Xhevdet Qeriqi, i cili është edhe kryetar i Këshillit për Mbrojtjen e Luftëtarëve të UÇK-së, ka thënë se në listat e veteranëve të UÇK-së, ka emra edhe të atyre që kanë qenë anëtarë të UDB-së.

Qeriqi, në një intervistë për Klan Kosova, ka thënë se në këto lista që tashmë kanë nisur të publikohen nga komisioni qeveritarë, janë qindra ose mijëra persona që nuk kanë qenë fare në luftë.

“Kam pasur biseda me komandant të zonave dhe me zinxhirin komandues, dhe ky proces ka mund të kryhet për 60 ditë. Secili prej komandantëve ka pasur listat e ushtarëve të tyre dhe e dimë që tashmë janë fryrë listat dhe brenda këtyre listave ka njerëz që nuk kanë qenë fare në luftë. Ka edhe njerëz që kanë qenë të angazhuar edhe në UDB. Është numri i madh i atyre që nuk kanë qenë në luftë dhe janë pjesë e listave. Janë qindra, e duke e parë se si po shkon procesi i konfigurimit ky numër do të shkojë deri në mijëra”, ka thënë Qeriqi.

Ai ka kërkuar nga institucionet e drejtësisë që të ndërhyjnë në këtë proces dhe të shohin problemet brenda, sepse sipas tij po dëmtohen veteranët por edhe buxheti i Kosovës.

Kur ka folur për dëmtimin e buxhetit, Qeriqi mbështetët në krijimin e Komisionit për Verifikim, i cili sipas tij e ka zvarritur këtë proces me qëllim vetëm për të marrë rroga.

Në këtë intervistë Qeriqi ka folur edhe për protestën e sotme të organizuar nga vet ai dhe Këshilli për Mbrojtjen e Luftëtarëve të UÇK-së. Ai, tha se kjo protestë do të jetë e qetë dhe pret pjesëmarrës të shumtë.

Qeriqi tha se ky është edhe paralajmërimi i fundit për një protestë të qetë, ndryshe nëse nuk publikohen të gjitha listat për protestën e ardhshme Qeriqi thotë se nuk do mbajë përgjegjësi.

“Ne jemi munduar disa herë që të zgjidhim problemin e veteraneve të luftës përmes dialogut por asnjëherë nuk kemi arritur. Kemi marrë vendim si kryesi e Këshillit që sot duke filluar prej orës 12:00 që të protestojmë. Në protestën e ardhshme situata do eskaloj. Ka shumë veteranë që janë në gjendje të rëndë dhe me trauma. Ka shumë prej atyre që kanë bërë vetëvrasje dhe shumë prej tyre që tashmë kanë kaluar në Hungari”, tha Qeriqi.

Gjykata Speciale për krimet e dyshuara të luftës së UÇK-së që brenda pak javësh do të jetë për votim para ligjvënësve kosovarë, pritet t’i kthejë në sallë deputetët e Listës Serbe.

Por, jo vetëm kaq, mendohet se deputetët serbë jo vetëm që do të kthehen në Parlamentin e Kosovës për ta votuar me të “dyja duart” themelimin e Gjykatës Speciale, por paraprakisht do të bëjnë “pazar” në favor të tyre me partnerët e koalicionit qeverisës PDK-LDK.

Zyrtarë të Qeverisë së Kosovës përjashtojnë çdo mundësi se do të arrihet ndonjë kompromis me Listën Serbe për kthimin e tyre në institucionet e shtetit të Kosovës.

Zëdhënësi i Qeverisë, Arban Abrashi, ka deklaruar për gazetën “Zëri” se janë në diskutime të vazhdueshme me përfaqësuesit e Listës Serbe për kthimin e tyre në institucione.

Presidentja e Kosovës, Atifete Jahjaga, ka afat edhe të mërkurën (sot) për të dekretuar Kryeprokurorin e Shtetit. Me Rregulloren për procedurën e emërimit/riemërimit të kandidatëve të propozuar për prokurorë, të nxjerrë nga sekretari i Zyrës së Presidencës në vitin 2011, përgatitja e dekretit parashihet të bëhet brenda 15 ditësh prej momentit që Këshilli Prokurorial i Kosovës (KPK) e dërgon kandidatin për dekretim, shkruan Koha Ditore.

Megjithatë, zyrtarë nga Presidentja, në bazë të përgjigjes që ia kanë dhënë “Kohës Ditore” kanë lënë të kuptojnë se nuk do ta përfillin këtë rregullore të nxjerrë nga po ky institucion, porse do ta respektojnë Kushtetutën e Kosovës dhe ligjet në fuqi.

Ndryshe prej tyre, anëtarë të KPK-së kanë thënë se për këtë rregullore nuk kanë dëgjuar më parë dhe se presidentja Jahjaga, sipas tyre, duhet ta respektojë.

Lideri i ri i “Vetëvendosje”, Visar Ymeri, rikonfirmon kundërshtimin e këtij subjekti ndaj Gjykatës Speciale, e cila, sipas tij, shkel mbi parimet bazë të Shtetit të Kosovës.

Në intervistën dhënë “Zërit”, Ymeri nuk i përjashton edhe protestat si mundësi për kundërshtimin e këtij mekanizmi që në “target” ka UÇK-në.

Nëse nuk kalon në Kuvendin e Kosovës, Gjykata Speciale, sipas tij, nuk mund të formohet në Organizatën e Kombeve të Bashkuara (OKB), pasi që OKB-ja nuk ka mandat për të formuar një gjykatë të këtij lloji.

Kryetari i porsazgjedhur i LVV-së është optimist se nën drejtimin e tij “Vetëvendosja” do të forcohet edhe më shumë, duke u profilizuar si subjekti kryesor në spektrin e politikës kosovare.

