Blloku paszgjedhor LDK-AAK-Nisma po pretendon se i ka përafruar qëndrimet me Lëvizjen Vetëvendosje për të lidhur koalicion qeverisës, por ndryshe i shohin gjërat këta të fundit.
Zyrtarët e subjektit të Albin Kurtit, konfirmojnë se nuk janë takuar me ata të bllokut që nga 17 korriku, kur edhe është zhvilluar seanca konstituive e Kuvendit të Kosovës. Përndryshe ata thonë se VV-ja nuk ka hequr dorë nga kushtet që i ka vënë më herët, e sidomos atë që konsiston në dialogun me Serbinë.

Vetëvendosje po kërkon me çdo kusht t’i udhëheqë këto bisedime. Kjo pikë pritet të jetë pjesë e bisedimeve të ardhshme mes palëve tek pas vendimit të Gjykatës Kushtetuese. Edhe pse në opinion qarkulloi një deklaratë e Kujtim Shalës se kriteret e Lëvizjes Vetëvendosje janë të pranueshme për bllokun, një konfirmim të tillë kjo lëvizje nuk e ka marrë.

Erzen Vraniqi, zëdhënës i VV-së, në një prononcim për gazetën ka thënë se atyre askush nuk u ka thënë se janë pranuar apo refuzuar kriteret e tyre, dhe se prej 17 korrikut ditën kur është dashur të nënshkruhej draftmarrëveshja e arritur një ditë më herët asgjë nuk ka ndryshuar

Raporti i rregullt i Sekretarit të Përgjithshëm të Kombeve të Bashkuara Ban Ki-Moon në Këshill të Sigurimit, pritet të jetë një tjetër goditje për Kosovën dhe diplomacinë e saj të brishtë.

Në këtë raport, përveç tjerash, vend të veçantë në kapitullin për sundim të rendit dhe ligjit do të zërë raporti i kryeprokurorit, Clint Williamson, lidhur me pretendimet e ish-senatorit zviceran Dick Marty se gjatë luftës së fundit në Kosovë krerët e UÇK-së kanë kryer krime kundër njerëzimit.

Këto pretendime të cilat kanë ngjallur hamendësime dhe debate të shumta në vend, nga analistët vlerësohen se do të jenë një pasqyrë negative për vendin, institucionet e të cilit ndonëse të brishta në këtë fazë kur funksionojnë pa mandat të plotë, nuk do të duhej që këtë raport ta linin të përfundonte në Këshillin e Sigurimit. Për profesorin e të drejtës ndërkombëtare Avni Mazrekun, dërgimi i raportit të Williamson në Këshill të Sigurimit vetëm sa dëshmon apetitet e Serbisë për të punuar në prishjen e imazhit të Kosovës, e po ashtu dështimin e institucioneve të vendit për të parandaluar këtë veprim të Beogradit zyrtar.

“Raporti i Williamsonit është dashur të mbetet në nivel të Bashkimit Evropian, por apetitet e Serbisë kanë qenë të tilla që kjo çështje të shtrohet edhe në Këshill të Sigurimit, në mënyrë që çështja të internacionalizohet. Mendoj që diplomacia e re në Beograd ka gjetur terren të përshtatshëm për të vepruar”, ka thënë Mazreku. /Tribuna

Kryetari i Degës së Lidhjes Demokratike të Kosovës në Gjermani, Qazim Bajgoraliu, ka dhjetë ditë që ka ardhur në Kosovë dhe ende nuk ka pasur një takim me kryetarin e Lidhjes Demokratike të Kosovës, Isa Mustafa.
Ai ka thënë se në vitet e kaluara në këtë periudhë kohore gjithmonë kanë pasur pritje nga ana e të parit të partisë, por këtë radhë gjërat kanë ndryshuar. Por sivjet Bajgoraliu është shprehur hapur kundër koalicionit LDK-AAK-Nisma.

Tash, ai pretendon se kjo mund të jetë një nga arsyet që ka penguar zhvillimin e një takimi mes tij dhe Mustafës. “Zotëri Mustafës ia kam bërë me dije agjendën tonë përmes një e-maili, që do të donim ta takonim. Që 10 ditë që kam ardhur, nuk kemi pas takime, edhe pse në këtë periudhë të vitit gjithmonë kemi pas takime të realizuara. Kemi pas traditë të pritjes së degës tonë nga kryetari i partisë. Ndoshta nuk e ka pa e-mailin, ka agjendën e vet edhe ai. Unë do të shfrytëzoj edhe kontakte tjera për t’i treguar gatishmërinë për një takim me të”, ka thënë Bajgoraliu, gjatë një interviste që i ka dhënë gazetës, para pak ditësh.

Që Isa Mustafa di të jetë refuzues në momente të caktuara, kanë vlerësuar edhe analistët politikë. Për analistin Shpend Kursani prishjet personale që mund t’i ketë Mustafa brenda partisë së tij, fundja janë çështje që i takojnë vetëm atij, dhe kjo, sipas tij, nuk definon nivelin e demokracisë që mund të ketë Mustafa, por vetëm bën matjen e nivelit të forcave brenda LDK-së. /Tribuna

Këshilltari politik i kryeministrit Hashim Thaçi, Ardian Arifaj, ka deklaruar se për shkak të proceseve, Kosovës i duhet një qeveri stabile.

Arifaj ka vlerësuar se shkuarja në zgjedhje të reja do të bënte që Kosova të mos ketë qeveri të re deri në fillim të vitit të ardhshëm.

Në këtë kontekst, Arifaj ka bërë me dije se nëse shkohet në zgjedhje të reja, sipas sondazheve edhe analizave në terren.

PDK do të jetë në gjendje ta formojë e vetme qeverinë e ardhshme.

Ndërkaq duke iu referuar kritikave të partive politike, rreth vendimit të fundit të Qeverisë, Arifaj ja thënë se kjo Qeveri ka mandat të plotë qeverisës. /Epoka e Re

E ardhmja e bllokut opozitar do të varet nga vendimi i Gjykatës Kushtetuese

Nëse verdikti i Kushtetueses konfirmon legjitimitetin e zgjedhjes së kryetarit të Kuvendit, partitë e bllokut opozitar kanë paralajmëruar rinisjen e një raundi të ri takimesh me “Vetëvendosjen” për të bindur që të bëhet pjesë e Qeverisë, shkruan sot Koha Ditore.

Ndërkaq analistët kanë thënë se partnerët e koalicionit duhet të vënë në peshore kërkesat e “Vetëvendosjes” dhe të Listës Serbe dhe të vendosin përfundimisht nëse dëshirojnë të mbeten gjithherë në vullnetin e Listës Serbe, rrjedhimisht Serbisë, apo në kërkesat që ka vënë “Vetëvendosje”.

Zyrtarë të bllokut të përfshirë në negociata me VV-n për krijimin e qeverisë së ardhshme kanë mohuar të ketë një insistim nga lëvizja e Albin Kurtit për ta marrë primatin në dialog me Serbinë.