Lëvizja Vetëvendosje ka vazhduar edhe sot aksionet kundër Qeverisë së Kosovës për shkak të marrëveshjes për Asociacionin e komunave me shumicë serbe.

Aktivistë të kësaj lëvizje, ua kanë shfryer gomat e dhjetëra veturave të Qeverisë së Kosovës.

“Sot rreth orës 11:20, dhjetëra vetura të Qeverisë së Kosovës u defunksionalizuan nga aktivistët e Vetëvendosje!-s, duke ua shfryrë gomat. Policia e Kosovës intervenoi me njësitet e saj speciale duke rrahur, lënduar dhe arrestuar aktivistët”, është thënë në njoftimin e VV-së.

Pas këtij aksioni Vetëvendosjes ka bërë me dije se Policia e Kosovës ka arrestuar disa aktivistë të kësaj lëvizje.

“Disa nga aktivistët e arrestuar janë: Gëzon Kastrati, Alban Makolli, Daut Halili, Armend Krasniqi, Vllaznim Krasniqi, Muhamet Merofci, Erden Atiq, Imer Fejza, Uran Hasani, Teuta Hasani, Muhamet Bytyqi, Fatos Sahiti, Kastriot Gërbeshi, Gurjeta Zeka, etj. Disa nga aktivistët e lënduar janë Albana Gashi, Etleva Malushaj, Margaritë Hajrizi, Valon Simnica, etj. Policia është duke përndjekur aktivistët e Lëvizjes nëpër qytet dhe po i arreston e rrah ata kudo që po i takon”, është thënë në njoftimin e VV-së.

Sipas Vetëvendosje-s pushtetarët duan ta defunskionalizojnë shtetin e Kosovës, ndërsa kjo lëvizje ka duan ta defunksionalizojnë qarkullimin e veturave të qeverisë së Isa Mustafë.

“Mustafa po e përdorë për ta jetësuar ‘Zajednicën’, me gjithë dëmet e rreziqet e saj për shtetin e Kosovës. Mustafa e ka vënë gjithë sistemin shtetëror në funksion të ‘Zajednicës’. Edhe policia e gjyqësia janë bërë jashtëzakonisht efektive kur vije puna t’i arrestojnë dhe dënojnë kundërshtarët e këtij projekti. Kosova po rrezikohet nga funksionimi i kësaj qeverie. Këto rreziqe katastrofike ne na bëjnë të lëvizim. Zajednica’ duhet të ndalohet”, është thënë në njoftimin e Lëvizjes Vetëvendosje. /PrizrenPress.com/

Ministri i Punës dhe Mirëqenies Sociale, Arban Abrashi, ka pritur sot në takim drejtorin e Zyrës të Kategorive të Dala nga Lufta, pranë Zyrës së Kryeministrit të Kosovës, Faik Fazliun.

Abrashi dhe Fazliu në këtë takim kanë diskutuar për udhëzimin administrativ që rregullon procedurat e aplikimit në skemën e pensioneve dhe beneficioneve të përcaktuara me Ligjin për Statusin dhe të Drejtat e Dëshmorëve, Invalidëve, Veteranëve, Pjesëtarëve të Ushtrisë Çlirimtare të Kosovës, Viktimave Civile dhe Familjeve të tyre. Udhëzimi administrativ, tanimë është në diskutim paraprak dhe publik dhe duke u bazuar në rregullat procedurale, gjatë javës së ardhshme do të finalizohet.

Ministri Abrashi dhe Fazliu kanë diskutuar edhe për një sensibilizim më të madh të këtij procesi, pasi që gjatë muajit shtator do të përfundojnë të gjitha procedurat dhe rrjedhimisht hapet rruga për jetësimin e ligjit. /PrizrenPress.com/

Marrëveshjet e arritura në Bruksel për çështjen e Asociacionit të Komunave me shumicë serbe, por edhe Marrëveshja për Demarkacionin e Kufirit me Malin e Zi, pritet të ngjallin debat të ashpër dhe të përplasë Qeverinë dhe opozitën qysh në seancën e parë të Kuvendit të Kosovës, që pritet të nisë në sesionin vjeshtor më 17 shtator.

Kryesia e Kuvendit të Kosovës pas më shumë se një muaji e gjysmë pritet t’i kthehet punës më 14 shtator, derisa ditë “të nxehta” pritet të jenë për legjislativin qysh në seancën e parë. Opozita i ka dërguar “selam” partnerëve të koalicionit qeverisës se tash e tutje do ta ndërrojë qasjen dhe se do të kërkojë llogari sa i takon marrëveshjeve të arritura në Bruksel në mes Kosovës dhe Serbisë për Asociacionin e Komunave me shumicë serbe, por edhe për Demarkacionin e Kufirit me Malin e Zi.

Por në anën tjetër është Qeveria ajo, e cila zotohet se kryeministri, Isa Mustafa, do të japë një informatë lidhur me marrëveshjet e arritura në Bruksel me të filluar punën legjislativi.

Valon Murtezaj, këshilltar për Marrëdhënie me Jashtë i kryeministrit Mustafa, ka deklaruar për “Zërin” se shefi i tij Mustafa qysh në seancën e parë të Parlamentit do të japë një informatë në lidhje me katër marrëveshjet e arritura si për Asociacionin, po ashtu edhe për heqjen e barrikadës tek lumi Ibër, Energjinë e Telekomunikacionin. Sipas tij, të gjithë deputetët e Kuvendit do të kenë mundësinë që të zhvillojnë debat parlamentar dhe të marrin njoftime të detajuara sa i takon marrëveshjeve që janë arritur. /Zëri/

Analisti politik, Astrit Gashi, në emisionin Zona e Debatit në Klan Kosova ku u diskutua për paralajmërimet e protestave kundër qeveritare që po bën vazhdimisht opozita, ka thënë se ekzekutivi aktual nuk ka një plan të veprimit si dhe se kryeministri Isa Mustafa dhe partia që drejton kanë hyrë në qeveri pa një vizion të qartë,

“Në 12 vjet e fundit kjo është qeveria e vetme që nuk ka orientim, Misioni për të cilën është formuar kjo qeveri – Gjykata Speciale dhe dialogu me Serbinë – po shkon drejt fundit”.

“Kjo qeveri nuk ka plan program. Mustafa edhe LDK-ja kanë hyrë në qeverisje si “pula pa kokë” dhe nuk kanë treguar rezultate”.

“Rrëzimi i qeverisë nuk do të duhej të ishte kauzë e protestave të opozitës. Është e vështirë që nga ajo që po thotë opozita të saktësohet kauza që ky bllok ka”, tha Gashi.