Mos arritja e marrëveshjes ndërmjet koalicionit LDK, AAK dhe Nisma me Lëvizjen Vetëvendosje, po i shkon për shtati e po i jep shpresa partisë që i fitoi zgjedhjet e 8 qershorit, PDK së Hashim Thaçit, raporton televizioni Rrokum.

Fjalët nënkryetari të PDK-së, Hajredin Kuçit, se ose PDK ka me formu qeverinë, ose para vetes i kemi edhe një palë zgjedhje, duket se është parashikim që mund të jetë realitet.

PDK po pret zhvillimet finale të koalicionit, që të nis gjahun për subjektin që pranon bashkëqeverisjen me të. Madje, që dy ditë është shtyrë mbledhja e Kryesisë së kësaj partie, që ishte në koherencë të njëjtë me takimet e koalicionit opozitar.

Zyrtarë të lartë brenda partisë së Thaçit, në kushte anonimiteti për televizionin Rrokum janë shprehur të bindur se PDK ka me udhëheq edhe për një mandat me Qeverinë e Kosovës.

Ky zyrtar ka thënë se PDK nuk po rri duarkryq dhe se ata janë të bindur se kanë me realizua planin e tyre.

Megjithatë, ai nuk ka dhënë shumë detaje për planin që tani po e synon PDK.

“Kur t’ja nini krismën”, ka thënë ai, duke shtuar se 61 vota në Kuvend janë problem i vogël për ta. “Posti i kryeparlamentarit absolutisht i takon partisë fituese të zgjedhjeve”.

“Kuvendi i Kosovës i ka 120 deputetë, ndërsa për kryeparlamentar duhen 61 vota. PDK këto vota i ka”, ka shtuar ai.

Por, një zyrtar tjetër, po ashtu i PDK-së, i ka thanë televizionit Rrokum se ata nuk kanë hequr dorë nga synimi i bashkëqeverisjes me LDK-në e Isa Mustafës.

“Jemi në pritje të veprimeve të Mustafës, pas vizitës së tij në Tiranë”, ka thanë ky zyrtar.

Megjithatë, që të gjithë zyrtarët e PDK-së kanë refuzuar të flasin para kamerës, duke shtuar se planet e tyre tani për tani nuk janë për publikun.

Analisiti i çështjeve politike në vend, Shpend Kursani, thotë se dështimi i marrjes vesh të bllokut opozitarë, i shkon për shtati PDK. Madje, sipas tij, LDK e AAK janë dy subjektet politike të cilat kanë mundësi më shumë me e thye marrëveshjen “anti-Thaçi” e me iu bashkua pikërisht të parit të PDK-së. /Rrokum/

Presidentes së Kosovës, Atifete Jahjaga, po i kërkohet që t`i dërgojë në Gjykatën Kushtetuese edhe disa pyetje. Ato do të duhej të kërkonin përgjigje nga Gjykata nëse grupet parlamentare mund të krijohen para konstituimit të Kuvendit të Kosovës nga dy tre parti të dala prej zgjedhjeve dhe kësisoj ta fitojnë të drejtën për ta propozuar kryeparlamentarin.

Tek kjo situatë ka sjellë fakti që partitë politike assesi nuk po pajtohen se kush është grupi më i madh parlamentar që do të ulet në mes të sallës së Kuvendit dhe do të propozojë kryeparlamentarin.

E ky mospajtim si dhe insistimi i PDK-së, por edhe insistimi i koalicionit LDK-AAK-NISMA, se atyre u takon kryeparlamentari, nuk mund të zgjidhet ndryshe pos me ndërhyrjen e shefes së shtetit, presidentes Atifete Jahjaga.

Burime të afërta me presidenten nuk e kanë mohuar mundësinë që kjo zyrë të dërgojë pyetje, por pasi që ta kenë konsultuar mirë lëndën dhe të jenë të bindur se Gjykata Kushtetues nuk do ta refuzojë kërkesën.

Blloku LDK-AAK-Nisma nuk e pranon kërkesën e lëvizjes Vetëvendosje që dialogun me Serbinë ta drejtojë subjekti që e udhëheq Albin Kurti, si dhe që Marrëveshja e 19 prillit e vitit të kaluar të dërgohet në Komisionin e Venecias.

