Pas lëshimit pe të Bllokut që PDK-së t’i takojë kryetari i Kuvendit, duket se krerët e kësaj partie kanë vendosur të mos shkojnë me të njëjtin kandidat për të parin e Kuvendit- pra Arsim Bajramin.

Gazeta Blic mëson se krerët e PDK-së, Hashim Thaçi dhe kadri Veseli janë duke u hamendur që për këtë post ta nominojnë Hajredin Kuçin, i cili do të duhej të jetë më i pranueshëm,sesa Arsim Bajrami, pasi që ky i fundit pos faktit që herën e kaluar nuk i mori votat në të njejtën kohë nuk do të ishte edhe aq fleksibil në procesin e dytë- atë të formimit të Qeverisë për të cilën Thaçi i ka dy javë afat.PDK-ja përndryshe është duke insistuar që para se të thirret seanca të shkohet tek Presidentja dhe të merren vesh në pako me Bllokun. Por gjasat për këtë janë të barabarta me zero. Kjo për shkakun që si Thaçit ashtu edhe PDK-së u është bërë e qartë që zgjedhja e të parit të Kuvendit është proces më vete kundruall atij të formimit të Qeverisë.

Burime ndërkombëtare i kanë thënë Gazetës Blic që PDK-ja ka kohë deri të martën të vendosë nëse do ta thërrasë vazhdimin e mbledhjes së Kuvendit.

Ndryshe Blloku do të mund të procedojë me mbledhjen e nënshkrimeve dhe zëvendësimin e Flora Brovinës me deputeten më të re të Kuvendit, Teuta Rugovës. Mundësia për të shkuar edhe në zgjedhje është e barabartë me zero pa konstituim të Kuvendit të Kosovës. PDK do të ketë një periudhë tepër të vështirë javën që vjen pasi që të gjitha gjasat janë që kjo parti- me apo pa dëshirën e saj, deri në fund të nëntorit do të duhet ta dorëzojë qeverinë pasi që shumica parlamentare e Bllokut atë e ka vënë para aktit të kryer.

Në të gjitha këto rrethana duket që gjasat e Kuçit për kryeparlamentar janë shumë më të mëdha sesa të të paparashikueshmit Arsim Bajrami. /Gazeta Blic/

Gjyqtari i procedurës paraprake Vehbi Kashtanjeva ua ka vazhduar të premten paraburgimin prej dy muajsh 24 personave, shumica e të cilëve u arrestuan nën dyshimin për terrorizëm më 11 gusht.

Për 22 prej tyre masa e paraburgimit vlen në periudhën kohore nga 9 nëntori deri më 9 janar 2015. Dy të tjerët do të jenë në paraburgim deri më 12 janar 2015.

Gjykata ua zëvendësoi masën e paraburgimit, me atë të arrestit shtëpiak për dy muaj dy të arrestuarve tjerë të këtij grupi.

Arresti shtëpiak për dy muaj iu vazhdua edhe tre të dyshurve për terrorizëm, ndërsa kjo masë iu ndërpre katër të tjerëve.

Për këta të katër u caktua masa e paraqitjes në stacion policor për dy muaj.

Shumica e të dyshuarve u arrestuan në aksionit e 11 gushtit, kur anekënd Kosovës u prangosën 40 persona.

Ata po hetohen për organizim dhe pjesëmarrje në grupe terroriste, nxitje të urrejtjes përçarëse ose mosdurimit racor, fetar, kombëtar apo etnik dhe rekrutim për terrorizëm.

Gjykata arsyetoi vendimin për këto masa me rrezikun e fshehjes, ose arratisjes së të dyshuarve, pasi ata tash e dinë se për çfarë po hetohen.

Sipas gjykatës ekziston mundësia që të dyshuarit me anë të lidhjes me persona tjerë t’u bashkohen luftërave në Siri e Irak, duke u bërë kështu të paarritshëm për policinë ose prokuroritë kosovare.

Më 17 shtator nën akuza të ngjashme janë arrestuar edhe 15 individë tjerë, shumica prej tyre imamë. Deri tash shumë prej tyre janë liruar.

Sekretari i Përgjithshëm i AAK-së, Burim Ramadani, thotë se qeverisjes së deritashme po i vjen fundi, kurse kërkon maturi në deklaratat nga partnerët e Bllokut.

