Eshref Shemollari dhe djali i tij Ejupi, sipas dyshimeve të policisë, i kanë vrarë dje në qendër të Prizrenit: Ferdi Shishkon, Haki Thaqin dhe Bilgin Ersojin. Ja pse ata vendosën që ta kryenin ketë krim.

Në fund të vitit 2013, saktësisht në dhjetor, thonë burimet e Gazetës, tre personat e vrarë, Shishko, Thaqi dhe Ersoji, e kishin rrahur deri në alivanosje Ejup Shemollarin.

“Ata përveçse e kishin rrahur rëndë, ia kishin ngulur edhe një thikë në shpinë. Ishte dërguar në spital në gjendje kritike”, tregojnë burimet e Gazetës Express brenda policisë së Prizrenit.

Prej asaj kohe Shemollarët, sipas burimeve të gazetës, kishin qenë në cak të provokimeve.

“Edhe para dhjetë ditësh Ejupin e kishin rrahur, në prani të një vajze”, i kanë thënë Gazetës Express, disa burime. Policia thotë se kjo rrahja e fundit nuk ishte regjistruar fare në organet policore.

Pastaj, mëson Gazeta, dje, dikush prej të vrarëve e kishte ftuar për ta takuar njërin prej dy Shemollarëve. Sipas hetimeve policore, në ‘këtë takim’, ata që dyshohet të jenë vrasësit, nuk kishin dalë të papërgatitur.

“Babë e bir dyshohet se kanë shtënë në të tri viktimat”, mëson Express, prej burimeve në polici. Mediat tjera kanë raportuar se viktimat e djeshme kanë qenë të njohura për organet e rendit edhe për shumë raste tjera penale. Ata në shumë raste kanë qenë të paraburgosur.

Lexo më shumë në: http://www.gazetaexpress.com/lajme/babe-e-bire-i-vrane-tre-personat-ne-prizren-85718/?utm_source=referral&utm_medium=web&utm_campaign=copyright

Një biznesmen nga Prizreni ka denoncuar në polici rastin e mashtrimit që i është bërë nga një person i panjohur. Sipas dëshmisë së deponuar në hetuesi, thuhet se i njëjti, ditë më parë kishte pranuar një “email” në adresën e tij nga një firmë hungareze me të cilën kishte bashkëpunuar vite me parë.

Nga biznesmeni prizrenas kërkohej që 33 000 euro të derdhen në një xhiro llogari bankare në emër të firmës në Hungari. Mirëpo më vonë ishte kontaktuar firma hungareze e cila kishte sqaruar se xhiro llogaria në të cilën është bërë pagesa nuk është e tyre.

Pas denoncimit të rastit në polici nga viktima, është njoftuar prokurori i shtetit i cili ka udhëzuar policinë që rasti të konsiderohet si mashtrim, njofton zëdhënësi i policisë rajonale në Prizren.

Drejtori i Spitalit Rajonal të Prizrenit, Dr. Afrim Avdaj, më datën 02.03.2015, ka mbrojtur me sukses diszertacionin e Doktoraturës, para jurisë së ngritur pranë Fakultetit të Mjekësisë në Tiranë, dhe ka marrë gradën shkencore “DOKTOR SHKENCE” në fushën Kirurgji e Përgjithshme.

Mbrojtja e dizertacionit të doktoratuës me temë “Trajtimi i sëmundjeve ulçeroze gastrodueodenale të perforuar “ është kurorizim i një pune gjashtë vjeçare të identifikimeve, hospitalizimeve, trajtimeve, intervenimeve kirurgjike, analizave, hulmtimeve, krahasimeve dhe rezultateve të krahinës së Dukagjinit. Punimi është vlerësuar lartë nga Komisioni i Fakultetit të Mjekësisë në Tiranë,i përbërë nga emrat më të njohur të kirurgjisë shqiptare.

“Kandidati Afrim Avdaj mbrojti në mënyrë të shkëlqyeshme disertacionin e doktoraturës dhe fitoi të drejtën e gradës shkencore “Doktor i shkencave” në fushën e Kirurgjisë së Përgjhithsme”, – thuhet në vendimin e komsionit 5 anëtarësh me kryetar Prof. Dr. Mustafa Xhani.

