Tri aksidente të trafikut kanë ndodhur brenda 24 orësh në regjionin e Prizrenit. Policia e Kosovës njofton se në të tri aksidentet fatmirësisht nuk ka pasur asnjë viktimë.

Aksidenti i parë ka ndodhur në rruga “Reshtani” në Suharekë.“Raportohet për një aksident trafiku në mes të dy automjeteve civile me ngasës meshkuj K/Shqiptarë. Përveç, dëmeve materiale lëndime trupore ka pësuar njëri nga drejtuesit e veturës i cili është dërguar për trajtim mjekësor në QKUK”, njofton Policia e Kosovës.

Aksidenti i dytë ka ndodhur në rr. “Transite” në Rahovec.”Përveç dëmeve materiale, lëndime trupore kanë pësuar dy drejtuesit e automjeteve si dhe katër bashkudhëtarë, të cilëve u është ofruar tretman mjekësor. Njëri nga vozitësit mbetet në tretman mjekësor në QKUK ndërsa të tjerët lirohen në shtëpi”.

Kurse, aksidenti i tretë ka ndodhur në fshati Mrasor të Rahovecit” Raportohet për një aksident trafiku në mes të dy automjeteve civile me ngasës meshkuj K/Shqiptarë. Përveç dëmeve materiale lëndime trupore kanë pësuar njëri nga vozitësit e automjetit dhe një bashkudhëtar i njërës nga veturat të cilëve u është ofruar tretman mjekësor në spitalin e Gjakovës e më pas janë liruar për në shtëpi.”/PrizrenPress.com/

Organizata Joqeveritare “EC Ma Ndryshe” nis ciklin e debateve “Planifikim urban me pjesëmarrje”.

Flaka Xërxa, koordinatore projekti tha se qëllimi i këtyre debateve është prezantimi i të gjeturave të fokus grupeve me shtatë grupe të komunitetit në Prizren për identifikimin e problemeve dhe gjetjen e zgjidhjeve në raport me planifikimin urban.
“Debatet do të jenë forume të avokimit publik ndaj qeverisë lokale, ku pjesëmarrës do të jenë përfaqësues të grupit përkatës të komunitetit, komunës, shoqërisë civile, medias, qeverisë qendrore dhe ekspertë të planifikimit urban”. Ky cikël i shtatë debateve realizohet në kuadër të projektit “Qyteti Gjithëpërfshirës…” që përkrahet nga Olof Palme International Center, e cila mbështetet nga Qeveria e Suedisë.

“Debati i radhës i ciklit “Planifikim urban me pjesëmarrje” mbahet më 08 tetor 2014 (e mërkurë), në Restaurant Marashi në Prizren duke filluar nga ora 11:00”, tregon ajo.

“Fokusi i debatit të pestë është gjendja e kësaj lagjeje të Prizrenit dhe sfidat me të cilat përballen banorët e saj në raport me planifikimin urban”.

Për të diskutuar mbi temën “Banorët e lagjes Tusuz dhe planifikimi urban në Prizren”, EC Ma Ndryshe ka ftuar banorë të kësaj lagjeje, aktivistë dhe përfaqësues të OJQ-ve, përfaqësues të komunës së Prizrenit dhe të organizatave të shoqërisë civile për pjesëmarrje në këtë debat.
Panelistë të debatit do të jenë: Hasan Hasani, Drejtor i Drejtorisë së Shërbimeve Publike (në pritje të konfirmimit) dhe Naser Berisha, banor i lagjes, ndërsa debati do të moderohet nga Elmedina Baxhaku.

Çështjet për të cilat do të diskutohet në këtë debat janë: Infrastruktura rrugore (rrugët dhe trotuaret), Transporti urban, Ndërtesat dhe hapësirat publike, Shkollat, Sportet, Punësimi, Edukimi, Shëndetësia, Kultura dhe Mjedisi. Gjatë debatit do të prezentohen edhe të gjeturat e anketës së fundit me 400 respondentë në Prizren mbi perceptimet e qytetarëve për planifikimin urban./PrizrenPress.com/

Presidentja Atifete Jahjaga duket se do të jetë më e prerë në veprime gjatë kësaj jave.

Është bërë e ditur se ajo sot pritet t`i presë në tavolinën e saj propozimet e liderëve të partive politike për daljen nga kriza institucionale.

Analistë politikë ndërkaq insistojnë në fuqizimin e rolit të presidentes sipas mandatit të saj që parashihet me Kushtetutë.