Për lajmin se PDK dhe EULEX-i i kanë përgatitur denigrimin dhe akuzat ndaj kryetarit të Nismës për Kosovën, Fatmir Limaj, u shpreh edhe deputeti Zafir Berisha.

Në emisionin “Rrokum Roll” me Fidan Jupollin në Rrokum TV, ai tha se në vitin 2010, kur ishte larguar nga PDK, EULEX-i bashkë me partinë e Hashim Thaçit, i kanë intervistuar ish-ushtarët që kanë qenë nën komandën e tij, gjatë luftës së fundit në Kosovë.

“Këto janë metoda shantazhuese dhe denigruese janë për krejt ata anëtarë që largohen nga PDK. Për rastin e Limajt gjithmonë kam besuar se është dosje e përgatitur. Asnjëherë nuk kam dyshuar se Limaj ka bërë diçka”, ka thënë Berisha.

Kryetari i Nisma për Kosovën Fatmir Limaj thotë se Hashim Thaçi në kohën kur ishte Kryeministër i kishte dhënë atij sms’të e montuara. Tha se 15 vjet pas luftës asnjë ministër ose ish-ministër tjetër përveç tij nuk është nën hetime, dhe për këtë ai është shprehur i habitur.

Duke folur për çështjen e sms-ve për rastin e MTPT’së, Fatmir Limaj ka thënë se ish-kryeministri Hashim Thaçi, ia ka dhënë sms-të, për të cilët Limaj thotë se janë të montuar.

“Kam kërkuar që z.Thaçi të vjen dhe të sqarohet sepse unë i kamë thanë Prokurorit. Kur më ka thirrë mu Prokurori: Kush t’i ka dhanë sms’të unë i kam thanë z.Thaçi. Dhe natyrshëm duhet me ardhe ai atje edhe me thanë se po, i kom dhanë sms’të”, tha Limaj në ‘Click’ në RTV 21.

Limaj tha se sms’të janë të montuara dhe se Thaçi si Kryeministër në atë kohë, duhet të tregoj arsyet e një veprimi të tillë.

“Kryeministri i vendit mi ka dhanë në dorë sms’të e montuara. Ai mi ka dhanë sms’të, ai mi ka dhanë emrat e atyre të cilët i kanë sjellë ata sms dhe ajo duhet me u folë në Gjykatë sepse sms’të janë të montuara”, tha ai.

Fatmir Limaj thotë se vazhdon të besoj në drejtësi, pavarësisht se në media kanë qarkulluar lajme se zyrtarë të PDK’së në bashkëpunim me EULEX’in, kishin tentuar të dënonin atë. Thotë se që nga fillimi i proceseve gjyqësore ndaj tij është parë se ‘diçka nuk ishte në rregull’ derisa beson se ajo që u publikua në media ishte vetëm ‘një pjesë’ e asaj që ka ndodhur në të vërtetë.

Limaj tha se pas publikimit të artikullit, Presidentja është dashur të reagonte.

“Ne nuk kemi kërku asgjë nga Presidentja përveçse Presidentja është dashtë të reagoj vetëse këtu në esencë kemi shkelje të të drejtave, që Presidentja e Republikës së Kosovës është garantuese, mbrojtëse e kushtetueshmërisë në këtë vend”, tha Limaj në ‘Click’ në RTV 21.

Ndërkaq, tha se i duket ‘interesante’ heshtja e PDK’së lidhur me këtë çështje. Tha se anëtar të Kryesisë së PDK’së i kanë telefonuar për këtë çështje.

“Mos reagimi i Partisë Demokratike, është kjo është për mu shumë interesante”, tha Limaj.

Tha se kishte sinjale edhe më parë se në gjykimet ndaj tij, nuk ishte gjithçka siç duhej.

Eshref Shemallari, që ka pranuar se ka kryer vrasjen e trefishtë të dielën në Prizren, ka deklaruar në polici se këtë akt e ka bërë në shenjë hakmarrje për rrahjet dhe poshtërimet që ia kanë bërë viktimat e krimit.

Ai ndërkaq ka mohuar që djali i tij, Ejup Shemallari të jetë përzier në këtë punë, pos që ka qenë në shoqërimin e tij në momentin kritik. “Djali nuk ka qëlluar dhe qëndron në arrati për shkaqe sigurie”, ka thënë ai gjatë deklarimit në polici, në praninë edhe të avokatit mbrojtës. Sipas tij edhe djali do të dorëzohet së shpejti, shkruan Zëri.

Gjatë paraditës dorasi është dorëzuar në Stacionin Policor në Prishtinë.

Drejtori i Policisë për rajonin e Prizrenit, Nexhmi Krasniqi ka thënë për “Zërin” se gjatë deklarimit dorasi ka pranuar se e tëra ka ndodhur për shkak të hakmarrjes, pasi sipas tijviktimat Ferdi Shishko, Haki Thaçi dhe Bilgin Ersoji e kishin rrahur e therë atë dhe e kishin rrahur edhe djalin e tij.

Nënkoloneli Krasniqi, tha se dorasi ka dorëzuar vetëm pistoletën me të cilën ka kryer krimin, ndërsa jo edhe kallashnikovin, të cilin ka deklarar se e ka fshehur në pjesën e “Marashit” në periferi të Prizrenit, por që kjo armë nuk është gjetur aty ku kishte deklaruar se e ka lënë ai, transmeton Zeri.info.

Sipas policisë, Shemallari sot nuk ka dalur edhe para Prokurorit, ndërsa i është caktuar masa fillestare e parabrgimit prej 48 orësh.