Gradimi i Dr. Afrim Avdaj , në gradën më të lartë shkencore në fushën e Kirurgjisë së përgjithshme, është një sukses dhe e arritur e madhe për mjekësinë dhe qytetarët në përgjithësi, ndërsa Spitali Rajonal i Prizrenit fitoi një kuadër, të munguar deri më tani, me titullin më të lartë shkencor “Doktor i shkencave” në fushën e Kirurgjisë së Përgjithshme.

Gazetari Rami Berisha ka pranuar se betejën për skandalet në arsim e ka nisur për të mbrojtur familjen e tij. Ai thotë ju ka përgjigjur edhe Sekretarit të PDK-së në Prizren, Nijazi Kryeziut.

Postimi i plotë dhe pa ndërhyrje në Facebook
Në kronikën e Televizionit “Besa” pas protestës së 7 marsit, sekretari I Degës së PDK-së e quan betejën time personale. I them publikisht, jam krenar që këtë betejë e kam nisur duke e mbrojtur familjen time. Ja cili është rasti i vajzës së vëllait tim…

Rreth një muaj më përpara, se të ndodh kjo që po ndodh, vajza e vëllait tim pranohet në një konkurs të rregullt, me dokumente të rregullta, adekuate për vendin e punës, me diplomë të Universitetit Publik të Kosovës në një konkurs që hapet për ta zëvendësuar një mësuese lehonë. Unë asnjë detaj nuk e kam ditur rreth punësimit të saj, vetëm se kur kam marr vesh se është punësuar jam gëzuar, sepse familja e vëllait nuk e ka asnjë të punësuar. Pas një muaji, ndonjë ditë më shumë, një mësues I po të njëjtës shkollë e fiton me konkurs vendin e punës në një shkollë në Prizren dhe në shkollën ku punon vajza e vëllait tim, për profilin e saj hapet një vend i përhershëm pune.

Ende pa u shpallur konkursi vajza e vëllait e merr vesh (athua si) se ajo nuk do të pranohet në këte vend pune, dhe duke mos e pas ndonjë njeri të “fuqishëm në familje” vjen te unë dhe më lut të intersohem çka po ndodh. Në aktivitetin e Drejtorisë së së turizmit bashkë me një kolegë e njoftoj drejtorin e DKA-së për rastin. Ainë fillimet e kësaj beteje më qetëson duke thënë se është i paarsyeshëm shqetësimi i vajzës së vëllait tim, dhe më thotë le të konkuron…ndërsa për rastin e Shollës “Mati Logoreci” e pranon se është punë e krye

Vajza e vëllait insistonte se punësimi në atë vend pune ku edhe ajo kish konkurruar ishte punë e kryer dhe në kohën kur askush nuk e dinte kush është punësuar në atë vend pune, i shkruaj sms drejtorit të Arsimit. I shkruaj “ A s’munde asgjë me ba për vajzën e vëllait tim…” e pranoj duke i kërkuar edhe nder si miq që ishim, sepse nëse vajza e vëllait tim një muaj më përpara, para të njëjtit komision e fitoi vendin e punës, logjikisht (jo e domosdoshme) do të duhej ta fitonte atë vend të punës. Përgjigje e drejtorit ishte “Jo valla, më ka cofë mori” që domethënë, para se të shpalleshin rezultatet edhe ai e dinte se kush do të punmësohej në këtë vend pune, bile e dinte edhe me presion të kujt. Edhe më tragjik doli rasti i “Mati Logorecit”, ku shumë kohë para se të shpallej konkursi dihej kush do të punësohej. Unë jam krenar me familjen time, dhe jam krenar se në mbrojtje të së drejtës së familjes sime, hyra që të zbuloj se çfarë dallaveresh bëhen në këtë drejtori, të cilat përditë po i dëshmojë me dokumente, një pjesë të së cilave do ta dozoj nesër në Njësinë e Krimeve Ekonomike..

Jam krenar që këtë betejë e kam nisur duke e mbrojtur familjen time.
Nuk e kam nisur, i diktuar nga ndonjë person, subjekt politik dhe as organizatë joqeveritare, e kam nis i vetëm në mbrojtje të familjes sime, por para se ta rrëfej këtë pjesë po e ndaj me ju nja rast, i cili dëshmon se DKA vepron se një orkestër mirë I trajnuar në meloditë kriminale. Deri më sot kam qenë shumë i butë në shprehje duke p[ritur reagimin e institucioneve.

