.

Ashtu siç e kemi bërë të ditur Policia e Kosovës (PK) me kohë ka bërë të gjitha përgatitjet e nevojshme duke hartuar planin operativ, për tu kujdesur për sigurinë e përgjithshme në Republikën e Kosovës, mbajtjen e rendit dhe sigurisë publike, zbatueshmerinë e ligjit, si dhe ndërmarrjen e masave të nevojshme policore ndaj veprimeve të mundshme kundërligjore dhe luftimi i të gjitha dukurive negative që mund të shkaktojnë jostabilitet.

Andaj referuar planit policor si dhe përgjegjësive ligjore që kemi, PK-ja është duke ndërmarr veprimet e saja konform autorizimeve ligjore duke përfshirë edhe kontrollin në komunikacionin rrugor, por në asnjë rast të vetëm nuk ka ndaluar dhe penguar qarkullimin e asnjë autobusi në asnjë rajon.

Ndërsa në pikën kufitare që lidhë Republikën e Kosovës me atë të Shqipërisë, bazuar në procedurat ligjore kufitare, një numri prej dyzet e dy (42) personave ju është refuzuar hyrja.

Policia e Kosovës e ri-thekson se njeh të drejtën e qytetarëve për tubime publike, fjalën e lirë në tubime publike, protesta e manifestime publike në pajtim me Kushtetutën dhe ligjet në fuqi.

Policia e Kosovës siguron opinionin e gjerë se do të ndërmarrë të gjitha masat e nevojshme për zbatimin e ligjit, garantimin e rendit dhe qetësisë publike, lëvizjen e lirë dhe mbarëvajtjen e qetë dhe pa incidente të kësaj proteste, i cili edhe është prioritet i yni.

Me respekt,
Zyra për Informim e PK-së

Lëvizja Vetëvendosje akuzon Policinë e Kosovës se intervenoi dhunshëm ndaj protestuesve që po vinin nga Shqipëria. Sipas VV-së, ndalimi dhe përdorimi i dhunës ndaj protestuesve që po vinin nga Shqipëria, është veprim antikombëtar dhe i kundërligjshëm

“Policia e Kosovës intervenoi dhunshëm ndaj protestuesve që po vinin nga Shqipëria. Policia i ndaloi ata në kufi për të mos lejuar hyrjen e tyre dhe përdori dhunën për t’i shpërndarë”, thuhet në një reagim të VV-së.

“Qeverisë së Kosovës, e orientuar që ta lejojë futjen e Serbisë në Kosovë, po i pengon ardhja e motrave dhe vëllezërve tanë nga Shqipëria, për të protestuar në mbrojtje të Republikës së Kosovës”.

“Policia që nga mëngjesi ka filluar me provokime të rënda ani pse çdo konventë ndërkombëtare e obligon që të sigurojë të drejtën e pjesëmarrjes së lirë të njerëzve në protesta”.

“Ndalimi dhe përdorimi i dhunës ndaj protestuesve që po vinin nga Shqipëria, është veprim antikombëtar dhe i kundërligjshëm”. /PrizrenPress.com

Janë nisur 17 autobusë nga Malisheva si dhe mijera aktivistë me vetura private për të protestuar në Prishtinë kundër qeverisë antikushtetuese për shtet me Sovranitet.

Drejt Prishtinës janë nisur edhe dhjetëra autobus me protestues nga të gjitha qytetet e Kosovës.

Ish lideri i VV-së Albin Kurti ndodhet në banesën e tij.

KALLXO.com sjell pamje ekskluzive të kontrollit që policia ia ka bërë banesës së Kurtit mëngjesin e sotëm për të vërtetuar nëse ai është duke respektuar arrestin shtëpiak.

Opozita ka paralajmëruar një protestë gjithëpopollore në Prishtinë në orën 14:00.

Në pjesë të ndryshme të qytetit, veçanërisht rreth stacionit policor Qendra në Prishtinë është vërejtur prani e shtuar e policisë përfshirë mjeteve të blinduara ndërsa opozita ka filluar ta rregullojë binën në sheshin ‘Skënderbeu’ nga e cila liderët opozitarë do t’i mbajnë fjalimet e protestës. /Kallxo.com

Edhe nga Prizreni pritet të nisen 7 autobusë për protestën e opozitës në kryeqytet.

Këtë e tha për KALLXO.com asamblisti i Lëvizjes “Vetëvendosje” në këtë qytet Arbër Rexhaj.

Sipas Rexhajt një pjesë e madhe e opozitarëve do të nisen me vetura.

Me vetura rrugën drejt Prishtinës do ta bëjnë edhe të gjithë zyrtarët e AAK-së në Prizren.

Sekretari i përgjithshëm i Lëvizjes Vetëvendosje!, Dardan Molliqaj, nga arratia i ka bërë thirrje faktorit ndërkombëtar që mbështet dy marrëveshjet, që të mos ndërhyjë në çështjet e brendshme të vendit. Ai tha se protestat që fillojnë sot, nuk do të ndalen deri në rrëzimin e qeverisë

Interpretimi i Gjykatës Kushtetuese për marrëveshjen e Asociacionit të komunave me shumicë serbe nuk do ta ndalë opozitën në kërkesën e saj për rrëzimin e qeverisë. Madje, gjykata e ka forcuar bindjen që të vazhdohet me protesta deri në fund.

Kështu ka deklaruar në intervistën dhënë gazetës Zërit sekretari i përgjithshëm i Lëvizjes Vetëvendosje!, Dardan Molliqaj, i cili aktualisht gjendet në arrati.

Ai ka thënë se kjo protestë e sotme do të jetë më e madhja që organizon opozita dhe synon t’ia kthejë Kosovës demokracinë dhe lirinë, që pushteti aktual ia ka cunguar.

Sidoqoftë, Molliqaj duke folur për opinionet e faktorit ndërkombëtar, të cilët i kanë mbështetur këto marrëveshje, ka thënë se deklaratat e tyre kanë qenë antidemokratike dhe u ka bërë thirrje që të mos ndërhyjnë në çështjet e brendshme të Kosovës.

Ndërkohë, duke folur për zgjedhjet si opsioni i vetëm Molliqaj ka thënë se opozita edhe atë sfidë do ta kalojë së bashku. /Zëri

Tri partitë opozitare, Lëvizja Vetëvendosje!, Aleanca për Ardhmërinë e Kosovës (AAK) dhe NISMA për Kosovën, sot (e shtunë) do të mbajnë protestën gjithëpopullore në kryeqytet, me sloganin: “Për shtet me sovranitet! Kundër  qeverisë antikushtetuese!”.

Opozita e bashkuar ka paralajmëruar se 9 janari shënon fillimin e një serie protestash deri në rrëzimin e Qeverisë dhe shkuarjen në zgjedhje të parakohshme.

Protesta do të fillojë në orën 14:00 te Biblioteka Kombëtare për të vazhduar nëpër sheshet deri te Qeveria e Kosovës./PrizrenPress.com