U2 kishte planifikuar të performonte në dy koncerte, në Bercy Arena në Paris, të shtunën dhe të dielën, ndërsa të gjithë anëtarët ishin duke bërë provat kur terroristët goditën kryeqytetin francez mbrëmjen e së premtes.

Rock bendi irlandez ndodhej më pak se 4 kilometra larg nga vendi i masakrës – Salla e Koncerteve “Bataclan”, ku nga sulmi i tmerrshëm mbeten rreth 100 veta të vdekur – të cilët kishin shkuar të kënaqeshin me muzikën rock të Eagles Of Death Metal.

“Ia dolëm që të largoheshim shpejt, pa na ndodhur gjë”, ka deklaruar Bono, në një intervistë për Radion RTÉ 2FM.

“Të gjithë u mblodhëm për të shikuar TV dhe si çdokush tjetër nuk e besonim atë që po ngjante”.

“Mendja së pari na shkon tek adhuruesit e Eagles Of Death Meta. Nëse e mendoni pak, shumica e viktimave të kësaj tragjedie janë adhurues të muzikës”.

“Kjo është goditja e parë në muzikë, në këtë farë lufte kundër terrorizmit. Është aq tronditëse”.

“Janë njerëzit tanë. Kam mundur të isha unë në atë mbrëmje muzike, ka mundur të jetë secili në atë vend”.

“Kjo është thellësisht shqetësuese. Nuk po më hiqet nga mendja”, ka thënë Bono.

Të dyja koncertet e planifikuara të U2 për këtë javë në Paris janë anuluar, për shkak të tragjedisë.

“Nuk është se ne hoqëm dorë. Por, thjesht, janë anuluar, ndershëm, për arsyet që janë tërësisht të kuptueshme”.

“Muzika është tejet e rëndësishme. Mendoj se U2 ka një rol për të luajtur dhe mezi pres që të kthehemi në Paris për të bërë muzikë. Këtë e ndjej edhe nga mesazhet që marrim nga adhuruesit e muzikës: këta njerëz nuk do të mund të na diktojnë jetën”.

“Pas 9/11, U2 luajti në Madison Square Garden. Përjetimi ishte i pabesueshëm. Ishim të mbërthyer nga ndjenja e fuqishme që thoshte – ne jemi këta që jemi, nuk do të mund të na ndryshoni. Nuk do të mund të na ktheni në urrejtës, e as nuk do të mund të na e përcaktoni se si do të jetojmë. Kjo ndjenjë ishte asokohe kur u kthyem në Madison Square Garden. Shpresoj që e tillë do të jetë edhe kur të kthehemi në Paris për muzikë në Bercy Arena”, ka thënë Bono.

U2 ka vizituar të shtunën “Bataclan”, për nderime, duke vendosur lule jashtë skenës ku kishte ndodhur sulmi që mbyti adhuruesit e muzikës dhe tronditi botën.

Poetja dhe botuesja e njohur, Flutura Açka, ka reaguar ndaj sulmeve terroriste në Paris. Përmes llogarisë së saj në Facebook ajo ka shkruar:

“Në mes të Parisit, dje, një të premte të zezë vriten dhjetra njerëz nga terrorizmi, në mes të Tiranes shiten libra si ky që po publikoj. Dhe prapë mbrëmë pati deklatata se sa shumë përpjekje paskemi bërë kundër Terrorizmit. Libra si ky shiten qete-qetë në panair, në shqip e pa taksë…
Ndërsa sa për skenat e mbrëmshme në Paris janë pershkruar gati besnikërisht nga parashikuesi ogurzi Michel Huellebecq te “Nënshtrimi”.
R.I.P. për francezët e thjeshtë që Zoti t’i pranojë, edhe pse i vranë në emër të tij, pa e pyetur”.

I cilësuar si ‘Profeti Ogurzi’ i letërsisë franceze, cilësime që nisën qysh me botimin e romanit “Platforma”, Houllebecq vazhdon ende të provokojë, siç bën edhe me dy veprat që po i prezantohen tani lexuesit shqiptar: “Nënshtrimi” dhe “thérrmijat elementare”. Profeti ogurzi i romanit “Platforma” paralajmëroi në epilogun e veprés së tij ankthin e një sulmi terrorist, i cili në fakt pak javë më vonë, më 11 shtatorit të vitit 2001, duke e ndryshuar përfundimisht konceptin mbi paqen, jo vetëm në Amerikë, por edhe në të gjithë botën. Qysh nga ajo kohë, Michel Houellebecq nuk ka reshtur së provokuari me veprën dhe me staturen e tij si shkrimtar, botën letrare dhe opinion publik.

Pas daljes së romanit “Platforma” në vititn 2001, Houellebecq u shpreh se Islami është ‘feja më budallaqe në botë’. Për këtë arsye, myslimanët e denoncuan dhe ai u detyrua t’i nënshtrohej një procesi gjyqësor, të cilin e fitoi, por duke i kushtuar atij largimin nga Franca.

Flutra Açka lindi në qytetin e Elbasanit, më 1966. Është poeteshë, shkrimtare dhe botuese shqiptare. Është diplomuar për Statistikë në Fakultetin e Ekonomisë në Universitetin e Tiranës më 1988 dhe për Gjuhë-Letërsi më 2001 në Universitetin e Elbasanit. /KultPlus.com