Njohës të çështjeve të pushtetit lokal dhe atyre politikë kanë kërkuar nga delegacioni i Kosovës të ketë kujdes kur është në pyetje statuti i asociacionit të komunave me shumicë serbe.

Drejtori ekzekutiv i Institutit Kosovar për Qeverisje Lokale, Besnik Tahiri, ka thënë për “Epokën e re” se, në kuadër të diskutimeve për asociacionin e komunave me shumicë serbe, duhet të trajtohen me kujdes dy çështje. “E para, duhet të ruhet sistemi njëshkallësh i qeverisjes në Kosovë. Pra, mos të krijohet edhe një nivel tjetër qeverisës, në këtë rast asociacioni i komunave me shumicë serbe nuk duhet as të duket e as të jetë nivel tjetër i qeverisjes lokale. E dyta, me Kushtetutë dhe të gjitha ligjet në fuqi të cilat i kemi, përgjegjësitë për ushtrimin e kompetencave i kanë komunat si njësi dhe si person juridik”, ka deklaruar Tahiri. Ai ka thënë se delegacioni i Kosovës në dialog duhet të jetë i palëkundur kur është në pyetje një shkallëshmëria e qeverisjes në Kosovë.

“Në këtë kuptim asociacionet gjithkund në botë kanë rol kryesisht të lehtësimit, të koordinimit të politikave dhe kompetencave që komunat i ushtrojnë. Ky është standard ndërkombëtar dhe delegacioni i Kosovës në dialog duhet të jetë i palëkundur sepse, në të kundërtën, do të dëmtohet seriozisht sistemi qeverisës në vend, në të njëjtën kohë edhe sistemi i pushtetit lokal në Kosovë”, është shprehur Tahiri.

Tahiri ka vlerësuar se në parim Kosova nuk do të duhej të kishte më shumë se një asociacion për shkak se, sipas tij, asociacioni i komunave të Kosovës do ta përmbushte lobimin dhe detyrimet që i ka një asociacion për të gjitha komunat. “Megjithatë, me Kushtetutë ne i kemi dhënë mundësi themelimit të më shumë asociacioneve, që mendoj se ka qenë gabim. Dhe meqë është kështu, duhet të ketë kujdes maksimal në hartimin e statutit të asociacionit të komunave me shumicë serbe, i cili nuk duhet t’i japë përgjegjësi ekzekutive këtij asociacioni. Në qoftë se me statut i jep kompetenca ekzekutive, atëherë problemi shkon më tej dhe lidhet me ligjet e tjera të cilat i japin përgjegjësi pushtetit lokal. Këtu kemi të bëjmë me Ligjin për financat lokale dhe Ligjin për bashkëpunim ndërkomunal dhe ndërkufitar”, ka thënë Tahiri, duke shtruar se debati rreth asociacionit duhet të fokusohet në kompetencat e tij, e jo se ku do ta ketë zyrën. “Në Bruksel janë rreth 750 zyra të asociacioneve të rajoneve të ndryshme të cilat i mbrojnë interesat e anëtarësisë së vet. Vetëm Franca i ka 20 asociacione. Kjo nuk është temë. Nëse kanë para për të lobuar, s’ka kush i ndal, siç nuk mund ta ndalësh as asociacionin e komunave të Kosovës. Problemi nuk është se a do të hapet zyra e asociacionit të komunave me shumicë serbe, por problemi është sa a interferon ky institucion në sistemin njëshkallësh qeverisës të Kosovës dhe a merr kompetenca ekzekutive”, ka thënë Tahiri.