Një mësimdhënës punonte në një shkollë të Prizrenit. i shpallet konkursi në korrik, e fiton, i shpallet konkursi në gusht e fiton dhe fillon të punojë…bile i jepet edhe kujdestaria e një klase… Ndërkohë I shpallet edhe një konkurs dhe me 21 shtator e largojnë nga procesi mësimor…Shihe kuriozitetin kriminal për librin e Ginesit…Ai largohet nga procesi mësimor por pagën e merr gjatë tërë vitit…I merr parat e taksapaguesve. Në këtë lojë përfshihen vetë Drejtori me të cilin 1 orë bisedon ky mësimdhënës, Reshit Kushaj që ia humb dokumentet në konkursin e tretë dhe financat, nuk e di kush I mban financat në DKA. Rrëfimi është shumë më I tmerrshëm dhe këtë rast bashkë me disa të tjera do ta dorëzoj nesër në krime ekonomike.

Greva e gjykatësve, e cila filloi me 3 mars, po shkakton probleme të mëdha duke zvarritur dhe rritur numrin e lëndëve.

KALLXO.com-i ka mësuar se nga fillimi i grevës deri më sot, në Gjykatën Themelore të Prizrenit janë shtyrë 235 seanca gjyqësore.

Vetëm ditën e hënë ishin të planifikuara që të mbaheshin 38 seanca gjyqësore, mirëpo greva e gjykatësve pamundësoi mbajtjen e tyre.

Valon Totaj, përfaqësuesi i grevistëve nga Gjykata Themelore e Prizrenit, tha se për momentin nuk ka asgjë konkrete rreth përmbushjeve të kërkesave të gjykatësve.

“Të premten përfaqësuesit e 7 gjykatave themelore të Kosovës kemi pasur një takim me kryesuesin e KGjK-së, z.Enver Pecin, ku prezentë kanë qenë edhe dy anëtarët e KGjK-së Agim Maliqi dhe Armend Berisha, mirëpo përkundër që takimi ka zgjatur rreth 2 orë e gjysmë, nuk ka pasur asgjë pos përkrahjes nga KGjK-ja,” tha gjykatësi Totaj.

KALLXO.com-i shkroi për takimin e kreut të KGjK-së me grevistët, pas të cilit Enver Peci tha se është i gatshëm të tërhiqet nga drejtimi i Këshillit Gjyqësor, nëse nuk plotësohen kërkesat e gjykatësve.

Gjyqtarët po kërkojnë rritje të pagave për 25 për qind, nivelizim të pagave me prokurorët dhe 200 euro në muaj për rrezikshmëri në rastet e gjyqtarëve të departamenteve të krimeve të rënda.

Vaton Totaj, po ashtu bëri të ditur se brenda kësaj jave do të mbahet edhe një mbledhje në KGjK-së, e cila tha se do të jetë ose e jashtëzakonshme, ose do të mbahet mbledhja e rregullt e KGjK-së të mërkurën, ku pika kryesore dhe e vetme do të jetë greva e gjykatësve.

“Ne jemi të vendosur që grevën ta vazhdojmë deri në realizimin e kërkesës që ka të bëjë me pagesën në emër të rrezikshmërisë në punë, në shumën prej 200 euro. Po e theksoj, kjo marrëveshje është arritur në muajin maj të vitit të kaluar, në mes ministrit të drejtësisë Hajredin Kuçi, Shoqatës së Gjyqtarëve dhe KGjK-së,” tha Totaj.

Edhe në gjykatat tjera të vendit po mbahen vetëm seancat me të paraburgosur dhe ato që konsiderohen urgjente.

Në mbledhjen e sotme të rregullt të Këshillit të Drejtorëve, që drejtohet nga kryetari i Malishevës, Ragip Begaj, në mesin e shumë çështjeve, dy kanë qenë temat më me rëndësi që janë trajtuar. Rrugët e bllokuara nga bora në fshatrat që shtrihen në malet e Berishës dhe çështja e etheve hemorragjike krime kongo (EHKK).

Në këtë mbledhje, kryetari Begaj, cili gjatë gjithë vikendit ka qëndruar në terren, bashkë me përgjegjësit tjerë komunal, njoftoi se rrugët në fshatrat Berishë, Fshat i Ri dhe rruga drejt fshatit Kleçkë (Komuna e Lipjanit), vazhdojnë të jenë të kalueshme me shumë vështirësi dhe në këtë pjesë duhet kujdes i vazhdueshëm për largimin e borës.

