Pas vendimit të Gjykatës Kushtetuese në lidhje me përputhshmërinë e parimeve të Asociacionit të Komunave me shumicë serbe me frymën e Kushtetutës së Republikës së Kosovës, Qeveria e Kosovës është zotuar se do ta zbatojë në përpikmëri këtë vendim.

Përmes një komunikate për media, Qeveria ka kërkuar që ky vendim të respektohet nga i gjithë spektri politik në vend.

Ky është njoftimi i potë i Qeverisë:

Qeveria e Republikës së Kosovës e mirëpret dhe e përshëndet vendimin e Gjykatës Kushtetuese lidhur përputhshmërinë e parimeve të Asociacionit të Komunave me shumicë serbe me frymën e Kushtetutës së Republikës së Kosovës.

Qeveria e Republikës së Kosovës zotohet se do ta zbatojë me përpikëri vendimin e Gjykatës Kushtetuese në fazat që ndërlidhen me hartimin e Statutit dhe të Dekretit të Asociacionit.

Qeveria e Republikës së Kosovës, me këtë rast, fton gjithë spektrin politik, përfshirë partitë opozitare, që të respektojnë këtë vendim, i cili është në përputhje edhe me vetë Marrëveshjen e Parimeve, në të cilën ishte paraparë tekstualisht që e njëjta të shqyrtohej nga ana e Gjykatës Kushtetuese të Republikës së Kosovës.

Qeveria e Republikës së Kosovës konsideron se është jetike për vendin që të përmbushen kërkesat ligjore dhe që të gjithë aktorët politikë t’i rikthehen jetës institucionale dhe debateve politike, të cilat duhet të zhvillohen brenda institucioneve, e në radhë të parë brenda Kuvendit të Republikës së Kosovës.

Partitë shqiptare në opozitë, Lëvizja Vetëvendosje, Aleanca për Ardhmërinë e Kosovës dhe Nisma për Kosovë, thonë se pas vendimit të Gjykatës Kushtetuese lidhur me përputhshmërinë e Asociacionit me Kushtetutën e Kosovës, kanë kërkuar largimin e Qeverisë.

Opozita thotë se Isa Mustafa dhe Hashim Thaçi, duhet të japin përgjegjësi për shkeljen e Kushtetutës së Kosovës.

Komunikata e plotë e partive opozitare:

Opozita e bashkuar ka deklaruar dhe argumentuar se marrëveshja e 25 gushtit me Serbinë e nënshkruar nga Isa Mustafa dhe Aleksandër Vuçiq në Bruksel është në kundërshtim me Kushtetutën e Republikës së Kosovës dhe frymën e saj.

Rrjedhimisht kjo marrëveshje dhe ‘Zajednica’ në përgjithësi janë në kundërshtim me Kushtetutën dhe si të tilla janë të vdekura.

Isa Mustafa dhe Hashim Thaçi, si dhe koalicioni i tyre duhet të japin përgjegjësi për shkelje të Kushtetutës.

Këta shkelën Kushtetutën, dhe mashtruan qytetarët duke u përpjekur ta fshihnin këtë mashtrim. Po ashtu, ata kanë vënë në lajthitje Kuvendin e Republikës, duke tentuar dhunshëm ta bëjnë atë pjesë të shkeljes së tyre të rëndë.

Kundër argumenteve tona Isa Mustafa dhe Hashim Thaçi patën deklaruar se Zajednica është OJQ, është në përputhje me ligjet dhe Kushtetutën dhe se Dekretin për themelimin e saj do ta dërgonin në Gjykatën Kushtetuese.

Ata nën këto qëndrime antikushtetuese shpërfillën Peticionin e 205 254 qytetarëve, arrestuan deputetët tanë, aktivistët e qytetarët protestues.

Ata na akuzuan se po shkelim ligjin teksa kishin shkelur thelbësisht Kushtetutën e vendit tonë, pra interesin tonë shtetëror.

Prandaj largimi i menjëhershëm i Mustafës dhe Thaçi është i domosdoshëm dhe më e pakta që duhet të ndodhë.

Lëvizja VETËVENDOSJE!

Aleanca për Ardhmërinë e Kosovës

NISMA për Kosovën

Njohësi i çështjeve politike Nexhmedin Spahiu e ka komentuar vendimin e Gjykatës kushtetuese në lidhje me marrëveshjen për asocacionin apo bashkësin e komunave më shumicë serbe brenda Kosovës, duke vlerësuar se po të mos pengohej nga nga partitë opozitare kjo gjë e paligjshme do të miratohej, transmeton gazetablic.com

Po ashtu për këtë çështje, Spahiu ka pyetur se a duhet të jap dorëheqje Kryeministri Isa Mustafa.

Më poshtë mund ta lexoni, komentin e plot të Nexhmedin Spahiut

Tani qe Zajednica doli antikushtetuese, a duhet qe kryeministri i Kosoves te jape doreheqje per tentim dhunimi te kushtetutes? Po prokuroret dhe gjykatesit qe denuan deputetet qe mbrojten kushtetuten e Kosoves a duhet te turperohen? Sikur mos te kishim sjelljen e tyre te dhunshme ne Parlament, Zajednica e Demarkacioni a do t’ishin ishin miratuar me 2/3 moti?

Presidentja e Republikës së Kosovës, Atifete Jahjaga nëpërmes një kumtese për medie, thuhet se ka pranuar vendimin e Gjykatës Kushtetuese të Republikës së Kosovës në kërkesën e saj për të shqyrtuar përputhshmërinë e parimeve të asociacionit të komunave me shumicë serbe me Kushtetutën e Republikës së Kosovës.

“Presidentja Jahjaga u ka bërë thirrje të gjitha institucioneve dhe spektrit politik në Kosovës që të respektojnë vendimin e Gjykatës Kushtetuese”, thuhet në kumtesën e Jahjagës, transmeton Koha.net.

Në fund thuhet se Jahjaga ka ftuar partitë e koalicionit qeverisës dhe opozitën të shfrytëzojnë këtë moment për të rinisur dialogun politik në Kosovë dhe për të rikthyer normalitetin në vend.