Kursani: Kosova nuk duhet ta negociojë asociacionin me Serbinë

Edhe njohësi i çështjeve politike, Shpend Kursani, ka folur për asociacionin e komunave me shumicë serbe. Ai ka thënë për “Epokën e re” se delegacioni i Kosovës në dialog me Serbinë në Bruksel nuk duhet të pranojë të negociojë për çështjen e këtij asociacioni. “Sa i përket krijimit të asociacionit të komunave me shumicë së pari, meqenëse kjo është çështje e brendshme e Kosovës dhe ka të bëjë me qytetarët serbë të Kosovës, kjo temë nuk do të duhej të negociohet me Serbinë sepse në momentin kur negociohet me shtetin serb, atëherë e bën këtë shtet hisedar në dhënien e propozimeve dhe bërjen e kërkesave se çfarë duhet të përmbajë ky asociacion. Nëse kjo çështje negociohet me Serbinë, ku mund të sigurohemi ne se ky asociacion mund të jetë i ngjashëm me këtë të komunave të Kosovës sipas ligjeve dhe Kushtetutës?”, ka deklaruar Kursani.

Ai ka vlerësuar se në momentin kur kompetencat e këtij asociacioni do të negociohen me Serbinë atëherë, sipas tij, medoemos do të ketë më shumë kompetenca shumë më të mëdha sesa lejohet me ligjet dhe Kushtetutën e Kosovës.

“Mendoj se problemi do të jetë disa nga kompetencat ekzekutive që do të mund t’i marrë ky asociacion dhe të cilat Serbia është duke u munduar t’i shtyjë në statutin e asociacionit të komunave me shumicë. Ky statut mund të bëhet një lloj kushtetute e improvizuar e serbëve të Kosovës dhe kësisoj mund ta krijojnë një nënshtet brenda Kosovës, pra një autonomi shumë më të madhe e cila do të lidhet shumë më shumë me Serbinë sesa me Kosovën. Prandaj, ata që negociojnë me Serbinë, edhe nëse shtyhen nga BE-ja, nuk duhet të pranojnë ta bëjnë një gjë të tillë, por duhet ta pranojnë një statut të këtij asociacioni në bazë të ligjeve dhe Kushtetutës”, është shprehur Kursani, duke shtuar se kryeministri Isa Mustafa nuk mund të refuzojë kurrfarë kërkese të bashkësisë ndërkombëtare kur është në pyetje asociacioni i komunave me shumicë serbe. “Do të duhej që negociatorët e Kosovës të rezistojnë çfarëdo presioni, mirëpo në situatën konkrete nuk besoj se kryeministri mund ta refuzojë çfarëdo kërkese të bashkësisë ndërkombëtare, sepse ky kryeministër nuk mund të refuzojë asgjë për shkak se ia kanë përmendur veprat penale të tij. Isa Mustafa e di se, nëse nuk e dëgjon komunitetin ndërkombëtar, ai mund të përfundojë në burg. Kështu që, çfarëdo që të kërkojë komuniteti ndërkombëtar, është amnisti për Isa Mustafën të qëndrojë në liri”, ka thënë Kursani.

Ndërkaq ministrja e Shtetit, Edita Tahiri, në një intervistë për “Epokën e re” pati deklaruar se asociacioni i komunave me shumicë serbe nuk do të ketë kompetenca ekzekutive.

“Çështja tjetër që do të diskutohet në dialog, është asociacioni i komunave me shumicë serbe, përkatësisht duhet të diskutohet një plan për zbatim, i cili lidhet me përmbajtjen e statutit të ri të këtij asociacioni. Sipas marrëveshjes së Brukselit, asociacioni duhet të krijohet në bazë të ligjeve ekzistuese të shtetit të Kosovës. Ky asociacion nuk do të ketë asnjëherë kompetenca ekzekutive, sepse Kushtetuta dhe Ligji për vetëqeverisje lokale e përcaktojnë qeverisjen në dy nivele, qendror dhe lokal. Pra, nuk ka ndonjë nivel tjetër ekzekutiv”, ka deklaruar Tahiri.

Reshjet e mbrëmshme të borës që ra në Kosovë kanë shkaktuar një numër të madh të aksidenteve.

Sipas Policisë së Kosovës që nga ora 21:00 e së dielës e deri më tani në gjithë Kosovën janë shënuar 30 aksidente trafiku me rreth 15 të lënduar.