“Kompania e cila merret me pastrimin e rrugëve nga bora, po qëndron në këto fshatra, pasi erërat po e bartin borën dhe në vazhdimësi po i mbulojnë rrugët, duke shkaktuar kështu probleme serioze në qarkullimin e banorëve të këtyre fshatrave”, njoftoi kryetari Begaj, përderisa rrugët në vendbanimet tjera, janë të qarkullueshme dhe nuk ka probleme të mëdha.

Në çështje tjetër të cilën kryetari Begaj, e ka diskutuar në mbledhjen e sotme, është edhe ajo e implementimit të strategjisë për luftimin dhe parandalimin e etheve hemorragjike krime kongo. Me këtë rast drejtori për shëndetësi, z.Hajdin Berisha, tha se “ deri më tani janë paraqitur dy raste të thumbimit nga rriqrat dhe pavarësisht prej kushteve atmosferike, shumë shpejt besoj se do të filloj repelimi i kafshëve shtëpiake, si njëra prej masave parandaluese, si dhe po punohet intensivisht në vazhdimin e vetëdijesimit për rrezikun nga thumbimi i rriqrave”.

Policia i ka pashkruar si persona problematik dhe me dosje të rënduar penale tri viktimat e gjinisë mashkullore që u vranë, një ditë më parë në Prizren, ndërkohë që organet e rendit janë vënë në kërkim të dy personave, babait dhe djalit të tij, që të dy me inicialet E.SH, për të cilët dyshohet të jenë autorë të krimit që ndodhi pasditen e së dielës. Policia edhe më tej llogarit hakmarrjen si motivin kryesor të vrasjes. Pas një shkëmbimi më armë zjarri, tek hyrja e vjetër e spitalit në Prizrenit, afër sallës së sporteve të gjimnazit shkencor, në një akt që mendohet të jetë bërë me paramendim mbetën të vrarë Ferdi Shishko, Haki Thaçi dhe Bilgin Ersoj, që tre nga Prizreni. Drejtuesit më të lartë të policisë rajonale në Prizren kanë nisur verifikimin e dosjes së viktimave, pasi dyshohet që të tri viktimat karakterizohen me vepra të shumta penale.

Drejtori i policisë në Prizren, Nexhmi Kransiqi, ka thënë për “Zërin” se dosjet e tyre janë të mbushura veprime të kundërligjshme, së paku për 12 raste, ndërsa shpesh kanë kaluar edhe nëpër duart e organeve të drejtësisë, sidomos të policisë.

“Viktimat kanë dosje të rëndë penale. Rastet ndaj tyre kanë të bëjnë me drogë, kidnapim, lëndime të rënda trupore, pastaj vrasje në tentativë dhunim dhe disa raste të tjera”, ka thënë ai , duke treguar se dosjet e tilla i ka edhe Prokuroria. Referuar nënkolonel Krasniqit, F. Shishko para dhjetë ditësh kishte dalë nga burgu, pasi kishte vuajtur burgimin prej 4 muaj për veprën penale të lëndimit trupor.

“Të tre kanë qenë në paraburgim, herë pas herë, janë mbajtur për një kohë, por jo shumë të gjatë e pastaj janë liruar”, ka thënë ai. Emri i Ferdi Shishkos është përmendur në procesin gjyqësor ndaj rastit të rrëmbimit të djalit të njërit prej afaristëve të njohur në Prizren, në tetorin e vitit 2011. Familjarët e Shukri Krasniqit, të akuzuar në këtë proces, ndër tjera e kishin akuzuar Shishkon se në bashkëpunim me një person tjetër dhe disa zyrtarë të Policisë së Kosovës e kanë kurdisur përzierjen e familjarit të tyre në procesin e kidnapimit.

Policia tashmë ka intervistuar disa persona, në cilësinë e dëshmitarëve të rastit, ndërsa pistat e hetimeve janë drejtuar tek dy persona, babait E. SH., 48 vjeçar dhe djalit të tij, E. SH., 23 vjeçar nga lagja “Tusuz” në Prizren.

Dyshimet për hakmarrje shkaku i hasmërisë mes tyre dhe viktimave kanë bërë që policia në këtë pistë edhe të drejtoi hetimet. Rreth 1 kilometër, në drejtim të qendrës së qytetit, të lokacioni “Pantelia” adër Qafës së Kishës, policia ka gjetur veturën e braktisur “Golf 2” me të cilën dyshohet se dorasit janë larguar nga vendi i ngjarjes.

