Drejtori i Qendrës Rajonale për Trashëgimi Kulturore – Prizren, Samir Hoxha, në një prononcim për Telegrafin ka sqaruar arsyet e restaurimit (fasadimit në atë mënyrë) të Hamamit të Prizrenit.

Sipas tij, në këtë fazë të implementimit të projektit, për restaurimet e objektit të Hamamit të “Gazi Mehmet Pashës”, janë mbuluar përkohësisht vrimat nëpër kupolat e hamamit.

Kjo gjë sipas Hoxhës, është bërë me karakter të përkohshëm për ta penguar depërtimin e lagështisë në strukturat brenda objektit.

“Meqenëse mjetet financiare për restaurimin e Hamamit për këtë fazë kanë qenë të pamjaftueshme (për restaurimin e tërësishëm), punët janë ndarë nëpër faza, duke i dhënë prioritet eliminimit të rrezikut më të madh që i kanosej ndërtesës”.

“Përfaqësuesi i UNESKO-se, në bashkëpunim me arkitektët e Qendrës Rajonale të Trashëgimisë Kulturore (QRTK) në Prizren, kanë hartuar planin për zbatimin e punëve nëpër faza, duke pasur parasysh shumën e mjeteve në dispozicion. Në të ardhmen, posa të sigurohen mjetet financiare për vazhdimin e punëve, do vendosen xhama gjysmë sferik nëpër hapjet e kubeve dhe qemerëve”, ka theksuar ai.

Sipas tij, në bazë të marrëveshjes në mes QRTK-së së Prizrenit dhe UNESCO-së, të nënshkruar me 17 mars 2010, QRTK-ja e Prizrenit (contract No: 4500097131) është hartuar projekti i restaurimit dhe rehabilitimit të hamamit të “Gazi Mehmet Pashës” në Prizren.

“Sipas paramasës për punët restauruese janë nevojitur rreth 670 mijë e 190 euro. Nga konferenca e donatorëve për Kosovën, e organizuar nga Qeveria e Turqisë, janë ndarë një shumë e caktuar për restaurimin e monumenteve në Kosovë, ku është paraparë të ndahen një sasi e mjeteve edhe për Hamamin e Prizrenit. Për zbatimin e punimeve është kontraktuar (nga ana e UNESCO-së) kompania ndërtimore NN “El-Com” nga Prizreni, për shumën rreth 214 mijë dollarë amerikan. Punimet ne objektin e hamamit të “Gazi Mehmet Pashës” në Prizren janë ndërpre në shtator të vitit të kaluar”, ka shtuar Hoxha./Telegrafi/

Ambasadorja amerikanë në Kosovë, Tracey Ann ka përciellë nga afër punimet e Kalasë së Prizrenit. Ajo tha se Kalaja e Prizrenit e demonstron pasurinë e trashëgimisë kulturore të Kosovës.

“Për realizimin e këtij projekti SHBA-ja ka dhënë një donacion prej 700 mijë dollarëve”, tregoi Jacobson.

“Për këtë projekt qytetarët e Prizrenit duhet të jenë krenarë, sepse Prizreni ka zënë vend në hartën botërore sa i përket trashëgimisë së pasur kulturore”, tha ajo.

“Restaurimi i këtij objekti të lashtë paraqet një rëndësi të posaçme për vlerat që i posedon ky qytet i bukur”.

Memorandumi midis Ambasadës Amerikane në Prishtinë, Degës në Kosovë të organizatës suedeze Trashëgimia Kulturore pa Kufij (CHË) dhe Institutit Arkeologjik të Kosovës për realizimin e punimeve të Kalasë është nënshkruar në muajin shtator të vitit të kaluar.

Shafi Gashi, udhëheqësi i Projektit për Kalanë e Prizrenit, tha se momentalisht është duke u punuar në pjesën e qytetit të poshtëm dhe atë jugor të Kalasë së Prizrenit, duke shtuar se punimet kanë karakter kryesisht të pastrimit dhe të konservimit të strukturave arkitektonike.

“Do të bëjmë edhe konservimin e murit të shembur”, ka thënë Gashi.

“Restaurimi i Kalasë ka një rëndësi të madhe pasi që edhe konsiderohet si një nga objektet më të vjetra të trashëgimisë kulturore e historike në këto hapësira”.

“Përveç vlerave të shumta të cilat i posedon Kalaja e Prizrenit, këtyre ditëve këtij monumenti historik i janë shtuar edhe më shumë atribute historie”.

“Gjatë gërmimeve dhe restaurimeve të kësaj kalaje nga arkeologët, janë gjetur materiale te shumta arkeologjike. Materialet të cilat janë gjetur në brendi të Kalasë kalojnë shifrën dy mijë”/TV Prizreni/.