Shoqatës atdhetare kulturore “Labëria” në 24-vjetorin e themelit të saj iu dha çmimi “Nderi i Kombit” nga presidenti i Shqipërisë, Bujar Nishani.
Nishani tha se ky çmim i takon kësaj shoqate për kontributin që ka dhënë në forcimin dhe përparimin e demokracisë si dhe për ruajtjen e pasurimin e traditave, zakoneve, kulturës dhe folklorit të trevës së Labërisë.
Gjithashtu, për veprimtari e vlera të rralla të kulturës së krahinës së Labërisë, presidenti Nishani nderoi publicistin Ago Nezha me titullin “Kalorës i Urdhrit të Skënderbeut”, skenaristin dhe autorin Petrit Ruka me titullin “Mjeshtër i Madh” dhe Haxhi Dalipin (pas vdekjes) me titullin “Mjeshtër i Madh” me motivacionin “Për kontributin e tij të vyer në krijimin e grupeve polifonike të Labërisë”.