Sapo kalon qytetin e Lezhës dhe futesh në superstradën drejt qytetit të Shkodrës, në të djathtën e udhëtimit, një tabelë të orienton për te “Mrizi i Zanave”, një lokal që gjendet mbi fshatin Fishtë të Lezhës.

Pasi merr kthesën djathtas dhe ecën drejt fshatit Fishtë, në krahun e majtë të rrugëtimit tënd, të tërheq vëmendjen një shtëpi e rrënuar gati në shembje që të thonë se është e poetit, filozofit dhe predikuesit shpirtëror At Gjergj Fishtës.Kur e shikon në atë gjendje nuk mund ta besosh se kjo është vërtetë banesa ku Ai krijoi kryeveprat e letërsisë shqiptare. Vet emri madhështor i Fishtës, nuk të lejon ta besosh. Kjo është e vërteta. Strukturat shtetërore deri më sot, nuk janë kujdesur për të, që ta kthejnë në një institucion pelegrinazhi për poetët, shkrimtarët, dashamirësit e letërsisë, si dhe të turistëve të huaj për të prezantuar gjigantin e letrave shqipe.

Atë që nuk e bëri dot shteti, kanë marrë përsipër ta bëjnë disa biznesmenë nga Kosova, transmeton ATSH. Sabri Maxhuni, një biznesmen kosovar është vetofruar për financimin e plotë të ndërhyrjes që duhet kryer për ta bërë të vizitueshme shtëpinë e At Gjergj Fishtës.

“Kam bërë projektin se si duhet restauruar shtëpia e At Gjergj Fishtës, gjithmonë duke ruajtur origjinalitetin ashtu siç ka qenë. Kemi mundësinë për të bërë financimin për restaurimin e saj, prandaj unë besoj se nuk duhet të kemi ndonjë pengesë për këtë”, shprehet biznesmeni nga Kosova në një prezantim mediatik.

Ai ka paraqitur kërkesën edhe projektin që, sipas tij, ruan identitetin e kësaj shtëpie, ndonëse ende nuk ka marrë një përgjigje nga Ministria e Kulturës.

“Kam bindjen se askush nuk ka arsye që të bëhet pengesë për restaurimin e shtëpisë. Më vjen keq ta them por mua më duket se rinia dhe fëmijët tanë dinë për të madhin At Fishta”, thotë ai.
Kërkesa ndonëse i është dërguar edhe Drejtorisë Rajonale të Kulturës Kombëtare në Shkodër, sërish nuk ka pasur asnjë reagim konkret. Shpresojmë që së shpejti të njoftojmë për fillimin e punimeve në restaurimin e kësaj vepre monumentale të historisë sonë kombëtare

Prof. Dr. Ramë Vataj, sot ka pranuar zyrtarisht detyrën e rektorit të Universitetit “Ukshin Hoti” në Prizren, nga ana e u. d. të rektorit të gjertanishëm, Prof. Dr. Zahadin Shemsidini.

Në fjalën e tij në një konferencë për shtyp, rektori Vataj falënderoi të gjitha menaxhmentet e gjertanishme për punën e bërë në të mirë të Universitetit dhe u zotua që do të punojë me të gjitha kapacitetet e tij për ta zhvilluar këtë Universitet.

“Unë besoj dhe angazhohem me të gjitha kapacitetet e mia njerëzore, akademike e intelektuale dhe i vë në dispozicion të gjithë punëtorëve të Universitetit, kolegëve, stafit akademik dhe asistentëve që të realizojmë qëllimin për një Universitet të zhvilluar në çdo aspekt që do të krenohemi të gjithë”, u shpreh ai, duke shtuar se një respekt të veçanet do të kenë studentët që janë pjesë e Universitetit të Prizrenit.

“Nuk do të kursehemi që puna akademike e shkencore e Universitetit të Prizrenit të avancohet. Unë zotohen se bashkë me stafin që do ta kem, do të jemi në shërbim të gjithëve dhe do ta kemi parim të respektojmë ligjin dhe statutin dhe rregulloret që kanë të bëjnë me arsimin e lartë dhe do të punojmë ndershmërisht dhe paanshmërish në të mirën e të gjithëve”, është zotuar rektori Vataj.

U. D. i gjertanishëm i rektorit të UPZ-së, Prof. Dr. Zahadin Shemsidini, tha se rektori i ri ka një përvojë pedagogjike mjaftë të gjatë dhe shprehu besimin e tij që Rektori Vataj bashkë me menaxhmentin e ri dhe të gjithë punëtorët do ta qojnë përpara Universitetin.

Të pranishëm në këtë ceremoni ishin edhe Kryesuesi i Këshilli Drejtues të UPZ—së, Avdulla Aliu, zv.kryesuesi Bekim Gashi dhe zyrtarë të tjerë të Universitetit.

“Së bashku të gjithë duke e dhënë kontributin ky Universiteti do të shkojë përpara dhe për këtë nuk dyshoj. Reaktorit të ri i dëshiroj shëndet dhe sukses në punën e mëtutjeshme”, u shpreh Shemsidini.

Ndërkaq, edhe Kryetari i Këshillit Drejtues të UPZ-së, Prof. Dr. Avdullah Aliu, e uroi rektorin e ri për marrjen e detyrës duke i dëshiruar shëndet dhe suksese në punë.

”Urojmë për një ardhmëri të mirë të këtij Universiteti”, u shpreh kryetari i Këshillit Drejtues të UPZ-së./PrizrenPress.com/

(E plotësuar) Iniciativa për Mbrojtjen e Kino Lumbardhit sot ka dorëzuar kërkesën në Ministrinë e Kulturës për shpalljen e Kino Lumbardhit në Prizren, pronë e mbrojtur e trashëgimisë kulturore. Në kërkesën e nënshkruar nga Eroll Bilibani (drejtor i Dokufest) në emër të 58 organizatave të Iniciativës, janë ofruar argumentet për përfshirjen e Kino Lumbardhit në Listën e Trashëgimisë Kulturore.

