Deputeti i LDK-së Arben Gashi thotë se LDK mund t’i bashkohet protestave të paralajmëruara nga Vetëvendosje por vetëm nëse konsumohen të gjithë mekanizmat.

Ai në emisionin “Rubikon” të KTV-së, tha se nëse Flora Brovina nuk e thërret seancën, atëherë LVAN duhet që të shkarkojë atë dhe pastaj ai beson se një vendim të tillë do të dërgohej në Gjykatë Kushtetuese, ajo do të duhej ta vlerësoj si të drejtë, për shkak, dhe në këtë formë të ndërtohet një precedent i drejt juridik.

Por, nëse ky skenar dështon, atëherë sipas Gashit shkohet në zgjedhje së bashku si Bllok dhe nëse prap përsëritet bllokada, atëherë LDK-ja do të dalë në rrugë për ta rrëzuar Hashim Thaçin nga pushteti.

“Unë besoj se PDK do të vetëdijësohet dhe do ta thërras seancën. Seanca nuk mund të pritet më shumë se deri në fund të javës së ardhshme. Unë mendoj se nuk është koha që të bëjmë presion përmes rrugës. Ky është mendimi im personal”.

“Për të dalë nga kjo status qou-je mendoj se duhet të konsultohemi juridikisht, që PDK nuk e ka konsumuar të drejtën e saj për të kandiduar dhe ne duhet që në Kuvend të shkarkojmë Brovinën dhe të krijojmë një gjendje të re. Gjykata Kushtetuese në këtë rast do të detyrohet që të jap përgjigje se si duhet të veprohet. Nëse Gjykata Kushtetuese vendos dhe unë mendoj se ajo do të vendos që është ndërtuar një precedent i drejt juridik por që nëse kjo nuk ndodhë ne do të dalim gjithsesi nga kjo situatë. Aty mund të hyjnë edhe zgjedhjet si zgjidhje. Nëse ezaurohen të gjitha mekanizmat ne do të shkojmë në zgjedhje bashkë por nëse pas zgjedhjes përsëritet situata ne do t’i bashkohemi protestave”, tha Gashi në KTV.

Ambasadori Britanik Ian Cliff, gjatë një ligjërate para nxënëse të kolegjit ”Mehmet Akif”, përveç tjerash foli edhe për shpërbërjen e Jugosllavisë dhe krijimin e shteteve të pavarura.

E duke folur për pavarësinë e Kosovës, Cliff shtoi se ishte qeveria britanike, SHBA’ja, Franca, Gjermania e Italia, të cilat vendosën se nuk ka alternativë tjetër pos të ecet para në menaxhimin e procesit të pavarësisë së Kosovës.

“Gjatë 3 viteve e gjysmë të qëndrimit tim këtu, puna me autoritetet kosovare ka qenë që të sigurojmë më shumë njohje, veçmas tek vendet ku ne kemi ndikim siç janë vendet anëtare te Comonwealthit, por edhe jemi përkushtuar shumë edhe tek 5 vendet e BE’së që s’e kanë njohur Kosovën për shkak se ky është një tjetër problem.

Ne besojmë që e ardhmja e Kosovës përfundimisht është në BE, prandaj kemi bërë shumë punë me autoritetet e ndryshme, përfshirë edhe parlamentin që të provojmë të ndikojmë që këto vende të lëvizin në drejtim të njohjes. Këtu kemi disa shenja të këtij rezultati si psh fakti që Rumania dhe Sllovakia i njohin dokumentet e Kosovës, por se a do të lëvizin drejt njohjes, do ta shohim”, tha Cliff.

Fjalimi i kryeministrit shqiptar në Beograd, Edi Rama, është ndryshuar në avion gjatë fluturimit për në kryeqytetin serb.

Këtë detaj interesant e ka zbuluar gjatë një emisioni në “KlanKosova” drejtori i këtij televizioni në Prishtinë, Baton Haxhiu, i cili ka qenë një ndër gazetarët shqiptarë që e ka ndjekur nga afër vizitën e kryeministrit në Beograd.

“Fjalimi i Ramës është ndryshuar në avion. Rama nuk ka lejuar që fjalimi të përkthehet nga përkthyesit serb”, tha Haxhiu.

Haxhiu nuk e ka zbuluar se cila pjesë e fjalimit është ndryshuar, por ka thënë se mbetet në dorë të publikut të gjykojë nëse ai ishte i duhuri apo jo.

Haxhiu tha gjithashtu se gjatë takimit 20-minutësh mes dy kryeministrave është folur edhe për Kosovën.

“Nuk është e vërtetë që nuk është hapur çështja e Kosovës në takimin 20-minutësh mes Ramës dhe Vuçiçit”, tha Haxhiu.