Këto janë dy nga pesë pikat e një aneksi që lëvizja Vetëvendosje e ka nxjerrë në tavolinë në takimin e së hënës. Me tri pikat e tjera LDK-AAK-Nisma janë pajtuar, shkruan Koha Ditore.

Nënkryetari i lëvizjes Vetëvendosje, Visar Ymeri, ka folur të martën për gazetën lidhur me ngecjet në takimin me përfaqësuesit e subjekteve të tjera.

Mbledhja konstituive e Kuvendit të Kosovës, e cila është caktuar të mbahet më 17 korrik (të enjten), po del t’i prish punë bllokut opozitar LDK-AAK-Nisma.

Kështu pasi që Vetëvendosje deri në këtë ditë nuk do të mund ta organizojë referendumin brendapartiak për ta konfirmuar mbështetjen e saj për këtë bllok, me të cilin pastaj do të mund të votohej kryetari i ri i Kuvendit të Kosovës.

Erzen Vraniqi, nga Lëvizja Vetëvendosje, ka thënë për lajmi.net se pa marrëveshje të këtij blloku nuk ka votim. Ndërsa thotë se vetëm nëse shtyhet mbledhja konstituive do të mund ta organizojnë referendumin brenda anëtarësisë së Vetëvendosjes.

“Pa marrëveshje nuk ka votim. Nëse ndërkohë ndodh diçka para të enjtes, atëherë kërkesa duhet të çohet në organet e brendshme të Lëvizjes dhe ato të vendosin se a do të organizojnë referendum, a do ta zgjidhin apo jo, ka kohë apo s’ka kohë. Por, momentalisht, si qëndron situata, nuk ka marrëveshje dhe nuk ka votim të kryetarit të Kuvendit”, ka thënë Vraniqi, transmeton koha.

“Nëse seanca konstituive shtyhet, atëherë ka kohë për referendum”.

Vraniqi ka thënë se koha e mbajtjes së këtij referendumi është përafërsisht një ditë e plotë, me votim të anëtarëve të VV-së nga mëngjesi deri në mbrëmje, pas së cilës gjë duhet të bëhet edhe numërimi i votave të referendumit.

Deputetit të Parlamentit të Kosovës, Zafir Berisha nuk i ka shkuar ndërmend se mund të grushtohet me ndonjërin prej kolegëve në seancën e së enjten. Ai tregon se pas përfundimit të zgjedhjeve, ka menduar vetëm se sit ë nxjerrë në opozitë PDK-në e Hashim Thaçit.

“Personalisht se kam menduar shtyrjen me grushte e karrige. Për mua e rëndësishme është që Hashim Thaçi me shku në opozitë për katër vite, sepse I bënë mirë edhe atij për shëndet”, thotë Berisha për “PrizrenPress”.

Ndërkaq, analistët kanë parashikuar se seance e Parlamentit të Kosovës, të enjten mund të shndërrohet edhe në grushtime ndërmjet deputetëve.

Zafir Berisha thotë se bllokut opozitar i takon që të ulet në mes të Kuvendit.

“Personalisht edhe në ballkon të Kuvendit do të ulesha vetëm që Hasha me shku në opozitë”, thotë Berisha.

Ai shpreson se LDK,AAK dhe Nisma do të arrijnë të krijojnë Qeverinë e re dhe përfundimisht të nxjerrë në opozitë PDK-në e Hashim Thaçit./PrizrenPress.com/

Vendimi i fundit i Kryesisë së Kuvendit se ulëset e mesit i takojnë Koalicionit Opozitar LDK-AAK-Nisma, ka tendosur edhe më shumë situatën mes dy blloqeve edhe ashtu të tensionuar që pas shpalljes së rezultateve preliminare të zgjedhjeve.

Përfaqësues të PDK-së thonë se ulëset qendrore në sallën e Kuvendit i takojnë Grupit më të madh parlamentar, i cili ka dalë nga zgjedhjet nacionale të qershorit. Ata presin që oponentët e tyre të respektojnë vullnetin e qytetarëve.

Nënkryetari i kësaj partie, Adem Grabovci, deklaron për Politiko.net se çështja e pozicionimit të deputetëve në sallë nuk është fontanë dëshirash.

“Mund të shkojnë të kërkojnë ndonjë emision për fontanë dëshirash, por këtu është vullneti i qytetarit të Kosovës që përcakton dhe vendos”, ka thënë ai. “Mos e dashtë Zoti që të ketë përplasje. Qytetarët kërkojnë stabilitet, siguri, zhvillim dhe mirëqenie”.