Nënkoloneli Krasniqi ka thënë se brenda veturës janë gjetur disa gëzhoja fishekësh si dhe gjurmë gjaku, që çon në dyshimin për shkëmbim zjarri mes dorasëve dhe viktimave”. Këtë dyshim edhe më tepër e përforcon fakti se vetura ka disa vrima nga goditja e plumbave, por policia ende nuk ka konstatuar amët me të cilat është qëlluar ajo. Në vendngjarje janë gjetur gëzhoja të dy armëve, të kallashnikovit dhe të pistoletës, ndërsa tek njëra nga viktimat në brezin e tij është gjetur një pistoletë.

Zëdhënësi i Policisë Rajonale të Prizrenit, Hazir Berisha ka thënë se ende nuk ka informata të sakta nëse të dy armët janë shkrepur nga i njëjti apo nga dy persona. Një shtëpi është bastisur në kërkim të të dyshuarve, por sipas autoriteteve, familjarët e tyre kanë thënë se ata nuk ndodheshin aty. Policia është vënë në kërkim të tyre. Për të kapur autorët janë shtuar patrullimet, janë njoftuar pikat kufitare dhe qendrat policore të vendit. Viktima Thaçi është nga lagja “Tusuz”, ndërsa Ersoji nga “Tabakhanja”.

Viktimat janë të moshës mbi 30 vjeçare. Dëshmitarët e rastit, por edhe ata që njohin viktimat dhe dorasin e dyshuar, me kusht anonimiteti flasin për vrasje me paramendim dhe motive të hakmarrjes.

Sipas tyre, dorasi dhe viktimat kanë qenë shokë, por në vitin 2013, pas një zënke mes tyre, tek qendra tregtare “Abi 2” , afër spitalit ishte therë me thikë i dyshuari 48 vjeçar E. SH., ndërsa për një kohë ka qëndruar pavetëdije në spital.

Kjo konfirmohet edhe nga policia, duke thënë se për këtë flasin edhe familjarët e viktimave. Sipas dëshmitarëve, hasmëritë mes tyre janë përkeqësuar edhe më tepër, pasi tri ditë më parë, viktimat kishin përsëritur sherrin, pasi ia kishin rrahur djalin e të dyshuarit kryesore të krimit, por kjo nuk konfirmohet nga policia. Tre trupat e të vrarëve janë dërguar në autopsi në Prishtinë.

Avokati i Popullit njofton opinionin publik se Presidentja e Republikës së Kosovës, Atifete Jahjaga; përfaqësuesi special i Bashkimit Evropian, Samuel Zhbogar; shefi i Misionit EULEX, Gabriel Meucci, po pengojnë hetimet që Institucioni i Avokatit të Popullit është duke zhvilluar, lidhur me dyshimet për shkelje ligjore dhe kushtetuese, të kryera nga kryetari i Gjykatës Kushtetuese, Enver Hasani.

Javën e kaluar, Avokati i Popullit ka njoftuar publikun e gjerë për hetimet që po zhvillonte rreth pjesëmarrjes së tre gjyqtarëve ndërkombëtarë në Rastin KO155/14, në të cilin Avokati i Popullit kishte kontestuar Dekretin e Presidentes Jahjaga për vazhdimin e mandatit të po atyre tre gjyqtarëve. Përveç këtyre hetimeve, Institucioni i Avokatit të Popullit është duke hetuar gjithashtu faktin se kryetari Hasani ka marrë pjesë në procedurën e këtij rasti, edhe pse ai ka pasur kontakte të ngushta me Bashkimin Evropian dhe Misionin EULEX, për të siguruar pikërisht atë vazhdim mandati që Avokati i Popullit po kontestonte. Këto kontakte janë konfirmuar nga një memorandum i brendshëm i Misionit EULEX, i botuar në revistën Prishtina Insight, si dhe nga vetë kryetari Hasani në emisionin Betimi për Drejtësi. Me gjithë faktin se kishte këtë konflikt të qartë të interesit, kryetari Hasani, në vend që të përjashtonte veten nga procedura e Rastit KO155/14, e caktoi veten si anëtar të kolegjit shqyrtues.

