Ish-anëtari i Shtabit të Përgjithshëm të UÇK-së, Xhavit Haliti, ka thënë se Kosova duhet ta kalojë edhe një sfidë, raportin e prokurorit të Task Forcës për Hetime Speciale të BE-së, Clint Williamson.

Sipas tij, ky raport nuk mund ta dëmtojë imazhin e luftës së UÇK-së.

Në këtë intervistë për “Epokën e re”, Haliti ka thënë se, në rast se do të ketë një proces gjyqësor mbi bazën e raportit të Williamsonit atëherë, sipas tij, do të shfajësohen UÇK-ja dhe NATO-ja.

“Është një proces që do ta shfajësojë nga këto akuza Kosovën, në të njëjtën kohë publikisht do ta shfajësojë edhe NATO-n”, ka deklaruar Haliti.
Në këtë kontekst, Haliti ka thënë se nuk ka kurrfarë shanse të dëshmohet se gjatë luftës ka pasur trafikim të organeve.
“Një fakt dua ta them, nuk kam besuar dhe nuk besoj kurrë se mund të ketë pasur transplantim të organeve. Nuk ka shans që me këtë çështje të jetë i implikuar Shtabi i Përgjithshëm i UÇK-së. Nuk jam mjek, por nuk besoj të ketë pasur mundësi të transplantimit të organeve. Edhe vetë serbët kanë dhënë shpjegime se asnjëri e as tjetri nuk kanë pasur mundësi të bëjnë transplantim të organeve as në një shtëpi të verdhë e as në një shtëpi të kuqe”, është shprehur Haliti.
Xhavit Haliti, i cili është anëtari i Kryesisë së Partisë së Kosovës (PDK), ka folur edhe për situatën e krijuar politike në vend sa i përket formimit të institucioneve të reja.

Ai beson se Gjykata Kushtetuese do ta rikthejë nga fillimi seancën konstituive të Kuvendit të Kosovës e cila është mbajtur më 17 korrik.
Haliti ka thënë se deputetët e koalicionit LDK-AAK-Nisma kanë bërë gabime të rënda ligjore dhe procedurale gjatë kësaj seance.
“Ata kanë bërë gabime të rënda gjatë seancës konstituive. Nuk jam i sigurt, por besoj se seanca do të rifillojë”, ka deklaruar Haliti.

Pavarësisht kësaj, Haliti ka thënë se Kosovës i duhet një qeveri stabile, e cila e ka numrin e sigurt të votave për t’i shtyrë proceset përpara.
“Në duhet ta ndryshojmë Kushtetutën, duhet t’i miratojmë disa ligje të cilat janë jo shumë të këndshme për Kosovën dhe që ndërlidhen me Gjykatën Speciale. Po ashtu, duhet ta bëjmë rishikimin e buxhetit sa më shpejt dhe t’i miratojmë në Kuvend vendimet që janë kaluar më herët nga Qeveria e të cilat kanë të bëjnë me zhvillimin e Kosovës”, ka thënë Haliti.

Ai ka bërë me dije se PDK-ja nuk e kundërshton koalicionin qeverisës as me LDK-në, as me AAK-në, as me Nismën.
Haliti ka thënë se mbajtja e zgjedhjeve të reja mund të sjellë një prolongim të institucioneve.
“Po ashtu, do të krijonte edhe pakënaqësi dhe do ta sillte Kosovën në një situatë jo të këndshme për shkak të proceseve që janë në zhvillim”, është shprehur Haliti.

PDK-ja ka marrë përgjigje negative të premten, në kërkesën e saj të publikuar po këtë ditë për të formuar një qeveri të spektrit të gjerë.

Koalicioni paszgjedhor LDK-AAK-Nisma e do në opozitë PDK-në.

“Grupi parlamentar LDK-AAK-Nisma dhe të 83 deputetët jemi që të formojmë një Qeveri pa PDK-në. Nuk pranojmë kurrfarë oferte, e në këtë rast as atë që ka dalë nga PDK-ja”, i ka thënë Kohës Ditore zyrtari i LDK-së, Ismet Beqiri.

“Është absurde dhe, në një masë, qesharake të flasim për një qeverisje me më shumë numra, me mbi 80. Pra, po kërkon një parti e cila për vite të tëra në këmbë të qelqta e ka mbajtur Qeverinë dhe, siç e dini, shpeshherë nuk ka pasur as numra e as kuorum për të votuar ligje të caktuara”

Për pjesëmarrje në seancën dëgjimore në rastin e kryeparlamentarit, Gjykata Kushtetuese i ka ftuar për të marrë pjesë “parashtruesin e kërkesës, si dhe përfaqësuesit zyrtarë të 14 subjekteve të tjera politike në Kuvendin e Kosovës”.

Juristët e kanë parë këtë si një indicie që eventualisht kjo gjykatë e ka një qasje që i jep një përparësi konceptit “parti politike” në Parlament përballë konceptit “grup parlamentar”.