Një vendim që pati e marrë Qazim Qeska në vitin 2010 i pati kushtuar jo vetëm atij personalisht por edhe Partisë Demokratike të Kosovës. Duke dhënë dorëheqje nga pozita e të parit të Rahovecit, e pati çuar komunën në zgjedhje të parakohshme. E në përfundim të garës zgjedhore, vendin e Qeskës e pati zënë Smajl Latifi i AAK-së.

Qeska s’pati mundur t’i evitonte zgjedhjet edhe pse i pati rënë “pishman” për dorëheqje. Zgjedhjet s’pati mundur t’i shmangte as Hashim Thaçi si kryeministër, duke mos e konsideruar si të mirëqenë dorëheqjen e bashkëpartiakut. Ishte Gjykata Kushtetuese ajo që e pati marrë si relevant aktin e dorëheqjes e jo atë të rikthimit në punë të Qeskës.

Këtë e kishte bërë duke iu përgjigjur kërkesës për interpretim nga ish-presidenti Fatmir Sejdiu. Ky i fundit, më pas, në pajtim me kompetencat kushtetuese i pati shpallur zgjedhjet për Rahovec. Pjesë e panelit që e kishte hartuar vendimin në rastin Qeska, atëbotë ka qenë gjyqtari amerikan, Robert Carolan../tribuna/

Diplomati rus në Prishtinë, Andrey Y. Shugurov, është i bindur se minoritetet nuk kanë të ardhme në Kosovë, prandaj, siç thotë ai, shkëmbimi i territoreve mes Kosovës dhe Serbisë do të ishte opsioni më i arsyeshëm për të dyja palët.

Sipas tij, përfshirja e komunave veriore në kuadër të Kosovës në vitin 1959 ka qenë artificiale, kështu që situata duhet të kthehet në mesin e shekullit të kaluar, kur Lugina e Preshevës ishte Kosovë, e pjesa veriore Serbi.

“Mendoj se ky do të ishte opsioni më i arsyeshëm. Por, po e përsëris ky është mendimi im personal që është krijuar pas pesë viteve që po qëndroj këtu në Kosovë”, thotë për gazetën “Zëri” Shugurov, udhëheqës i Zyrës ruse në Prishtinë, e cila funksionon në kuadër të Ambasadës Ruse në Beograd…/zëri/

Kryetari i Komisionit Trilateral, Jean-Claude Tricet, e ka ftuar presidenten e Kosovës, Atifete Jahjaga, të marrë pjesë në forumin e këtij komisioni, i cili do të mbahet në Beograd nga 31 tetor deri më 2 nëntor. Presidenca ka konfirmuar marrjen e ftesës, por nuk ka treguar nëse shefja e shteti do të marrë pjesë në këtë forum, ku do të diskutohet për shtetet kandidate të Ballkanit Perëndimor dhe rruga e integrimit të tyre në BE.
Këshilltari i presidentes Jahjaga, Arbër Vllahiu, ka thënë për “Epokën e re” se vendimi për pjesëmarrjen ose jo të presidentes në këtë forum do të publikohet me kohë. “Presidentja zyrtarisht ka marrë ftesën për këtë forum, ndërsa çështjet e tjera janë në diskutim e sipër. Për çdo gjë do të informohemi me kohë”, ka deklaruar Vllahiu.

Ndërsa simboli i rezistencës kombëtare, Adem Demaçi, ka deklaruar për “Epokën e re” se presidentja e Kosovës duhet të shkojë në këtë takim dhe duhet të thotë fjalë të forta. “Presidentes nuk i bie copa të shkojë në Beograd, vetëm se duhet ta dijë se çka po flet me ta atje. Ne luftën e kemi mbaruar me ta. Nuk është problemi për t’u takuar ose për të mos u takuar, por duhet të dimë se çka të kërkojmë prej tyre dhe çka po kërkojnë ata. Ne i kemi ata fqinjë të parë dhe nuk ke ku i çon. Pra, nuk ke qare pa u takuar me ta”, ka deklaruar Demaçi.

Ai ka bërë me dije se presidentja Jahjaga në Beograd duhet të kërkojë nga Serbia zbatimin e marrëveshje të arritura në Bruksel. “Presidentja duhet të kërkojë atje që ato marrëveshje që i kemi nënshkruar në Bruksel më 19 prill të vitit 2013 t’i zbatojë, sepse Serbia deri më tani asnjë prej tyre nuk i ka realizuar. Kështu që, nuk ka kuptim t’i vazhdojmë bisedimet me Serbinë dhe kjo asnjë marrëveshje të mos zbatojë. Meqë bashkësia ndërkombëtare po insiston që këto dy shtete të afrohen, atëherë presidentja le të kërkojë prej Serbisë t’i zbatojë të gjitha ato marrëveshje që janë nënshkruar deri më tani, si dhe të kërkojë që Serbia të mos japë deklarata se nuk do ta pranojë Kosovën kurrë shtet. Pra, presidentja duhet të flasë fjalë të forta e të mos tutet”, është shprehur Demaçi.

