Këngëtari kosovar, Hekuran Krasniqi ka zbuluar për KultPlus se është në përgatitje të një kënge që i dedikohet një shteti evropian. Mirëpo, detajet se për çfarë projekti bëhet fjalë, sipas tij do të zbulohen kur të vjen momenti

Këngëtari kosovar, Hekuran Krasniqi, që është i njohur për disa nga baladat e suksesshme, sikurse që është i njohur edhe për bashkëpunim me këngëtarë të mirënjohur, së fundmi është duke punuar në një projekt që synon të kapërcejë kufijtë e Kosovës.

Ai për KultPlus ka bërë të ditur se është duke punuar në një këngë që i dedikohet një shteti evropian, por, sipas tij, se për çfarë bëhet fjala mbetet të shihet kur të lansohet kënga.

“Nuk mund të flas më shumë për këtë projekt, të gjitha do të bëhen publike atëherë kur edhe kënga do të lansohet”, ka thënë Krasniqi.

Në anën tjetër, ai ka shpjeguar se skenës kosovare do ti rikthehet nga fundi i tetorit, me një këngë që do të shoqërohet edhe me videoklip, por, sipas tij, nuk përjashtohet as albumi.

Arsyeja se pse ka zgjedhur vjeshtën për lansimin e këngëve, sipas tij është se në stinën e verës po ka aq shumë këngë, sa vështirë të absorbohen të gjitha. Edhe pse, ai ka treguar se edhe në këtë stinë ai ka qenë aktiv në koncerte dhe organizime të ndryshme që përcjellin stinën e verës në Kosovë. Në anën tjetër, nga studio e tij pritet së shpejti të lansohen edhe disa këngë që janë punuar për këngëtarët e tjerë.

Java e parë e muajit gusht ishte rezervuar pothuajse e tëra për aktivitetet e organizuara nga mërgata. E mërkura, ishte dita ku ishte caktuar për takimet tradicionale të krijuesve nga mërgata dhe diaspora. Të mbledhur në një numër goxha të madh të krijuesve në tempullin e dijes, atë të Bibliotekës Kombëtare të Kosovës “Pjetër Bogdani”, ku paneli përbëhej nga shkrimtarë shqiptarë që veprojnë jashtë.

Librat që janë promovuar në kuadër të “Ditët e Diasporës”, janë : “Forca e fatit dhe dashurisë”; “Andrra e Lumturueme” vepra këto nga autori Ragip Dragusha; “Gjarpërinjtë e Zinj dhe atje…” nga Mustafë Krasniqi; “Iliricum” nga Lidhja e Shkrimtarëve nga Austria “Aleksandër Moisiu” ; “Shqiptaret në Zvicër – 1001 pamje” nga Rexhep Rifati; “Ishulli” nga Frank Tanushi; “Lojë thikash” nga Mustafë Krasniqi …

Zëvendës kryetari i shoqatës së shkrimtarëve nga diaspora, Hazir Mehmeti falënderoi të gjithë pjesëmarrësit dhe uroi që të vazhdojnë me krijimtari edhe në vazhdimësi.

“Ju përshëndes të gjithëve në emër të komisionit. Shpresoj që të kalojmë një ditë të bukur edhe pse e di që kjo kërkon energji dhe lodhje, mirëpo finalizimi është ai që do të na gëzojë në fund”, tha Mehmeti.

Ndërsa përfaqësuesi nga Ministria e Diasporës, Shani Hamitaga kërkoi nga krijuesit e diasporës që të mos e lënë të qetë Ministrinë që ai e përfaqëson, por të kërkojnë vazhdimisht mbështetje financiare dhe morale.