Beteja juridike ndërmjet PDK-së dhe koalicionit LDK-AAK-Nisma zhvillohet për këto koncepte.

Kërkesa për seancë dëgjimore është vlerësuar si një veprim i gabueshëm i koalicionit LDK-AAK-Nisma.

Sipas Fisnik Korenicës, pas aprovimit nga ana e Gjykatës, kërkesa e tillë e ka shtyrë procesin e konstituimit të institucioneve për së paku 3-4 javë krahasuar me një situatë në të cilën nuk do të bëhej një kërkesë e tillë./Koha Ditore/

Javët në vazhdim do të jenë me të reshura të shiut, por muajt e vjeshtës do të jenë të nxehtë.

Kështu thonë meterologët, të cilët shirat e rrëmbyeshëm të ditëve të fundit, i ndërlidhin me prerjet masive të drunjëve.

Madje, sipas profesorit Sylë Tahirsylaj, ditët në vazhdim mund të priten edhe vërshimet.

“Ka rrezik të vërshimeve, por jo vetëm nga qielli por edhe për shkak të kanalizimeve dhe degradimit të natyrës”, ka thënë Tahirsylaj për RTK-në.

Temperatura më e lartë deri në fund të javës, sipas tij, do të shkojë deri në 34 gradë Celsius.

Por ai ka thënë se temperaturat do të rriten kah tetori, ku parashihet të ketë temperatura deri në 30 gradë celsius.

Problemi mjedisor, me të cilin është ballafaquar Kosova prej vitesh me pickimin e rriqrave dhe ethet hemorragjike, sipas profesionistëve shëndetësorë, është bërë një problem kronik.

Zyrtarë në Institutin Kombëtar të Shëndetit Publik kanë bërë të ditur se Ministria e Shëndetësisë bashkë me Qeverinë e Kosovës dhe institucione tjera relevante, kanë ngritur një komitet ndërministror, i cili këtë vit ka shërbyer për parandalimin e sëmundjes në fjalë.

Si rezultat, këtë vit nuk ka pasur vdekje të personave nga ethet hemorragjike, krime kongo.

Ndryshe, nga ethet hemorragjike vetëm gjatë vitit 2013, kanë vdekur 11 persona dhe janë pickuar nga rriqrat 5.200 qytetarë, raporton REL.

Këtë vit kur edhe është paraqitur rasti i parë i pickimit nga rriqrat me datën 8 shkurt në Malishevë, ndihmë mjekësorë në këtë vend kanë kërkuar 2,125 qytetarë.

Drejtori i Qendrës Kryesore të Mjekësisë Familjare në Malishevë, Besim Zogaj, jep hollësi të tjera.

“Këtë vit situata paraqitet më e qetë krahasuar me vitet e kaluara. Nga data 8 shkurt kur edhe është paraqitur rasti i parë i pickimit të rriqrave, 2,125 qytetarë kanë kërkuar ndihmë në Qendrën Kryesore të Mjekësisë Familjare, derisa prej tyre 55 qytetarë janë udhëzuar në Klinikën Infektive, ndërsa 4 kanë rezultuar me ethe hemorragjike, por që asnjë nuk ka humbur jetën këtë vit”.

Ndërkaq, në Klinikën Infektive në Qendrën Klinike Universitare të Kosovës, sipas infektologes Lindita Ajazaj – Berisha, fluksi i pacientëve që kërkojnë ndihmë si pasojë e pickimit nga rriqrat, ka shënuar rënie.

“Këtë vit, 91 pacientë kanë qenë të shtrirë. 372 pacientë është dashur t’ua heqim rriqrat nga trupi. Situata epidemiologjike është nën kontroll. Këtë vit kemi pasur fluks më të vogël, krahasuar me vitin e kaluar. Vetëm 5 raste janë me ethe hemorragjike, por që janë në gjendje të mirë shëndetësore. Asnjë nuk është i hospitalizuar. Të gjithë janë në gjendje të mirë shëndetësore. Këtë vit kemi pasur edhe terapi dhe nuk kemi pasur telashe”, thotë ajo.

Ndërkaq, drejtori i QKMF-së në Malishevë, Besim Zogaj, ka theksuar se pavarësisht situatës së qetë epidemiologjike, sa i përket etheve hemorragjike, ndihmë mjekësore vazhdojnë të kërkojnë qytetarët që pickohen nga rriqrat.

“Është një rënie e numrit. Tash në ditët e fundit 10 deri 15 persona vizitojnë Qendrën e Mjekësisë, por situata është e qetë”, shpjegon Zogaj.

Zyrtarë nga Instituti Kombëtar i Shëndetit Publik thonë se këtë vit, gjithashtu është punuar edhe në vetëdijesimin e popullatës, gjë që konsiderohet si shumë e rëndësishme në uljen e numrit të njerëzve që pickohen nga rriqrat.