Më tej analisti tha se Rama e ka ironizuar Vuçiçin në dy momente. Kjo ka ndodhur kur është folur për ndeshjen e radhës në Shqipëri me Serbinë dhe kur kryeministri Rama e ftoi Vuçiçin në Tiranë.

“Rama i ka thënë Vuçiçit që po deshe sill drona e flamurë sa të duash. Ky ka qenë një ironizim, ndërsa e dyta ka qenë ku i tha eja në Tiranë dhe shprehi qëndrimet e tua, të cilat ne nuk e cilësojmë si provokim”, tha Haxhiu.

Kryetari i Komunës së Prizrenit, Ramadan Muja, sot ka marrë 12 vendime. Zëdhënësi i Komunës, Ymer Berisha tha se këto vendime lidhen drejtpërdrejt me interesin e qytetarëve.

“Këto vendime adresojnë kërkesat e qytetarëve të Komunës së Prizrenit”, tha Berisha.

Ai tha se të gjitha këto projekte do të kalojnë nëpër faza të obligueshme ligjore dhe do të realizohen në afatet e parapara./PrizrenPress.com/

Në Gjykatën Themelore të Prizrenit, të hënën vazhdoi seanca gjyqësore ndaj dy shtetasve të Guatemalës, të cilët po akuzohen për vepër penale të mashtrimit.

Ndryshe nga seanca e fundit e mbajtur më 14 tetor 2014, ku të akuzuarit në fund të seancës qajtën para trupit gjykues, të hënën u panë të qetë.

Gjykimi vazhdoi me marrjen në pyetje të të akuzuarit të dytë, Cirillo Antonio Zuniga Fosters, i cili para trupit gjykues tha se për herë të parë kur ka ardhur në Kosovë është vendosur në Prizren.

Si arsye të ardhjes përmendi ushtrimin e profesionit të tij si mjeshtër i artit dhe fotograf.

Kur i akuzuari u pyet nga prokurori se sa kishte qëndruar dhe me kë ishte takuar në Prishtinë, ai tha se së bashku me shokun e tij(të akuzuarin e dytë) kanë qëndruar 4 ditë në Prishtinë.

Ai mohoi se është takuar me ndokënd në kryeqytetin e Kosovës, edhe pse aktakuza i ngarkon dy shtetasit e Guatemalës se në Prishtinë mashtruan një person duke ia marrë 20 mijë euro.

“Asnjëherë nuk jam takuar me askënd në Prishtinë… asnjëherë”, tha ai.

Po ashtu i akuzuari tha se nuk e njeh personin e dëmtuar me emrin Masar Basha.

Kur prokurori e pyeti të akuzuarin se të kujt ishin medikamentet dhe letrat e bardha në formë të parave të cilat janë gjetur ditën e arrestimit, i akuzuari pranoi se kishin qenë të tijat dhe të shokut të tij.

“Medikamentet e lëngshme, pluhuri dhe të tjerat kanë qenë tonat, të gjitha kanë qenë tonat”, tha Fosters.

Ai u arsyetua se këto gjëra i kishin me vete vetëm për të mësuar dilerët e drogës se si të prodhojnë para të falsifikuara.

Me përfundimin e marrjes në pyetje të të akuzuarit Cirillo Antonio Zuniga Fosters, përfundoi edhe procedura e provave.

Këtë e konfirmoi edhe avokati kosovar i guatemalasit.

“Ka përfunduar marrja në pyetje dhe që do të thotë se ka përfunduar edhe procedura e provave dhe në seancën e radhës më 19 dhjetor pritet edhe seanca përfundimtare e mbrojtësve dhe të prokurorit”, tha avokati Nexhat Elshani.

Elshani që më parë ishte ankuar se procedura po zvarritej për shkak të shtyrjeve në distanca të largëta kohore të seancave gjyqësore, kësaj radhe ishte i kënaqur me caktimin e seancës së radhës nga trupi gjykues.

“Po duke i marrë parasysh kërkesat tona që sa më shpejt të caktohet seanca e radhës që ta japim fjalën tonë përfundimtare, megjithatë është përmbushë ajo kërkesë, do të thotë brenda nëntë dite është caktuar seanca e radhës ku edhe përmbyllet kjo çështje penale”, tha avokati.

Sipas prokurorisë së Prizrenit, Jose Manuell Monroi Rivera dhe Cirillo Antonio Zuniga Fosters, gjatë qëndrimit të tyre në Kosovë, pas kontaktit me dy persona të caktuar nga policia e Prizrenit, gjatë zbatimit të masave të fshehta të simulimit, të akuzuarit arrijnë që t’i mashtrojnë ata duke u marrë shumën e parave prej 50 mijë eurosh.

Të akuzuarit në të njëjtën mënyrë kanë vepruar edhe në Prishtinë, ku i kanë marrë një të dëmtuari 20 mijë euro duke u larguar pastaj për të humbur çdo kontakt me të.