Reshjet e mbrëmshme të borës që ra në Kosovë kanë shkaktuar një numër të madh të aksidenteve.

Policia e Kosovës është në teren dhe numri i aksidenteve mund të ndryshojë.

Ndërkohë që Policia u ka bërë thirrje ngasësve të veturave që të mos dalin pa pajisjet e duhura dhe të papërgatitur në rrugë./Gazeta Express/

Policia e Kosovës ka raportuar se është ndaluar në pikë kufitare i dyshuari, mashkull boshnjak, me veturën e tij, derisa ka qenë së bashku me katër meshkuj shqiptarë, të cilët kishte tentuar t’i kontrabandojë në drejtim të shteteve të Evropës. I dyshuari pas intervistimit, me vendim të prokurorit lirohet në procedurë të rregullt.

Ndërsa, katër personat meshkuj shqiptarë, të cilët kanë qenë me të dyshuarin janë kthyer mbrapa dhe nuk janë lejuar të kalojnë kufirin. Po ashtu, Policia ka njoftuar se edhe në fshatin Rogoçicë të Kamenicës, derisa Policia ka ndaluar katër të dyshuar meshkuj shqiptarë të cilët me vete kishin dy krerë lopë, të cilat kanë qenë duke i kontrabanduar.

Të dyshuarit pasi që janë takuar me patrullën policore kanë filluar që t’i sulmojnë fizikisht dhe me mjete të forta zyrtarët policorë. Njëri nga të dyshuarit është arrestuar dhe dërgohet në mbajtje, ndërsa tre të dyshuar të tjerë kanë ikur në drejtim të panjohur. Një zyrtar policor ka pësuar lëndime trupore, i njëjti është dërguar për trajtim mjekësor.

Deputeti i Partisë Demokratike të Kosovës (PDK), Bekim Haxhiu, i njohur në opinion me nofkën “Kamishi”, ka nisur “Misionin e Ri” për rehatimin e dhëndrit të tij, Bajram Jashari, në krye të një ndërmarrjeje shumë të rëndësishme publike “Ibër Lepenc”.

Kjo ndërmarrje deri muajin e kaluar ishte udhëhequr nga bashkëpartiaku i Haxhiut, Hajdar Beqa. Por, që ky i fundit ka dhënë dorëheqje nga pozita, pasi është zgjedhur deputet i Kuvendit të Kosovës.

Pas largimit të tij, me kërkesë së MZHE-së bordi i kësaj ndërmarrjeje si ushtrues të detyrës e ka përzgjedhur Demë Abazin, i cili deri më tash ka pasur pozitën e drejtorit në njësisë afariste “Ujitja”, mirëpo ky i fundit po kundërshtohet fuqishëm nga “Kamishi” dhe dhëndëri i tij Bajram Jashari, i cili njëkohësisht është sekretar i ndërmarrjes “Ibër Lepenc”, si dhe anëtar i Bordit të Drejtorëve në Ujësjellësin Regjional “Prishtina”/zeri/

Shoqata e të shpërngulurve në Mal të Zi ka ftuar qytetarët që në numër sa më të madh t’i përgjigjen protestës kundër ardhjes së zëvendëskryeministrit të Qeverisë së Kosovës Hashim Thaçi në vizitën zyrtare që është paralajmëruar në Mal të Zi më 15 dhe 16 janar. Në anën tjetër Shoqata e Malazezëve të Kosovës e ka përshëndetur këtë vizitë.

“Mali i Zi pa dyshim gjithnjë ka qenë faktor i qetësisë në rajon dhe kjo vizitë është vazhdim i kësaj politike. Në anën tjetër, nënshkrimi i marrëveshjes së Brukselit dhe pjesëmarrja në iniciativat rajonale të Kosovës çdo ditë e më shumë tregon shenja të njëjta. Besojmë se vizita e Thaçit do të sjellë qetësi dhe stabilitet në rajon që është edhe qëllimi ynë”, thuhet në komunikatën e Shoqatës së malazezëve të Kosovës.

