(E plotësuar) Liderët e opozitës, Visar Ymeri, Ramush Haradinaj dhe Fatmir Limaj, kanë deklaruar në Malishevë se manifestimet që po mbahen kundër Asociacionit për komunat serbe dhe demarkacionit me Malin e Zi janë për të kundërshtuar Serbinë në Kosovë dhe ata të cilët duan ta sjellin atë këtu.

Duke iu drejtuar pjesëmarrësve që janë mbledhur në sheshin “Adem Jashari” në këtë qytezë, kryetari i Nismës tha se janë këtu për të njoftuar qytetarët me rrezikun që kanoset vendi me këto dy marrëveshje.

“Ne nuk po bëjmë kërkesa partiake por kërkesa për të ndalë Serbinë që të kthehet në Kosovë. Tash është koha t’i thuhet jo kësaj se më pas do të jetë vonë”, tha Limaj.

Ndërsa kryetari i VV-së, Visar Ymeri tha se janë mbledhur në këtë shesh për të treguar se “Baci Adem nuk u kry, nuk u kry se po donë që Serbinë ta kthejnë në Kosovë.

“Të gjithë qytetarët i thonë Jo këtyre marrëveshjeve por Thaçi dhe Mustafa po i thonë Po, pasi që ata thonë se kështu po thotë Vuçiqi”, tha Ymeri.

Ndërsa lideri i AAK-së, Ramush Haradinaj tha se Kosova e do lirinë për të gjithë edhe për pakicat, por jo për që Serbia të kthehet në Kosovë.

Ai tha se ka kaluar koha kur janë dhënë tokat e Kosovës për Ballkanin.

“Kosova nuk do t’i jap askujt toka dhe këto dy marrëveshje nuk kalojnë”, tha Haradinaj në Malishevë. /lajmi.net

Nis manifestimi i opozitës në Malishevë

Tri partitë opozitare, Lëvizja Vetëvendosje!, Aleanca për Ardhmërinë e Kosovës( AAK) dhe Nisma për Kosovën ka nisur manifestimin në qytetin e Malishevës  për të kundërshtuar dy marrëveshjet, Asociacioni i komunave serbe dhe demarkacioni i kufirit me Malin e Zi.

Në këtë manifestim po marrin pjesë tre liderët e opozitës, Visar Ymeri, Ramush Haradinaj dhe Fatmir Limaj.

Opozita ka mbajtur edhe një ditë më parë manifestim në Pejë në kundërshtim të këtyre dy marrëveshjeve.

Presidentja Atifete Jahjaga, në fjalën e saj para deputetëve në Kuvendin e Kosovës, ka konstatuar se vendi ndodhet në krizë të thellë politike dhe i ka lutur të gjithë që t’i kthehen dialogut dhe ta gjejnë konsensusin për të ecur tutje.

“Po ju drejtohem në njërin prej momenteve më kritike të demokracisë tonë parlamentare”, ka thënë Jahjaga, në fillim të fjalimit të saj vjetor.

Ajo ka rikujtuar se zgjidhja e vetme e krizës politike është dialogu, ndërsa ka bërë të qartë se forcën e argumentit nuk mund ta mundë gazi lotsjellës.

“Pareshtur i kam takuar individualisht dhe kolektivisht përfaqësuesit për të kërkuar dialog dhe çdo herë kërkesa ime është refuzuar apo kushtëzuar”.

“Forcën e argumentit nuk mund ta zëvendësojë gazi lotsjellës, por as demokracinë nuk mund ta reduktojmë në numra”.

“Kosova është më e rëndësishme se secili prej nesh. Qytetarët e Kosovës nuk na kanë borxh të sillemi kështu, duke sfiduar rendin dhe ligjin”.

“Qytetarët u bënë spektatorë të një dhunë të paparë. U sfiduan rënd rendi dhe ligji”.

Jahjaga ka deklaruar se ka ndjerë shqetësimin e qytetarëve lidhur me dy marrëveshjet e fundit me Serbinë dhe Malin e Zi dhe ka reaguar duke dërguar Asociacionin në Kushtetuese, kurse për Demarkacionin ka propozuar komision gjithëpërfshirës.

“Duhet besuar institucioneve që vetë i kemi krijuar”, ka thënë Jagjaha.