Sipas tij, shefja e shtetit duhet të deklarohet edhe në Beograd se Republika e Kosovës është për fqinjësi të mirë, por këtë duhet ta dëshmojë edhe Serbia. “Presidentja atje duhet të tregojë se Kosova është për fqinjësi të mirë me të gjitha shtetet që ka përreth. Por, fatkeqësisht, Serbia nuk po dëshiron fqinjësi të mirë me neve. Serbia çdoherë po e shfrytëzon rastin, duke thënë se nuk e ka as mendjen ta pranojë Kosovën si shtet. Serbia, gjithashtu, po bën presion te shtetet e ndryshme të botës nëpërmjet shantazheve të ndryshme të mos e njohin Kosovën si shtet”, ka deklaruar Demaçi, duke shtuar se Serbia para vendeve anëtare të BE-së po deklarohet se është e gatshme për t’u integruar në BE, në anën tjetër nuk po ndërmerr hapa që e dërgojnë në atë drejtim.
Veprimtari i shquar i çështjes kombëtare, Adem Demaçi, ka deklaruar se Serbia pa kërkim falje, pa pajtim me Kosovën dhe pa normalizim të marrëdhënieve me Kosovën nuk do të mund të bëhet anëtare e BE-së.

Gjithashtu, ai ka thënë se presidentja duhet t’i përmendë në Serbi të drejtat që Kosova ua ka garantuar serbëve brenda terrorit të saj. “Ne ua kemi dhënë serbëve të Kosovës që janë 5 apo 6 për qind të drejtat sikur të ishin ata 30 për qind. Askush në botë nuk ua jep këto të drejta. Zakonisht minoriteve u jepen ato të drejta lokale që u takojnë. Ndërsa ne gjuhën serbe e kemi bërë gjuhë shtetërore, sikurse gjuhën shqipe.

Këtë veç shqiptarët e kanë bërë. Pra, presidentja e Kosovës duhet t’ua numërojë këto të drejta që ne ua kemi dhënë serbëve dhe të tregojë se këtë askush deri tash nuk e ka bërë”, ka vlerësuar Demaçi. Në këtë kontekst, ai ka thënë se edhe presidentja dhe gjithë përfaqësuesit e tjerë duhet të kërkojnë që shqiptarëve të Luginës së Preshevës t’u njihen të gjitha të drejtat që Kosova ua ka njohur serbëve që jetojnë brenda territorit të saj.

“Presidentja duhet t’ua tërheqë vërejtjen Evropës dhe Serbisë, se ato të drejta që po ua njohim ne vullnetarisht dhe me dëshirë serbëve këtu, duhet që edhe Serbia t’ua njohë edhe shqiptarëve që jetojnë në Preshevë, Bujanoc dhe Medvegjë. Kjo është drejtësia e Zotit dhe demokracia të cilën Evropa duhet ta përkrahë. Kurse vëllezërit tanë atje të trajtohen si qytetarë të rendit të dytë apo të tretë, e ne këtu t’ua japim krejt ato që po i kërkojnë serbët”, ka thënë Demaçi

Në këtë krizë politike pothuajse të gjithë zyrtarët partiakë e pushtetarë në Kosovë kanë rënë në provim dhe, cili më pak, cili më shumë e cili krejtësisht janë komprometuar politikisht, kështu thotë akademik Rexhep Qosja.

Në një intervistë dhënë për “Gazeta Shqiptare”, të cilën e boton edhe “Epoka e re”, Qosja ka thënë se krizën politike e shkaktoi grupi, tani i quajtur blloku, i përbërë prej Isa Mustafës, Ramush Haradinajt, kryetarit e sekretarit të Nismës, Fatmir Limaj e Jakup Krasniqi.

“Ata në të vërtetë para se të mbyllej procesi i numërimit të votave të zgjedhjeve të 8 qershorit, bënë një puç të tipit afrikan: u turrën të bëjnë qeverinë sepse, thanë: bashkërisht, me aleancën që krijuam pas zgjedhjeve, kemi shumicën! Këtij grupi puçist iu bashkua edhe kush nuk pritej se do t’i bashkohej: Vetëvendosja. Puçi i tyre i nxitur nga pasioni për pushtet vetjak nxiti pasionin vetëmbrojtës të Partisë Demokratike. Dhe, kështu pasionet instiktive pushtetore dhe etjet pasurore me lakmitë privilegjuese të këtyre puçistëve dhe kundërpuçistëve vazhdojnë që tre muaj e tri javë. Dhe, kështu, me pasionet e tyre tragjikomike e cenuan keqas e pafalshëm konceptin e Kosovës shtet!”, ka thënë Qosja.