Ai thotë se KQZ e ka radhitur PDK-në partinë që ka fituar në zgjedhje, prandaj thotë se “me Rregulloren e Kuvendit dhe me dhe ligjet në fuqi, të cilat i ka aprovuar po ajo fuqi, ballina i takon PDK-së dhe koalicionit të saj parazgjedhor”.

Në bazë të vendimit përfundimtar të Kryesisë së Kuvendit, e cila ka rrjedh sot në media, thuhet se deputetët e PDK-së do të ulen në anën e majtë të sallës. /politiko.net/

Zyrtarë gjermanë u kanë thënë AAK-së dhe LDK-së që partia e Albin Kurtit, Vetëvendosje, nuk ka vend në qeverinë e ardhshme të vendit.

Këtë ia kanë konfirmuar KTV-së burime të sigurta të njohura me këto takime.

Mybera Mustafa(LDK) dhe Artan Abrashi (VV) kanë kërkuar nga kryesuesi i Kuvendit Komunal në Prizren,Kujtim Gashi, që të futet në rend të ditës kërkesa e Forumit Transparenca, për hapjen e mbledhjeve për gazetarë të kryetarit Ramadan Muja me drejtorët e Ekzekutivit. Mustafa e Abrashi thanë se në mbledhjen e kryetarit Muja me drejtorët e Ekzekutivit, vendoset për parat e taksapaguesve të qytetarëve.
“Prandaj vendimet se si shpenzohen ato para duhet të jenë transparente”, thanë Mustafa e Abrashi.

Forumi Transparenca të hënën ka shprehur shqetsimin se me gjithë angazhimin e medias dhe shoqërisë civile në Prizren, kryetari i Komunës së Prizrenit Ramadan Muja vazhdon të mbajë të mbyllur procesin e vendimmarrjes dhe menaxhimit të parasë publike.

Duke e konsideruar transparencën si parakushtin themelor të qeverisjes demokratike dhe pasi që deri më tani nuk kemi pranuar asnjë përgjigje, ne anëtarët e Forumit Transparenca kanë ri përsëritur të hënën kërkesën për hapjen e takimeve të Kryetarit me drejtorët.

Kërkesën e kuvendarëve Mybera Mustafa dhe Artan Abrashi, kryesuesi i Kuvendit Komunal Kujtim Gashi nuk e ka futur në rend të ditës.
“Nuk ka nevojë pasi kryetari do t’i hap për media dhe shoqërinë civile takimet me drejtorët”, tha Gashi./PrizrenPress.com/

Presidentja e Republikës së Kosovës, Atifete Jahjaga, u takua sot në Dubrovnik të Kroacisë, me Presidentin e Republikës së Shqipërisë, Bujar Nishani, me të cilin bisedoi për zhvillimet aktuale në rajonin e Ballkanit në përgjithësi.

Jahjaga dhe Nishani vlerësuan marrëdhëniet ndërmjet dy vendeve dhe theksuan nevojën e konkretizimit të platformave të bashkëpunimit, në veçanti në fushën e ekonomisë, duke u bërë shembull i bashkëpunimit në rajonin e Ballkanit.

Ata thanë se pjesëmarrja e vendeve të rajonit, në cilësi të barabarta, në nismat rajonale, ndihmon gjithë Ballkanin Perëndimor ne rrugën e tij evropiane dhe siguron fqinjësinë e mirë si dhe stabilitetin rajonal. Ata thanë se procesi i Bërdo-Brioni është një nismë shumë e mirë, që siguron përfshirjen edhe të BE në projektet e përbashkëta të vendeve të rajonit në fushën e infrastrukturës dhe të energjisë.

Ata biseduan edhe për zhvillimet e tjera politike në Kosovë dhe Shqipëri.

Jahjaga dhe Nishani, së bashku me presidentët e vendeve të tjera të rajonit, po marrin pjesë në Samitin Bërdo-Brioni që mbahet në Dubrovnik të Kroacisë, me mikpritjen e Presidentit Ivo Josipoviq si dhe me pjesëmarrjen e kancelares së Republikës Federale të Gjermanisë zonjën Angela Merkel. /PrizrenPress.com/