Kjo shoqatë e ka lëshuar këtë komunikatë pasi që lidhja e të shpërngulurve në Mal të Zi do të organizojë protestë të qetë para vilës “Gorica” në Mal të Zi kundër siç thuhet “ ardhjes së kriminelit të luftës dhe terroristit të UÇK-së, Hashim Thaçi”, raportojnë mediat.

Në anën tjetër sipas malazezëve të Kosovës kjo vizitë do të përmirësojë kushtet e malazezëve që jetojnë në Kosovës e po ashtu do të krijohen kushtet për kthimin e të gjithë të shpërngulurve në Kosovë.

Deputeti i Lidhjes Demokratike të Kosovës (LDK), Armend Zemaj, duke iu referuar deklarimeve të kryeministrit Isa Mustafa se Gjykata Speciale do të merret me vrasjet e pasluftës si për vrasjen e Enver Malokut dhe rastet tjera , ka thënë se kjo deklaratë tregon më së miri se Mustafa nuk i beson drejtësisë vendore.

“Kjo tregon se edhe vet z. Mustafa nuk i beson sistemit të drejtësisë vendore dhe pret që vrasjet politike të zbardhën nga drejtësia ndërkombëtare përmes një Gjykate Speciale”, ka thënë Zemaj për “Zëri”.

Ai ka shtuar se edhe lideri i tij i partisë, që është edhe shef i qeverisë Mustafa e ka të qartë se njerëzit e fuqishëm të politikës kanë dhënë urdhër që drejtësia vendore mos të merret me vrasjet e pasluftës dhe këto të trajtohen tash nga ndërkombëtarët.

Ndryshe, deputeti i LDK-së Zemaj, kohë më parë pati deklaruar se vrasja e xhaxhait të tij,ushtarakut Tahir Zemajt me 4 janar të vitit 2003 ka qenë vrasje politike.

Zv/kryeministri i Kosovës dhe shefi i diplomacisë, Hashim Thaçi ka thënë eskluzivisht për Indeksonline në Paris se krerët e shtetit të Kosovës sot treguan solidaritet me popullin dhe qeverinë franceze.

“… solidaritetin që tregoi e gjithë Evropa, e gjithë bota demokratike me këtë angazhim maksimal të përpjekeve tona të përbashkëta për paqe, për bashkëpunim”, ka thënë Thaçi, i cili sot bashkë me presidenten Atifete Jahjaga morën pjesë në marshin e bardhë të mbajtur në Paris në nderim të viktimave të terrorizimit.

Ai tha se marshi i sotëm i marsh i vlerave civilizuese kundër të keqes dhe për fitoren e së mirës.

“Kam besim të plotë që Kosova siç ka qenë gjithmonë, shqiptarët siç kanë qenë gjithmonë do të jenë përkrah civilizimit botëror dhe garantuese e vlerave demokratike”, ka thënë në fund Thaçi.

Sot në Paris mbi një milion njerëz kanë marshuar (marshi ende po vazhdon) në nderim të viktimave të dy sulmeve terroriste në kryeqytetin francez. Në këtë marsh kanë marrë pjesë mbi 40 liderë botëror. /Indeksonline/

Marshi në Paris dëshmon solidaritetin e botës demokratike me popullin e Francës, që ka përjetuar këto ditë akte të rënda të barbarisë mbi qytetarët e saj dhe sulme mbi një prej vlerave më të çmuara të shoqërisë – lirinë e shprehjes dhe të fjalës, thotë presidentja Atifete Jahjaga.

“Sulmet mbi vlerat demokratike dhe mbi lirinë e shoqërive tona nuk mund të na zmbrapsin nga lufta e përbashkët për ndërtimin e një bote më të sigurt”, ka shkruar ajo në profilin e saj në Facebook.