Kryetari i Parlamentit të Kosovës, Kadri Veseli, në një postim në faqen e tij në Facebook, ka kërkuar përsëri falje për, siç e quajti ai “lëshim të çastit”, kur ofendoi deputeten e Kosovës, Albulena Haxhiun, duke i dëshiruar diçka të pa hijshme.

Veseli kërkim faljen nuk e ka drejtuar në adresë të deputetes së ofenduar, por në atë të qytetarëve të Kosovës, “të cilët mund të jenë ndjerë keq nga ai lëshim”.

Shkrimi i plotë i Kadri Veselit:

Mbrëmë kaluam një situatë shumë të vështirë për të gjithë ne. Të vështirë, pikësëpari, për qytetarët e Republikës së Kosovës, për përfaqësuesit e zgjedhur të tij në Kuvendin e Kosovës, për miqtë tanë perëndimorë që në vazhdimësi po na qëndrojnë pranë në mbështetje të projektit tonë të përbashkët: konsolidimit dhe fuqizimit të shtetit tonë të pavarur dhe sovran.

Ishte një sfidë e veçantë edhe për mua.

Në njërën anë, duhej me deomos të tregojmë vendosmëri në vazhdimin e punës së Kuvendit- institucionit më të lartë të shtetit tonë, sepse për këtë na obligon Kushtetuta, Ligjet dhe Rregullorja e brendshme e punës së Kuvendit, e në anën tjetër, më duhej të garantoja respektimin e integritetit fizik dhe dinjitetit politik të deputetëve, të të gjitha grupeve parlamentare brenda në Kuvend.

Me shumë përpjekje, në një situatë tej mase të rënduar, së bashku me Kryesinë e Kuvendit, me mbështetjen e Qeverisë e mekanizmave tjerë institucional, si dhe miqve perëndimor të shtetit tonë, ia dolëm këtij qëllimi. Respektuam institucionin. Respektuam dinjitetin njerëzor. Respektuam shtetin tonë

Të nderuar miq!

Situatat e vështira shkaktojnë edhe lëshime të çastit. Unë e kisha një të tillë. Mbrëmë, menjëherë ju adresova publikut për këtë. Edhe këtu dëshiroj t’i kërkoj ndjesë secilit qytetar të Kosovës që mund të jetë ndjerë keq prej këtij lëshimi.

Të gjithë që ishim aty kishim emocionet e situatës, por në fund ne që bëjmë shumicën demokratike në Kuvend, me maturi dhe gjakftohtësi, bëmë që të triumfoj arsyeja dhe interesi i vendit.

Duhet të jemi krenarë për këtë.

Mbi të gjitha duhet të jemi krenarë me qytetarët e Republikës së Kosovës që mbrëmë qëndruan me familjet e tyre dhe nuk i dëgjuan thirrjet për t’u bërë pjesë e skenarëve të dhunës nëpër rrugë.

Ata dëshmuan një vetëdije të lartë shtetërore.

Ata e dinë se institucionet mbrohen duke i lënë ato të punojnë, e jo duke i shkatërruar.

Sjellja dijnitoze e qytetarëve të Kosovës, në raport me situatën e krijuar, duhet të shërbej si një leksion reflektimi për partitë opozitare. Ne jetojmë në demokraci dhe kjo nënkupton faktin se opozita është pjesë e domosdoshme e jetës politike.

Vendi ynë ka nevojë për opozitë, por për një opozitë që sjellë në Kuvend ide dhe argumente politike, projekte zhvillimore dhe projektligje në shërbim të jetës së qytetarëve.

Jo, për një opozitë që me masa të dhunshme e privon shumicën parlamentare nga e drejta për t’u shprehur dhe përfaqësuar zgjedhësit e saj.

Jo, për një opozitë që po me masa të dhunshme pretendon të marrë monopolin mbi patriotizmin, kombin dhe shtetin.

Duke qenë në krye të Kuvendit të Republikës së Kosovës unë do të vazhdoj t’i konsideroj të hapura rrugët e komunikimit me partitë opozitare, do të vazhdoj të ndjek kursin e paqes parlamentare dhe unitetit të përgjithshëm politik, sepse besoj thellësisht se kjo është rruga më e mirë dhe e vetme që na shpie përpara. Kuvendi i Kosovës do të vazhdoj të punoj me dinamikë të shtuar në agjendën e tij legjislative.

Ata që ëndërrojnë dhe punojnë që Kosovës t’i ngjitet njolla e shtetit të dështuar kanë për t’u zhgënjyer.