“Përshëndes gjithë të pranishmit, gjithë krijuesit dhe gjithë artistët, ju falënderoj shumë për pjesëmarrjen. Ju krijues të nderuar nga diaspora, që ditët të na sensibilizoni në çdo moment edhe atëherë kur të tjerët heshtën, ju nuk heshtët. Shfrytëzoj nga rasti që të kërkoj nga ju që të mos na lejoni të qetë sepse ne duam që ju të kërkoni nga ne mbështetje, me projektet e juaja, që ne të ju ndihmojmë juve e ju ta ndihmoni letërsinë tonë”, tha në fund Hamitaga.
Kujtojmë që Shoqata e shkrimtarëve nga Diaspora ditën e martë kishte vizituar varrezat e dëshmorëve,bustin e Afrim Zhitisë, kullën e heroit Zahir Pajaziti për të vazhduar më tej me leximin e poezive të ndryshme të krijuara nga vetë ata./KultPlus.com

Seminari Ndërkombëtar për Gjuhën, Letërsinë dhe Kulturën Shqiptare këtë vit shënon edicionin e tridhjetë e tretë. Sesioni do t’i zhvilloj punimet nga 18 deri më 30 gusht. Ky Seminar organizohet për studentë e studiues që merren me probleme të gjuhës, të letërsisë e të kulturës shqiptare, po edhe me albanologjinë përgjithësisht.

Drejtori i Seminarit Ndërkombëtar për Gjuhën, Letërsinë dhe Kulturën Shqiptare, Bardh Rugova, për KultPlus tha se sesioni i këtij viti nuk është se ka ndonjë ndryshim në aspektin organizativ, sipas tij, ajo që ndryshon për këtë vit nga vitet e kaluara është aspekti përmbajtjesor.

“Nuk ka dallime të mëdha në aspektin organizativ, ato që dallojnë këtë vit dhe që besoj që do të ndryshojnë edhe viteve të ardhshme janë temat e sesionit si dhe ligjëratat. Në sesionin e letërsisë do ligjërohet me temën “Letërsia shqipe dhe kodet e mëdha”, kurse në sesionin e gjuhës shqipe do të ligjërohet mbi temën “Gjuha shqipe dhe ideologjia”. Këtë vit gjithashtu do të festohet 200 vjetori i Jeronim De Radës me një ligjëratë nga Francesko Altimari, gjuhëtari më i madh arbëresh”, tha Rugova. Sipas tij në këtë sesion, i cili shënon më shumë se tri dekada, tha se më 21 gusht 2014, në kuadër të Seminarit Ndërkombëtar për Gjuhën, do të zhvillohet punëtoria me temën: “Shqiptarët në Komunizëm”, ku do të paraqiten kumtesa të ndryshme mbi jetën e shqiptareve ne periudhën e komunizmit .

Programi bazë i Seminarit të tridhjetë e tre :
1. Kurse intensive të mësimit të shqipes (tri shkallë);
2. Ligjërata të veçanta të gjuhësisë;
3. Ligjërata për letërsinë shqiptare;
4. Referime shkencore;
5. Ligjërata të përgjithshme;
6. Tryezë e rrumbullakët;
7. Program kulturor plotësues për t’i njohur seminaristët me bukuritë natyrore, me veprimtaritë kulturore e të mira të tjera në qendra të Kosovës
Gjithashtu do të ketë sesion shkencor, më 29 dhe 30 gusht, mbi temat: Gjuha shqipe dhe ideologjia; Letërsia shqipe dhe kodet e mëdha
Seminari Ndërkombëtar për Gjuhën, Letërsinë dhe Kulturën Shqiptare është themeluar në vitin 1974 në Fakultetit të Filologjisë (atëherë Fakulteti Filozofik) të Universitetit të Prishtinës. Seminari ka zhvilluar gjithsej tridhjetë e dy sesione. Në vitin 1991 është ndërprerë veprimtaria e tij nga organet e dhunshme serbe. Në vitet 1995 e 1996 sesionet e këtij Seminari u mbajtën në Tiranë në bashkëpunim me Institutin e Gjuhësisë e të Letërsisë të Akademisë së Shkencave të Shqipërisë. Nga viti 2000 Seminari zhvillohet sërish në Prishtinë. Sesionet 19 dhe 20 (2000-2001) janë organizuar në bashkëpunim me Institutin e Gjuhësisë dhe të Letërsisë të Akademisë së Shkencave të Shqipërisë./KultPlus.com