Kryeministri i Kosovës, Isa Mustafa, ka deklaruar se nuk ka krizë institucionale dhe se opozita duhet të tërhiqet nga veprimet e bllokimit të Kuvendit të Kosovës.

“As nuk mund të ketë e as nuk ka krizë institucionale. Unë mendoj që opozita duhet të tërhiqet nga këto veprime dhe të hapim debatin në Kuvend. Me argumente të flasim me opozitën, por kurrsesi të vëmë kushte. Kemi përkrahjen e plotë të qendrave të botës dhe ata vlerësojnë se këto janë në dobi të Kosovës dhe integrimeve të vendit. Kjo është as me pak as me shumë se sa implementim i marrëveshjes së parë dhe nuk del jashtë kornizave të saj për themelimin e Asociacionit. Sepse po zbatoj ligjin si kryeministër i cili është miratuar kur është ratifikuar marrëveshja e 19 prillit 2013”, ka thënë ai.

Në vitin 2015, nuk është shënuar asnjë rast me infeksion nga EHKK.

Edhe pse Komuna e Malishevës, në të kaluarën, ishte njëra vatrave endemike më të rrezikuara nga virusi i Etheve Hemorragjike Krime Kongo (EHKK), në këto dy vite, duket që ky rrezik është larguar, pasi nuk janë shënuar raste të vdekjeve nga ky virus. Madje në vitin 2015, nuk është shënuar asnjë rast me infeksion nga EHKK. Për këtë qëllim, drejtori i Drejtorisë Komunale për Shëndetësi dhe Mirëqenie Sociale, Hajdin Berisha, sot i ka falënderuar të gjithë ata që kanë qenë të inkuadruar në luftimin dhe parandalimin e EHKK.

“Jam mëse i lumtur për përfundimin e suksesshëm edhe të një sezone aspak të lehtë në raport me EHKK. Tani, kur edhe zyrtarisht ka përfunduar edhe periudha e raportimit për pickimet nga rriqrat, po e ndiej obligim që nga zemra të i falënderoj të gjithë ata që ishin të inkuadruar në procesin e parandalimit dhe luftimit të EHKK”, thuhet në një letër falënderimi, të drejtorit Berisha, dërguar në adresë të të gjitha institucioneve, që kanë qenë të inkuadruar në këtë proces.

“Viti 2013, ishte i tmerrshëm për popullatën e Komunës së Malishevës, ku gjashtë qytetarë kanë përfunduar me fatalitet, ndërsa pozitiv në virusin e EHKK, ishin tetëmbëdhjetë. Një vit më vonë, pra me 2014, është arritur pas aktiviteteve të shumta, fillimisht të zvogëlohet numri i pickimeve, të zvogëlohet numri i të infektuarve nga virusi i EHKK, ndërsa numri i të vdekurve nga virusi i EHKK, të bie në zero. Po ashtu edhe në vitin aktual, pra në 2015, aktivitetet nuk kanë rreshtur në drejtim të parandalimit dhe luftimit të EHKK, është zvogëluar numri i të pickuarve përreth pesëdhjetë për qind, nuk ka pasur asnjë me infeksion dhe logjikisht asnjë që ka përfunduar me fatalitet nga kjo sëmundje vrastare. I falënderohem, zotit dhe atyre që na besuan këtë mision, dhe për dy vite rresht dolëm së bashku faqebardhë. Uroj për suksese të mëtejme”, thuhet në këtë letër.

Përndryshe, bazuar në raportet nga qendrat shëndetësore në Komunën e Malishevës, numri i të thumbuarve nga rriqrat, në vitin 2015, ka qenë 1424 raste dhe asnjë rast i infektuar me EHKK. Gjatë këtyre dy viteve, Komuna e Malishevës, në bashkëpunim me të gjitha institucionet tjera përgjegjëse, ka vazhduar aktivitetet e saj dhe kanë zbatuar në përpikëri strategjinë kombëtare për luftimin dhe parandalimin e EHKK, strategji e cila, deri më tani ka dalë të jetë e suksesshme.

Monitoruesi i punës së Kuvendit të Kosovës nga Instituti Demokratik i Kosovës, Driton Selmanaj, ka thënë se qasja e opozitës për ta bllokuar Kuvendin është e papranueshme dhe nuk duhet të vazhdojë.

Në këtë intervistë për “Epokën e re” ai ka thënë se në asnjë variant bllokimi i jetës parlamentare nuk është zgjidhje.

“Qasja e bllokimit të organit më të lartë legjislativ është e papranueshme. Qasja bllokuese nuk është zgjidhje, por ajo duhet të zëvendësohet me debat në Kuvend si dhe me dialog në mes të subjekteve politike në mënyrë që të gjendet një zgjidhje, e jo të zgjidhet bllokimi si formë e reagimit politik”, ka deklaruar Selmanaj, duke shtuar se bllokimi nuk është formë e ardhjes në pushtet.

“Tendencat për të ardhur në pushtet janë legjitime, por duhet garë lojale dhe qasje e përgjithshme publike dhe politike. Më pas duhen gjetur format se si mund të vihet në pushtet, por jo duke bllokuar jetën institucionale”, është shprehur ai.
Selmanaj e ka vlerësuar të nevojshëm ndërhyrjen e presidentes Jahjaga nëpërmjet thirrjes së një takimi në mes të liderëve të subjekteve politike parlamentare për të gjetur zgjidhje.
“Presidentja ka mandat ta garantojë funksionimin kushtetues të institucioneve. Në këtë drejtim ajo duhet të kujdeset edhe për jetën parlamentare. Dhe nëse dikush duhet të ndërhyjë, mendoj se është në mandatin e presidentes t’i ftojë liderët e partive parlamentare të diskutojnë për format e mundshme për t’u tejkaluar kjo situatë”, ka theksuar ai. Sipas Selmanajt, faktori ndërkombëtar nuk duhet të ndërhyjë sepse drejtuesit e institucioneve dhe subjekteve parlamentare duhet të tregojnë maturi dhe pjekuri politike.

“E kaluara ka treguar se vetëm intervenimi nga jashtë u ka dhënë zgjidhje situatave. Mund të ndodhë edhe tani, por uroj të mos ndodhë, sepse njëherë e përgjithmonë duhet të dëshmojmë se kemi arritur pjekuri politike që problemet eventuale politike t’i zgjedhim vetë, e jo të kërkojmë ndihmë nga të tjerët”, ka deklaruar Selmanaj, duke shtuar se as zgjedhjet e parakohshme nuk janë zgjidhje.