Nga pozicioni im institucional dua t’i siguroj qytetarët dhe miqtë e lirisë e të shtetit tonë se Kosova do të vazhdoj të jetë një rrëfim i bashkëpunimit strategjik me botën perëndimore, e rrjedhimisht edhe rrëfim suksesi për një popull që një shekull rresht pagoi një çmim shumë të madh për të qenë i lirë.

Deputeti i Vetëvendosjes, Rexhep Selimi ka thënë se seanca e mbrëmshme e improvizuar në një sallë të Kuvendit të Kosovës është ilegale dhe ligjet e miratuar në atë seancë nuk do të mund të marrin formën legale.

Selimi për ORAinfo ka thënë se u ishte thënë se në atë sallë po mbahej takimi i vetëm grupeve parlamentare.

“Ne e kuptuam se në atë sallë ishin mbledhur shefat e grupeve parlamentare dhe ne u dërguam në atë mbledhje përfaqësuesen tonë, por policia nuk e kishte lejuar të hyjë me arsyetimin se aty po mbahej mbledhje e grupeve parlamentare. Ndërkaq, kjo mbledhje e grupeve parlamentare u shndërrua në seancë Kuvendi, e cila nuk mund të marrë formën legjitime”, ka thënë Selimi.

Ai gjithashtu ka komentuar edhe fjalorin e kryetarit të Kuvendit të Kosovës, Kadri Veseli i cili në një moment, deputetes së Vetëvendosjes, Albulena Haxhi iu drejtua “ma hanksh”.

“Kadriun pak me gërrith del ai i vërteti dhe dje ishte ai i vërteti, nga aktrimi që kishte në seancat e mëparshme”, ka thënë Selimi.

Kryesia e Kuvendit të Kosovës vlerëson se në pamundësi për mbajtjen e seancave plenare, më 17 shtator 2015, 8, 15 dhe 23 tetor 2015, ku është bllokuar puna e seancës plenare, është cenuar siguria dhe shëndeti i deputetëve.

Si pasojë, në mbledhjen e Kryesisë së Kuvendit të Kosovës, të mbajtur me 23 tetor 2015, është marrë vendimi përmes të cilit kërkohen veprime plotësuese, duke përfshirë edhe ndërhyrjen e zyrtarëve të policisë për siguri, në mënyrë që të sigurohet shëndeti i deputetëve dhe mbarëvajtja e punimeve të seancës plenare.

“Ky vendim është marrë në mbështetje të nenit 67.6 të Kushtetutës së Republikës së Kosovës dhe të nenit 41, paragrafi 4 i Rregullores së Kuvendit”, thuhet në njoftim.

Gjithashtu shtohet se vazhdimi i seancës së 23 tetorit 2015 në sallën tjetër të Kuvendit të Kosovës, është bërë mbi bazën e nenit 4 të Rregullores së Kuvendit.

“Salla në të cilën është mbajtur vazhdimi i seancës nuk është byfeja e Kuvendit, por sallë alternative e sallës kryesore”, shtohet më tej.

Një nga arsyet pse seanca është zhvendosur në sallën alternative, sipas Kryesisë, është se deputetët opozitarë me veprimet e tyre kanë shkaktuar dëmtim në rrjetin e zërimit përmes prishjes së gjashtë mikrofonave.

Presidentja Atifete Jahjaga ka apeluar te deputetët e opozitës që të heqin dorë nga dhuna.

Përmes një deklarate Jahjaga ka thënë se është thellësisht e shqetësuar dhe ka shprehur keqardhjen e saj të thellë për zhvillimet në Kuvendin e Kosovës dhe jashtë tij.

“Skenat dhe veprimet e dhunshme në Kuvend janë të dënueshme dhe të papranueshme, mjetet e përdorura plotësisht në kundërshtim me parimet bazike të një rendi demokratik dhe një demokracie parlamentare”.

“Apeloj te deputetët e opozitës të heqin dorë nga dhuna. Aspiratat e vendit tonë po rrezikohen thellësisht nga këto ngjarje dhe këto veprime po e dëmtojnë demokracinë që e kemi ndërtuar me mund. Apeloj te i tërë spektri politik që t’i kthehen normalitetit, që institucionet të vazhdojnë punën sepse kemi shumë sfida para vetes”.

“Qytetarët që na kanë zgjedhur presin nga ne të jemi shembull i promovimit të sundimit të ligjit, respektim të procesit demokratik. Dialogu është gurthemel i demokracisë. Aty ku ka dialog, ka zgjidhje”.

