Instituti Demokratik i Kosovës ka vazhduar me aktivitetet avokuese për përmirësimin e indikatorëve të transparencës komunale. Tryeza me aktorët kyç në nivel komunal për të diskutuar transparencën komunale sot u mbajt në Komunën e Rahovecit dhe qëllim në vete kishte ndikimin në përmirësim të performancës komunale në katër shtyllat e vlerësimit.

Në fillim të këtij takimi nënkryetari i Komunës së Rahovecit, Xhemali Haxhimustafa, e theksoi rëndësinë e Transparometrit dhe e te gjitha indikatorëve e përdorur për vlerësimin e transparencës duke thënë se me pak përkushtim dhe angazhim nga ana e ekzekutivit dhe e kuvendit komunal mund të eliminohen edhe këto mungesa. Haxhimustafa vazhdo se ky nivel i ulet i transparencës sa ka rezultuar si pasojë e neglizhencës nga zyrtarët e komunës mirëpo ai u tregua i gatshëm për përmirësime.

Kryesuesi i Kuvendit te Komunës, Nehat Elshani, potencoi se edhe pse Kuvendi i Komunës së Rahovecit është vlerësuar si organi më transparent në krahasim me Kuvendet e Komunave të tjera të regjionit të Prizrenit, ka ende hapësirë për përmirësimin e disa indikatorëve. Elshani gjithashtu shtoi se është në interes të qytetarëve të bëhet publikimi i procesverbaleve, rregulloreve dhe i të gjitha vendimeve qe janë marrë në kuvend, ku ata mund të shohin se si përfaqësohen nga te zgjedhurit e tyre.

Lulzim Sylejmani, Drejtor i Financave, tha se ai është gjithmonë i gatshëm të ju përgjigjet kërkesave të qytetarëve dhe OJQ-ve sa i përket raporteve financiare dhe se plani i prokurimit është në përputhje me projektet që zhvillohen dhe ato duhet vetëm të publikohen në faqen zyrtare të Komunës. Sylejmani tha se ka çalime mirëpo të gjitha indikatorët të cilët mungojnë ne Komunën e Rahovecit duhet të merren më me seriozitet.

Florije Boshnjaku (AAK), anëtare e Kuvendit të Komunës, ka konsideruar si çështje shumë të rëndësishme mungesën e publikimit të planit të prokurimit, rregulloreve, vendimeve dhe statutit ne faqen zyrtare të Komunës. Ajo tha se në vend që këto dokumente të ruhen në arkiv ato nevojiten të publikohen në buletin apo gazetë zyrtare e cila do të mund të ju ofrohet edhe publikut.

Fatmir Iska (AAK), anëtarë i Kuvendit të Komunës, e shprehu pakënaqësinë e tij sa i përket nivelit të transparencës në Komunën e Rahovecit duke theksuar se gjatë seancave të mbajtura në Kuvendin e Komunës në shumicën e rasteve asamblistët nuk marrin përgjigje sa ju përket pyetjeve të parashtruara ekzekutivit të komunës, dhe raporti gjashtëmujor i punës nuk raportohet nga Kryetari i cili është shumë pak prezent ne mbledhjet asambleiste. Ai gjithashtu tha duhet inkurajohen qytetarët për të marrë pjesë në debate publike në mënyrë që të merren kërkesat dhe sugjerimet e tyre.

Ndërkaq, Komuna e Rahovecit gjatë periudhës janar-qershor 2015 është vlerësuar me mungesë të transparencës komunale duke arritur vetëm 40.3% të vlerësimit të përgjithshëm në katër shtyllat e vlerësimit: Zyra e Kryetarit, Kuvendi i Komunës, Financat Komunale dhe transparenca në Konsultime me Publikun (secila nga katër shtyllat përmban nga 11 indikator). /PrizrenPress.com

Organizata Jo-qeveritare “EC Ma Ndryshe” vlerëson se Raporti i Komisionit Evropian për Kosovën për vitin 2015 ka vënë në pah edhe njëherë nevojën që pushteti i nivelit lokal të rris transparencën në vendimmarrje, gjë që përputhet edhe me thirrjet e vazhdueshme të shoqërisë civile në Kosovë. Një tjetër çështje që përmendet në Raport, e ku po ashtu mund të tërhiqen paralelet me Komunat e Kosovës, ka të bëjë me pamjaftueshmërinë e transparencës buxhetore.

