Instituti i Kosovës për Mbrojtjen e Monumenteve, IKMM, në bashkëpunim me FLOSSK, me mbështetjen e Ministrisë së Kulturës, Rinisë dhe Sportit, ka prezantuar punën e projekteve rreth trashëgimisë kulturore dhe dhënë çmimet për fituesit e garës së organizuar nga FLOSSK për fotografitë më të bukura të monumenteve të Kosovës dhe Shqipërisë, Wiki Loves Monuments.
Çmimi i parë për të tretën herë më radhë i ka takuar fotografit Arben Llapashtica, i cili kishte garuar me një fotografi nga lokaliteti arkeologjik, “Ulpiana”.
Në profilin e tij zyrtar në rrjetin social Facebook, Llapashtica ka shkruar se është i nderuar me ketë çmim dhe ka inkurajuar edhe të tjerët të merren me fotografi.
“Ndihem i nderuar sepse për herë të tretë jam fitues dhe në mesin e fituesve në garën e fotografisë në Wikipedia, Wiki Loves Monuments. Kësaj radhe përveç çmimit të parë, në mesin e 10 fotografive fituese gjithsej, 6 janë të miat. Bëj thirrje që edhe ju të jeni kontribuues dhe te ngarkoni sa më shumë fotografi të Kosovës”, ka shkruar ai.
Vendi i dytë i ka takuar Bujar Gashit, me fotografinë e Kalasë së Novobërdës, kurse i treti Emin Gjikut, me një fotografi të Muzeut Etnologjik. /KL