Policia e Kosovës ka bërë të ditur se gjatë intervenimit të mbrëmshëm për të shpërndarë protestuesit janë arrestuar dhjetë protestues. Poashtu, policia ka njoftuar se si pasojë e dhunës është lënduar një zyrtar i Policisë.

Komunikata e plotë e Policisë

Edhe pas orës 23:30 të datës 23.10.2015 seanca e Kuvendit të Kosovës është tentuar të vazhdoj sërish, mirëpo e njëjta nuk ka vazhduar për arsye se nga deputet të caktuar janë hedhur edhe dy mjete të dyshuara si gaz lotsjellës, si dhe janë hedhur shishe të ujit drejt Kryesisë së Kuvendit.

Referuar vendimit të Kryesisë së Kuvendit dhe situatës së krijuar në sallën e Kuvendit, personeli i sigurimit ka vazhduar qëndrimin e tyre në formë të kordonit të sigurisë, deri në vendimin për largim nga salla i cili ka ndodhur pak minuta pas orës 01:00 të datës 24.10.2015.

Me vendimin e radhës së Kryesisë së Kuvendit të Kosovës, personeli i sigurimit policor është kërkuar të ofrojë siguri të mjaftueshme për mbarëvajtjen e pa penguar të seancës së Kuvendit të Kosovës e cila është zhvilluar në një sallë tjetër të Kuvendit.

Personeli i sigurimit policor konform kërkesës dhe vendimit në fjalë ka ofruar siguri të plotë, duke mundësuar mbarëvajtjen pa pengesa të seancës së mbajtur në sallën e caktuar deri në përfundimin e saj.

Si pasojë e të gjitha zhvillimeve të dhunshme të protestuesve, të cilët po thuajse gjatë gjithë kohës kanë hedhur mjete të ndryshme drejt objektit të Kuvendit të Kosovës, duke përfshirë mjete piroteknike, fishekzjarre, boca me ngjyrë e tym, boca me zjarr, mjete të forta gur masiv dhe koktej molotovi, njësitet policore ishin detyruar të intervenojnë për të shpërndarë turmën deri në lokacione të caktuara, me qëllim të ruajtjes së rendit dhe sigurisë publike, si dhe ruajtjes së pronës publike dhe asaj private.

Disa protestues të dhunshëm gjatë lëvizjes dhe shpërndarjes së tyre, në disa rrugë kanë vendosur pengesa të ndryshme dhe kontejnerë për të penguar qarkullimin dhe lëvizjen e lirë të komunikacionit rrugor.

Njësitet policore gjatë veprimeve të tyre kanë arrestuar dhjetë (10) protestues të dhunshëm të cilët janë shoqëruar në stacion policor për intervistim dhe procedura të mëtutjeshme ligjore.

Po ashtu si pasojë e dhunës së shprehur nga disa protestues është lënduar një (1) zyrtar policor i cili ka kërkuar ndihmë mjekësore.

Policia e Kosovës ka arritur ta vejë situatën nën kontrolle dhe tani ajo konsiderohet të jetë e qetë dhe stabile.

Policia e Kosovës mbetet e përkushtuar në realizimin e detyrave dhe obligimeve të saja ligjore, me qëllim të ruajtjes së rendit dhe sigurisë publike, ruajtjes së pronës publike dhe asaj private si dhe krijimit të lirisë së lëvizjes së lirë për të gjithë qytetarët.

Nënkryetari i Lidhjes Demokratike të Kosovës, Haki Rugova ka qenë i vetmi nga LDK-ja që ka folur për mediat në këtë mëngjes rreth zhvillimeve të mbrëmshme në Kuvendin e Kosovës.

Në një bisedë për emisionin “Alo Mirëmëngjesi” të Radio Dukagjinit, Haki Rugova ka ftuar opozitën t’i kthehet punës në Kuvend duke shfrytëzuar mjetet demokratike për arritjen e qëllimeve të veta, e jo dhunën.

“Ata duhet të kthehen në punën e Parlamentit dhe me forma demokratike t’i bllokojnë proceset. Pa hyrë në detajet e organizimit, ato që pamë mbrëmë janë skena të këqija. Nuk dua t’ua hedh fajin njërës apo palës tjetër, por, këtu po shihet qartë se opozita ka vetëm një qëllim – marrjen e pushtetit me dhunë”, ka thënë Rugova për Radio Dukagjinin.

Rugova ka shtuar se një tryezë pozitë – opozitë për LDK-në do ishte e mundur vetëm pa kushtet paraprake të opozitës, e që janë tërheqja e nënshkrimeve për Asociacionin dhe demarkacionin.