Sipas Qosjes, kriza e ka dëmtuar dhe vazhdon ta dëmtojë fort Kosovën dhe t’i dëmtojë mentalitetin dhe kulturën politike shqiptare në sytë e të tjerëve në Evropë e në botë në përgjithësi. “Çfarë njerëzish të politikës janë ata që as për tre muaj e tri javë nuk mund të merren vesh për formimin e Kuvendit dhe krijimin e Qeverisë? Çka në të vërtetë duan ata? Çka në të vërtetë nuk duan ata?”, ka deklaruar Qosja.

Ai ka vlerësuar se të gjithë zyrtarët partiakë e pushtetarë kanë rënë nga provimi dhe janë komprometuar politikisht duke menduar për pushtetin e jo për shtetin. “Dhe, kështu, në këtë krizë politike, pothuajse të gjithë zyrtarët partiakë e pushtetarë në Kosovë kanë rënë në provim dhe, cili më pak, cili më shumë e cili krejtësisht janë komprometuar politikisht. Ata treguan se mendojnë vetëm për pushtetin e vet, për leverditë e veta e jo për qeverisjen demokratike, për interesat e Kosovës”, ka theksuar Qosja.

Sipas tij, humbës politikë janë kryetarët e partive të dala nga UÇK-ja dhe Vetëvendosja, kurse fitues është kryetari i Lidhjes Demokratike të Kosovës. “Heronjtë e luftës çlirimtare pranojnë të ecin pas rrogëtarit të dikurshëm të kasapit të Ballkanit dhe pastruesit etnik të shqiptarëve-të ecin, të rreshtohen pas tij e të bëjnë politikën e tij! Përmbysje tepër dëshpëruese! Në këtë moçal politik, në të cilin luftëtarët Ramush Haradinaj, Fatmir Limaj dhe Jakup Krasniqi e lanë dhe e shpërlanë Isa Mustafën, pas tre muajsh u zhyt edhe Albin Kurti! Ky djalosh i zgjuar, që lexon, që mendon drejt për shumë çështje, hoqi dorë prej të gjitha atyre fjalëve që kishte shqiptuar për të kaluarën antikombëtare politike rrahmanmoriniane dhe millosheviqiane të Isa Mustafës dhe për, si thoshte, përfitimet e llojllojshme materiale të Ramush Haradinajt, të Fatmir Limajt e të partizanëve të tyre në Kosovën e privatizuar dhe me sapun venus filloi t’i lajë e t’i shpërlajë të përzgjedhurit e tij, në të vërtetë përdoruesit e tij të udhëhequr prej Isa Mustafës! Për disa poste administrative të vetes e të bashkëpunëtorëve të vet Albin Kurti i ktheu në hiçgjë politikën dhe etikën me të cilat Vetëvendosja ishte bërë zë i ri dhe shpresëdhënës në Kosovë”, është shprehur Qosja, duke shtuar se në këtë moçal politik ka rënë edhe Hashim Thaçi. Në këtë kontekst, ai ka thënë se presidentja Jahjaga nuk ka bërë asgjë karshi krizës politike. “E si të bëjë? Identiteti i saj më shumë se në prestigjin e paqenë politik mbështetet në kostumet e saj luksoze!”, ka theksuar Qosja.

Ai ka thënë se të drejtën që të krijojë qeverinë e ka Partia Demokratike, sepse ajo i fitoi zgjedhjet. Qosja ka deklaruar se pas gjithë kësaj tollovie politike, pa urtësi politike, Hashim Thaçit i mbetet të mendojë e t’i nxjerrë konkluzionet: nga e gjithë kjo revoltë ndaj tij, revoltë e partive politike, revoltë e intelektualëve dhe çerekintelektualëve, e organizatave joqeveritare, e disa medieve, e një numri të dukshëm të ish-luftëtarëve!

Qosja ka folur edhe për arrestimet e imamëve, duke thënë se është kundër shkuarjes së shqiptarëve në luftërat e të ashtuquajturit ISIS në Irak, Siri apo kudo tjetër në Lindje të Mesme. “E dënoj shkuarjen dhe përkrahjen në çfarëdo mënyre të pjesëmarrjes së shqiptarëve në terrorizmin e ISIS-it, por nuk e pranoj as Zyrën, në të vërtetë Qendrën që ka hapur Dom Lush Gjergji për konvertimin e shqiptarëve të besimit mysliman në Kosovë”, ka thënë ndër të tjera Qosja.