“Ligji për Trashëgiminë Kulturore dhe Rregullorja për shpalljen në mbrojtje ligjore, parashohin kriteret (vlerat) për përfshirjen e një prone në Listën e Trashëgimisë Kulturore. Kinemaja Lumbardhi plotëson së paku katër nga këto kritere: historike, shoqërore, teknologjike dhe rariteti. Kinoja është njëra ndër objektet më të vjetra publike që ka mbijetuar në Prizren (historike). Ajo është dëshmi e traditës filmike të qytetit dhe ka ndikuar në formësimin e identitetit kulturor dhe shoqëror të komunitetit (shoqërore). Kinoja ka sjellë në Prizren teknikën e avansuar të asaj kohe të projektimit përmes shiritit filmik 35 milimetërsh në ekranin e madh (teknologjike). Stili i ndërtesës (përmasat dhe posedimi i pjesës së hapur krahas asaj të mbyllur) paraqet një ekzemplar të rrallë në Kosovë dhe rajon, jo vetëm në kohën e ndërtimit, po edhe sot (rariteti)”, thuhet në kumtesën e 58 organizatave të shoqërisë civile, pjesë e Iniciativës për Mbrojtjen e Kino Lumbardhit.

Në kërkesën e Iniciativës elaborohet edhe baza ligjore, e cila aktualisht i jep mbrojtje Kino Lumbardhit. Kjo bazë ligjore rrjedh nga Ligji për Trashëgiminë Kulturore, Plani i Konservimit dhe Zhvillimit të Zonës Historike të Prizrenit, Strategjia Orientuese për Zhvillimin Kulturor të Prizrenit dhe Ligji për Qendrën Historike të Prizrenit. Duke u thirrur në bazën ligjore dhe vlerat e Kino Lumbardhit, Iniciativa ka kërkuar nga Ministria e Kulturës dhe Këshilli i Kosovës për Trashëgimi Kulturore që të shqyrtojnë kërkesën për shpalljen e Kino Lumbardhit pronë e mbrojtur e trashëgimisë kulturore. Pjesë e kërkesës janë edhe dokumentacioni plotësues në mbështetje të argumenteve për dhënien e kërij statusi.

“Shpallja e Kino Lumbardhit pronë e mbrojtur e trashëgimisë kulturore do të shpëtonte atë nga degradimi i mëtejmë dhe në të njëjtën kohë do të rifunksionalizonte atë si hapësirë kulturore multifunksionale. Për më tepër, ky veprim do të ndalonte edhe privatizimin e Kinos, proces i nisur nga Agjencia Kosovare e Privatizimit. Në raport me këtë proces, edhe Kuvendi i Komunës së Prizrenit, më 18 shtator 2014 ka marrë vendim për shpalljen e Kino Lumbardhit si zonë e interesit të përgjithshëm publik, për të ndaluar privatizimin dhe rifunksionalizuar atë si hapësirë kulturore”.

“Për më tepër, komuniteti kulturor i Prizrenit dhe i Kosovës ka vullnet dhe gatishmëri për të qenë pjesë e procesit të menaxhimit të Kino Lumbardhit. Shpallja e Kinos pronë e mbrojtur e trashëgimisë kulturore dhe eventualisht ndalja e procesit të privatizimit, do të hapnin rrugë për bartjen e pronësisë tek Komuna e Prizrenit. Nëse komuna e Prizrenit ka gatishmëri për funksionalizim dhe e bart menaxhimin e Kinos tek Rrjeti i Organizatave të Kulturës në Prizren, ky Rrjet tashë ka edhe Plan konkret për: Hartimin dhe zbatimin e Planit të Menaxhimit dhe sigurimin e qëndrueshmërisë financiare të Kino Lumbardhit”.

“Kino Lumbardhi në Prizren është njëra ndër dëshmitë dhe vlerat më të rëndësishme të identitetit kulturor të shoqërisë kosovare. Ruajtja e kësaj vlere është obligim i gjeneratave aktuale të shoqërisë. Për këtë arsye, ne, organizatat e shoqërisë civile nga e gjithë Kosova, jemi bashkuar rreth Iniciativës për Mbrojtjen e Kino Lumbardhit. Përmes këtij veprimi të përbashkët, kemi dëshirë të qartësojmë qëndrimin tonë të vendosur si dhe gatishmërinë tonë për t’i përdorur të gjitha mjetet demokratike për të kundërshtuar rrënimin e ndërtesës apo tjetërsimin e funksionit primar të Kino Lumbardhit. Bazuar në argumentet tona, ne kërkojmë ndaljen e procesit të privatizimit dhe shprehim mospajtimin tonë me përpjekjet për të rrënuar pjesë të caktuara të Kino Lumbardhit”. /PrizrenPress.com/

Kërkohet mbrojtja e Kino Lumbardhit

Organizata të ndryshme do të dorëzojnë sot në Ministrinë e Kulturës, Rinisë dhe Sportit dokumentacionin për shpalljen e Kino Lumbardhit si pronë të trashëgimisë kulturore në mbrojtje të ligjit.

E gjithashtu edhe zhvillimet e reja për mbrojtjen dhe funksionalizimin e këtij objekti.

Veprimet për mbrojtjen e Kino Lumbardhit, janë përkrahur nga dhjetëra organizata vendore e ndërkombëtare, ndërkohë pas dorëzimit të dokumentacionit do të ketë edhe një deklaratë për media nga organizatorët.