Bazuar në këto fakte, Avokati i Popullit, njofton deklarata, u ka drejtuar presidentes Jahjaga, Zhbogar dhe z. Meucci, por edhe vetë kryetarit Hasani, një sërë pyetjesh për të mësuar natyrën, përmbajtjen, nivelin dhe kohëzgjatjen e kontakteve midis kryetarit Hasani dhe zyrtarëve të Bashkimit Evropian dhe të Misionit EULEX. Përveç kësaj, në letrat e tij, Avokati i Popullit është interesuar për të ditur nëse kryetari Hasani ka pasur kontakt, në çfarëdo kohe para publikimit të Aktvendimit të Gjykatës Kushtetuese në Rastin KO155/14, me Presidenten Jahjaga rreth vazhdimit të mandatit të tre gjyqtarëve ndërkombëtarë. Presidentja Jahjaga ishte pala përgjegjëse në kontestimin e Avokatit të Popullit dhe ka qenë, sikurse edhe kryetari Hasani, palë në diskutime me Bashkimin Evropian dhe Misionin EULEX, sa i përket procedurës për vazhdimin e mandatit.

Si në të gjitha rastet, Avokati i Popullit u ka dhënë katër zyrtarëve përgjegjës të gjitha mundësitë, bazuar në ligj, për t’iu përgjigjur pyetjeve të tij në komunikimin e rregullt ndërinstitucional. Madje, presidentes Jahjaga dhe Zhbogar, Avokati i Popullit u është drejtuar tri herë me të njëjtat pyetje. Por të gjithë zyrtarët përgjegjës, ose kanë shpërfillur plotësisht letrat e dërguara nga Avokati i Popullit, ose kanë refuzuar, në mënyrë kategorike, t’u përgjigjen pyetjeve të tij. Ky dështim i plotë i bashkëpunimit, sipas Ligjit për Avokatin e Popullit, “konsiderohet pengim i punës së Avokatit të Popullit”.

Në rastin e kryetarit Hasani dhe Presidentes Jahjaga në veçanti, refuzimi kategorik për të bashkëpunuar me Avokatin e Popullit përbën shkelje të Kushtetutës së Republikës së Kosovës, e cila përcakton qartë se “Çdo organ, institucion ose autoritet tjetër, që ushtron pushtet legjitim në Republikën e Kosovës, është i detyruar t’u përgjigjet kërkesave të Avokatit të Popullit dhe t’i paraqesë atij/asaj të gjitha dokumentet dhe informacionet e kërkuara në pajtim me ligj.”

Avokati i Popullit vëren se refuzimi i kryetarit Hasani për t’u përgjigjur në këtë rast, pason refuzimin e tij për t’u përgjigjur në pyetjet për fshehjen e përjashtimit të gjyqtarit Carolan nga procedura e Rastit KO155/14. Kjo shpërfillje e jashtëzakonshme e normave kushtetuese dhe ligjore nuk ka vend në institucionet e Republikës së Kosovës, aq më pak në një gjykatë, roli kryesor i së cilës është të ruajë vlerat themelore të një shoqërie demokratike.

Avokati i Popullit e konsideron po aq shqetësues faktin që Presidentja Jahjaga refuzon t’u përgjigjet jo vetëm pyetjeve rreth kontakteve të kryetarit Hasani me Bashkimin Evropian dhe Misionin EULEX, por edhe pyetjeve rreth kontakteve që Zyra e Presidentes mund të ketë pasur me kryetarin Hasani, ose gjatë bisedimeve me BE-në dhe EULEX-in ose në çfarëdo kohe tjetër, lidhur me vazhdimin e mandatit të gjyqtarëve ndërkombëtarë. Ky refuzim kategorik për t’u përgjigjur shtron pyetjen: çfarë ose kush po shtyn Presidenten Jahjaga për të shkelur edhe Kushtetutën, në mënyrë që të fshehë faktet kyçe në këto hetime?

Refuzimi i kryetarit Hasani dhe Presidentes Jahjaga për të bashkëpunuar me Avokatin e Popullit paraqet konfirmimin e radhës të një realiteti shqetësues në vendin tonë: Sa më i lartë që është statusi i një zyrtari në hierarkinë shtetërore të Republikës së Kosovës, aq më i ulët është respekti që tregon për Kushtetutën dhe ligjet në fuqi. Ky është rrënim i themeleve të shtetit ligjor.