Nëpërmjet një postimi në Facebook, Ramadani ka thënë se ditët dhe javët në vijim janë më të rëndësishmet në zhvillimet politike për qeverisjen e re në Kosovë.

Lexojeni të plotë postimin e Ramadanit:

“Edhe pak ditë na ndajnë nga arritja e objektivit tonë të përbashkët për largimin e qeverisjes së deritashme.

Deklaratat e pakujdesshme, që pasqyrojnë pozicione të ngushta nuk kanë qenë dhe nuk duhet të jenë diskursi i Koalicionit.

Partitë politike janë bërë bashkë si kurrë më herët me të vetmin qëllim: ndryshimin në Kosovë.

Ditët dhe javët në vijim janë më të rëndësishmet në zhvillimet politike për qeverisjen e re në Kosovë” (sic), ka shkruar Ramadani. /

Dilemat u hoqën. LDK tashmë e kërkoi hapur postin e kryeministrit. Por, një marrëveshje e re në Bllokun LAN ende nuk është arritur. Pritet çka do të thotë Ramush Haradinaj.

Ramush Haradinaj, në vitin 2004, i kishte bërë 100 ditë si kryeministër, ndërsa në vitin 2014 i ka bërë 150 ditë si i nominuar për kryeministër.

Në të dyja rastet – herën e parë kur kishte ardhur në krye të Qeverisë së Kosovës, ndërsa herën e dytë kur kishte shpresuar se do të ngjitej sërish aty – e ka bërë përmes marrëveshjeve me LDK-në.

Por, kur të premten Blloku opozitar hoqi dorë nga pretendimi për Kryeparlamentarin, rrjedhimisht marrëveshja fillestare për koalicion u prish, ndërkohë që LDK shfaqi hapur synimin për postin e Kryeministrit.

Burime të Politiko.net pohojnë se Ramush Haradinaj, njësoj si Isa Mustafa dhe Fatmir Limaj, është pajtuar që Blloku ta votojë kryeparlamentarin e PDK-së dhe vendi të çlirohet nga ngërçi, pasi këtë e kërkoi qartësisht Ambasadorja Amerikane, Tracy Jacobson, mirëpo ai ende nuk është deklaruar se pajtohet për ridizajnimin e marrëveshjes.

Vendimin për tërheqjen e Bllokut nga kryeparlamentari, gjatë ditës, e bëri publik Fatmir Limaj.

Në mbrëmje, ndërkaq, LDK u shfaq me një komunikatë për media – në të cilën tha se ajo do ta drejtojë Qeverinë, me Ismet Beqirin që deklaroi se Haradinaj di për synimin e LDK-së për kryeministrin, si dhe me Arben Gashin që shprehu besimin e tij për një qëndrim pozitiv të AAK-së.

Vetëm AAK nuk u shfaq në opinion, me një qëndrim.

Limaj dhe Beqiri pohuan sërish atë që e kanë përsëritur pareshtur tash e pesë muaj, se Blloku i tyre është unik, ndërsa në ditët në vazhdim do të diskutojnë lidhur me marrëveshjen e re mes tyre.

Nëse Blloku do të arrijë të vazhdojë të mbetet ende bashkë, këtë pritet ta vendosë Ramush Haradinaj.

Të premten, nuk pat një deklaratë të përbashkët të tyre, me të cilën do të tregonin, ashtu si më 10 qershor, çfarë e kanë ndërmend të bëjnë tash e tutje LDK-AAK-Nisma. Pat vetëm një deklaratë të LDK-së, e cila tregoi se e do kryeministrin.

Policia e Kosovës vazhdon ta respektojë udhëzimin e Ministrisë së Punëve të Brendshme, që pas shqiptimit të gjobave kundërvajtëse në trafik të konfiskojë edhe patentë shoferët. Ndonëse ky veprim është cilësuar si shkelje e të drejtave dhe lirive të njeriut, MPB nuk heq dorë nga vendimi që e ka marrë.

Gazeta Tribuna ka kontaktuar me ministrin e Punëve të Brendshme, Bajram Rexhepi, për të marrë sqarimin rreth këtij udhëzimi, por i njëjti ka kërkuar që për këtë temë të kontaktohet zyra për media. Ndërsa kjo e fundit nuk ka koment për këtë temë. “Ju lutemi drejtohuni Policisë së Kosovës me këto pyetje”, ka qenë përgjigja e zyrtares për informim në MPB, Rroksana Qarri..