Në këtë Raport janë marrë parasysh përpjekjet e qeverisjes lokale në Kosovë për përmirësimin e kapaciteteve dhe vendimmarrjen në përputhje me Ligjin për Vetëqeverisje Lokale, por po ashtu është vënë në pah nevoja që Komunat e Kosovës të vazhdojnë angazhimet për rritjen e transparencës.

“Përpjekjet e qeverisjes lokale duhet të vazhdojnë për rritjen e transparencës në vendimmarrje dhe fuqizimin e rolit mbikëqyrës të Kuvendeve të Komunave”, thuhet në Raport.

Ndërkohë Raporti në pjesën ku përshkruan zhvillimet në menaxhimin e financave publike në Kosovë thekson se “transparenca buxhetore është e pamjaftueshme”, gjë që vlen edhe për Komunat e Kosovës.

“Në veçanti, informatat mbi buxhetin duhet të jenë më të besueshme dhe më të hollësishme për të fuqizuar llogaridhënien. Prezantimi i informatave kryesore buxhetore në mënyrë të qasshme do të krijojë besim te publiku dhe do të kontribuoj në përmirësimin e marrëdhënieve qytetar-shtet”, thuhet në Raport.

Shqetësimet lidhur me çështjet e lartpërmendura janë ngritur shpeshherë nga “EC Ma Ndryshe”.

“Prandaj, konstatimet e Raportit të Komisionit Evropian duhet të kuptohen drejtë nga Komunat e Kosovës, të cilat duhet të marrin veprime të menjëhershme për rritjen e transparencës në vendimmarrje dhe menaxhim të buxhetit, si dhe të mundësojnë mbikëqyrje më efektive nga Kuvendet e Komunave. Njëkohësisht i bëjmë thirrje edhe ministrive të linjës në Qeverinë e Kosovës që të ndërmarrin veprime të duhura në mënyrë që të kemi përmirësimin thelbësor në transparencën e nivelit komunal”, thuhet në komunikaten e OJQ-së “EC Ma Ndryshe”. /PrizrenPress.com

Analistët propozojnë reforma në diplomacinë kosovare, një ristrukturim të tërësishëm të Ministrisë së Punëve të Jashtme dhe rrjetin diplomatik të Kosovës

Fakti që disa shtete, që e kanë njohur shtetin e Kosovës, iu bashkuan të hënën abstenimit për anëtarësimin në UNESCO, nga njohësit e politikës kosovare interpretohet si një fiasko e diplomacisë joprofesionale kosovare. Sipas tyre, ka një zhgënjim dhe rënie të entuziazmit të disa shteteve, në raport me procesin e deritashëm të shtetndërtimit jo të mirë, prandaj nevojitet reformë e shërbimit të jashtëm.

“Nëse 15 shtete, që e kanë njohur pavarësinë e Kosovës, nuk e kanë përkrahur anëtarësimin në UNESCO, kjo duhet të jetë shqetësuese për të gjithë në Kosovë, jo vetëm për politikanët, intelektualët, shoqërinë civile etj. Në shtetet ku Kosova ka ambasadorë (si Japonia), apo ku mbulohet me ambasador si Koreja e Jugut, Polonia, Egjipti etj., gjithë stafi diplomatik që kanë hëngër bukë badihava gjithë këto vite duhet të shkarkohet urgjentisht”, tha analisti politik Nexhmedin Spahiu për “Kosova Sot”.