Dy guatemalasit gjenden në paraburgim nga data 1 nëntor 2013, ndërsa seanca e radhës është caktuar më 19 nëntor 2014./Kallxo.com/

Kryeministri i Shqipërisë, Edi Rama, duket se është emocionuar nga pritja e shqiptarëve të Kosovës, gjatë kthimit të tij për Tiranë.

“Per Shqiperi permes Kosoves me zemren plot, fale mijera shqiptareve qe dolen pergjate rruges per te na pershendetur#Faleminderit perulesisht”, shkruan Rama në rrjetet sociale.

Edi Rama dje në Beograd, në një konferencë live për media me homologun e tij serb, tha se pavarësia e Kosovës është realitet që duhet të pranohet nga të gjithë. Sot, ndërkaq, vizitoi Preshevën, e nga aty u kthye në Tiranë përmes Kosovës. Gjatë rrugës së kthimit, përpara i dolën shumë qytetarë të emocionuar dhe falënderuar për fjalët që tha në kryeqytetin serb, Beograd.

Dy ekipet mjekësore të Qendrës Kryesore të Mjekësisë Familjare(QKMF) “Dr.Fahredin Hoti” të Rahovecit kanë kontrolluar gjendjen shëndetësore të nxënësve të klasës së parë, të pestë dhe të nëntë në të gjitha shkollat fillore dhe të mesme të ulët të kësaj komune.

Ky kontroll ka rezultuar me 298 filloristë të prekur nga sëmundje infektuese.

Drejtori i Qendrës së Mjekësisë Familjare, Agim Kadiri, ka bërë të ditur se gjatë vizitave mjekësore janë kontrolluar 3.083 nxënës të 33 shkollave amë dhe paralelet e ndara të kësaj komune. Sipas tij, kontrollit të 11 mjekëve dhe 11 teknikëve i janë nënshtruar 847 nxënës të klasave të para, 916 nxënës të klasës së pestë, si dhe 1320 nxënës të klasave të nënta.

“Nga numri total i nxënësve me sëmundjen pedikulozis (morrat) kanë dalë të jenë 245 sish, ku numri prej 120 nxënësve janë të klasave të nënta, pastaj 79 të klasave të pesta, si dhe 46 nxënës të klasave të para”, ka bërë të ditur Kadiri. Kurse me zgjebe janë identifikuar 45 nxënës të tjerë, 13 të klasave të para,14 të pesta dhe 18 nxënës të klasave të nënta,shkruan Koha Ditore.

Sipas Kadirit, me shenjat objektive të verdhëzës, kontrolli mjekësor ka zbuluar të jenë vetëm 8 filloristë, prej të cilëve 4 të klasave të pesta, 3 të parave dhe 1 nxënës i klasës së nëntë.
“Sa i përket higjienës personale, ka rezultuar se prej 3.083 nxënësve, 313 janë me nivel të ulët apo 10.5 për qind, me nivel të mesëm 2324 ose 75.38 për qind dhe me nivel të lartë të higjienës janë 446 apo 14.47 për qind të nxënësve të klasave të parathëna”, ka treguar Kadiri. Ai ka thënë se ky kontroll i ndihmon shëndetësisë, sepse me zbulimin e hershëm të sëmundjeve ngrihet niveli e higjienës personale dhe kolektive, por edhe evitohet përhapja e sëmundjeve të ndryshme.

Nga ana tjetër, drejtorët e shkollave e kanë parë të domosdoshëm kontrollin sistematik. Murat Kryeziu, drejtor i shkollës fillore “Hamëz Thaçi” në Xërxë, thotë se vizita ka qenë e nevojshme, pasi që në shkolla tona nuk ka mjekë, kurse regjistrimi i nxënësve në klasat e para bëhet pa një kontroll paraprak.
Edhe homologu i këtij të fundit nga shkolla fillore “Sylejman Vokshi” në Palluzhë, Shpend Hoti, thotë se vizita ishte e qëlluar, por ato duhet të bëhen më shpesh duke përfshirë të gjithë nxënësit. Sipas tij, ekipi i mjekëve nuk i ka lënë asnjë shënim zyrtar në lidhje me gjendjen shëndetësore të fëmijëve. Besoj se konstatimet e nxjerra do të ndikojnë në marrjen e hapave me qëllim të përmirësimit të kujdesit shëndetësor të nxënësve”, ka potencuar Hoti.

E drejtori i Shëndetësisë së Komunës së Rahovecit, Munib Durguti, ka thënë se pas këtij kontrolli të përfunduar në fillim të muajit dhjetor do të vazhdohet me kontrollin e higjienës orale dhe sëmundjeve eventuale të dhëmbëve të nxënësve në 33 shkolla fillore dhe klasave të njëjta.